1. Aha do akibatna molo sai naeng unjago sasahalak sian donganna na asing?

GODANG do halak di portibi on sai naeng ibana unjago idaon. Misalna molo parbisnis ibana, dibahen do segala cara asa unang berhasil sainganna. Molo atlet ibana, berupaya do ibana mambahen celaka alona asa ibana na monang di parlumbaan i. Molo akka parsikkola, mancontek do asa boi dapotna nilai na denggan jala masuk tu universitas na jago. Molo hita halak Kristen pasti dang songon i, ala taboto do “parniulaon ni daging” do i. (Gal. 5:19-21) Alai olo do ra dang tasadari adong do keinginan di hita sai naeng bersaing. Jadi porlu do sai tapareso diritta ala boi do i mambahen huria dang marsada.

2. Aha do na lao tabahas di artikel on?

² Di artikel on lao tabahas ma dua sifat na mambahen hita sai naeng bersaing dohot dongan na asing. Dung i taparsiajari ma akka contoh naposo ni Debata na disurat di Bibel na so olo bersaing. Alai na parjolo tabahas ma jo songon dia carana mamareso diritta sandiri.

3. Aha do na porlu tasukkun tu diritta sandiri?

³ Porlu do sai torus tapareso diritta. Coba ma tapikkiri akka sukkun-sukkun on, ‘Jotjot do hubandingkon dirikku tu na asing jala marpikkir au do na undenggan sian nasida? Tikki hubahen na dumenggan mangulahon tugashu di huria, holan asa jago do au idaon ni halak? Manang lao  palasson roha ni Jahowa do huulahon i?’ Boasa porlu tapikkiri akka sukkun-sukkun on? Taparrohahon ma aha na didok Bibel.

4. Sesuai tu Galatia 6:3, 4, boasa dang denggan molo tabandingkon diritta tu na asing?

⁴ Bibel mandok dang boi sai tabandingkon diritta tu na asing. (Jaha Galatia 6:3, 4.) Boasa? Alana molo tabandingkon diritta tu na asing jala merasa hita undenggan sian nasida, gabe ginjang ma rohatta. Alai molo merasa hita dang marguna, gabe metmet ma rohatta. Jadi dang marbisuk hita molo songon i cara marpikkirta. (Rom 12:3) Donganta si Katarina, * na tinggal di Junani mandok, “Jotjot do hubandingkon dirikku tu dongan na ubbagak sian au, na ummalo marbarita, jala na godang donganna. Alani i gabe merasa ma au dang marguna.” Ikkon sai taingot do ditarik Jahowa pe hita tu organisasina on, dang alana bagak, alana malo, manang ala terkenal hita. Alai ala holong do rohatta tu Ibana jala olo hita manangihon Anakna i.​—Joh. 6:44; 1 Kor. 1:26-31.

5. Aha do na boi taparsiajari sian donganta si Hary?

⁵ Porlu do muse tapikkiri sukkun-sukkun on, ‘Ditanda halak do au sibahen dame, manang jotjot do au berdebat dohot dongan na asing?’ Taida ma jo pengalaman ni donganta si Hary, na tinggal di Korea Selatan. Hea do ibana manganggap akka donganna sintua gabe sainganna. Didok ibana, “Jotjot do hukritik akka donganta i, jala maol do au sepakat dohot nasida.” Aha do akibatna? Didok si Hary, “Ala songon i sikaphu, gabe dang marsada be huria.” Alai adong ma dongan ni si Hary na mangurupi ibana asa muba. Ujungna muba ma si Hary jala nga lam denggan be saonari sifatna. Molo tapareso diritta jala taida sai naeng bersaing hita dohot dongan na asing, ikkon hatop do tapauba i.

6. Sesuai tu Galatia 5:26, akka sifat aha do na mambahen sasahalak gabe dang olo talu?

⁶ Jaha Galatia 5:26. Akka sifat aha do na mambahen sasahalak dang olo talu? Na parjolo sifat egois. Halak na egois on sombong jala holan mamikkiri dirina sandiri. Na paduahon late ni roha. Molo halak na marlate ni roha, dang holan naeng songon halak na asing, alai naeng mambuat appuna ni halak i. Jadi molo late roha ni sasahalak tu donganna, sabotulna na sogo do rohana tu donganna i. Alani i, ikkon tapasiding do akka sifat na roa on.

7. Dipatudos tu aha do sifat egois dohot late ni roha?

⁷ Sifat egois dohot late ni roha, dipatudos ma i songon hama na manegai suan-suanan. Molo adong sasahalak na manomba Jahowa alai egois ibana jala marlate ni roha, boi do gabe sega hubunganna dohot Jahowa. (Poda 16:18) Ujungna gabe dang disomba ibana be Jahowa, jala parohon na haccit do i tu dirina sandiri dohot tu na asing. Attong boha do carana asa unang sappe adong di hita sifat egois dohot late ni roha?

