1. Aha do na pittor diulahon Jahowa dung mardosa si Adam dohot si Hawa? (1 Musa 3:15)

 DUNG mardosa si Adam dohot si Hawa, pittor dipaboa Jahowa ma sada surirang na penting na marisi janji tu pinoppar ni nasida. Disurat do surirang i di 1 Musa 3:15.​—Jaha.

2. Boasa penting surirang na disurat di 1 Musa 3:15?

² On ma surirang na parjolo disurat di Bibel. Penting do taboto surirang on, ala sude isi ni Bibel berkaitan do tu surirang i. Songon jilid ni bukku na pasadahon sude halaman ni bukku, songon i ma surirang na disurat di 1 Musa 3:15. On ma na pasadahon sude isi ni Bibel gabe sada tema, i ma na lao suruon ni Debata do Sipalua lao manghancurhon Sibolis dohot akka pengikutna na jahat. * Sada surirang na luar biasa do on di hita naposo ni Jahowa!

3. Aha do na lao tabahas di artikel on?

³ Di artikel on naeng tabahas ma alus ni sukkun-sukkun na berkaitan tu 1 Musa 3:15. Akka ise do na adong di surirang i? Songon dia do surirang i digenapi? Jala aha do manfaat ni surirang i tu hita?

4. Ise do “ulok” i, jala sian dia do taboto i?

⁴ Di 1 Musa 3:14, 15 dipaboa do taringot sada “ulok”, ‘pinoppar ni ulok’, sada “borua”, dohot ‘pinoppar ni borua i’. Sian hatorangan na adong di Bibel boi do taboto ise nasida. * Saonari taparrohahon ma jo ise ulok i. Dang mungkin ulok na adong di Taman Eden on. Attong ise do i? Dipaboa ma alusna di Pangungkapon 12:9. Disi didok, “ulok na parjolo” i, i ma Sibolis, suru-suruan na mangalo tu Debata Jahowa. Alai ise do akka pinoppar ni ulok i?

5. Akka ise do pinoppar ni ulok i?

⁵ Di Bibel jotjot do dipakke hata pinoppar lao manggombarhon halak na maniru cara marpikkir dohot pangalaho ni na asing. Jadi pinoppar ni ulok i maksudna, akka suru-suruan dohot akka jolma na mangalo tu Jahowa jala na menyerang naposo ni Debata. Contohna, akka suru-suruan na so setia tu Jahowa di jaman ni si Noak dohot akka jolma na jahat na marpangalaho songon Sibolis.​—1 Mus. 6:1, 2; Joh. 8:44; 1 Joh. 5:19; Jud. 6.

6. Boasa boi tadok dang si Hawa “borua” na adong di surirang i?

⁶ Saonari taida ma jo ise do borua i. Dang si Hawa maksud ni on. Boasa? Alana di surirang i dipaboa do molo pinoppar ni borua i lao ‘mangaropukkon’ ulu ni ulok i. Songon naung tabahas Sibolis do ulok na dipaboa di surirang i, i ma suru-suruan na so setia. Jadi dang mungkin adong pinoppar ni si Hawa na boi mangaropukkon Sibolis. Attong taida ma jo hatorangan na asing taringot on. 

7. Sesuai tu Pangungkapon 12:1, 2, 5, dohot 10, ise do borua na dipaboa di 1 Musa 3:15?

 ⁷ Dipaboa do di bukku Pangungkapon ise borua na di 1 Musa 3:15. (Jaha Pangungkapon 12:1, 2, 5, 10.) Disi didok, adong bulan di toru ni patna, jala adong mahkota na sian 12 bintang di atas ni uluna. Ditubuhon borua i ma Harajaon ni Debata. Ala di surgo do Harajaon i, berarti borua i pe di surgo do, dang di tano on. Jadi borua i manggombarhon organisasi ni Jahowa na di surgo, termasuk ma i akka suru-suruan na setia.​—Gal. 4:26.

