1. Sesuai tu 1 Petrus 5:2, aha do tugas ni akka sintua?

 DILEHON Jahowa do tugas tu akka sintua melindungi biru-biruna na massai arga. Las do roha ni akka sintua na setia on mangurupi akka dongan jala berupaya do nasida gabe “parmahan na burju”. (Jer. 23:4; jaha 1 Petrus 5:2.) Pasti mandok mauliate do hita tu akka sintua di huriatta!

2. Tantangan aha do na bisa jadi diadopi akka sintua?

² Godang do tantangan na diadopi akka sintua tikki mandalatton tanggung jawab ni nasida. Alana godang do na ikkon diurus nasida. On ma na dihilala si Tony sahalak sintua di Amerika Serikat. Ikkon marsiajar do ibana asa seimbang tikki manjalo tugas. Didok ibana, “Di awal pandemi COVID-19, sibuk hian do au mangatur parpunguan dohot ulaon marbarita. Alani sibukna, gabe maol ma au mangatur tikki lao manjaha Bibel, marsiajar, dohot martangiang.” Asing do muse tantangan na diadopi si Ilir, sahalak sintua di Kosovo. Tikki masa porang di daerahna, maol hian do dihilala ibana mangihutton petunjuk sian organisasi. Didok ibana, “Sai diuji do habaraniokku tikki dilehon kantor cabang tugas lao mangurupi akka dongan di daerah na berbahaya. Mabiar do au jala huhilala hira na so cocok do petunjuk i.” Molo si Tim sahalak misionaris di Asia, maol do dihilala ibana mangulahon tugasna tiap ari. Didok ibana, “Sipata palojahu do huhilala mangurus kebutuhan ni akka dongan.” Aha ma na boi mangurupi akka sintua molo songon i tantangan ni nasida?

3. Aha do manfaatna mamparsiajari teladan ni si Gidion?

³ Boi do akka sintua marsiajar sian teladan ni si Gidion. (Heb. 6:12; 11:32) Sahalak panguhum do ibana jala parmahan ni  bangso ni Debata. (Pangh. 2:16; 1 Kron. 17:6) Songon si Gidion, dipillit do akka sintua lao mangurus naposo ni Debata saleleng ari parpudi on. (Ul. 20:28; 2 Tim. 3:1) Boi do akka sintua marsiajar sian si Gidion asa boi patuduhon serep ni roha, unduk ni roha, jala asa unang menyerah tikki mangulahon tugasna. Asing ni i, akka na so sintua pe boi do lam mangargai jala mendukung akka sintua marhite mamparsiajari teladan ni si Gidion.​—Heb. 13:17.

4. Songon dia do si Gidion patuduhon serep ni roha?

⁴ Halak na serep roha do si Gidion jala disadari ibana do keterbatasanna. b Tikki dipaboa suru-suruan ni Jahowa naung dipillit do si Gidion lao paluahon halak Israel sian halak Midian, didok si Gidion ma, “Keluargakku do na ummetmet di marga Manasse. Jala au ma na so apala sangap di keluarga ni bapakku.” (Pangh. 6:15) Dihilala si Gidion dang layak ibana manjalo tugas i, alai diboto Jahowa do na sanggup ibana mangulahon tugas i. Alani bantuan ni Jahowa, marhasil do si Gidion mandalatton tugasna.

5. Di situasi sisongon dia do serep ni roha ni akka sintua diuji?

⁵ Berupaya do akka sintua lao patuduhon serep ni roha di sasude. (Mik. 6:8; Ul. 20:18, 19) Dang olo nasida mambangga-banggahon akka na dicapai nasida. Dang gabe sai disalahon nasida dirina ala hea mambahen kesalahan. Alai sipata olo do diuji serep ni roha ni akka sintua. Misalna, olo do dijalo nasida piga-piga tugas alai belakangan maol nasida pasaehon i. Diuji do muse serep ni roha ni nasida tikki adong na mangkritik cara ni nasida makkarejohon sada tugas, manang adong na mamuji cara ni nasida menangani tugas na asing. Tikki masa situasi sisongon i, aha do na boi ditiru akka sintua sian si Gidion?

