1-2. Boasa sahalak Kristen dipatudos tu sada bangunan na timbo? (1 Korint 15:58)

 DI TAON 1978, dibangun ma sada gedung 60 tingkat na massai timbo di Tokyo, Jepang. Heran do akka halak boasa boi hot gedung i nang pe jotjot masa gempa bumi di kota i. Boasa boi songon i? Sasittongna nungnga dirancang gedung i boi hot jala boi tong menyesuaihon tu guncangan. Halak Kristen pe, ikkon songon gedung i do. Aha do maksudna?

² Ikkon togu do halak Kristen alai boi tong menyesuaihon diri. Ikkon toktong do hita togu lao mangoloi patik dohot standar ni Jahowa. (Jaha 1 Korint 15:58.) Ikkon rade do hita mangoloi. Alai porlu do hita masuk akkal manang menyesuaihon diri molo porlu. (Jak. 3:17) Molo seimbang hita, dang gabe terlalu kaku hita manang gabe sepele tu patik dohot standar ni Jahowa. Di artikel on, tabahas ma songon dia carana asa toktong togu. Tabahas ma muse lima cara na dipakke Sibolis lao mambahen gale tekadta jala songon dia caratta melawan upayana i.

3. Aha do patik ni Jahowa na disurat di Ulaon ni Apostel 15:28, 29?

³ Jahowa do Silehon Patik, jala takkas do dipaboa Jahowa patikna i asa mura diattusi naposona. (Jes. 33:22) Uppamana di abad na parjolo, dipaboa naposo haposan do tu halak Kristen di tikki i cara asa toktong togu: (1) unang manomba debata na so sittong, alai holan Jahowa ma na disomba,  (2) mangargai hangoluan dohot mudar, jala (3) mangihutton paretta na disurat di Bibel asa unang mangulahon seks na so patut. (Jaha Ulaon ni Apostel 15:28, 29.) Songon dia do halak Kristen saonari boi toktong togu mangulahon na tolu i?

4. Songon dia do hita patuduhon holan Jahowa do na tasomba? (Pangungkapon 4:11)

⁴ Holan Jahowa ma na tasomba, dang akka patung. Diparettahon Jahowa do halak Israel najolo asa holan manomba Ibana. (5 Mus. 5:6-10) Jala tikki digoda Sibolis Jesus, takkas do didok Jesus holan Jahowa do na ikkon tasomba. (Mat. 4:8-10) Alani i, dang olo hita manomba akka patung. Dang olo muse hita manomba jolma songon akka pamimpin agama, parpolitik, atlet, manang artis. Holan Jahowa ma na tasomba ala Ibana do na “manoppa saluhutna”.​—Jaha Pangungkapon 4:11.

5. Boasa ikkon taoloi patik ni Jahowa taringot mangargai hangoluan dohot mudar?

⁵ Taoloi ma patik ni Jahowa taringot mangargai hangoluan dohot mudar. Boasa? Molo di Jahowa, sarupa do mudar i tu hangoluan, jala silehon-lehon ni Jahowa na massai arga do hangoluan di hita. (3 Mus. 17:14) Tikki parjolo sahali diloas Jahowa jolma boi mangallang jagal, diorai Ibana do nasida mangallang mudar ni binatang i. (1 Mus. 9:4) Diulangi Jahowa do muse paretta on di Patik ni si Musa tu halak Israel. (3 Mus. 17:10) Jala di abad na parjolo, diarahon Ibana do punguan na mangaradoti organisasi lao mangalehon petunjuk tu sude halak Kristen asa ‘padaohon diri sian mudar’. (Ul. 15:28, 29) Jadi ikkon togu do hita mangoloi patik on tikki naeng mambahen keputusan taringot perawatan kesehatan. b

6. Aha do na ikkon taulahon lao mangihutton standar moral ni Jahowa na timbo?

⁶ Taihutton ma standar moral ni Jahowa na timbo. (Heb. 13:4) Dilehon si Paulus do nasehat tu hita asa ‘pamatehon’ giot-giot ni dagingta na sala. Lapatanna, ikkon tegas do hita jala berupaya mambolokkon keinginan na sala. Unang ma taida manang taulahon akka na mambahen hita gabe mangulahon seks na so patut. (Kol. 3:5; Job 31:1) Tikki ro godaan lao mamikkirhon manang mangulahon na sala, pittor hatop ma hita bertindak asa unang sega parale-aleotta dohot Debata.

