Tikki masa Perang Dunia  II ditinggalhon natua-tuakku ma Estonia lao tu Jerman, jala di Jerman ma au tubu. Dung tubu au, direncanahon natua-tuakku ma asa pinda hami tu Kanada. Tempat tinggalnami na parjolo sahali i ma bangunan na gelleng na adong handang ni manukna jonok tu Ottawa, Kanada. Massai pogos do hami, alai pinomatna adong ma tolor ni manuk sarapannami.

Hea ma sada tikki dijahahon Saksi Jahowa do tu omakku Pangungkapon 21:3, 4. Tikki dijaha ibana i, las hian do rohana sappe tangis ma ibana. Marsiajar Bibel ma omak dohot bapa, jala dang leleng dukkon i tardidi ma nasida.

Dang pola takkas diboto natua-tuakku bahasa Inggris, alai semangat do nasida manomba Jahowa. Sai diboan bapa ma au dohot itokku si Sylvia marbarita hampir setiap ari Sabtu, nang pe nungnga loja bapa karejo di borngin sebelumna di pabrik peleburan nikel di Sudbury, Ontario. Jala setiap minggu diparsiajari hami do Joujou Paboahon. Sai diurupi omak dohot bapa do au asa makkaholongi Debata. Alani i gabe taronjar ma rohakku mangalehon ngolukku tu Jahowa jala tardidi ma au taon 1956 tikki marumur sappulu taon. Molo hurimangi na massai holong do roha ni nasida tu Jahowa, gabe taronjar ma rohakku asa toktong manomba Ibana saleleng ngolukku.

Dung tamat SMA au, gabe hurang ma fokushu manomba Jahowa. Tikki i, hupikkir ma molo gabe perintis au, dang cukkup annon hepengku pasautton cita-citakku naeng marpesawat keliling dunia. Karejo do au di stasiun radio jala lomo do rohakku karejo disi. Borngin do au karejo, alani i gabe jotjot do au dang marpungu jala mardongan ma au dohot akka halak na so makkaholongi Debata. Alai ala nungnga dilatik Bibel panggora ni rohakku, gabe tergerak ma au mambahen perubahan.

Pinda ma au tu Oshawa, Ontario. Disi pajuppang ma au dohot si Ray Norman, si Lesli itona, dohot akka perintis na asing. Disambut nasida do au. Ala huida nasida marlas ni roha gabe tergerak ma au mamikkiri muse tujuan ni ngolukku. Alani i mulai ma au merintis di bulan September 1966. Las do rohakku jala boi do hunikmati i. Mulai sian i, godang ma masa perubahan di ngolukku.

Tikki SMA dope au, nungnga mendaftar au naeng melayani di Betel di Toronto, Kanada. Dung i tikki  merintis, diundang do au lao melayani disi saleleng opat taon. Alai lomo hian rohakku tu si Lesli. Jala mabiar do au molo hujalo undangan on, dang na lao boi be au pajuppang dohot ibana. Dung hutangiakkon i tu Jahowa, huputusson ma lao melayani di Betel. Alai lungun do rohakku ala ikkon berpisah sian si Lesli.

Karejo ma au di bagian penatu jala belakangan gabe sekretaris. Tikki i, gabe perintis istimewa ma si Lesli di Gatineau, Quebec. Jotjot do hupikkiri ibana jala sukkun-sukkun do rohakku denggan do keputusan na hubahen on manang na dang. Alai adong ma kejutan na masa. Diundang do si Ray ito ni si Lesli tu Betel jala gabe dongan sakamarhu ma ibana! Gabe boi ma au jonok muse dohot si Lesli. Dung i menikah ma hami di ari parpudi penugasanku saleleng opat taon di Betel, i ma tanggal 27 Februari 1971.

