1. Boasa dipatudos Sibolis songon parburu?

TUJUAN ni parburu, i ma manakkup jala pamatehon buruanna. Marmacam-macam do jorat na dipakke ibana songon na didok di Bibel. (Job 18:8-10) Songon dia do dibahen parburu asa masuk binatang buruanna i tu jorat i? Diparsiajari ibana do kebiasaan ni binatang i, tudia binatang i jotjot lao, jala aha siallangonna. Dung diboto ibana i, dipakke ma jorat na cocok lao manakkup binatang i. Dos do songon parburu Sibolis. Diamati ibana do kebiasaanta, diparrohahon ibana do tudia biasana hita lao, jala aha lomo ni rohatta. Dung i ditottuhon ibana ma jorat na cocok lao manjorat hita. Songon dia do molo tarjorat hita? Bibel mandok, boi do hita malua sian jorat i. Alai saonari tabahas ma songon dia carana unang sappe tarjorat hita.

2. Aha do dua jorat na jotjot dipakke Sibolis?

² Dua jorat na sering dipakke Sibolis, i ma sifat sombong dohot tamak. * Saleleng marribu taon, marhasil do Sibolis mamakke jorat on. Dos songon panakkup pidong do Sibolis. Dibahen ibana ma cara asa masuk hita tu joratna i. (Ps. 91:3) Alai boi do hita dang tarjorat. Alana nungnga dipaboa Jahowa akka taktik na dipakke Sibolis manjorat hita.​—2 Kor. 2:11.

3. Boasa disurat akka pengalaman ni naposo ni Jahowa di Bibel?

³ Berbahaya do sifat sombong dohot tamak on. Godang do naposo ni Jahowa na gabe masuk tu jorat ni Sibolis on. Alani  i ma dipaboa Jahowa tu hita akibat ni sifat sombong dohot tamak asa unang dohot hita tarjorat. Taida ma songon dia Sibolis marhasil manjorat akka naposo ni Jahowa naung leleng manomba Ibana. Alai nang pe adong naposo ni Jahowa na tarjorat, boi do hita dang tarjorat. Alana disurat do akka contoh i di Bibel “gabe sipasingot” tu hita. (1 Kor. 10:11) Marsiajar ma hita sian nasida, asa unang tarjorat hita jala asa boi malua sian jorat ni Sibolis.

4. Aha do akibatna molo sombong hita?

⁴ Lomo do roha ni Sibolis asa sombong hita. Alana molo sombong hita songon ibana, dang dapotta be hangoluan na saleleng ni lelengna. (Poda 16:18) Alani i do dipaingot si Paulus “asa unang ginjang [rohatta] jala gabe diuhumi songon Sibolis”. (1 Tim. 3:6, 7) Alana ise pe hita, na baru manang naung leleng di hasittongan, boi do hita masuk tu jorat ni Sibolis on.

5. Songon na didok di Parjamita 7:16, 20, songon dia do halak na sombong i?

⁵ Egois do halak na sombong. Lomo do roha ni Sibolis asa holan diritta sandiri na tapikkiri jala dang fokus manomba Jahowa, khususna tikki adong masalah. Misalna, tikki adong halak na mandok na so tutu taringot tu hita manang mambahen na so adil tu hita. Tikki masa sisongon i, lomo do roha ni Sibolis asa muruk hita tu Jahowa dohot tu akka dongan. Ujungna dang poda ni Jahowa be na tapakke pasaehon masalah i, alai gabe tapakke ma caratta sandiri.​—Jaha Parjamita 7:16, 20.