7. Aha do tekadta, jala boasa?

⁷ Lomo do roha ni Jahowa asa ‘taoloi Ibana sian nasa roha’. (Rom 6:17) Sai marlaba do petunjukna i tu hita, jala dang boi lomo-lomotta mamillit patik na dia do lao siihuttonotta. (Jes. 48:17, 18; 1 Kor. 6:9, 10) Berupaya ma hita pasonakkon roha ni Jahowa, jala tatiru ma tekad ni panurat Psalmen na mandok, “Marsitutu do au mangihutton akka aturanmu huihutton do i ganup tikki sahat tu ujungna.” (Ps. 119:112) Alai berupaya do Sibolis lao mambahen gale tekadta i. Songon dia carana?

8. Songon dia do Sibolis mamakke penganiayaan lao mambahen gale haporseaotta?

⁸ Penganiayaan. Dipakke Sibolis do penganiayaan dohot tekanan lao mambahen gale haporseaotta. Tujuanna lao ‘mamboddut’ hita do manang manghancurhon parale-aleotta tu Jahowa. (1 Ptr. 5:8) Di abad na parjolo, diancam do halak Kristen, dipukkuli, bahkan dipamate ala bertekad nasida asa toktong togu. (Ul. 5:27, 28, 40; 7:54-60) Sahat tu saonari pe, sarupa do cara na dipakke Sibolis. Tarida ma i sian marragam cara na dibahen musu lao menganiaya akka donganta di Rusia dohot di negara na asing.

9. Paboa ma sada contoh tekanan halus na dibahen Sibolis.

 ⁹ Tekanan halus. Asing ni penganiayaan, dipakke Sibolis ma muse “jorat” lao menyerang hita. (Eps. 6:11) Taida ma pengalaman ni donganta na margoar si Bob na ikkon operasi besar di rumah sakit. Didok ibana ma tu dokter dang olo ibana manjalo transfusi darah manang songon dia pe situasina. Setuju do akka dokter i jala diargai do keputusanna. Alai di borngin sebelum operasi, ro ma dokter na asing manjuppangi ibana dung mulak keluargana. Didok dokter i ma tu si Bob memang dang na lao ditransfusi ibana, alai tetap do diparade nasida mudar molo porlu annon. Didok roha ni dokter i boi do gabe muba pikkiran ni si Bob molo dang disi be keluargana. Alai bertekad do si Bob asa toktong togu, dang olo ibana transfusi darah manang songon dia pe situasina.

10. Boasa berbahaya cara marpikkir ni portibi on? (1 Korint 3:19, 20)

¹⁰ Cara marpikkir ni portibi on. Molo tatiru cara marpikkir ni halak na di portibi on, boi do gabe taabaihon Jahowa dohot akka standarna. (Jaha 1 Korint 3:19, 20.) ‘Bisuk na sian portibi on’ jotjot do mambahen halak dang mangoloi Debata. Piga-piga halak Kristen na di Pergamos dohot Tiatira dipengaruhi akka halak di kota i na mangulahon seks na so patut jala manomba patung. Dilehon Jesus do sipasingot na tegas tu dua huria i asa unang terpengaruh tu akka halak di sakaliling ni nasida na menganggap dang sala akka ulaon i. (Pgk. 2:14, 20) Saonari pe, ditekan do hita asa manjalo cara marpikkir na sala. Olo do keluarga dohot akka dongan mandok na pakakuhu do hita jala dang pola ikkon taihutton standar ni Jahowa. Uppamana didok nasida, ‘Bahen ma lomo ni roham’ manang ‘Nungnga ketinggalan jaman be Bibel.’

