1. Boasa ditogu Jahowa hita asa jonok tu Ibana?

JAHOWA do na manogu hita sude asa jonok tu Ibana. (Joh. 6:44) Lapatanna, manat do diparrohahon Jahowa marmiliar jolma na adong di portibi on lao mangida ise halak na tulus rohana makkaholongi Ibana. (1 Kron. 28:9) Jadi, ditanda Jahowa do hita jala dihaholongi. Pasti las hian do rohatta mamboto on!

2. Tudosan aha do na dipakke Jesus lao patuduhon na arga do hita sude di Jahowa?

² Parduli do Jahowa tu hita secara pribadi. Jadi pasti parduli do tong Ibana tu sude dongan sahaporseaotta. Coba ma jo taingot muse tikki dipatudos Jesus Jahowa songon parmahan. Molo adong 100 biru-biruna, mago ma sada, aha do diulahon parmahan i? “Tottu ditadikkon ibana do na 99 i kan? Dung i lao ma ibana mangalului na sadana i.” Dung dapot ni parmahan i biru-biru i, dang gabe muruk ibana. Gariada las do rohana. Aha do parsiajaranna? Sude naposo ni Jahowa na dos songon biru-biru, arga do di Ibana. Alani i ma didok Jesus, “Dang lomo roha ni Damang na di banua ginjang i mago apala sada pe sian na metmet on.”​—Mat. 18:12-14.

3. Aha do na lao tabahas di artikel on?

³ Pasti dang adong sian hita na olo mambahen haccit roha ni donganta. Jadi boha do asa unang sappe metmet roha ni dongan tabahen? Jala, aha do na ikkon taulahon molo haccit rohatta dibahen dongan? Taalusi ma akka sukkun-sukkun i di artikel on. Alai na parjolo, tabahas ma jo ise do maksudna “na metmet on” na disurat di Mateus bindu 18.

4. Ise do maksudna “na metmet on”?

⁴ Na didok Jesus “na metmet on”, i ma sude siseanna dang  soal sadia umurna. Dipatudos do nasida “songon dakdanak” ala olo diajari Jesus, nang pe adong sian nasida naung matua. (Mat. 18:3) Jala nang pe marasing-asing latar belakang, kebudayaan, dohot sifat ni nasida, alai sude do halak i marhaporseaon tu Jesus Kristus. Alani i ma dihaholongi Jesus nasida.​—Mat. 18:6; Joh. 1:12.

5. Songon dia do perasaan ni Jahowa molo adong na mambahen haccit manang metmet roha ni naposona?

⁵ Arga do di Jahowa sude naposona “na metmet on”. Asa lam takkas taattusi i, coba ma bayakkon songon dia perasaanta tu dakdanak. Holong do rohatta tu dakdanak. Alana gale dope halak i, dang adong pengalamanna, jala porlu dope sai diajar-ajari. Pasti muruk do hita molo adong mambahen na haccit tu dakdanak. Dos songon i ma Jahowa, lomo do rohana manjaga hita sude secara pribadi. Muruk do Ibana molo adong na mambahen haccit manang metmet roha ni naposona.​—Jes. 63:9; Mrk. 9:42.

6. Sesuai tu 1 Korint 1:26-29, songon dia do pandangan ni portibi on tu akka sisean ni Jesus?

⁶ Aha dope alasan na asing boasa didok sisean ni Jesus i “na metmet”? Coba ma jo tapikkiri on, ise do halak na penting di pandangan ni portibi on? Halak na mora, na terkenal, dohot na marhuaso do. Alai biasana molo akka sisean ni Jesus, halak na so sangap jala na so penting do di pandangan ni portibi on. (Jaha 1 Korint 1:26-29.) Alai anggo di Jahowa, arga do nasida sude.

7. Ala dihaholongi Jahowa do sude dongan sahaporseaon, aha do na ikkon taulahon?

⁷ Dihaholongi Jahowa do sude naposona, na baru dope manang naung leleng manomba Ibana. Dianggap Jahowa do penting sude dongan sahaporseaotta. Jadi ikkon songon i ma tong hita tu nasida. Berupaya ma hita ‘makkaholongi sude dongan sahaporseaon’, dang holan piga-piga dongan. (1 Ptr. 2:17) Ikkon parduli do hita tu nasida jala berupaya manjaga akka donganta i. Molo tasadari nungnga haccit roha ni dongan tabahen, unang ma sengaja hita mangalupahon i, hira na so adong masalah. Unang ma taharappon donganta i na ikkon manalpuhon hasalaatta manang mangalupahon i. Alai, boasa adong donganta na mura tersinggung? Olo do ra alani latar belakang ni nasida, gabe merasa halak i dang mararga diri ni nasida. Na asing, ala baru dope gabe sisomba Jahowa. Jadi agak maol dope halak i manalpuhon hasalaan ni na asing. Alai manang aha pe na mambahen nasida songon i, molo haccit roha ni dongan tabahen, ikkon berupaya do hita mardame dohot nasida. Jala molo taboto hita halakna mura tersinggung, berupaya ma hita padenggatton kelemahanta i. Porlu do tapadenggan i, asa dame rohatta jala denggan hubunganta tu na asing.

