1. Akka aha do naung diparsiajari hamu sian Bibel?

 DIINGOT hamu dope tikki baru marsiajar Bibel hamu? Di tikki i, songgot do ra rohamuna mamboto adong do goar ni Debata. Diboto hamu ma muse dang disiksa Debata akka halak di api narokko. Jala pasti las do rohamuna mamboto boi do mulak mangolu halak na mate na dihaholongi hamu, jala boi do hamu rap dohot nasida di Paradeiso di tano on.

2. Asing ni mamparsiajari Bibel, aha dope kemajuan naung dibahen hamu? (Epesus 5:1, 2)

² Lam godang na diparsiajari hamu sian Bibel, gabe lam tamba ma holongmuna tu Jahowa. Holong i ma na menggerakkon hamu mangulahon na diparsiajari hamu. Gabe lam denggan ma keputusan na dibahen hamu ala mangihutton prinsip ni Bibel. Gabe lam denggan ma pangalaho dohot cara marpikkirmuna ala lomo rohamuna pasonakkon Debata. Songon dakdanak na maniru natua-tuana, songon i ma hamu na berupaya maniru Bapakmuna na di surgo i.​—Jaha Epesus 5:1, 2.

3. Sukkun-sukkun aha do na porlu tapikkirhon?

³ Tapikkirhon ma sukkun-sukkun on, ‘Umholong do rohakku tu Jahowa saonari sian tikki baru tardidi au? Hutiru do Jahowa na makkaholongi akka dongan sahaporseaon dukkon tardidi au?’ Molo tasadari dang “songon na parjolo i” be holongta tu Jahowa dohot tu na asing, unang ma gabe kecil hati hita. Masa do tong songon i tu halak Kristen di abad na parjolo. Alai dang ditolak Jesus nasida, jala hita pe pasti dang ditolak ibana. (Pgk. 2:4, 7) Diboto ibana do boi do hita muse patuduhon holong songon tikki parjolo sahali marsiajar hasittongan.

4. Aha do na lao tabahas di artikel on?

 ⁴ Di artikel on lao tabahas ma songon dia carana asa lam tamba holongta tu Jahowa dohot tu na asing. Tabahas ma muse aha do manfaatna molo torus tapatudu holongta tu Jahowa dohot tu na asing.

5-6. (a) Aha do tantangan na diadopi si Paulus saleleng pelayananna? (b) Aha do na mangurupi si Paulus asa toktong melayani Jahowa?

⁵ Las do roha ni Apostel Paulus melayani Jahowa, alai godang do tantangan na diadopi ibana. Jotjot do ibana marbarita tu inganan na dao, jala dang sai mura pardalananna i. Di pardalanan, jotjot do ibana mangadopi bahaya ‘alani sunge manang alani pangarampok’. Hea do muse ibana dipukkuli akka musuna. (2 Kor. 11:23-27) Jala adong do piga-piga dongan sahaporseaon na so mangargai upaya ni si Paulus lao mangurupi nasida.​—2 Kor. 10:10; Plp. 4:15.

⁶ Aha do na mangurupi si Paulus asa toktong melayani Jahowa? Godang do dapotna parsiajaran taringot akka sifat ni Jahowa sian Surat na Badia dohot sian pengalamanna sandiri. Gabe pos ma roha ni si Paulus na dihaholongi Jahowa do ibana. (Rom 8:38, 39; Eps. 2:4, 5) Gabe lam holong ma roha ni si Paulus tu Jahowa. Dipatudu si Paulus do i marhite “mangurupi akka na badia”.​—Heb. 6:10.

7. Songon dia do asa lam tamba holongta tu Jahowa?

⁷ Sada cara asa lam tamba holongta tu Jahowa, i ma ringgas mamparsiajari Bibel. Tikki dijaha hamu Bibel, rimangi ma aha na diajarhon ayat i taringot Jahowa. Sukkun ma dirimuna, ‘Sian na hujaha on, aha do buktina na dihaholongi Jahowa do au? Sifat ni Jahowa na dia ma na huparsiajari sian on, na mambahen au lam makkaholongi Ibana?’

8. Boasa martangiang boi mangurupi hita mambahen lam tamba holongta tu Jahowa?

⁸ Cara na asing asa lam tamba holongta tu Jahowa, i ma martangiang ganup ari paboahon sude perasaanta tu Ibana. (Ps. 25:4, 5) Jala olo do Jahowa mangalusi tangiangta. (1 Joh. 3:21, 22) Sahalak donganta di Asia na margoar si Karin mandok, “Di mulana holong do rohakku tu Jahowa holan alani na huparsiajari taringot Ibana. Alai dung huida songon dia Jahowa mangalusi tangiakku, gabe lam holong ma rohakku tu Ibana. Jala gabe lomo ma rohakku mambahen las rohana.” b