11. Asa boi hita toktong togu, aha do na ikkon tahindari?

¹¹ Sipata boi do ro tu pikkiranta hurang jelas do petunjuk na dilehon Jahowa. Alani i gabe targoda ma hita lao mangulahon “lobi sian na tarsurat” di Bibel. (1 Kor. 4:6) On ma dosa na diulahon pamimpin agama di tikki ni Jesus. Ditamba-tambai nasida do aturan na dibahen nasida, hape dang adong tarsurat i di Patik. Gabe terbebani ma akka halak. (Mat. 23:4) Saonari nungnga dilehon Jahowa petunjuk na jelas marhite Bibel dohot organisasina. Dang adong alasan di hita lao mambahen aturan na baru. (Poda 3:5-7) Jadi unang ma hita mangulahon lobi sian na tarsurat di Bibel manang mambahen aturan tu akka donganta.

12. Songon dia do Sibolis mamakke “akka hata na so marguna”?

¹² Akka hata na mangoto-otoi. Dipakke Sibolis do “akka hata na so marguna” dohot “akka na mangarajai portibi on”, lao mangaliluhon jolma jala mambahen nasida dang marsada. (Kol. 2:8) Di abad na parjolo termasuk ma on ajaran ni jolma, ajaran ni halak Jahudi na so berdasarhon Surat na Badia, dohot ajaran na mandok ikkon diihutton halak Kristen do Patik ni si Musa. Didok do on hata na mangoto-otoi, ala gabe mandao do jolma sian Mual ni bisuk na sittong, i ma Jahowa. Saonari pe dipakke Sibolis do barita dohot media sosial lao paboahon teori konspirasi manang barita na so adong buktina, dohot barita na so sittong na dibahen akka parpolitik. Godang do taida on saleleng masa pandemi COVID-19. c Alai ala ditangihon Saksi Jahowa petunjuk sian organisasi, gabe dang  marsak nasida songon na dihilala akka halak na porsea tu barita i.​—Mat. 24:45.

13. Boasa ikkon toktong hita fokus?

¹³ Akka na mangganggu fokusta. Ikkon torus do hita fokus tu “na urrikkot”. (Plp. 1:9, 10) Molo dang fokus hita, boi do gabe habis tikki dohot gogotta alani ulaon siganup ari songon mangan, minum, rekreasi, dohot karejo. Boi do gabe i na uppetting di ngolutta. (Luk. 21:34, 35) Asing ni i, ganup ari godang do tabege manang tajaha akka barita taringot masalah sosial dohot politik. Molo holan tusi fokusta, boi do gabe marpihak hita tu nasida di bagasan roha dohot pikkiranta. Dipakke Sibolis do sude cara i lao mambahen gale tekadta mangulahon na sittong. Saonari, tabahas ma songon dia hita boi manolak i jala toktong togu.

14. Aha do na boi mangurupi hita asa toktong togu?

¹⁴ Rimangi ma boasa olo hamu mangalehon diri tu Jahowa jala tardidi. Olo pe hamu mambahen keputusan i ala lomo do rohamuna marpihak tu Jahowa. Ingot ma muse aha do na paposson rohamuna molo hamu nungnga mandapot hasittongan. Nungnga dapotmuna be parbinotoan na sittong taringot Jahowa, jala holong do rohamuna tu Ibana. Nungnga lam balga haporseaonmuna jala mangonjar hamu asa bertobat. Gabe tergerak ma hamu maninggalhon akka ulaon na sala jala mangulahon lomo ni roha ni Debata. Las do rohamuna mamboto nungnga disalpuhon Debata hasalaanmuna. (Ps. 32:1, 2) Nungnga ro hamu marpungu jala dipaboa hamu do na denggan na diparsiajari hamu tu na asing. Dung dilehon hamu dirimu tu Jahowa jala tardidi, mardalan ma hamu di dalan hangoluan, jala bertekad do hamu asa toktong mardalan di dalan i.​—Mat. 7:13, 14.

15. Aha do manfaatna molo hita marsiajar jala mangarimangi isi ni Bibel?

¹⁵ Parsiajari jala rimangi ma Hata ni Debata. Songon hau na boi hot jongjong ala bagas marurat tu toru, hita pe boi do toktong togu haporseaotta molo bagas haporseaotta  tu Hata ni Debata. Boi do urat ni hau i lam bagas jala rarat. Suang songon i ma, molo taparsiajari jala tarimangi Hata ni Debata boi do lam togu haporseaotta jala lam pos rohatta undenggan do dalan ni Jahowa. (Kol. 2:6, 7) Rimangi ma muse songon dia petunjuk, panogu-noguon, dohot perlindungan sian Jahowa boi mangurupi naposona di tikki najolo. Uppamana di sada parnidaan, manat do diparrohahon si Hesekiel tikki adong suru-suruan mangukkur bagas joro. Gabe dipatogu do si Hesekiel alani parnidaan i, jala gabe diurupi do tong hita asa torus mangulahon ibadat na sittong sesuai tu standar ni Jahowa. d (Hes. 40:1-4; 43:10-12) Hita pe boi do mandapot manfaat molo talehon tikki lao marsiajar jala mangarimangi akka na bagas na adong di Bibel.