8. Pandangan ni halak Jahudi na songon dia do na mempengaruhi sisean ni Jesus?

⁸ Boasa dihatai Jesus taringot “na metmet on”? Alana disukkun akka siseanna do tu ibana, “Ise do na umbalga di Harajaon banua ginjang i?” (Mat. 18:1) Godang halak Jahudi marpikkir molo halak na penting, i ma halak na adong kedudukan manang jabatanna. Jala sesuai do i tu hata ni sahalak pakar Alkitab. Didok, “Na paling penting dianggap jolma, i ma molo boi sangap jala terkenal.”

9. Aha do na ikkon diulahon sude sisean ni Jesus?

⁹ Godang do halak Jahudi marpikkir, uppenting do nasida sian halak na asing. Jadi ikkon berupaya do sisean ni Jesus asa unang tepengaruh tu pandangan sisongon i. Alani i ma didok Jesus, “Manang ise na ussangap di tonga-tongamuna naeng ma gabe songon halak na upposo. Jala manang ise na naeng gabe pamimpin di tonga-tongamuna, naeng ma gabe songon parhobas.” (Luk. 22:26) Molo  taanggap do diritta “na upposo”, gabe tabahen ma sangap dongan na asing. (Plp. 2:3) Molo nga berupaya hita mambahen songon i, gabe dang metmet be roha ni dongan tabahen.

10. Aha do poda ni si Paulus tu halak Korint na ikkon torus taingot?

¹⁰ Molo fokus hita tu kelebihan dohot sifat na denggan sian akka dongan, lam mura ma hita mambahen nasida sangap. Alani i, ikkon sai taingot do poda ni si Paulus tu halak Korint. Didok ibana, “Ai aha huroa na adong di hamu umbahen na didok hamu dumenggan hamu sian na asing? Kan sian Debata do sude na adong di hamu? Molo Debata do na mangalehon sude na adong di hamu, boasa ginjang rohamuna gabe hira sian gogomuna i sude?” (1 Kor. 4:7) Jadi ikkon manat do hita asa unang sappe taanggap diritta na uppenting sian na asing. Jala unang ma taharappon ikkon dipasangap dongan na asing hita. Misalna, molo adong donganta na malo marjamita manang malo mamandu parsiajaran Bibel, ikkon Jahowa do dipuji ibana. Alana nungnga dilean kemampuan i tu ibana.

11. Parsiajaran aha do na tadapot sian tudosan ni Jesus taringot sahalak raja dohot hatobanna?

¹¹ Dung dipaingot Jesus akka siseanna asa unang dibahen metmet roha ni na asing, dipaboa Jesus ma muse tudosan taringot sahalak raja dohot hatobanna. Disesa raja i do utang ni hatoban i na massai godang, na so mungkin boi gararonna. Alai di pudian ni ari, dang olo hatoban i manesa utang ni donganna hatoban. Hape otik hian do utang ni donganna i. Alani i, dipenjarahon raja ma hatoban na so marasi ni roha i. Aha do parsiajaranna tu hita? Jesus mandok, “Songon i ma bahenon ni Damang na di banua ginjang i tu hamu, molo dang disesa hamu hasalaan ni donganmuna sian rohamuna.”​—Mat. 18:21-35.

12. Molo dang olo hita manalpuhon hasalaan ni dongan, aha do pengaruhna?

¹² Alani tindakan ni hatoban i, dang holan ibana na rugi. Alai dohot do tong na asing. Na parjolo, gabe rugi do dibahen ibana donganna na marutang i. Alana “dipenjarahon do donganna i sahat tu na digarar sude utangna i”. Na paduahon, gabe berdampak do i tu donganna hatoban na asing. Alana tikki diida hatoban na asing na masa i, “marsak situtu ma nasida”. Takkas ma, adong do pengaruh ni tindakanta tu na asing. Molo adong dongan na mambahen haccit rohatta jala dang olo hita manalpuhon hasalaanna i, aha do pengaruhna? Na parjolo, gabe tabahen ma haccit roha ni donganta na marsala i. Ala dang olo hita manalpuhon hasalaanna, dang tapardulihon be ibana jala dang tahaholongi. Na paduahon, berdampak do i tu akka dongan na asing. Gabe dang tabo be dihilala halak i ala dang mardame hita tu donganta i.

13. Aha do na boi taparsiajari sian pengalaman ni si Kristina?

¹³ Molo olo hita manalpuhon hasalaan ni donganta, gabe dame ma tahilala, songon i ma nang donganta na asing. I do na dihilala sahalak perintis na margoar si Kristina. * Hea do haccit rohana dibahen sahalak donganta borua. Didok si Kristina, “Jotjot do asal dipandok ibana hatana na mambahen haccit rohakku, dos songon podang na manikkam. Gabe dang olo be au marpatner dohot ibana tikki marbarita. Alani i, gabe dang semangat be au jala dang marlas ni roha be.” Sebenarna adong do alasan ni si Kristina torus marsogo ni roha tu donganta i. Alai dang torus ibana muruk. Diihutton ibana do poda na adong di artikel na marjudul, “Ampunilah dengan Segenap Hati Saudara” na adong di Menara Pengawal 15 Oktober 1999. Ujungna disalpuhon ibana  ma hasalaan ni donganta i. Didok ibana, “Huingot do, hita sude ikkon berupaya mamakke pangalaho na imbaru. Jala ikkon taingot do muse molo Jahowa sai rade manalpuhon hasalaatta. Saonari nungnga lubbang be huhilala. Hira na diangkat ma boban na borat sian pundakku. Nga las be rohakku saonari.”

