1-2. Sesuai tu Psalmen 25:14, aha do na ikkon taulahon asa boi marale-ale tu Jahowa?

 MENURUT hamu, sifat aha do na ikkon tapatudu asa boi gabe ale-ale na burju? Bisa jadi dialusi hamu do, ikkon tahaholongi jala tadukung ale-aletta i. Olo do dang tarpikkir hamu porlu do biar ni roha asa boi marale-ale. Alai songon na dipaboa di ayat tema ni artikel on, akka halak na lomo rohana marale-ale tu Jahowa ikkon “makkabiari Ibana”.​—Jaha Psalmen 25:14.

² Dang soal nungnga sadia leleng hita manomba Jahowa, ikkon torus do tahabiari Ibana. Alai aha do lapatanna makkabiari Debata? Songon dia do carana asa tahabiari Debata? Jala aha do na boi taparsiajari taringot biar tu Debata sian kepala istana ni raja na margoar si Obaja, Sintua ni Malim Jehoyada, dohot Raja Jehoas?

3. Patorang ma manfaat ni biar ni roha tu hita.

³ Biar tu Debata lapatanna mabiar mangulahon na dihasogohon Jahowa. Memang hata “mabiar” dang tabo begeon, alai perasaan sisongon i boi do bermanfaat tu hita, jala mangurupi hita asa mambahen keputusan na denggan. Misalna molo mabiar hita madabu, tottu dang olo hita mardalan di pinggir ni jurang. Molo mabiar hita tarlukka, tottu mandao do hita sian situasi na berbahaya. Jala molo mabiar hita sega parale-aleotta dohot halak na tahaholongi, pasti dang olo hita mambahen haccit rohana marhite hata dohot pambahenatta.

4. Aha do na dihalomohon Sibolis sian hita?

 ⁴ Lomo do roha ni Sibolis asa sala alasanta makkabiari Jahowa. Didok Sibolis Debata na parmuruk do Jahowa i, lomo rohana manghukum jolma, jala dang boi tabahen las rohana. (Job 4:18, 19) Lomo do roha ni Sibolis asa unang tasomba be Jahowa. Alani i asa unang dioto-otoi hita, ikkon sittong do alasanta makkabiari Jahowa.

5. Aha do lapatanna makkabiari Debata?

⁵ Halak na makkabiari Debata, i ma halak na makkaholongi Ibana jala dang olo mangulahon manang aha pe na boi manegai parale-aleonna dohot Ibana. Songon i ma Jesus, “dihabiari Jesus do Debata”. (Heb. 5:7) Las do rohana pasangappon Jahowa. (Jes. 11:2, 3) Massai holong do roha ni Jesus tu Jahowa jala lomo do rohana mangoloi paretta ni Jahowa. (Joh. 14:21, 31) Songon Jesus, tapasangap do Jahowa ala taboto Debata na parholong, marbisuk, jala marhuaso do Ibana. Taboto do muse na massai holong do roha ni Jahowa tu hita, jala tanggapanta tu akka petunjukna berpengaruh do tu perasaan ni Jahowa. Boi do tabahen haccit roha ni Jahowa manang tabahen las rohana.​—Ps. 78:41; Poda 27:11.

6. Aha do sada cara na mangurupi hita asa makkabiari Debata? (Psalmen 34:11)

⁶ Biar tu Jahowa dang taboan sian na tubu. Ikkon marsiajar do hita patuduhon i. (Jaha Psalmen 34:11.) Sada cara asa boi tahabiari Debata, i ma mengamati akka toppaan. Lam takkas taida bisuk, huaso, dohot holong ni Jahowa sian “akka na dibahen Ibana”, gabe lam tergerak ma hita asa makkaholongi jala mangargai Ibana. (Rom 1:20) Sahalak donganta borua na margoar si Adrienne mandok, “Longang do rohakku mamparsiajari bisuk ni Jahowa na tarida sian akka toppaanna. Gabe pos ma rohakku diboto Jahowa do na terbaik tu au.” Ala sai dirimangi ibana on gabe disimpulhon ibana ma, “Dang olo au mangulahon aha pe na boi manegai parale-aleokku dohot Jahowa, na mangalehon hangoluan tu au.” Boi do dilehon hamu tikkimuna di minggu on lao mangarimangi toppaan? Molo diulahon hamu i, gabe lam tergerak ma hamu asa makkaholongi jala mangargai Jahowa.​—Ps. 111:2, 3.

