Tanggal 19 Mei 1940 do au tubu di kota Amioûn, Lebanon. Piga-piga taon dukkon i pinda ma keluarganami tu kota Tripoli. Bahagia do keluarganami. Parholong do bapa dohot omak jala huhaholongi hami do Debata Jahowa. Adong do lima hami anak ni bapa dohot omak, tolu boru dua bawa jala au ma siappudan. Sederhana do ngolunami. Alana na uppenting di keluarganami, i ma marsiajar Bibel, marpungu, dohot marbarita na uli.

Adong do piga-piga donganta di hurianami na harapanna mangolu tu surgo. Misalna, donganta si Michel Aboud. Ibana do na jotjot mamandu Pelajaran Buku Sidang manang PBS. Ibana marsiajar Bibel di New York jala ibana do na parjolo sahali marbarita na uli di Lebanon di taon 1921. Huingot dope songon dia donganta si Michel mangurupi dua donganta borua na baru lulus sian Sikkola Gilead, i ma si Anne dohot si Gwen Beavor. Akrab do pardonganonnami tikki i. Piga-piga taon dukkon i, las hian do rohakku ala boi juppang muse dohot donganta si Anne di Amerika Serikat. Jala dang leleng dukkon i juppang muse dohot si Gwen naung menikah dohot si Wilfred Gooch. Melayani di Betel Inggris do nasida.

Holan saotik dope Saksi Jahowa di Lebanon tikki gelleng au. Alai semangat hian do hami marbarita na uli nang pe ditentang akka pamimpin agama. Adong dope piga-piga kejadian na sai huingot sahat tu saonari.

Sada tikki marbarita na uli ma au dohot kakakku si Sana di sada bangunan apartemen. Ternyata adong ma na manuru sahalak pandita asa ro manjuppangi hami. Jadi kasar ma pandita i makkatai tu kakakku. Dionjarhon ma kakakku si Sana, sappe dabu ma ibana sian tangga jala lukka. Adong ma na manelepon polisi asa ro, ala asi rohana mangida kakakki. Jadi diboan polisi i ma pandita i tu pos polisi. Ternyata adong do sinjata ni pandita i. Jadi gabe disukkun polisi i ma, “Ai aha do on? Pandita do amang manang pareman?”

Hea do muse marbarita na uli hami sahuria tu huta-huta. Disewa hami ma sada bus. Las hian do rohanami marbarita na uli disi. Alai toppu ma ro sahalak pandita dohot rombonganna lao mangusir hami. Kasar ma nasida, dilempari ma hami pakke batu jala sappe lukka do bapakku. Marmudari ma bohi ni bapakki. Jadi masuk ma muse bapa dohot omak tu bus na disewa hami i. Mabiar hian do hami tikki i. Alai huingot dope na didok ni omak sambil paiasson mudar na di bohi ni bapa i. Didok ibana, “Ale Jahowa, sesa ma dosa ni nasida. Ai dang diboto nasida na dibahen ni nasida i.”

Tikki mulak hami tu jabu ni oppung, pajuppang ma hami dohot sahalak uskup na terkenal. Nga diboto ibana naung Saksi Jahowa hami. Tikki i marumur onom taon dope au, jadi naeng dipaila ibana ma au. Disukkun ma tu au, “Boasa dang tardidi dope ho?” Hualusi ma, “Dakdanak dope au. Jadi molo naeng tardidi au ikkon adong do parbinotoakku taringot Bibel jala ikkon togu do haporseaokku.” Ala dang lomo rohana membege alussi, gabe mangalu-alu ma ibana tu oppung. Didok ma dang sopan au mangalusi ibana.

Nang pe adong pengalamannami na songon i, alai jotjotan tabo do marbarita na uli di Lebanon. Alana burju-burju do halak disi jala ramah. Godang do halak na olo manjalo hami tikki marbarita na uli jala godang do na olo studi.

Tikki marsikkola dope au, adong ma ro sahalak donganta bawa tu hutanami, sian Venezuela do ibana. Ro ma ibana marpungu tu hurianami. Dung i marsitandaan ma ibana dohot kakakku si Wafa jala marhallet ma nasida. Menikah ma halak i jala tinggal ma di Venezuela. Jotjot do ibana mangirim surat tu hami. Nungnga masihol hian ibana tu hami, jadi dijujui ibana do hami asa pinda tu Venezuela. Ujungna pinda ma hami tusi.

