1. Situasi na songon dia do na boi mambahen hita mabiar?

 SAONARI on godang do situasi na mambahen akka donganta mabiar. Contohna songon si Nestor dohot istrina si María. * Lomo do roha ni nasida melayani di inganan na makkaporluhon godang penyiar. Asa boi diulahon nasida i, ikkon sederhana do parngoluon ni nasida. Alai mulana, mabiar do nasida dang boi marlas ni roha molo holan saotik hepeng ni nasida. Molo si Biniam, tinggal di negara na mangorai ulaon ni Saksi Jahowa. Diboto ibana do, olo do gabe dianiaya akka naposo ni Jahowa disi. Tamba mabiar do muse ibana mamikkiri reaksi ni keluargana molo diboto nasida nungnga gabe Saksi Jahowa ibana. Molo donganta si Valérie didiagnosa do ibana hona kanker ganas. Berupaya ma ibana mangalului dokter bedah na olo mangoperasi tanpa transfusi darah asa unang terganggu panggora ni rohana. Pasti mabiar do ibana mate di tikki i.

2. Boasa ikkon takendalihon biar ni rohatta?

² Godang do sian hita na hea mabiar songon akka donganta i. Alai molo dang takendalihon biar ni rohatta i boi do gabe tabahen keputusan na so denggan, na berpengaruh tu hubungatta tu Jahowa. On ma na dihalomohon Sibolis. Dimanfaatton ibana do biar ni rohatta i asa unang taoloi be paretta ni Jahowa, termasuk parettana asa marbarita na uli. (Pgk. 12:17) Licik do Sibolis, kejam, jala umgogo do ibana sian hita. Alai boi do hita marhasil mangalo ibana. Songon dia carana?

3. Aha do na boi tatiru sian panurat Psalmen 118?

 ³ Molo pos rohatta na dihaholongi Jahowa hita jala sai didongani hita, boi do tataluhon Sibolis. (Ps. 118:6) Marsiajar ma hita sian panurat Psalmen 118. Godang do hasusaan na diadopi ibana. Godang do musuna, termasuk do akka pamimpin (ayat 9, 10). Marsak do ibana ala massai borat sitaononna (ayat 13). Asing ni i, hea do ibana dipissang Jahowa (ayat 18). Alai didok panurat Psalmen i do ‘dang mabiar ibana.’ Boasa boi songon i? Diboto ibana do dipissang Jahowa pe ibana ala massai holong do roha ni Jahowa tu ibana. Pos do rohana situasi aha pe na diadopi ibana, sai rade do Jahowa mangurupi ibana.​—Ps. 118:29.

4. Aha do na lao tabahas di artikel on?

⁴ Molo pos rohatta na massai holong do roha ni Jahowa tu hita, gabe boi ma taatasi biar ni rohatta i. Di artikel on, tabahas ma tolu situasi na biasana mambahen hita mabiar: (1) mabiar dang boi memenuhi kebutuhan keluarga, (2) mabiar tu jolma, dohot (3) mabiar tu hamatean. Taida ma muse songon dia akka donganta na dipaboa di paragraf parjolo nakkin, boi marhasil mangatasi biar ni roha ni nasida ala porsea tu holong ni Jahowa.

5. Situasi na songon dia do na boi mambahen kepala keluarga mabiar? (Ida gambar sampul.)

⁵ Adong do tanggung jawab ni kepala keluarga na balga, i ma paradehon kebutuhan ni keluargana. (1 Tim. 5:8) Molo hamu sahalak kepala keluarga, mabiar do ra hamu molo dang adong karejomuna saleleng pandemi on. Khawatir do ra hamu dang boi paradehon kebutuhan ni keluargamuna dohot mambayar sewa ni jabumuna. Asing ni i, olo do ra mabiar hamu dipecat sian parkarejoanmuna jala dang boi be dapotmuna karejo na baru. Manang songon si Nestor dohot si María naung dipaboa nakkin, olo do ra ragu hamu naeng mambahen sederhana parngoluanmuna. Alai sai taingot ma, boi do dimanfaatton Sibolis biar ni roha sisongon i, asa unang setia be hita melayani Jahowa.