Ditugasson ma hami tu huria na marbahasa Prancis di Quebec. Piga-piga taon dukkon i, diundang ma au lao melayani gabe pengawas wilayah. Tikki i 28 taon dope umurhu. Huhilala paposohu dope au, jala otik dope pengalamanku. Alai hata di Jeremia 1:7, 8 patoguhon au. Adong muse tantangan na asing. Nungnga piga-piga hali kecelakaan mobil si Lesli, jala maol do ibana modom. Boha ma annon ibana molo gabe pengawas wilayah au? Nang pe songon i didok si Lesli do, “Molo diundang Jahowa hita mangulahon sada tugas, ikkon berupaya do hita mangulahon i.” Jadi dijalo hami ma penugasan i, jala las do rohanami mangunjungi akka huria saleleng 17 taon.

Sibuk do au tikki gabe pengawas wilayah. Jala dang sai adong tikkikku rap dohot si Lesli. Alai dapottu ma sada parsiajaran na penting. Hea ma di ari Senin manogot, makkuling ma bel ni pintu jabunami. Dang adong halak di luar, alai adong ma disi karanjang piknik na marisi taplak meja, buah, roti, sabotol anggur, galas, dohot catatan na mandok, “Boan ma istrim piknik.” Cerah do ari di tikki i. Alai hupaboa ma tu si Lesli dang boi au lao, alana ikkon hupersiappon do jamitakku. Memang diattusi ibana do, alai lungun do rohana. Tikki hundul au, targanggu ma panggora ni rohakku. Hurimangi ma Epesus 5:25, 28. Di ayat i, dipangido Jahowa do au asa mamparrohahon perasaan ni istrikku. Dung martangiang, hudok ma tu si Lesli, “Beta, lao ma hita.” Gabe las ma rohana. Lao ma hami tu inganan na bagak di jonok ni sunge, jala disi ma hami piknik. On ma sada ari na paling berkesan di perkawinannami. Jala adong dope tikkikku mempersiappon jamitakku.

Las hian do rohanami mangunjungi akka huria sian British Columbia sahat tu Newfoundland. Nungnga tercapai be cita-citakki mardalani tu godang inganan. Sasittongna nga tarpikkir au naeng mandaftar tu Sikkola Gilead, alai dang olo au ditugasson gabe misionaris tu luar negeri. Huhilala halak na istimewa do misionaris i, jala dang cocok au gabe misionaris. Asing ni i mabiar do au ditugasson tu Afrika, alana godang do disi na marsahit jala gabe korban alani porang. Nungnga las be rohakku melayani di Kanada.

Di taon 1992, boi ma muse Saksi Jahowa marbarita na uli di akka negara bekas Uni Soviet. Jadi disukkun akka dongan ma olo do hami gabe misionaris di Estonia manang daong. Songgot do rohanami, alai ditangiakkon hami ma i muse tu Jahowa. Jala dirimangi hami ma, ‘Molo diundang Jahowa hami mangulahon sada tugas, ikkon berupaya do hami mangulahon i.’ Jadi dijalo hami tugas i. Didok rohakku ma, ‘Tuani ma dang tu Afrika hami.’

Pittor marsiajar bahasa Estonia do hami. Dung piga-piga bulan di negara i, ditugasson ma au gabe pengawas wilayah. Dikunjungi hami ma hira-hira 46 huria dohot kelompok di Estonia, Latvia, Lituania, dohot di Kaliningrad, Rusia. Alani i ikkon marsiajar piga-piga bahasa do hami, i ma bahasa Latvia, Lituania, dohot bahasa Rusia. Gabe tantangan do on di hami. Alai las do roha ni akka dongan mangida upayanami, jala diurupi nasida do hami. Di taon 1999, dibahen ma kantor cabang di Estonia, jala ditugasson ma au gabe panitia cabang rap dohot donganta si Toomas Edur, si Lembit Reile, dohot si Tommi Kauko.

Godang do ditanda hami akka dongan na hea diasingkan tu Siberia. Nang pe kejam dibahen tu nasida jala dipadao sian keluarga, alai dang hea jut roha ni nasida. Torus do nasida marlas ni roha jala semangat di ulaon marbarita. Sian teladan ni nasida, marsiajar ma hami boi do hita martahan jala marlas ni roha nang pe maol situasina.