8. Ise do pinoppar utama ni borua i, jala nandigan do ibana dilantik? (1 Musa 22:15-18)

⁸ Dipaboa do muse di Bibel Jesus do pinoppar utama ni borua i. Sian dia taboto? Akka surirang ni Bibel paboahon molo ibana ro sian pinoppar ni si Abraham. (Jaha 1 Musa 22:15-18.) Jala memang i do na masa. Sian pinoppar ni si Abraham do ro Jesus. (Luk. 3:23, 34) Ala ikkon dihancurhon Jesus do Sibolis, berarti ikkon umbalga do huasona sian jolma. Taingot ma tardidi do Jesus hira-hira marumur 30 taon. Di tikki i, dimiahi tondi parbadia ma Jesus jala dilantik gabe pinoppar utama ni borua i. (Gal. 3:16) Dung i mate ma Jesus jala dipahehe ma ibana tu surgo. Dilehon ma tu ibana “hamuliaon dohot hasangapon”. Dilehon do muse tu ibana “huaso na di banua ginjang dohot na di tano on”. Termasuk ma i huaso lao ‘mangaripasson akka ulaon ni Sibolis’.​—Heb. 2:7; Mat. 28:18; 1 Joh. 3:8.

9-10. (a) Ise dope na gabe pinoppar ni borua i, jala tikki sadihari do nasida dilantik? (b) Aha do na lao tabahas muse? 

⁹ Asing ni Jesus, adong dope na gabe pinoppar ni borua i. Si Paulus mandok, nasida akka halak Kristen na dimiahi tondi parbadia, na ro sian bangso Jahudi dohot sian bangso na asing. Didok ibana, “Molo sisean ni Kristus do hamu, tutu ma hamu pinoppar ni si Abraham na lao manjalo pasu-pasu na dijanjihon i.” (Gal. 3:28, 29) Jadi tikki dimiahi tondi parbadia ni Jahowa sahalak Kristen, dilantik ma ibana gabe pinoppar ni borua i. Saonari nungnga taboto be akka ise do pinoppar ni borua i, i ma Jesus dohot si 144.000 na tarpillit lao mamaretta rap dohot Jesus. (Pgk. 14:1) Berupaya do nasida sude maniru sifat dohot cara marpikkir ni Jahowa.

¹⁰ Dung taboto akka ise na disurat di 1 Musa 3:15, tabahas ma muse songon dia Jahowa menggenapi surirang i. Dung i tabahas ma aha manfaat ni surirang i tu hita.

11. Nandigan do diturbing ulok i “tumit” ni pinoppar ni borua i?

¹¹ Di 1 Musa 3:15 didok do, diturbing ulok i ma “tumit” ni pinoppar ni borua i. Masa ma on tikki dipakke Sibolis halak Jahudi dohot halak Rom mambunu Jesus. (Luk. 23:13, 20-24) Molo lukka tumitta, boi do i malum. Jala biasana holan satokkin do hita dang boi mardalan. Songon i ma tong na masa tu Jesus. Tikki na mate i ibana, dang boi diulahon Jesus manang aha, alai holan satokkin do i.​—Mat. 16:21.

12. Tikki sadihari do ulu ni ulok i diropukkon, jala songon dia do i masa? 

¹² Asa boi saut surirang na di 1 Musa 3:15, ikkon dipahehe do Jesus. Boasa? Alana didok di surirang i, ikkon diropukkon pinoppar ni borua i do ulu ni ulok i.  Songon dia ma i masa? Dung tolu ari Jesus mate, dipahehe do ibana lao mangolu saleleng ni lelengna di surgo. Dung dapot tikki naung ditottuhon Debata, lao dihancurhon Jesus ma Sibolis saleleng ni lelengna. (Heb. 2:14) Dung i, rap ma Jesus dohot si 144.000 i manghancurhon pinoppar ni ulok i, i ma sude musu ni Debata.​—Pgk. 17:14; 20:4, 10. *

13. Manfaat aha do na tadapot ala nungnga digenapi surirang on?

¹³ Pasti mandapot manfaat do sude naposo ni Debata sian penggenapan ni surirang on. Tikki di tano on Jesus, sempurna do ibana maniru akka sifat ni Bapakna Jahowa. (Joh. 14:9) Marhite Jesus, gabe boi ma tatanda jala tahaholongi Debata. Mandapot manfaat do muse hita sian ajaran ni Jesus dohot sian cara ni ibana mangarahon huria Kristen saonari. Diajari Jesus do muse hita songon dia carana mambahen las roha ni Jahowa. Jala na uppetting, mandapot manfaat do hita sian tobusan ni Jesus. Alana tikki dipahehe Jahowa ibana, dijalo Jahowa do pelean ni Jesus na sempurna. On ma na mambahen hita ‘ias sian dosa’.​—1 Joh. 1:7.