6. Aha do na dibahen Sibolis asa sega hubungatta tu Jahowa?

⁶ Berupaya do Sibolis mambahen hita ragu tu holong ni Jahowa dohot tu janjina lao mangurupi hita memenuhi kebutuhan ni keluargatta. Akibatna olo do didok rohatta ikkon taulahon manang aha pe asal ma boi hita tetap karejo. Bahkan olo do gabe taulahon na so sesuai tu prinsip ni Bibel lao mampartahatton karejotta i.

7. Aha do na didok Jesus taringot Jahowa?

⁷ Jesus do na paling mananda Jahowa. Didok ibana, ‘Diboto Jahowa do manang aha na porlu di hita andorang so tapangido i tu Ibana.’ (Mat. 6:8) Sian hatana on boi taida, pos situtu do roha ni Jesus pasti paradeon ni Jahowa do kebutuhanta. Ala naposo ni Jahowa do hita, berarti anggota keluargana do hita. Alani i, pos ma rohatta pasti ulahonon ni Jahowa do tanggung jawabna sebagai Kepala keluarga, songon na didok di 1 Timoteus 5:8.

8. (a) Aha do na porlu taingot molo mabiar hita dang boi memenuhi kebutuhan ni keluargatta? (Mateus 6:31-33) (b) Aha do na boi tatiru sian suami istri na adong di gambar?

⁸ Molo pos rohatta na dihaholongi Jahowa hita dohot keluargatta, pasti yakin do hita paradeonna do akka na porlu di hita. (Jaha Mateus 6:31-33.) Lomo do roha ni Jahowa mangulahon i, ala Debata  na murah hati do Ibana. Tikki ditoppa Ibana pe tano on, dang holan kebutuhan dasar na diparade Ibana. Diparade Ibana do muse akka na asing asa boi hita marlas ni roha. (1 Mus. 2:9) Jadi pos ma rohatta sai diparade Jahowa do kebutuhanta, nang pe holan kebutuhan dasar na adong di hita. (Mat. 6:11) Taingot ma pengorbanan aha pe na tabahen saonari, dang sadia dope i molo tabandingkon tu na dilehon Jahowa tu hita saonari dohot di ari na naeng ro. On ma na diingot si Nestor dohot si María.​—Jes. 65:21, 22.

9. Aha do na boi taparsiajari sian pengalaman ni si Nestor dohot si María?

⁹ Tinggal di Kolombia do si Nestor dohot si María jala nyaman do ngolu ni nasida. Didok nasida, “Lomo do rohanami mambahen sederhana parngoluonnami asa boi unggodang tikkinami melayani. Alai mabiar do hami dang boi marlas ni roha molo holan saotik hepengnami.” Aha ma na diulahon halak i? Diingot nasida ma songon dia Jahowa mambuktihon holongna tu nasida saleleng on. Jadi kaluar ma nasida sian parkarejoanna nang pe balga gajina. Alana pos do roha ni halak i pasti paradeon ni Jahowa do kebutuhan ni nasida. Dijual nasida ma jabuna jala pinda ma tu negara na makkaporluhon godang penyiar. Songon dia ma perasaan ni nasida saonari? Didok si Nestor, “Nungnga huhilala hami be tutu do isi ni Mateus 6:33 i, dang hea hurangan manang aha hami. Jala umlas do rohanami saonari.”

10. Boasa adong halak na mabiar tu jolma?

¹⁰ Sian mulai mangalo si Adam dohot si Hawa tu Jahowa, godang do jolma na mangulahon na jahat jala mambahen susa na asing. (Pjm. 8:9) Contohna, adong do halak na lomo-lomona mamakke jabatanna lao mambahen na jahat tu na asing. Akka parsikkola pe, di-bully do donganna sasikkola. Bahkan adong do halak na mangulahon kekerasan tu keluargana sandiri. Jadi dang heran hita molo adong halak na mabiar tu jolma. Ala diboto Sibolis sipata hita mabiar tu jolma, aha ma na diulahon ibana?

11-12. Songon dia do Sibolis memanfaatton biar ni rohatta tu jolma?

¹¹ Dipakke Sibolis do biar ni rohatta asa unang marbarita be hita jala asa taulahon  na dihasogohon Jahowa. Dipakke do pamaretta lao mangorai ulaonta marbarita jala menganiaya hita. (Luk. 21:12; Pgk. 2:10) Godang do muse akka halak na dipakke Sibolis lao paboahon informasi na so sittong taringot Saksi Jahowa. Akibatna godang do na mangarehei hita, bahkan menyerang hita. (Mat. 10:36) Dang pola heran hita disi! Alana nga hea dipakke Sibolis cara sisongon i di abad na parjolo.—Ul. 5:27, 28, 40.