6. Aha do na boi taparsiajari sian pengalaman ni donganta na di Belanda?

⁶ Taparrohahon ma pengalaman ni donganta borua na tinggal di Belanda. Jut do rohana alani pambahenan ni dongan na asing di huria. Alani jut ni rohana, dang olo be ibana makkatai tu nasida. Didok ibana, “Ala maol hian husalpuhon hasalaan ni nasida, gabe merasa kesepian ma au. Jadi hupaboa ma i tu suamikku jala hupangido ma asa pinda hami  tu huria na asing.” Dung i, ditotton ibana ma acara JW Broadcasting^® bulan Maret 2016. Di acara i, dipaboa do aha na porlu taulahon molo adong dongan na mambahen haccit rohatta. Didok donganta i ma muse, “Nga huboto be, porlu do serep rohakku lao mangakkui hasalaakku. Porlu do muse huubah cara pandangku tu akka dongan di huria. Acara on mangurupi au fokus tu Jahowa dohot tu hak ni Jahowa manottuhon cara na undenggan pasaehon masalah on.” Aha do parsiajaranna tu hita? Tikki adong masalah, toktong ma hita fokus tu Jahowa. Martangiang ma hita asa boi maniru cara ni Jahowa mangida akka donganta. Dibereng Jahowa do sude hasalaan ni nasida i, alai rade do Ibana manalpuhon i. Jala lomo do roha ni Jahowa asa tatiru Ibana.​—1 Joh. 4:20.

7. Aha do na masa tu Raja Usia?

⁷ Ala adong sifat sombong di Raja Usia na sian Juda, gabe lomo-lomona do dibahen ibana, jala dang olo be ibana dipasingot. Sasittongna bawa na malo do si Usia on. Jotjot do ibana monang tikki marporang, godang do kota na dibangun ibana, jala marhasil do ibana martani. “Sai dipasu-pasu Debata na sittong do ibana.” (2 Kron. 26:3-7, 10) Alai “dung lam marhuaso ibana, gabe ginjang ma rohana”. Jala parohon “jea ma on tu ibana”. Lao do ibana tu bagas joro, ditutung ibana do dupa disi, hape nungnga ditottuhon Jahowa hian holan akka malim do na boi manutung dupa. Gabe sogo ma roha ni Jahowa alani i. Hona kusta ma ibana sahat tu na mate.​—2 Kron. 26:16-21.

8. Sesuai tu 1 Korint 4:6, 7, songon dia do asa unang sappe sombong hita?

⁸ Boi do hita tarjorat songon si Usia. Saonari tabereng ma jo pengalaman ni si José. Sukses do ibana marbisnis jala sahalak sintua na direspek do ibana. Jotjot do ibana marjamita di kebaktian, jala sering do pengawas wilayah manjalo saran sian ibana. Didok ibana ma, “Dang Jahowa be na huandalhon, alai kemampuan dohot pengalamanku nama. Merasa do au nga togu haporseaokku, jadi dang olo be au manangihon poda dohot sipasingot sian Jahowa.” Ujungna mangulahon dosa serius ma si José jala dipecat ma ibana. Piga-piga taon dukkon i kembali ma ibana muse tu organisasi. Didok ibana ma, “Sian sude na masa on, nga huboto be dang jabatan manang  wewenangta na uppenting, alai mangulahon lomo ni roha ni Jahowa do.” Taingot ma, sude kemampuanta manang tugas istimewa na tajalo, sian Jahowa do i. (Jaha 1 Korint 4:6, 7.) Jadi molo gabe sombong do hita alani i, dang pakkeon ni Jahowa be hita.

9. Ala tamak Sibolis dohot si Hawa, aha do na diulahon nasida?

⁹ Tikki tabege hata tamak, pittor Sibolis do ra na taingot ate. Sabotulna suru-suran hian do Sibolis on, jala godang do tugasna na istimewa. Alai dang cukkup dope i di ibana. Naeng do ibana disomba songon Jahowa. Lomo do roha ni Sibolis asa songon ibana hita. Dibahen ibana ma hita dang marna puas tu akka na adong di hita. Tarida do i tikki digoda ibana si Hawa. Godang hian do siallangon naung diparade Jahowa tu si Hawa dohot tu suamina. Boi do diallang halak i “akka parbue ni hau” na di taman i. (1 Mus. 2:16) Alai digoda Sibolis ma si Hawa. Dibahen ma ibana merasa porlu do tong allangonna parbue ni hau na dilarang Jahowa. Dang puas be si Hawa tu akka na adong di ibana, dang cukkup be i dihilala ibana. Ala targoda si Hawa mangallang parbue ni hau i, gabe mardosa ma ibana jala mate.​—1 Mus. 3:6, 19.