9. Sian dia taboto na berupaya do si Timoteus patuduhon holongna tu akka dongan sahaporseaon?

⁹ Saleleng pardalanan utusan injil ni si Paulus, pajuppang ma ibana dohot sahalak bawa na poso na margoar si Timoteus. Burju do si Timoteus. Holong do rohana tu Jahowa dohot tu akka halak. Didok si Paulus do tu halak Kristen na di Pilippi, “Dang adong na songon [si Timoteus] burjuna, na sian ias ni roha mamparrohahon hamu.” (Plp. 2:20) Dipuji si Paulus pe si Timoteus dang alani bakatna mangorganisasi manang ala malo marjamita. Alai takkas do diida si Paulus na massai holong do roha ni si Timoteus tu akka dongan sahaporseaon. Pasti tarpaima do akka huria tu kunjungan ni si Timoteus.​—1 Kor. 4:17.

10. Songon dia do si Anna dohot suamina patuduhon holong tu dongan sahaporseaon?

¹⁰ Hita pe boi do mangalului cara lao mangurupi akka dongan sahaporseaon. (Heb. 13:16) Parrohahon ma pengalaman ni si Anna na dipaboa di artikel sebelumna. Dung sae badai na gogo di daerahna, lao ma ibana dohot suamina manjuppangi sada keluarga Saksi,  jala dibereng nasida ma nungnga sega be atap ni jabu ni keluarga i alani badai i. Gabe dang adong be baju ni keluarga i na ias. Didok si Anna ma, “Dibuat hami ma baju ni nasida na kotor i, dicucci hami ma, digosok, diloppit, dung i dilehon hami ma muse tu nasida. Sasittongna dang pola maol hami mangulahon i. Alai ala diurupi hami nasida gabe akrab ma hami sahat tu saonari.” Holong ni si Anna dohot suamina tu akka dongan sahaporseaon mambahen nasida tergerak lao mangurupi na asing.​—1 Joh. 3:17, 18.

11. (a) Boha do perasaan ni akka dongan molo tapatudu holong tu nasida? (b) Sesuai tu Poda 19:17, boha do perasaan ni Jahowa molo tapatudu holong tu akka dongan?

¹¹ Tikki tapatudu holong dohot haburjuon tu akka dongan, boi ma diida nasida na berupaya hita maniru Jahowa. Bisa jadi dang tasadari na massai diargai nasida do haburjuonta i. Si Karin na dipaboa sebelumna takkas do mangingot haburjuon na dipatudu tu ibana tikki poso. Didok ibana, “Najolo godang do akka donganta borua na jotjot mangajak au mardinas. Dijemput nasida do au, diajak nasida do au rap mangan siang, jala ditaruhon nasida muse au mulak tu jabu. Pasti godang do upaya na dibahen nasida mangulahon i sude. Alai alani holong do umbahen na dibahen nasida songon i. Sahat tu saonari dang boi hulupahon sude na dibahen nasida i.” Memang dang sude halak mandapot kesempatan lao mambalos haburjuonta tu nasida. Didok si Karin do muse, “Lomo do nian rohakku mambalos sude haburjuon ni nasida, alai dang huboto didia nasida sude tinggal saonari. Nang pe songon i diboto Jahowa do i, jala martangiang do au asa dibalos Jahowa sude haburjuon ni nasida.” Toho do na nidok ni si Karin i. Diida Jahowa do sude haburjuon na tapatudu tu akka dongan, nang pe tahilala dang sadia i. Dianggap Jahowa do i  songon pelean na massai arga tu Ibana manang songon pinjaman na ikkon gararonna.​—Jaha Poda 19:17.

12. Songon dia do akka donganta bawa patuduhon holong ni nasida di huria? (Ida gambar.)

¹² Molo hamu sahalak bawa, songon dia do carana patuduhon holong tu dongan sahaporseaon jala mangurupi nasida? Sahalak donganta bawa na poso margoar si Jordan manukkun sahalak sintua songon dia do carana mangurupi di huria. Dipuji sintua i do ibana alani akka na denggan naung dicapai ibana jala dilehon ma piga-piga saran cara mangurupi di huria. Misalna, dipaboa ma tu si Jordan asa tibu ro tu Bale Harajaon jala menyapa akka dongan, mangalehon komentar di parpunguan, taratur marbarita na uli rap dohot kelompok dinas, jala porlu do muse mamikkirhon akka cara na asing lao mangurupi akka dongan. Dung diterappon si Jordan akka saran i, gabe diboto ibana ma dang holan mamparsiajari keterampilan na baru ibana, alai on boi mambahen gabe lam tamba do holongna tu dongan sahaporseaon. Diboto si Jordan ma tikki dilantik sahalak bawa gabe parhobas, dang na gabe di tikki i ibana mulai mangurupi na asing. Alai sebalikna torus do ibana mangurupi na asing.​—1 Tim. 3:8-10, 13.