¹² Dang holan tekanan sian pamaretta na dipakke Sibolis lao pabiar-biarhon hita. Adong do halak na mabiar molo diboto keluargana nungnga gabe Saksi Jahowa nasida. Sipata umbiar do nasida tu reaksi ni keluargana i daripada dianiaya pamaretta. Holong do roha ni nasida tu keluargana jala lomo do roha ni nasida asa manomba jala makkaholongi Jahowa keluargana i. Jadi tikki adong keluargana na mangaleai Debata dohot akka dongan sahaporseaon, gabe lungun ma roha ni nasida. Memang adong do anggota keluarga na menentang hian ujungna gabe Saksi Jahowa. Alai molo so olo be anggota keluargatta berhubungan tu hita alani haporseaotta, songon dia do reaksitta?

13. Molo dang olo be keluargatta berhubungan tu hita, aha do na porlu taingot? (Psalmen 27:10)

¹³ Olo do memang gabe mabiar hita mamikkiri aha na lao masa molo dang olo be keluargatta berhubungan dohot hita. Alai boi do mago biar ni rohatta i molo taingot balga ni holong ni Jahowa tu hita. Dipatogu ma muse rohatta molo taingot isi ni Psalmen 27:10. (Jaha.) Pos ma rohatta pasti dipasu-pasu Jahowa do kesetiaanta tu Ibana. Taingot ma holan Jahowa do na boi paradehon sude kebutuhanta, mambahen dame roha dohot pikkiranta, jala mangurupi hita asa torus jonok tu Ibana. Songon i do na dihilala si Biniam naung dipaboa nakkin.

14. Aha do na boi taparsiajari sian pengalaman ni si Biniam?

¹⁴ Holong do roha ni si Biniam tu Jahowa. Gabe Saksi Jahowa do si Biniam nang pe diboto ibana na lao dianiaya pamaretta do ibana alani haporseaonna i. Nang pe songon i, ikkon berusaha dope ibana mangatasi biar ni rohana tu jolma. Didok ibana, “Memang, mabiar do au dianiaya pamaretta. Alai umbiar do rohakku molo ditentang keluargakku. Mabiar do au gabe kecewa annon bapa alani  keputusankon jala gabe dang diargai keluargakku be au.” Alai pos do roha ni si Biniam pasti dijaga Jahowa do akka halak na dihaholongi Ibana. Didok si Biniam, “Huingot do songon dia Jahowa mangurupi akka dongan na susa di parhepengon, na mengalami ketidakadilan, jala na dianiaya. Pos do rohakku molo toktong au setia tu Jahowa, pasu-pasuonna do au. Nang pe jotjot au ditakkup jala dianiaya, boi do huida songon dia Jahowa mangurupi au ala toktong setia.” Gabe songon Bapak do Jahowa di si Biniam, jala akka dongan sahaporseaon pe gabe songon keluarga do di ibana.

15. Boasa wajar molo mabiar hita mate?

¹⁵ Dipaboa do di Bibel molo hamatean i musu. (1 Kor. 15:25, 26) Olo do gabe mabiar hita molo sai tapikkirhon taringot hamatean, tarlumobi molo adong halak na tahaholongi na marsahit na parah. Alai wajar do i. Boasa? Ala dilehon Jahowa do tu hita keinginan lao mangolu saleleng ni lelengna. (Pjm. 3:11) Sabotulna adong do dengganna molo mabiar hita mate. Misalna, gabe taallang ma akka sipanganon na sehat jala rajin ma hita olahraga. Asing ni i, marubat do hita tu dokter tikki marsahit. Jala tahindari do akka situasi na boi membahayakan ngolutta.

16. Songon dia do Sibolis memanfaatton biar ni rohatta tu hamatean?

¹⁶ Diboto Sibolis do na taargai hangoluan. Jadi didok Sibolis, pasti taulahon do manang aha pe asal ma boi hita tetap mangolu, nang pe gabe sega hubungatta tu Jahowa. (Job 2:4, 5) Alai sala do Sibolis! Ibana do “na parohon hamatean”. Alani i sai berupaya do ibana memanfaatton biar ni rohatta tu hamatean lao mambahen hita mangalo Jahowa. (Heb. 2:14, 15) Dipakke Sibolis do muse akka halak na marsogo ni roha tu Saksi Jahowa mangancam lao pamatehon hita. Tikki marsahit hita, dipakke Sibolis do kesempatan i asa unang setia be hita tu Jahowa. Adong do ra dokter manang keluarga na so Saksi na mamaksa hita manjalo transfusi darah, hape maralo do i tu patik ni Debata. Manang adong do ra halak na asing manjujui hita manjalo pengobatan alternatif na so sesuai tu prinsip ni Bibel.