14. Sesuai tu Mateus 18:21, 22, aha do na ikkon diupayahon Apostel Petrus, jala aha do na boi taparsiajari sian hata ni Jesus tu ibana?

¹⁴ Taboto do ikkon tasalpuhon hasalaan ni na asing. Alai dang sai mura mangulahon i. Songon i do na dihilala Apostel Petrus. (Jaha Mateus 18:21, 22.) Attong aha do na ikkon taulahon asa boi tasesa hasalaan ni na asing? Na parjolo, sai taingot ma sadia jotjot Jahowa manesa hasalaatta. (Mat. 18:32, 33) Sabotulna dang layak hita diampuni, alai sai rade do Ibana manesa dosatta. (Ps. 103:8-10) Asing ni i, diparettahon Jahowa do hita ‘ikkon marsihaholongan dohot na asing’. Jadi ikkon olo do hita manalpuhon hasalaan ni dongan. (1 Joh. 4:11) Na paduahon, sai taingot ma molo olo hita mangampuni hasalaan ni dongan, gabe taurupi ma donganta na marsala i asa dame dihilala ibana. Gabe dame ma huria, denggan ma hubunganta tu Jahowa, jala gabe lubbang ma tahilala ala nungnga tabolokkon boban na borat i. (2 Kor. 2:7; Kol. 3:14) Alani i, martangiang ma hita tu Jahowa asa boi tasalpuhon hasalaan ni na asing. Unang ma taloas Sibolis manegai hubunganta dohot akka dongan. (Eps. 4:26, 27) Porlu do diurupi Jahowa hita, asa boi tetap dame huria.

15. Sesuai tu Kolosse 3:13, aha do na ikkon taulahon molo adong dongan na mambahen jut rohatta?

¹⁵ Boha do molo adong tindakan ni donganta na mambahen jut hian rohatta? Berupaya ma hita asa toktong mardame. Martangiang ma hita tu Jahowa paboahon perasaanta i. Tatangiakkon ma dongan na mambahen haccit rohatta i asa dipasu-pasu Jahowa ibana.  Tapangido ma tu Jahowa asa diurupi hita mangida akka sifatna na denggan, na mambahen holong roha ni Jahowa tu ibana. (Luk. 6:28) Molo maol dope tahilala manalpuhon hasalaanna i, talului ma cara asa boi hita makkatai tu ibana. (Mat. 5:23, 24; 1 Kor. 13:7) Unang ma hea ro tu rohatta na sengaja ibana mambahen haccit rohatta. Jala tikki makkatai hita tu donganta i, sai taingot ma molo ibana pe berupaya do mardame tu hita. Alai boha do molo hira na so olo ibana mardame? “Toktong ma [hita] sabar” tu ibana. (Jaha Kolosse 3:13.) Asing ni i, taingot ma molo torus jut rohatta tu donganta i, boi do sega hubunganta tu Jahowa. Unang ma taloas manang aha pe mambahen gale haporseaotta. Molo tabahen songon i, berarti na holong hian do rohatta tu Jahowa.​—Ps. 119:165.

16. Aha do na ikkon taulahon asa toktong marsada huria?

¹⁶ Pasti taargai do kesempatan na dilehon Jahowa tu hita boi “sada punguan” jala “sada parmahan” dohot akka dongan na asing lao manomba Ibana. (Joh. 10:16) Bukku Diorganisasi untuk Melakukan Kehendak Yehuwa halaman 165 mandok, “Godang do manfaat na tadapot ala marsada huria, jadi ikkon sai berupaya do hita asa torus marsada huria.” Alani i, ikkon sai “talatik do diritta asa boi tatiru cara ni Jahowa mangida akka dongan”. Molo di Jahowa, arga do hita sude “na metmet on”. Songon i do tong perasaanta tu dongan na asing? Diida Jahowa jala diargai Ibana do upayatta mangurupi dohot mamparrohahon dongan na asing.​—Mat. 10:42.

17. Molo tahaholongi do akka dongan, aha do na ikkon taulahon?

¹⁷ Ala tahaholongi akka dongan sahaporseaon, “marsitutu ma hita asa unang tabahen gale haporseaon ni donganta manang gabe manimbil nasida”. (Rom 14:13) Sai taanggap ma ussangap dongan na asing sian hita. Tasalpuhon ma hasalaan ni na asing sian nasa rohatta. Unang ma gabe gale haporseaotta alani na asing. Gariada sai “marsitutu ma [hita] mangulahon akka na mambahen dame jala masipatoguan ma [hita]”.​—Rom 14:19.