 Nungnga di Venezuela hami taon 1953, jala tinggal di Caracas do hami jonok tu istana ni presiden. Setiap lewat mobil ni presiden i, lomo hian do rohakku mangida i ala mantap hian huida. Alai agak maol do di halak bapa dohot omak menyesuaihon tu negara na baru, bahasa na baru, budaya na baru, sipanganonna, dohot cuacana. Nang pe songon i, boi do ujungna beradaptasi halak i tinggal dison, ala adong na masa tu keluarganami.

Toppu ma marsahit bapa. Tarsonggot do hami mamboto i. Alana dang hea bapa marsahit. Sehat do bapa saleleng on jala gogo do ibana. Hape didok dokter, marsahit kanker pankreas do bapa. Jadi dioperasi ma ibana, alai saminggu dukkon i mate ma bapa.

Dang tarhatahon songon dia lungun ni rohanami. Sappulu tolu taon dope umurhu tikki i. Dang hurippu hami mate bapa. Hurasa, dang mungkin be boi bahagia keluarganami songon najolo i. Jala omak pe lungun hian do rohana. Maol hian do situasi on di ibana. Alai berupaya do hami asa boi semangat muse. Sai diurupi Jahowa do hami, gabe boi ma hami sabar manaon i. Tikki marumur 16 taon, lulus ma au SMA di Caracas. Lomo do rohakku naeng mambantu keuangan ni keluargakku.

Dung i, menikah ma kakakku si Sana tu si Rubén Araujo. Lulusan Sikkola Gilead do si Rubén, jala melayani di Venezuela do ibana. Alai dung menikah nasida, pinda ma halak i tu New York. Disuru keluargakku ma au kuliah. Jadi pinda ma au tu New York. Tinggal ma au disan rap dohot kakakku dohot laekku. Saleleng rap tinggal au dohot nasida, sai diurupi halak i do au asa lam jonok tu Jahowa. Asing ni i, bergabung do au di huria bahasa Spanyol di Brooklyn, jala godang do disi akka dongan na togu haporseaonna. Misalna, donganta si Milton Henschel dohot si Frederick Franz. Las hian do rohakku mardongan tu halak i na dua. Melayani di Betel Brooklyn do nasida.

Dung naeng sae tahun pertama au kuliah, hupikkiri ma aha do tujuan ni ngolukku. Tikki i, hujaha ma pengalaman ni akka dongan na melayani sepenuh waktu di sada artikel di Menara Pengawal. Las hian do roha ni halak i. Huida do muse akka perintis dohot anggota Betel di huriakku na sai marlas ni roha. Lomo do rohakku asa songon halak i au. Alai dang tardidi dope au tikki i. Gabe husadari ma massai penting do hubahen keputusan mangalean diri tu Jahowa. Alani i, tardidi ma au tanggal 30 Maret 1957.

Dung tardidi au, hubahen ma rencana asa merintis. Alai hurasa maol do annon au mangatur tikkikku antara tugas kuliah dohot merintis. Jadi hubahen ma  keputusan asa so au kuliah. Dung i, hukirim ma surat tu keluargakku di Venezuela. Hudokkon ma tu nasida naeng so au kuliah jala mulak tu Venezuela, asa boi au merintis.

Di bulan Juni 1957, mulak ma au tu Caracas. Huida sederhana hian do ngolu ni keluargakku. Jadi hurasa, porlu do huurupi nasida. Karejo di bank ma au. Alai tong do naeng merintis au. Ai alani i do au mulak. Jadi merintis ma au sambil karejo di bank. Saleleng martaon-taon, i ma na huulahon. Sibuk hian do au, alai las hian do rohakku.