17. Sesuai tu Rom 8:37-39, boasa dang porlu hita mabiar tu hamatean?

¹⁷ Memang dang olo hita mate. Alai taboto do molo tung pe ikkon mate hita, sai torus do dihaholongi Jahowa hita. (Jaha Rom 8:37-39.) Molo di Jahowa nang pe mate naposona, hira na mangolu dope nasida, ala sai diingot Jahowa do nasida. (Luk. 20:37, 38) Tarpaima do Jahowa pahehehon nasida. (Job 14:15) Jala nungnga dilehon Jahowa tobusan na massai arga asa boi hita “mandapot hangoluan na saleleng ni lelengna”. (Joh. 3:16) Pos do rohatta massai holong do roha ni Jahowa tu hita jala parduli do Ibana tu hita. Jadi unang ma tatinggalhon Jahowa tikki marsahit manang tikki terancam ngolutta. Sebalikna taasahon ma Ibana. Tapangido ma muse asa dilehon tu hita bisuk, gogo, jala asa tarapul rohatta. On ma na diulahon si Valérie dohot suamina.​—Ps. 41:3.

18. Aha do na boi taparsiajari sian si Valérie?

¹⁸ Tikki marumur 35 taon si Valérie, diboto ibana ma na mengidap kanker ganas ibana. Alai, parrohahon ma songon dia holong ni Jahowa mangurupi ibana asa unang mabiar tu hamatean. Didok si Valérie, “Marsak do au dohot suamikku mamboto na hona kanker au jala ikkon dioperasi.  Alai tikki konsultasi hami tu godang dokter bedah, dang olo nasida mangoperasi au molo dang transfusi darah. Mabiar do au alani i. Alai ala huihutton paretta ni Debata, hutolak do operasi na mamakke transfusi darah. Saleleng on, nungnga huhilala holong ni Jahowa na massai balga i. Jadi saonari ma kesempatan di au lao patuduhon holongku tu Ibana. Setiap hubege lam parah sahittu, lam berupaya ma au mambahen las roha ni Jahowa, dang Sibolis. Ujungna marhasil ma au dioperasi tanpa transfusi darah. Nang pe dang malum dope au, sai diparade Jahowa do na dihaporluhon hami. Misalna, andorang so didiagnosis pe au marsahit kanker, nungnga dibahas hami di parpunguan artikel ‘Menghadapi Kesukaran dengan Tabah.’ * Gabe dipatogu do hami alani artikel on. Jadi torus do diparsiajari hami i. Asing ni i, marbarita na uli dohot marpungu mambahen hami toktong tenang jala mangurupi hami mambahen keputusan na denggan.”

19. Aha do na lao masa satokkin nai?

¹⁹ Sai diurupi Jahowa do akka naposona di liat portibi on asa marhasil nasida mangadopi akka hasusaan dohot tantangan na borat na dibahen Sibolis. (1 Ptr. 5:8, 9) Hamu pe boi do marhasil mangadopi i. Satokkin nai suruon ni Jahowa ma Jesus dohot si 144.000 ‘mangaripasson akka ulaon ni Sibolis’. (1 Joh. 3:8) Dukkon i, ‘dang adong be na tahabiari, jala dang adong na mambahen hita mabiar’. (Jes. 54:14; Mik. 4:4) Alai saonari torus ma hita berupaya mangatasi biar ni rohatta.

20. Aha do na boi mangurupi hita mangatasi biar ni rohatta?

²⁰ Pos ma rohatta massai holong do roha ni Jahowa tu hita jala pasti jagaonna do hita. Torus ma taingot songon dia Jahowa mangurupi akka naposona di tikki naung salpu. Jala taceritahon ma i tu na asing. Torus ma taingot songon dia Jahowa nungnga mangurupi hita mangadopi akka hasusaatta. Pos ma rohatta, boi do hita marhasil mangatasi biar ni rohatta molo diurupi Jahowa.​—Ps. 34:4.