Saleleng martaon-taon, sibuk do si Lesli mangulahon tugasna jala jarang do ibana istirahat. Alani i gabe loja hian ma dihilala ibana. Dang disadari hami na marsahit fibromialgia do hape si Lesli umbahen na mura-mura ibana loja. Gabe tarpikkir ma hami maninggalhon penugasannami jala mulak tu Kanada. Tikki diundang hami lao mandapot pelatihan di Patterson, New York, AS, ragu do au boi do hami ro manang na dang. Torus do i ditangiakkon hami. Ujungna dijalo hami ma undangan i. Dipasu-pasu Jahowa do keputusannami. Saleleng sikkola i, dapot ni si Lesli do pengobatan medis na dihaporluhon ibana. Hasilna boi ma dilanjutton hami tugasnami.

Di sada borngin taon 2008 di Estonia, dihubungi kantor pusat do au. Disukkun do au olo do hami ditugasson tu Kongo manang daong. Songgot hian do rohakku, tarlumobi ala ikkon hualusi do undangan i marsogotna i. Dang pittor hupaboa i tu si Lesli, ala huboto molo hupaboa i annon dang boi modom ibana bornginna i. Alai gabe au do na so boi modom di borngin i. Martangiang do au tu Jahowa ala mabiar hian au lao tu Afrika.

Marsogotna i, hupaboa ma taringot i tu si Lesli. Dirimangi hami ma: ‘Diundang Jahowa do hami tu Afrika. Sian dia ma diboto hami dang sanggup hami melayani disi molo dang jolo dicoba hami i?’ Jadi dung 16 taon di Estonia, lao ma hami tu Kinshasa, Kongo. Bagak do taman di kantor cabang Kongo, jala tenang do suasanana. Adong do sada kartu na torus disippan si Lesli mulai sian ditinggalhon hami Kanada, jala i ma sada barang na parjolo dibahen si Lesli di kamarnami. Di kartu i didok,  “Las ma rohamuna didia pe hamu tinggal.” Las do rohanami melayani di Afrika. Boi ma hami marsitandaan dohot akka dongan, memandu parsiajaran Bibel, jala menikmati tugas gabe misionaris. Asing ni i, sada hasangapon do di hami mangunjungi kantor cabang di 13 negara na asing di Afrika. Gabe boi ma hami marsitandaan dohot akka dongan sian marragam suku dohot latar belakang. Dang mabiar be au tinggal di Afrika, gariada mandok mauliate do hami tu Jahowa ala ditugasson disi.

Di Kongo, dilehon ma tu hami marragam jenis ni sipanganon, termasuk ma i serangga. Didok rohakku dang na lao boi huallang i. Alai dung diida hami akka dongan menikmati makanan i, gabe olo ma hami mancoba. Tabo do hape daina.

Sada tikki adong ma sakelompok halak na menyerang akka huta di Kongo bagian timur, jala diserang nasida akka borua dohot dakdanak. Alani i lao ma hami tusi lao patoguhon akka dongan jala mambagihon kebutuhan ni nasida. Massai pogos do akka dongan disi. Alai massai togu do haporseaon ni nasida tu janji ni Jahowa taringot haheheon, massai togu do holong ni nasida tu Jahowa, jala setia tu organisasina. Hona do i tu rohanami. Gabe dirimangi hami ma alasannami manomba Jahowa jala lam bertekad ma hami patoguhon haporseaonnami tu Ibana. Godang do akka dongan disi na dirampas jabu dohot hasil ladangna. Gabe dipaingot do au, boi do hatop mago arta i, jala hubungatta tu Jahowa do na paling penting di ngolutta. Nang pe susa akka dongan i, dang hea nasida marungut-ungut. Teladan ni nasida mambahen hami barani mangadopi akka tantangan dohot masalah kesehatannami.