8. Songon dia do carana pasidikkon sifat egois?

⁸ Boi do tapasiding sifat egois molo taihutton sipasingot ni si Paulus tu halak Pilippi. Didok ibana, “Unang ma sai naeng marbada hamu manang holan mamikkiri diri sandiri. Alai toruk ma rohamuna, jala sangap ma bahen tu na asing.” (Plp. 2:3) Molo taanggap do ussangap dongan na asing, dang olo hita bersaing dohot akka dongan na taanggap malo. Gariada ikkon  las do rohatta ala adong kemampuan ni nasida sisongon i. Apalagi molo dipakke halak i kemampuanna i tu Jahowa. Sebalikna akka dongan na terampil i pe, ikkon diihutton do tong poda ni si Paulus i. Ikkon berupaya do halak i mangida akka na denggan sian dongan na asing. Molo tabahen songon i, gabe marsada jala dame ma huria.

9. Songon dia do asa unang sappe late rohatta tu dongan na asing?

⁹ Boi do tabolokkon late ni roha molo serep rohatta. Artina ikkon taakkui do hahurangatta. Molo serep rohatta, dang pola porlu tabuktihon na ummalo hita sian dongan na asing. Gariada olo do hita marsiajar sian dongan na ummalo i. Misalna molo adong donganta bawa na malo marjamita, tasukkun ma tu ibana songon dia ibana paradehon jamitana i. Molo adong donganta borua na malo mangaloppa, marsiajar ma hita sian ibana asa malo tong hita mangaloppa. Molo akka dongan na poso na maol mangalului dongan, boi do dijalo ibana saran sian na asing na mura mangalului dongan. Molo tabahen songon i, boi ma tabolokkon late ni roha jala gabe tamba ma keterampilatta.

10. Masalah aha do na diadopi si Gidion?

¹⁰ Saonari tabereng ma jo parsoalan ni si Gidion na sian marga Manasse dohot halak Epraim. Hea do diurupi Jahowa si Gidion dohot 300 tentarana monang di parporangan. Alai gabe sogo do roha ni halak Epraim tu si Gidion ala dang ditogihon nasida marporang. Dijuppangi nasida ma si Gidion naeng marbada dohot ibana. Ala holan harga dirina na dipikkiri halak Epraim on, gabe lupa ma nasida tu na lebih penting. Dang diingot nasida be molo na diulahon si Gidion i lao pasangappon goar ni Jahowa jala manjaga bangso Israel. (Pangh. 8:1) Sabotulna boi do gabe ginjang roha ni si Gidion ala nungnga monang ibana marporang. Alai dang songon i na dibahen ibana.

11. Aha do na didok si Gidion tu halak Epraim?

 ¹¹ Serep do roha ni si Gidion. Didok ibana ma tu halak Epraim, “Dang sadia na hubahen i martimbakkon na binahenmuna.” Dipaingot ibana ma halak Epraim, nungnga godang pasu-pasu na dijalo halak i sian Jahowa. Hasilna, gabe “dang muruk be nasida”. (Pangh. 8:2, 3) Ala serep roha ni si Gidion, gabe toktong ma marsada akka naposo ni Debata i.

12. Aha do na boi taparsiajari sian halak Epraim dohot sian si Gidion?

¹² Aha do na boi taparsiajari sian i? Sian halak Epraim, marsiajar ma hita unang ma gabe dang tapasangap Jahowa holan alani harga diritta. Jala sian si Gidion, boi do marsiajar akka kepala keluarga dohot akka sintua. Molo adong halak na asing na marsogo ni roha tu hita, berupaya ma hita mangattusi boasa sappe songon i perasaanna. Jala tapuji ma ibana ala nungnga diulahon akka na denggan. Porlu do serep rohatta asa boi taulahon i, khususna molo donganta i memang sala. Alai taingot ma, uppetting do toktong mardame dohot akka dongan, sian mampartahatton harga diritta.

13. Hasusaan aha do na diadopi si Hanna jala songon dia do ibana mangatasi i?

¹³ Saonari, taparrohahon ma contoh ni si Hanna. Menikah do ibana tu si Elkana na sian marga Lepi. Holong hian do roha ni si Elkana tu ibana. Alai adong do sada nai istri ni si Elkana, i ma si Pininna. “Adong do gelleng ni si Pininna, alai dang adong gelleng ni si Hanna”. Umholong do roha ni si Elkana tu si Hanna sian tu si Pininna. Alani i gabe sogo ma roha ni si Pininna. “Sai direhe-rehei si Pininna do si Hanna asa jut rohana”. Aha do akibatna? Gabe marsak ma si Hanna. “Gabe sai tangis ma ibana jala dang olo mangan.” (1 Sam. 1:2, 6, 7) Alai dang adong disurat di Bibel na dibalos si Hanna sude pambahenan ni si Pininna i. Dipaboa ibana do sude perasaanna i tu Jahowa. Jala pos do rohana, urupan ni Jahowa do ibana. Muba do ujungna si Pininna? Dang adong dipaboa taringot i di Bibel. Alai taboto do gabe boi ma muse dame roha ni si Hanna, “jala dang marsak be ibana idaon”.​—1 Sam. 1:10, 18.