6. Aha do na boi diparsiajari akka sintua sian serep ni roha ni si Gidion? (Ida gambar.)

⁶ Pangido ma bantuan. Disadari halak na marserep ni roha do keterbatasanna. Serep do roha ni si Gidion, olo do ibana mangido bantuan ni na asing. (Pangh. 6:27, 35; 7:24) Akka sintua na marbisuk boi do mangulahon na sarupa. Si Tony naung dipaboa nakkin mandok, “Nungnga terbiasa au manjalo tugas lobi sian na sanggup huulahon, ala songon i au dipagodang-godang. Jadi dibahas hami ma taringot serep ni roha di ibadat keluarganami  jala husukkun ma pandapot ni istrikku. Dibahas hami do muse video di jw.org na marjudul Ajari, Haporseai jala Marpos ni Roha ma Songon Jesus.” Dukkon i mulai ma ditogihon si Tony akka dongan asa mangurupi ibana. Didok si Tony, “Gabe denggan ma mardalan akka ulaon di huria, jala boi ma hubahen tikkikku lao patoguhon parale-aleokku tu Jahowa.”

7. Songon dia do akka sintua boi maniru si Gidion tikki dikritik? (Jakobus 3:13)

⁷ Unang ma muruk molo adong na mangkritik hamu. Olo do diuji serep ni roha ni akka sintua tikki dikritik nasida. Marsiajar ma teladan ni si Gidion. Diboto si Gidion do dang sempurna ibana. Alani i boi ma ibana tetap tenang tikki dikritik halak Epraim ibana. (Pangh. 8:1-3) Dang gabe muruk si Gidion mangalusi nasida. Serep do rohana, olo do ibana manangihon, jala lambok do ibana mangalusi nasida. Hasilna gabe dang muruk be halak Epraim. Songon si Gidion, berupaya do akka sintua manangihon jala lambok mangalusi tikki dikritik. (Jaha Jakobus 3:13.) Molo dibahen nasida songon i, gabe toktong ma dame huria.

8. Songon dia do seharusna sikap ni akka sintua tikki dipuji? Paboa ma contohna.

⁸ Arahon ma pujian tu Jahowa. Tikki dipuji na asing si Gidion ala marhasil manaluhon halak Midian, diarahon ibana do pujian i tu Jahowa. (Pangh. 8:22, 23) Songon dia do akka sintua boi maniru si Gidion? Ikkon dipuji nasida do Jahowa alani sude naung marhasil diulahon nasida. (1 Kor. 4:6, 7) Misalna molo dipuji sahalak sintua ala malo ibana mangajari, boi do ibana mangurupi akka dongan asa berfokus tu sumber ni pengajaran i, i ma Hata ni Debata manang tu pelatihan na dibahen organisasi. Boi do muse dirimangi akka sintua songon dia cara ni nasida mangajari, pasangappon Jahowa do manang holan asa terkesan akka halak. Taida ma pengalaman ni sahalak sintua na margoar si Timothy. Tikki baru dilantik ibana, las do rohana pasahatton jamita. Didok ibana, “Jotjot do au dipuji ala malo au mambahen hata pamukka na ganjang dohot ilustrasi na mantap. Alai gabe holan tu au do fokus ni nasida, dang tu Bibel manang tu Jahowa.” Ujungna disadari si Timothy ma ikkon diuba ibana do carana mangajari asa unang holan tu ibana be fokus ni akka dongan. (Poda 27:21) Aha ma hasilna? Didok ibana, “Saonari godang do dongan na mandok akka jamita na hupasahat boi mangurupi nasida mangadopi masalah, asa unang menyerah, jala mambahen nasida lam jonok tu Jahowa. Umlas do rohakku saonari alani hata ni nasida i dibandingkon tu pujian ni nasida piga-piga taon naung salpu.”

9. Songon dia do unduk ni roha dohot habaranion ni si Gidion diuji? (Ida gambar sampul.)

⁹ Dung ditugasson si Gidion lao mamimpin bangso Israel, ikkon barani do ibana jala unduk. Disuru do muse ibana lao mangaruppakkon langgatan ni Baal appuna ni bapakna. Tugas na berbahaya do i. (Pangh. 6:25, 26) Belakangan dung dipapungu ibana akka tentarana, disuru do ibana sappe dua hali lao mangorui godang ni tentarana i. (Pangh. 7:2-7) Dang holan i, disuru do muse ibana menyerang perkemahan ni musu di tonga borngin.​—Pangh. 7:9-11.