10. Ala gabe tamak si Daud, aha do na diulahon ibana?

¹⁰ Godang do pasu-pasu na dijalo si Daud sian Jahowa. Dibahen Jahowa do ibana mamora, sangap, jala jotjot do ibana monang mangalo akka musuna. Las do roha ni si Daud manjalo pasu-pasu i. Didok ibana do “tung so habilangan” i sude. (Ps. 40:5) Alai lam leleng, gabe tamak ma ibana. Dang puas be ibana tu akka naung dilean Jahowa i. Nungnga godang istrina, naeng dope dibuat ibana istri ni halak, hape sala do i. Si Bat-seba do goar ni borua i, istri ni si Uria halak Het. Mangulahon seks ma si Daud dohot si Bat-seba. Gabe hamil ma borua i. Massai jahat do na diulahon si Daud i. Alai dang holan i, diatur ibana dope rencana lao pamatehon si Uria, suami ni si Bat-seba. (2 Sam. 11:2-15) Boasa sappe diulahon si Daud i? Na dirippu ibana do dang diida Jahowa na diulahonna i? Nang pe naung leleng si Daud manomba Jahowa, alai boi do ibana gabe tamak jala susa do ibana alani i. Ujungna muba do si Daud jala disesa Jahowa do dosana i. Pasti mandok mauliate do si Daud tu Jahowa!​—2 Sam. 12:7-13.

11. Sesuai tu Epesus 5:3, 4, boasa ikkon puas hita tu na adong di hita?

 ¹¹ Aha do na taparsiajari sian si Daud? Molo puas hita tu akka na dilean Jahowa, dang tarjorat be hita alani sifat tamak. Alai gabe mandok mauliate ma hita alani sude naung tajalo i. (Jaha Epesus 5:3, 4.) Hea do ra tadok tu studitta asa dipikkirhon ibana sada pasu-pasu na dapotna tiap ari. Dung i tajujui do ibana mandok mauliate tu Jahowa. Jadi molo adong sada pasu-pasu na diingot ibana ganup ari, berarti saleleng saminggu nga adong be pitu hali ibana mandok mauliate tu Jahowa alani pasu-pasu na dijalona i. (1 Tes. 5:18) Songon i do tong na taulahon? Molo sai tarimangi sude pasu-pasu naung tajalo sian Jahowa, pasti mandok mauliate do hita, jala boi ma hita merasa puas. Molo nga puas hita, dang gabe tamak be hita.

12. Aha do na diulahon si Judas ala tamak ibana?

¹² Mulana dang halak na jahat si Judas Iskariot. Alai ala adong sifat tamak di ibana, gabe penghianat ma ibana. (Luk. 6:13, 16) Dipillit Jesus do si Judas gabe apostelna. Halak na malo do si Judas on. Ibana do sitiop kotak inganan ni hepeng. Dipakke Jesus dohot akka apostelna do hepeng i tu kebutuhan ni nasida saleleng marbarita na uli. Sarupa do ra hepeng i tu sumbangan pekerjaan seluas dunia saonari. Lam leleng, mulai ma manakko hepeng si Judas sian kotak i, hape nga jotjot dipasingot Jesus nasida asa unang tamak. (Mrk. 7:22, 23; Luk. 11:39; 12:15) Alai dang ditangihon si Judas akka sipasingot i.