Tamba do muse las ni rohakku dung menikah dohot si Sylvia, sahalak donganta borua na bagak jala massai holong rohana tu Jahowa. Sian Jerman do ibana, alai nungnga pinda ibana dohot natua-tuana tu Venezuela. Dang leleng dung menikah, tubu ma anaknami si Michel (Mike) dohot borunami si Samira. Tamba do muse tanggung jawabhu ala rap dohot hami do omakku tinggal. Jadi, ikkon so do au merintis asa boi huparade kebutuhan ni keluargakku. Alai toktong do semangat au marbarita. Molo libur karejo, merintis ekstra do au dohot si Sylvia.

Pengalamanku na hupaboa di mula ni artikel on, masa tikki sikkola dope akka gellengku. Tikki i, tabo do ngolunami. Akka donganku sakarejo pe burju-burju do. Alai lomo ni rohakku, unang ma sahalak parkarejo ni bank au ditanda halak, parbarita na uli ma nian. Jadi makkatai ma au dohot istrikku. Dihatai hami ma keuangan ni keluarganami. Molo so au annon karejo sian bank, dapottu do pesangon. Jadi molo hubahen hami sederhana ngolunami, cukkup dope tabungannami lao pakkeonnami. Apalagi dang adong utangnami.

Memang dang mura mambahen keputusan i, alai sai didukung istrikku dohot omakku do au. Jadi merintis ma au muse. Las hian ma rohakku! Hape adong ma situasi na so tarduga.

Ternyata didokkon dokter, hamil si Sylvia. Tarsonggot ma hami mambege i! Las hian do nian rohanami, alai gabe hupikkiri ma muse rencanakku naeng merintis i. Tamba nama anaknami sada nai. Alani i, gabe ragu ma au, boi dope nuaeng au merintis?

 Dung diskusi hami, diputusson hami ma asa tetap au merintis. Tubu ma anaknami si Gabriel bulan April 1985. Dung i kaluar ma au sian bank, jala merintis ma au muse bulan Juni 1985. Dukkon i, dilantik ma au gabe anggota panitia cabang. Alai dang di Caracas kantor cabang. Alani i, ikkon lao do au tusi dua ari manang tolu ari di bagasan saminggu, daona hira-hira 80 km.

Di kota La Victoria do kantor cabang. Jadi, pinda ma hami tusi asa unjonok tu Betel. Perubahan na balga do on di hami. Alai las do rohakku ala didukung keluargakku do keputusan on. Olo do kakakku si Baha mangurus omak, jala si Mike pe nga mangoli. Alai si Samira dohot si Gabriel rap dohot hami dope tinggal. Jadi, ala pinda hami tu La Victoria, gabe dao ma nasida sian akka donganna na di Caracas. Asing ni i, istrikku si Sylvia pe ikkon menyesuaihon do, ala nga terbiasa ibana tinggal di ibukota. Hape saonari, ikkon tinggal di kota na gelleng do hami. Jala jabunami na saonari pe unggelleng do sian jabunami na sebelumna. Jadi, keputusan na balga do pinda sian Caracas tu La Victoria.

Alai, muba ma muse situasinami. Menikah ma si Gabriel, jala si Samira nga tinggal sahalakna be. Dung i taon 2007, diundang ma au dohot si Sylvia gabe anggota keluarga Betel. Jala melayani di Betel dope hami sahat tu saonari. Sintua do anaknami si Mike, jala rap merintis do ibana dohot istrina si Monica. Si Gabriel pe sintua do, di Italia do ibana dohot istrina si Ambra. Molo si Samira, merintis do ibana, jala gabe komuter jarak jauh di Betel.

Godang do keputusan na balga na hubahen saleleng ngolukku. Alai dang hea husesali i. Molo dilean pe kesempatan di au lao manguba keputusanki, tong do hubahen keputusan na sarupa. Mandok mauliate do au tu Jahowa, ala dilehon Ibana do akka tugas tu au. Jala saleleng martaon-taon, boi ma huida, penting hian do marale-ale tu Jahowa. Tikki mambahen keputusan, na balga manang na dang pengaruhna tu hita, boi do lehonon ni Jahowa “hadameon na so boi diattusi jolma”. (Plp. 4:6, 7) Las hian do rohakku dohot si Sylvia melayani di Betel jala dipasu-pasu Jahowa do hami. Alana Jahowa do sai parjolo hubahen hami di ngolunami.