10. Songon dia do unduk ni roha ni akka sintua diuji?

¹⁰ Akka sintua ikkon rade do “mangoloi”. (Jak. 3:17) Ikkon rade do sahalak sintua mangihutton na didok ni Bibel dohot petunjuk sian organisasi. Molo dibahen nasida songon i, gabe sitiruon ma nasida tu na asing. Olo do diuji unduk ni rohana tu Jahowa. Uppamana, olo do dilehon tu ibana godang petunjuk manang hatop muba akka petunjuk i. Alani i gabe maol do ibana menerappon akka petunjuk i.  Jala sipata, olo do sukkun-sukkun rohana cocok dope petunjuk on manang na daong. Bisa jadi dilehon do muse tugas na boi mambahen ibana dipenjarahon. Di akka situasi i songon dia do akka sintua boi maniru si Gidion?

11. Aha do na ikkon diulahon akka sintua tikki mandapot petunjuk?

¹¹ Denggan ma tangihon petunjuk jala ulahon ma i. Dipaboa Jahowa do tu si Gidion songon dia carana mangaruppakkon langgatan ni bapakna, didia ikkon dibahen ibana langgatan na baru lao tu Jahowa, jala binatang na songon dia na lao dipelehon. Dang diraguhon si Gidion petunjuk ni Jahowa i, alai pittor diulahon ibana do i. Saonari pe dapot ni akka sintua do petunjuk sian organisasi marhite surat, boa-boa, dohot pedoman. On sude mangurupi hita asa tetap sehat jala jonok tu Jahowa. Holong do rohatta tu akka sintua ala setia nasida mangihutton petunjuk sian organisasi jala sude na di huria boi mandapot manfaat.​—Ps. 119:112.

12. Songon dia do akka sintua boi menerappon Heber 13:17 molo adong perubahan na dibahen organisasi?

¹² Rade ma mangihutton perubahan. Dipangido Jahowa do tu si Gidion asa mangorui hampir sude tentarana. (Pangh. 7:8) Mungkin ro do tu pikkiran ni si Gidion, ‘Boasa ikkon adong perubahan? Marhasil do annon hami?’ Nang pe songon i, tetap do unduk si Gidion. Akka sintua pe saonari maniru si Gidion do, rade do nasida menerappon perubahan na dibahen organisasi. (Jaha Heber 13:17.) Misalna di taon 2014, dibahen Punguan na Mangaradoti Organisasi ma perubahan taringot songon dia pembangunan Bale Harajaon dohot Bale Kebaktian dibiayai. (2 Kor. 8:12-14) Sebelumna, organisasi maminjappon hepeng tu huria lao mambangun Bale Harajaon jala belakangan dibayarhon huria ma pinjaman i. Alai saonari organisasi mamakke sumbangan sian sude huria na adong di liat portibi on lao mambangun Bale Harajaon dohot Bale Kebaktian di tempat na dihaporluhon, nang pe huria na mamakke i holan boi menyumbang saotik. Tikki diboto si José perubahan on, ragu do ibana na lao marhasil i. Dipikkir ibana, ‘Dang adong nanggo sada pe annon Bale Harajaon na dibangun, jala dang somal cara sisongon i dison.’ Aha do mangurupi si José asa rade mangihutton petunjuk i? Didok ibana, “Poda 3:5, 6 paingotton au asa porsea tu Jahowa. Luar biasa do hasilna. Godang do Bale Harajaon na boi dibangun, jala boi ma dipakke sumbangan i lao manutupi na hurang di inganan na asing.”

13. (a) Aha do na mambahen si Gidion gabe barani? (b) Songon dia do akka sintua maniru si Gidion? (Ida gambar.)

¹³ Barani ma mangulahon lomo ni roha ni Jahowa. Dioloi si Gidion do paretta ni Jahowa nang pe mabiar ibana jala boi parohon bahaya tugasna i. (Pangh. 9:17) Dung dipapos Jahowa rohana, gabe dang ragu be si Gidion pasti diurupi Jahowa do ibana lao melindungi naposona. Akka sintua na tinggal di daerah  na mangorai ulaonta pe maniru si Gidion do. Barani do nasida manguluhon parpunguan dohot ulaon marbarita nang pe boi i mambahen nasida ditakkup, diinterogasi, kehilangan pekerjaan, manang dianiaya. c Saleleng hasusaan bolon haduan, ikkon barani do akka sintua mangihutton petunjuk aha pe na dilehon tu nasida, nang pe bisa jadi do i berbahaya. Misalna, olo do tadapot petunjuk songon dia carana pasahatton barita panguhuman, manang songon dia hita asa boi selamat tikki ro serangan ni Gog na sian Magog.​—Hes. 38:18; Pgk. 16:21.