14. Boasa tadok dang langsung digenapi Jahowa surirang na di Taman Eden i?

¹⁴ Surirang na dipaboa Jahowa di Taman Eden, dang langsung digenapi tikki i. Alana, porlu do tikki di borua i lao manubuhon pinoppar na dijanjihon i. Porlu do muse tikki di Sibolis papunguhon akka pengikutna, jala asa terjadi permusuhan di antara dua pihak i. Sian surirang on taboto ma muse, pasti sogo do roha ni akka halak na di portibi on tu akka sisomba Jahowa. Alana Sibolis do na mangarajai portibi on. Jala Jesus pe hea do paboahon taringot i tu akka siseanna. (Mrk. 13:13; Joh. 17:14) Nungnga taida masa sebagian surirang on, khususna saleleng 100 taon na parpudi on. Boasa tadok songon i?

15. Boasa lam sogo roha ni akka halak na di portibi on tu hita, alai boasa dang porlu hita mabiar tu Sibolis?

¹⁵ Dung gabe Raja Jesus di Harajaon ni Debata taon 1914, didabuhon ibana ma Sibolis sian surgo. Gabe muruk situtu ma Sibolis, alana diboto ibana otik nai nama tikkina. (Pgk. 12:9, 12) Gabe diserang ibana ma akka naposo ni Debata na di tano on. (Pgk. 12:13, 17) Jadi boi ma taattusi boasa lam sogo roha ni akka halak di portibi on tu hita. Nang pe songon i, dang porlu hita mabiar tu Sibolis dohot tu akka pengikutna. Gariada songon Apostel Paulus pos ma rohatta mandok, “Molo Debata do donganta, ise ma na boi mangalo hita?” (Rom 8:31) Ala nungnga taida hampir digenapi sude surirang na di 1 Musa 3:15, gabe lam porsea ma hita tu Jahowa.

16-18. Manfaat aha do na dihilala si Edward, si Ursula, dohot si Jessica ala mangattusi surirang di 1 Musa 3:15?

¹⁶ Janji ni Jahowa di 1 Musa 3:15, boi mangurupi hita martahan nang pe maol situasitta. Songon i do na dihilala donganta si Edward na melayani sebagai misionaris di Guam. Torus do ibana paimahon saut janji ni Jahowa na mandok lao disalpuhon do sude sitaononta. Didok ibana, “Godang do akka hasusaan na masa di ngolukku. Alai ikkon tetap do au  setia tu Jahowa. Hurimangi ma surirang na disurat 1 Musa 3:15. On mangurupi au toktong setia tu Jahowa jala marpos ni roha tu Ibana.”

¹⁷ Donganta si Ursula na tinggal di Jerman mandok molo surirang di 1 Musa 3:15 paposson rohana, Hata ni Debata do Bibel i. Massai terkesan do ibana mamboto molo sude surirang na adong di Bibel berkaitan tu surirang na adong di ayat i. Didok ibana, “Tikki huparsiajari songon dia Jahowa pittor bertindak lao paluahon jolma, gabe lam holong ma rohakku tu Ibana.”

¹⁸ Donganta si Jessica na sian Mikronesia mandok, “Massai las do rohakku tikki marsiajar Bibel. Gabe huboto ma pasti saut do sude surirang na di 1 Musa 3:15 i. Huboto ma muse sude hasusaan na masa tu hita, dang sian Debata i. Surirang on mambahen pos rohakku molo torus au melayani Jahowa, gabe lam denggan ma ngolukku saonari dohot di ari naeng ro.”

19. Boasa boi pos rohatta na lao saut do bagian na parpudi sian surirang di 1 Musa 3:15?

¹⁹ Songon naung tabahas di artikel on, nga hampir tergenap be sude surirang di 1 Musa 3:15. Nungnga taboto be ise na manggombarhon pinoppar ni borua dohot pinoppar ni ulok i. Saonari nungnga gabe Raja Jesus di surgo. Jala nungnga hampir lengkap be jumlah ni si 144.000 i. Ala nungnga digenapi bagian na parjolo sian surirang di 1 Musa 3:15 i, na lao digenapi do tong bagian na parpudi sian surirang i. Pos ma rohatta pasti diropukkon do ulu ni ulok i. Marlas ni roha ma hita tikki dihancurhon Sibolis saleleng ni lelengna. Jala marhite pinoppar ni borua i, pasu-pasuon ni Jahowa ma “sude bangso di tano on”. Boi do tahaporseai sude na didok Jahowa. Jadi unang ma menyerah hita!​—1 Mus. 22:18.