13. Tikki sadihari do tarida nungnga lam tamak si Judas?

¹³ Piga-piga ari sebelum mate Jesus, lam takkas ma dipatudu si Judas sifat tamakna i. Tikki i diundang si Simon na hea marsahit kusta do Jesus, akka siseanna, si Marta, dohot si Maria asa mangan di jabuna. Disi, diusehon si Maria ma miak tu ulu ni Jesus. Gabe muruk ma si Judas dohot sisean na asing. Didok akka sisean i, tumagon do dijual miak i asa boi dipakke hepengna paradehon kebutuhan ni nasida. Alai asing do molo si Judas, didok pe songon i asa boi do takkoonna hepeng sian kotak i. Ai “panakko do ibana”. Ala gabe tamak si Judas, di pudian ni ari dihianati ibana ma Jesus asa boi dapotna hepeng.​—Joh. 12:2-6; Mat. 26:6-16; Luk. 22:3-6.

14. Songon dia do sapasang suami istri mangulahon poda na disurat di Lukas 16:13?

¹⁴ Hea do didok Jesus tu akka siseanna, “Dang boi hamu gabe hatoban ni Debata jala di tikki na sarupa gabe hatoban ni Hamoraon.” (Jaha Lukas 16:13.) Sipasingot on ma na diulahon sapasang suami istri di Rumania. Hea do ditawarhon tu halak i parkarejoan di negara maju. Didok nasida ma, “Adong do utangnami tu bank. Jadi mulana dipikkir hami do pasu-pasu sian Jahowa karejo on.” Alai jorat ni Sibolis do i. Molo dijalo nasida karejo i, gabe dang adong be tikki ni nasida manomba Jahowa. Jadi sebelum mambahen keputusan, dijaha nasida ma artikel “Pertahankan Loyalitas dengan Kebulatan Hati” na adong di Menara Pengawal 15 Agustus 2008. Didok nasida ma, “Molo alani hepeng do pinda hami tu luar negeri, berarti dang hubungannami tu Jahowa be na uppenting di hami. Boi do gabe dang marale-ale be hami tu Jahowa alani i.” Jadi ditolak nasida ma karejo i. Hape ternyata dapot ni suamina ma karejo di negarana na boi manutupi kebutuhan ni nasida. Didok istrina ma, “Dang pendek tangan ni Jahowa.” Las do roha ni halak i ala Jahowa do na diutamahon nasida, dang hepeng.

15. Boi do hita malua sian jorat ni Sibolis?

¹⁵ Molo tasadari adong di hita sifat sombong manang tamak, boi dope tabolokkon i.  Songon na didok si Paulus, akka halak na “ditakkup jorat ni Sibolis” boi dope “kaluar nasida sian jorat i”. (2 Tim. 2:26) Contohna dung dipasingot si Natan si Daud, muba do ibana. Dang tamak be ibana. Hasilna gabe boi ma muse ibana marale-ale tu Jahowa. Taingot ma, unggogo do Jahowa sian Sibolis. Molo olo hita diurupi Jahowa, boi do hita malua sian jorat ni Sibolis.

16. Aha do na porlu taulahon asa unang sappe masuk hita tu jorat ni Sibolis?

¹⁶ Nang pe boi hita malua sian jorat ni Sibolis, alai undenggan do unang sappe tarjorat. Boi do i taulahon molo diurupi Jahowa hita. Jadi unang ma ro tu pikkiranta na so mungkin hita tarjorat alani sifat sombong dohot tamak. Taingot ma, akka naposo ni Jahowa naung leleng manomba Ibana pe, boi do gabe sombong manang tamak. Jadi tapangido ma tu Jahowa tiap ari asa diurupi hita mamareso diritta, atik naung adong akka sifat na roa on di rohatta. (Ps. 139:23, 24) Sai taupayahon ma asa unang adong sifat sombong manang tamak di hita!

17. Aha do na lao masa tu Sibolis?

¹⁷ Dos songon parburu do Sibolis i. Marhasil do ibana manjorat akka halak saleleng marribu taon. Alai satokkin nai, diratte nama ibana jala dipamate saleleng ni lelengna. (Pgk. 20:1-3, 10) Sai tapaima do masa i. Alai sebelum i, tetap ma hita jaga asa unang sappe tarjorat. Berupaya ma hita asa unang adong sifat sombong manang tamak di hita. Bertekad ma hita ‘mangalo Sibolis, asa lari ibana sian hita’.​—Jak. 4:7.