14. Aha do buktina dang menyerah si Gidion mangulahon tugasna?

¹⁴ Kerja keras do si Gidion mangulahon tugasna gabe sahalak panguhum. Tikki melarikan diri halak Midian saleleng parporangan di tonga borngin, dilele si Gidion do nasida mulai sian Rura Jisreel sahat tu Sunge Jordan. Ikkon dibolus nasida do ra akka ramba-ramba na marsuga. (Pangh. 7:22) Gabe so do si Gidion tikki sahat di Sunge Jordan? Daong. Nang pe nungnga loja ibana dohot 300 tentarana, menyeberang do nasida jala torus mangalele halak Midian. Ujungna boi ma dapot ni nasida halak Midian jala ditaluhon ma nasida.​—Pangh. 8:4-12.

15. Boasa sipata maol sahalak sintua mangulahon tugasna?

¹⁵ Olo do massai loja dihilala sahalak sintua ala godang tanggung jawabna di huria dohot di keluarga. Di situasi sisongon i, songon dia do akka sintua maniru si Gidion?

16-17. Aha do na mangurupi si Gidion asa unang menyerah? (b) Songon dia do akka sintua boi maniru si Gidion? (Jesaya 40:28-31) (Ida gambar.)

¹⁶ Pos ma rohamuna lehonon ni Jahowa do gogo tu hamu. Pos do roha ni si Gidion lehonon ni Jahowa do gogo tu ibana, jala memang i do na dibahen Jahowa. (Pangh. 6:14, 34) Hea do mardalan pat si Gidion dohot akka tentarana mangalele dua raja ni Midian na naek unta. (Pangh. 8:12, 21) Alai diurupi Jahowa do halak Israel mangalele jala manaluhon nasida.  Akka sintua pe boi do mangandalhon Jahowa na so hea “loja manang gale”. Pasti lehonon ni Jahowa do gogo tu nasida tikki sadihari pe.​—Jaha Jesaya 40:28-31.

¹⁷ Parrohahon ma pengalaman ni si Matthew sahalak anggota Panitia Penghubung Rumah Sakit. Aha do na mangurupi ibana asa martahan? Si Matthew mandok, “Huhilala do songon na disurat di Pilippi 4:13 i. Jotjot do au loja jala hira na so sanggup be mangulahon manang aha. Alani i martangiang ma au mangido tu Debata asa dilehon tu au gogo na huhaporluhon lao mangurupi akka dongan. Di tikki sisongon i ma boi huhilala tondi parbadia ni Jahowa mangalehon gogo tu au jala mangurupi au asa unang menyerah.” Songon si Gidion, godang do tantangan na diadopi akka sintua tikki mangurus biru-biru ni Debata. Memang ikkon disadari nasida do keterbatasanna, jala dang sai boi nasida mangulahon tugas songon na dihalomohon nasida. Alai, porsea do nasida tu Jahowa pasti ditangihon Jahowa do tangiang ni nasida jala lehononna gogo asa boi mangulahon tugasna.​—Ps. 116:1; Plp. 2:13.

18. Sian pembahasan di artikel on, songon dia ma akka sintua boi maniru si Gidion?

¹⁸ Godang do na boi ditiru akka sintua sian si Gidion. Porlu do nasida mangakkui keterbatasanna jala patuduhon serep ni roha. Ikkon seimbang do nasida taringot sadia godang tugas na boi diulahon nasida jala molo adong halak na mamuji manang na mangkritik nasida. Ikkon dipatudu nasida do muse habaranion dohot unduk ni roha, tarlumobi ala nungnga lam jonok be ujung ni portibi ni Sibolis on. Asing ni i dang soal tantangan aha pe na diadopi nasida, ikkon pos do roha ni nasida na lehonon ni Jahowa do gogo tu nasida. Mandok mauliate do hita tu akka sintua na kerja keras di huria jala torus ma taargai nasida.​—Plp. 2:29.