14. Aha do na boi taparsiajari sian si Hanna?

¹⁴ Aha do na boi taparsiajari sian contoh ni si Hanna on? Molo adong donganta na sai naeng bersaing dohot hamu, dang pola porlu buktihononmuna na undenggan hamu sian ibana. Unang ma tabalos na jahat tu ibana, alai berupaya ma hita mambahen na denggan. (Rom 12:17-21) Jala molo tung pe ibana dang olo muba alai nga berupaya hita mambahen  na denggan, gabe dame ma rohatta jala marlas ni roha.

15. Aha do persamaan ni si Apollos dohot si Paulus?

¹⁵ Na parpudi, tabahas ma taringot si Apollos dohot Apostel Paulus. Godang do diboto halak i na dua taringot surat na badia. Guru na terkenal jala na malo do halak i. Diurupi nasida do godang halak gabe sisean ni Jesus. Alai dang hea bersaing halak i na dua.

16. Halak na songon dia do si Apollos?

¹⁶ “Tubu di Aleksanderia” do si Apollos, i ma sada kota na terkenal ala jotjot do ro halak tusi naeng marsikkola. “Massai malo do [si Apollos] makkatai jala godang do diboto ibana taringot tu Surat na Badia”. (Ul. 18:24) Tikki di Korint si Apollos, adong do piga-piga dongan na ullomo rohana tu ibana sian tu na asing, termasuk ma tu si Paulus. (1 Kor. 1:12, 13) Alai dang terpengaruh si Apollos tu pandangan ni nasida. Dang lomo rohana gabe tarbagi huria. Alani i ma tikki ditinggalhon si Apollos huria Korint, dijujui si Paulus do ibana asa mulak muse tusi. (1 Kor. 16:12) Dang mungkin dipangido si Paulus songon i, molo adong sifat bersaing di si Apollos. Jadi denggan do dipakke si Apollos kemampuanna i. Dipakke do i lao paboahon barita na uli jala patoguhon akka dongan. Serep do muse roha ni si Apollos. Buktina tikki dipatorang si Priskilla dohot si Akuila tu ibana ‘dalan ni Debata asa lam takkas diattusi ibana’, dang haccit rohana tu nasida.​—Ul. 18:24-28.

17. Aha do na diulahon si Paulus asa toktong marsada huria?

¹⁷ Diboto Apostel Paulus do kelebihan ni si Apollos. Alai dang gabe merasa  tersaingi ibana. Gariada boi do taida sian suratna tu halak Korint, halak na serep roha jala na masuk akkal do si Paulus on. Tikki adong halak Korint na mandok, “Sisean ni si Paulus do au,” dang lomo rohana mambege i. Dipasahat ibana do sude pujian tu Debata Jahowa dohot tu Jesus Kristus.​—1 Kor. 3:3-6.

18. Sesuai tu 1 Korint 4:6, 7, aha do na boi taparsiajari sian si Apollos dohot si Paulus?

¹⁸ Aha do na boi taparsiajari sian si Apollos dohot si Paulus? Nungnga godang ra na taulahon tu Jahowa, jala godang do na taurupi asa boi tardidi. Alai taingot ma, sudena i boi taulahon ala diurupi Jahowa do hita. Sian contoh ni si Apollos dohot si Paulus pe boi do hita marsiajar, molo lam godang tanggung jawabta di huria lam godang ma tong kesempatanta mambahen huria marsada. Pasti mandok mauliate do hita ala sai berupaya do akka sintua dohot parhobas mangurupi hita marsada dohot mardame di huria. Tikki mangalehon poda pe nasida sian Bibel do podana i. Dang berupaya halak i gabe na lebih penting. Alai diurupi halak i do sude na adong di huria asa mangihutton Jesus Kristus.​—Jaha 1 Korint 4:6, 7.

19. Aha do na ikkon taulahon lao manjaga huria toktong marsada? (Ida kotak “ Unang ma Bersaing”.)

¹⁹ Sude hita adong be do kelebihanna, jala pasu-pasu sian Jahowa do i. Jadi tapakke ma i “lao mangurupi na asing”. (1 Ptr. 4:10) Nang pe hita rasa holan saotik do na boi taulahon, alai tindakatta na holan saotik i dipatudos ma i songon akka bonang na gelleng na dipasada lao mambahen baju. Jadi tapakke ma kemampuanta i lao mambahen huria dame jala marsada. Berupaya ma hita mambolokkon keinginan naeng bersaing sian diritta.​—Eps. 4:3.