13. Songon dia do holong manggerakkon si Christian asa boi ibana gabe sintua muse?

¹³ Boha do molo dang parhobas manang dang sintua be hamu saonari? Diingot Jahowa do sude na dibahen hamu najolo dohot holong na dipatudu hamu tu Ibana. (1 Kor. 15:58) Jala diparrohahon Jahowa do holong na dipatudu hamu sahat tu saonari. Sahalak donganta bawa na margoar si Christian hea do merasa kecewa ala dicabut sian sintua. Alai didok ibana, “Dang soal au sintua manang na daong, huputusson ma mangalehon na terbaik tu Jahowa.” Ujungna dilantik ma muse si Christian gabe sintua. Didok ibana,  “Mulana ragu do au, boi do au mandalatton tanggung jawab on manang na daong. Alai huingot ma ala asi do roha ni Jahowa tu au, diloas Ibana do au muse asa torus gabe sintua. Jadi huputusson ma lao manjalo tanggung jawab on ala holong rohakku tu Ibana dohot tu akka dongan.”

14. Aha do na boi taparsiajari sian na dipaboa ni sahalak donganta borua di Georgia?

¹⁴ Dipatudu naposo ni Jahowa do muse holong ni nasida tu na asing. (Mat. 22:37-39) Misalna si Elena sahalak donganta borua na tinggal di Georgia mandok, “Di mulana, holan ala holong tu Jahowa do umbahen na marbarita na uli au. Alai lam balga holongku tu Debata, lam balga ma muse holongku tu akka halak. Hucoba do mambayakkon aha masalah na diadopi nasida jala topik aha do na boi hona tu roha ni nasida. Lam hurimangi taringot on gabe lam lomo ma rohakku lao mangurupi nasida.”​—Rom 10:13-15.

15-16. Songon na dipatudu di gambar, aha do manfaatna molo tapatudu holong tu na asing?

¹⁵ Tikki tapatudu holong tu akka dongan, dang holan nasida na mandapot manfaat. Parrohahon ma sada pengalaman. Dung masa pandemi COVID-19, sahalak donganta bawa na margoar si Paolo dohot istrina mangurupi godang akka donganta borua na matua mamakke perangkat elektronik ni nasida lao marbarita. Adong ma sahalak donganta borua na mulana maol mamakke perangkat elektronik, alai ujungna marhasil do ibana. Dipakke ibana ma perangkatna i lao mangundang akka  tondongna ro tu Borngin Parningotan. Adong ma 60 sian tondongna i na ro marhite video-conference. Alani upaya ni si Paolo dohot istrina, gabe boi ma donganta borua na matua i dohot tondongna mandapot manfaat. Dung i dibahen donganta borua i ma surat tu si Paolo. Didok ibana, “Mauliate da nungnga diajari ho hami akka na matua on. Dang boi hulupahon na massai parduli do Jahowa tu hami dohot kerja kerasmuna mangurupi hami.”

¹⁶ Parsiajaran na penting do on tu si Paolo. Gabe dipaingot ma ibana, uppetting do holong sian parbinotoan dohot bakat. Didok ibana, “Hea do au gabe pengawas wilayah. Alai saonari gabe sadar do au, olo do dang diingot akka dongan be jamita na hea hupasahat. Alai pasti diingot nasida do akka bantuan na hubahen tu nasida.”

17. Ise do muse na mandapot manfaat molo tapatudu holong?

¹⁷ Hita sandiri pe mandapot manfaat do molo tapatudu holong tu na asing. On ma na dihilala si Jonathan, na tinggal di Selandia Baru. Hea ma di ari Sabtu arian na mohop, diida ibana ma sahalak donganta bawa perintis marbarita sahalakna. Alani i, diputusson si Jonathan ma asa rap marbarita dohot donganta i setiap ari Sabtu arian. Dang disadari ibana na massai godang do dapotna manfaat ala dipatudu ibana haburjuon tu donganta perintis i. Didok si Jonathan, “Sasittongna dang pola lomo rohakku marbarita na uli. Alai dung hutangihon cara ni perintis i mangajari jala huida semangatna tikki marbarita, gabe lomo ma rohakku marbarita. Gabe ale-alekku ma donganta i jala diurupi ibana do au asa lomo rohakku marbarita jala lam jonok tu Jahowa.”

18. Aha do na dipangido Jahowa sian hita?

¹⁸ Lomo do roha ni Jahowa asa lam balga holongta tu Ibana dohot tu na asing. Songon naung taparsiajari, boi do tapatogu holongta tu Jahowa marhite manjaha Bibel dohot mangarimangi i jala taratur martangiang tu Ibana. Boi do muse lam balga holongta tu dongan sahaporseaon molo talului cara lao mangurupi nasida. Lam balga holongta, lam jonok ma hita tu Jahowa dohot tu akka dongan sahaporseaon. Jala boi ma hita marale-ale dohot nasida saleleng ni lelengna!