16. Aha do manfaat na dihilala si Bob ala dipatogu ibana rohana? (Psalmen 112:7)

¹⁶ Patogu ma rohamuna. Didok Raja Daud sai toktong do ibana makkaholongi Jahowa. Didok ibana do di endena, “Pos do rohakku tu Ho ale Debata.” (Ps. 57:7) Hita pe, tapatogu ma rohatta molo botul-botul hita marhaposan tu Jahowa. (Jaha Psalmen 112:7.) Parrohahon ma songon dia on mangurupi si Bob na dipaboa nakkin. Dung didokkon tu si Bob adong do mudar na tersedia molo muba pikkiranna, pittor dialusi si Bob do molo naeng ditransfusi ibana, pittor kaluar do ibana sian rumah sakit i. Didok si Bob ma, “Tegas do au mandokkon i, jala dang khawatir au manang aha pe na masa annon.”

17. Aha do na boi taparsiajari sian pengalaman ni si Bob? (Ida gambar.)

¹⁷ Boi pe toktong togu si Bob ala nungnga dibahen ibana keputusan leleng sebelum masuk rumah sakit. Aha do na mangurupi ibana mambahen keputusan i? Parjolo, bertekad do ibana lao mambahen las roha ni Jahowa. Na paduahon, manat do diparsiajari ibana aha na didok Bibel dohot akka publikasi taringot mangargai hangoluan dohot mudar. Na patoluhon, pos do roha ni si Bob pasti dilehon Jahowa do upa tu ibana molo dioloi ibana patikna. Hita pe boi do songon i togu ni rohatta dang soal tantangan manang aha pe na lao taadopi.

18. Songon dia do teladan ni si Barak mangajari hita asa marhaposan tu Jahowa? (Ida gambar sampul.)

 ¹⁸ Marhaposan ma tu Jahowa. Parrohahon ma songon dia si Barak marhasil ala porsea tu Jahowa. Tikki i dang adong sinjata ni tentara ni Israel lao marporang. Alai disuru Jahowa do si Barak dohot tentarana marporang mangalo si Sisera dohot tentara ni Kanaan na marsinjata lengkap. (Pangh. 5:8) Disuru panurirang borua Debora ma si Barak asa turun lao marporang di inganan na rata mangalo si Sisera dohot 900 kareta porangna. Nang pe diboto si Barak pasti maol do annon ibana mangalo akka tentara na mamakke kareta porang i, alai dioloi ibana do paretta i. Tikki turun akka tentara sian Dolok Tabor, diparo Jahowa ma udan na doras sian langit. Gabe sakkot ma kareta ni Sisera di gambo. Jala dibahen Jahowa do monang si Barak. (Pangh. 4:1-7, 10, 13-16) Songon i ma, molo porsea hita tu Jahowa jala unduk tu petunjukna marhite organisasina, boi do hita marhasil.​—5 Mus. 31:6.

19. Boasa bertekad hamu asa toktong togu?

¹⁹ Saleleng mangolu hita di portibi na dirajai Sibolis on, torus do hita berjuang asa toktong togu. (1 Tim. 6:11, 12; 2 Ptr. 3:17) Anggiat ma dang gabe gale hita alani penganiayaan, tekanan halus, cara marpikkir ni jolma, akka hata na mangoto-otoi, dohot akka na mangganggu fokusta. (Eps. 4:14) Torus ma hita togu, torus ma hita setia tu Jahowa jala mangoloi parettana. Alai porlu do tong hita bersikap masuk akkal. Di artikel na mangihut, tabahas ma songon dia caratta maniru Jahowa dohot Jesus na gabe teladan na sempurna ala bersikap masuk akkal.