7. Songon dia tangiang boi mangurupi hita asa makkabiari Debata?

⁷ Cara na asing na boi mangurupi hita asa makkabiari Debata, i ma taratur martangiang. Molo taratur hita martangiang, lam nyata ma Jahowa i di hita. Tikki tapangido gogo sian Jahowa asa boi martahan mangadopi sitaonon, dipaingot do hita tu huasona na luar biasa. Tikki mandok mauliate hita tu Jahowa ala dilehon Ibana Anakna gabe tobusan, gabe dipaingot ma hita na massai holong do roha ni Jahowa tu hita. Jala tikki tapangido petunjuk ni Jahowa tikki adong masalahta, dipaingot do hita tu bisuk ni Debata. Tangiang sisongon i mangurupi hita asa makkabiari Ibana. Molo taulahon on, gabe lam bertekad ma hita asa unang manegai parale-aleotta tu Ibana.

8. Aha do na porlu taulahon asa torus makkabiari Debata?

⁸ Asa boi torus tahabiari Debata, taparsiajari ma akka contoh na denggan dohot na so denggan na adong di Bibel. Saonari tabahas ma dua naposo ni Jahowa na setia, i ma si Obaja kepala istana ni Raja Ahab, dohot Sintua ni Malim Jehoyada. Marsiajar ma muse hita sian si Jehoas, sahalak raja ni Juda na manomba Jahowa alai belakangan maninggalhon Ibana.

9. Aha do hasilna ala mabiar si Obaja tu Debata? (1 Raja-Raja 18:3, 12)

⁹ Tikki parjolo sahali dipaboa Bibel taringot si Obaja, b didok do ibana halak “na makkabiari Jahowa”. (Jaha 1 Raja-Raja 18:3, 12.) Ala makkabiari Debata, gabe halak na jujur do si Obaja jala boi dihaporseai. Hasilna dibahen raja ma ibana gabe kepala istana. (Bandingkon tu Nehemia 7:2.) Asing ni i, ala mabiar si Obaja tu Debata, boi ma dipatudu ibana habaranion na luar biasa. Massai penting do sifat on di si Obaja, alana ibana mangolu tikki mamaretta Raja Ahab na jahat. Bibel mandok, ‘Unjahat do si Ahab di jolo ni Jahowa sian sude [raja] na mamaretta andorang so ibana.’ (1 Raj. 16:30) Asing ni i, manomba Baal do si Izebel, istri ni si Ahab. Massai sogo do rohana tu Jahowa jala berupaya do ibana asa unang adong be ibadat na sittong di harajaon ni Israel sappulu marga. Bahkan dipamate si Izebel do godang panurirang ni Jahowa. (1 Raj. 18:4) Takkas ma, ikkon barani do si Obaja melayani Jahowa di situasi na maol.

10. Songon dia do si Obaja patuduhon habaranion na luar biasa?

¹⁰ Songon dia do si Obaja patuduhon habaranion na luar biasa? Tikki naeng dipamate si Izebel akka panurirang ni Jahowa, ‘ditabunihon si Obaja do 100 panurirang di gua. Dibahen ibana ma 50 halak di bagasan sada gua jala dilehon do sipanganon dohot siinumon tu nasida’. (1 Raj. 18:13, 14) Molo sappe diboto si Izebel on, boi do gabe dipamate si Obaja. Tottu dang olo si Obaja mate, jadi pasti mabiar do ibana di tikki i. Alai umholong do roha ni si Obaja tu Jahowa dohot tu akka halak na manomba Ibana sian ngoluna sandiri.