Dung i adong ma muse kejutan na asing. Diundang do hami asa pinda tu kantor cabang Hong Kong. Dang hea dibayakkon hami tinggal di benua Asia! Alai dung dirimangi hami songon dia Jahowa mangurupi hami mandalatton akka tugasnami, dijalo hami ma undangan i. Di taon 2013, ditinggalhon hami ma benua Afrika na bagak dohot akka dongannami disi. Massai lungun do rohanami, jala dang diboto hami aha na lao masa tu joloan ni ari on.

 Balga do penyesuaian na dibahen hami dung pinda tu Hong Kong. Kota na padat do i jala marragam do halak na tinggal disi. Sada tantangan do muse di hami marsiajar bahasa Kanton. Alai disambut akka dongan do hami, jala lomo hian do rohanami mangallang sipanganon disi. Massai godang do na dikarejohon di kantor cabang, alai hatop do naek arga ni properti. Alani i, diputusson Punguan na Mangaradoti Organisasi ma lao manjual hampir sude properti ni kantor cabang. Dang leleng dukkon i, di taon 2015, pinda ma hami tu Korea Selatan. Dison pe, ikkon marsiajar do hami bahasa na baru. Gabe tantangan do on muse di hami, alai dipatogu akka dongan do hami. Didok nasida godang do kemajuan na dibahen hami marbahasa Korea.

Dang sai mura mangalului dongan na baru. Alai diboto hami ma molo berinisiatif hami mengajak akka dongan bergaul, lam hatop ma ditanda hami nasida. Diboto hami ma unggodang do persamaannami sian perbedaannami tu nasida. Jala ditoppa Jahowa do hita asa boi mambukka rohatta jala makkaholongi akka dongan.—2 Kor. 6:11.

Marsiajar do hami asa mangida akka halak songon cara ni Jahowa mangida nasida. Jala ikkon dilului hami do petunjuk ni Jahowa dohot bukti na massai holong do rohana tu hami. Tikki metmet rohanami manang tikki ragu hami lomo do roha ni akka dongan tu hami manang na dang, dijaha hami ma akka kartu dohot surat na patoguhon sian akka dongan. Dialusi Jahowa do tangiangnami. Dipapos Jahowa do rohanami na massai holong do rohana tu hami jala dilehon Ibana do gogo tu hami asa boi martahan.

Saleleng martaon-taon, marsiajar do hami dang soal sadia sibuk hami, massai penting do mangalehon tikki tu pasangan. Marsiajar do muse hami porlu do mamparekkeli diri sandiri molo mambahen kesalahan tikki marsiajar bahasa na baru. Jala berupaya do hami tiap borngin mangarimangi akka na denggan na dinikmati hami jala mandok mauliate tu Jahowa.

Sasittongna dang hea tarpikkir au gabe misionaris manang tinggal di negara na asing. Alai sian pengalamankon, takkas do huida dang adong na so mungkin di Jahowa. Gabe huingot ma hata ni Panurirang Jeremia na mandok, “Ale Jahowa, . . .  dipapos Ho do rohakku.” (Jer. 20:7) Dilehon Jahowa do tu hami godang pasu-pasu na so hea dibayakkon hami. Bahkan dipasaut Jahowa do cita-citakku marpesawat tu godang inganan. Godang do inganan na didalani hami, lobi sian na hubayakkon tikki dakdanak au. Boi ma hami mangunjungi akka kantor cabang di lima benua. Massai huargai do dukungan ni si Lesli, sai diurupi ibana do au mandalatton akka tugashu.

Sai dirimangi hami ma ala na massai holong do rohanami tu Jahowa umbahen na olo hami melayani Jahowa. Akka na denggan na tahilala saonari patuduhon umbalga do pasu-pasu na lao tajalo haduan tikki mangolu salelengna. Di tikki i, ‘dibukka Jahowa do tanganna jala dilehon Ibana ma sude na porlu tu akka jolma’.​—Ps. 145:16.