11. Songon dia do akka dongan di jamanta saonari maniru si Obaja? (Ida gambar.)

¹¹ Saonari godang do naposo ni Jahowa na tinggal di inganan na mangorai ulaonta. Dihormati nasida do akka pamaretta, alai songon si Obaja toktong do nasida setia tu Jahowa. (Mat. 22:21) Ala dihabiari nasida Debata, dioloi nasida do paretta ni Debata sian paretta ni jolma. (Ul. 5:29) Toktong do  nasida marbarita na uli jala marpungu nang pe ikkon martabuni. (Mat. 10:16, 28) Dipastihon nasida do asa boi akka donganna mandapot publikasi. Parrohahon ma pengalaman ni si Henri, na tinggal di sada negeri di Afrika. Tikki diorai ulaonta di negeri i, rade do si Henri manaruhon publikasi tu akka dongan. Didok ibana, “Parila do au halakna. Ala na mabiar do au tu Jahowa umbahen na barani au.” Boi do hamu barani songon si Henri? Pasti boi, molo berupaya hamu makkabiari Debata.

12. Songon dia do Sintua ni Malim Jehoyada dohot istrina patuduhon kesetiaan tu Jahowa?

¹² Dihabiari Sintua ni Malim Jehoyada do Jahowa. Biar tu Debata mambahen ibana toktong setia tu Jahowa jala mendukung ibadat na sittong. Tarida do i tikki berupaya si Atalia, boru ni si Izebel merebut tahta harajaon di Juda. Godang do alasan na mambahen akka halak mabiar tu si Atalia. Halak na kejam jala ambisius do ibana. Ala lomo hian rohana gabe ratu, berupaya do ibana pamatehon akka pahoppuna! (2 Kron. 22:10, 11) Alai adong sada pahoppuna i ma si Jehoas na diselamatton si Jehoyada dohot istrina si Jehoseba. Ditabunihon nasida do dakdanak i jala dipagodang-godang. Alani i, gabe torus ma adong pewaris tahta harajaon sian pinoppar ni si Daud. Nang pe nungnga matua, setia do si Jehoyada tu Jahowa jala dang mabiar tu si Atalia.​—Poda 29:25.

13. Tikki marumur pitu taon si Jehoas, songon dia do si Jehoyada patuduhon kesetiaanna tu Jahowa?

¹³ Tikki marumur pitu taon si Jehoas, dipatudu si Jehoyada do muse kesetiaanna tu Jahowa. Dibahen ibana ma rencana lao melantik si Jehoas gabe raja, ala ibana do pewaris tahta ni si Daud na sah. Molo gagal rencanana i, boi do dipamate si Jehoyada. Alai alani pasu-pasu ni Jahowa, marhasil do rencanana i. Didukung akka pamimpin dohot halak Lepi do si Jehoyada lao mambahen si Jehoas gabe raja jala pamatehon si Atalia. (2 Kron. 23:1-5, 11, 12, 15; 24:1) Dung i, “disuru si Jehoyada ma asa marjanji raja i dohot akka rakyat i tu Jahowa, na toktong do nasida gabe naposo ni Jahowa”. (2 Raj. 11:17) “Dipillit si Jehoyada ma muse akka panjaga gerbang ni jabu ni Jahowa, asa unang masuk tusi manang ise pe na ramun.”​—2 Kron. 23:19.

14. Songon dia do Jahowa mambahen si Jehoyada gabe sangap?

¹⁴ Nungnga dipaboa Jahowa hian, “Sangap do bahenokku halak na pasangappon Au.” Dipasu-pasu Jahowa do si Jehoyada ala toktong setia ibana. (1 Sam. 2:30) Misalna, dipastihon Jahowa do asa disurat teladan ni si Jehoyada di Bibel lao mangajari hita. (Rom 15:4) Jala tikki mate si Jehoyada, dilehon do hasangapon tu ibana, i ma dikuburhon ‘di kuburan ni akka raja di Kota ni si Daud, alana diulahon ibana do akka na denggan tu halak Israel, tu Debata na sittong, dohot tu jabu ni Debata’.​—2 Kron. 24:15, 16.

15. Aha do na boi taparsiajari sian contoh ni si Jehoyada? (Ida gambar.)

¹⁵ Sian contoh ni si Jehoyada, marsiajar do hita massai penting do makkabiari Debata. Molo dihabiari akka sintua Debata, berupaya do nasida asa torus mangalului cara lao melindungi huria. (Ul. 20:28) Akka na matua pe boi do marsiajar sian si Jehoyada. Molo dihabiari nasida Jahowa jala toktong setia, boi do dipakke Jahowa nasida lao pasautton lomo ni rohana. Nang pe naung matua, dang ditolak Jahowa nasida. Marsiajar do tong akka na poso sian Jahowa. Sangap do dibahen Jahowa si Jehoyada nang pe nungnga matua  ibana. Hamu akka na poso, sangap ma bahen akka dongan na matua, tarlumobi naung setia melayani Jahowa saleleng martaon-taon. (Poda 16:31) Jala sude do hita boi maniru akka pamimpin dohot halak Lepi na mendukung si Jehoyada. Toktong ma hita setia mendukung akka “na manguluhon” hita jala unduk ma hita tu nasida.​—Heb. 13:17.

16. Sian dia taboto dang togu haporseaon ni si Jehoas?

¹⁶ Diurupi si Jehoyada do Raja Jehoas gabe halak na burju. (2 Raj. 12:2) Hasilna tikki poso dope raja i, lomo do rohana mambahen las roha ni Jahowa. Alai dung mate si Jehoyada, ditangihon si Jehoas do akka pejabat na murtad. Akibatna gabe ‘disomba si Jehoas dohot akka rakyatna ma tiang sisombaon dohot akka patung’. (2 Kron. 24:4, 17, 18) Massai haccit do roha ni Jahowa mangida i, alai torus do ‘disuru Jahowa akka panurirang pasingotton nasida asa mulak tu Ibana. Nang pe songon i, dang olo nasida manangihon’. Dang olo halak Israel manangihon si Sakaria, anak ni si Jehoyada. Hape panurirang dohot malim do si Sakaria. Na upparah muse, dipamate si Jehoas do si Sakaria, hape keluarga ni si Sakaria do na menyelamatton ibana.​—2 Kron. 22:11; 24:19-22.

17. Aha do akibatna ala dang dipartahatton si Jehoas biar ni rohana tu Jahowa?

¹⁷ Ala dang dipartahatton si Jehoas biar ni rohana tu Jahowa, gabe marjea ma ibana. Nungnga dipaboa Jahowa hian, “Leas do rohakku tu halak na leas rohana tu Au.” (1 Sam. 2:30) Sada tikki, marporang ma tentara ni  si Jehoas mangalo tentara ni Siria. Talu do tentara ni si Jehoas, hape unggodang do tentarana sian tentara ni si Siria i. Lukka parah do si Jehoas di parporangan i. Dung lao tentara Siria i, dipamate akka parkarejona do si Jehoas, ala dipamate ibana si Sakaria. Ala massai kejam si Jehoas on, dang dianggap layak ibana dikuburhon “di kuburan ni akka raja”.—2 Kron. 24:23-25; ida keterangan “anak Barakhia” di Matius 23:35 di Alkitab Edisi Pelajaran Bahasa Indonesia.

18. Sesuai tu Jeremia 17:7, 8, songon dia do carana asa unang songon si Jehoas hita?

¹⁸ Aha do na boi taparsiajari sian contoh ni si Jehoas? Sarupa do si Jehoas songon hau na so bagas tartanom uratna, jala na holan bergantung tu hau penopang. Dung mate si Jehoyada na mendukung ibana jala dung ditangihon ibana halak na murtad, gabe dang setia be ibana tu Jahowa. Sian on marsiajar do hita, unang ma taoloi Jahowa holan alani keluargatta dohot akka dongan di huria. Asa torus tahabiari Jahowa, ikkon tapasangap do ibana jala tapatogu hubungatta tu Ibana. Carana taratur ma hita marsiajar Bibel, mangarimangi isina, dohot martangiang.​—Jaha Jeremia 17:7, 8; Kol. 2:6, 7.

19. Aha do na dipangido Jahowa sian hita?

¹⁹ Dang hea dipangido Jahowa hita mangulahon lobi sian na tolapta. Na dipangido ibana tarsurat do di Parjamita 12:13 na mandok, “Habiari ma Debata na sittong jala oloi ma parettana. Ai on do na ikkon ulahonon ni sude jolma.” Molo tahabiari Debata, boi ma hita toktong setia tu Jahowa dang soal aha na lao masa di ari na naeng ro, songon si Obaja dohot si Jehoyada. Hasilna, dang adong manang aha pe na boi manegai parale-aleotta tu Jahowa!