1-2. Songon si Lot, aha do tantangan na diadopi halak Kristen saonari?

 TIKKI taida pangalaho ni akka halak saonari, boi ma tahilala songon dia perasaan ni si Lot. ‘Marsak situtu do ibana alani ulaon ni akka parjahat na so umboto ila’ ala diboto ibana sogo do roha ni Debata tu pangalaho sisongon i. (2 Ptr. 2:7, 8) Ala dihaholongi jala dihabiari si Lot Debata, sogo do rohana tu akka pangalaho na rorang na masa di sakalilingna. Hita pe saonari dikalilingi akka halak na so mangargai standar moral ni Jahowa. Alai nang pe songon i, boi do toktong denggan pangalahotta molo torus tahaholongi Debata jala torus tahabiari Ibana.—Poda 14:2.

² Diurupi Jahowa do hita marhite akka nasehat na adong di bukku Poda. Sude halak Kristen, bawa, borua, na poso, dohot na matua boi mandapot manfaat sian akka nasehat na adong disi.

3. Sesuai tu Poda 17:3, aha do alasanna boasa ikkon tajaga rohatta? (Ida gambar.)

³ Alasan utama boasa ikkon tajaga rohatta, i ma ala dipareso Jahowa do rohatta. Maksudna boi do diida Ibana aha na adong di bagasan rohatta jala halak na songon dia hita sasittongna. (Jaha Poda 17:3.) Dihaholongi Ibana do hita molo torus tapikkirhon nasehatna na boi mambahen hita mangolu salelengna. (Joh. 4:14) Alani i, unang ma olo hita dipengaruhi  gabus ni Sibolis dohot maniru pangalaho ni akka parjahat. (1 Joh. 5:18, 19) Lam jonok hita tu Jahowa lam holong ma rohatta tu Ibana jala lam tapasangap ma Ibana. Haru mamikkirhon na sala pe dang olo hita, ala dang lomo rohatta mambahen haccit roha ni Bapakta. Tikki adong godaan lao mangulahon na sala, tasukkun ma diritta, ‘Sengaja do au mambahen haccit roha ni Debata na massai holong rohana tu au?’—1 Joh. 4:9, 10.

4. Songon dia biar tu Jahowa melindungi sahalak donganta borua sian godaan lao mangulahon na sala?

⁴ Sahalak donganta borua di Kroasia na margoar si Marta hea do tergoda lao mangulahon seks na so patut. Didok ibana, “Maol do huhilala asa toktong ias pikkiranku jala mangalo keinginan lao mangulahon na sala. Alai biar tu Jahowa melindungi au.” b Boasa didok ibana songon i? Ala dirimangi si Marta do akibatna molo diulahon ibana seks na so patut. Hita pe taulahon ma songon i. Taingot ma akibat na paling parah molo taulahon dosa, gabe tabahen haccit roha ni Jahowa jala dang boi be tasomba Ibana saleleng ni lelengna.—1 Mus. 6:5, 6.

5. Aha do na boi taparsiajari sian pengalaman ni si Leo?

⁵ Molo mabiar hita tu Jahowa, dang olo hita marale-ale tu akka halak na so denggan pangalahona. On ma na diparsiajari si Leo na tinggal di Kongo. Opat taon dung tardidi ibana, marale-ale ma ibana dohot akka halak na roa pangalahona. Didok rohana dang sala i saleleng dang diulahon ibana akka pangalaho na roa i. Alai dang leleng dukkon i, gabe dohot ma ibana mabuk-mabuk jala mangulahon seks na so patut. Belakangan mulai ma muse dipikkirhon ibana akka na diajarhon natua-tuana dohot las ni roha na dihilala ibana tikki manomba Jahowa dope. Hasilna mulai  ma denggan muse cara berpikirna. Diurupi sintua ma ibana jala mulak ma muse ibana manomba Jahowa. Saonari nungnga gabe sahalak sintua ibana jala perintis istimewa.

6. Manggombarhon aha do dua borua na dipaboa di Poda bindu 9?

⁶ Saonari tabahas ma jo taringot Poda bindu 9, na paboahon taringot dua borua. Sada sian borua i manggombarhon bisuk jala na sada nai manggombarhon haotoon. (Bandingkon tu Rom 5:14; Galatia 4:24.) Tikki tabahas i, ingot ma sai berusaha do portibi na dirajai Sibolis on manjujui akka halak asa mangulahon seks na so patut jala mangida pornografi. (Eps. 4:19) Alani i massai penting do hita asa torus makkabiari Debata jala berupaya asa unang mangulahon na jahat. (Poda 16:6) Sude do hita dang soal bawa manang borua boi mandapot manfaat sian Poda bindu 9 i. Disi dipaboa do taringot dua borua na mangundang halak na so marpengalaman manang “halak na oto”. Didok nasida, ‘Ro ma ho tu jabukku jala allang ma rotikku.’ (Poda 9:1, 5, 6, 13, 16, 17) Alai asing be do na lao masa tu akka halak na manjalo undangan ni nasida i.

7. Sesuai tu Poda 9:13-18, aha do na lao masa tu akka halak na manjalo undangan ni borua na oto? (Ida gambar.)

⁷ Jaha ma undangan ni “borua na oto” i. (Jaha Poda 9:13-18.) Dang maila ibana manjou akka halak na so marpengalaman asa ro tu jabuna jala mangallang sipanganon na diparade ibana. Aha do na lao masa tu na manjalo undangan i? Na lao masuk na nasida tu “bagasan Kuburan”. Didok tu “bagasan Kuburan do akka tamuna”. Ra diingot hamu do istilah na sarupa na adong disurat di bagian awal ni bukku Poda. Dipasingot do hita taringot “boru-boru sibabi jalang” dohot “boru-boru na so hasea”. Dipaboa do muse tu hita disi “na mandapotton hamatean do molo lao tu jabuna”. (Poda 2:11-19) Di Poda 5:3-10 pe dipasingot do hita taringot “boru-boru na so hasea” na ‘mangalakka turun tu hamatean’.

8. Keputusan aha do na ikkon tabahen?

⁸ Akka halak na mambege soara ni “borua na oto” i ikkon mamutusson dijalo nasida do undanganna i manang na daong. Hita pe ikkon mambahen keputusan do. Molo adong sasahalak na manjujui hita mangulahon seks na so patut manang molo toppu taida gambar pornografi, aha do na lao taulahon?

9-10. Boasa ikkon tahindari seks na so patut? Paboa ma piga-piga alasanna.

⁹ Adong dope alasan na denggan boasa dang boi hita mangulahon seks na so patut. “Borua na oto” na didok nakkin mandok,  “Manis do aek na ditakko.” Aha do “aek na ditakko” i? Di Bibel dipatudos do hubungan seks ni suami istri songon aek. (Poda 5:15-18) Bawa dohot borua naung sah menikah boi do menikmati hubungan seks dohot pasanganna. Asing do i tu seks na so patut, na dipatudos songon “aek na ditakko”. Biasana halak na mangulahon seks na so patut manabunihon ulaon ni nasida i asa unang diboto na asing, dos songon sasahalak na sip-sip manakko. Hira na manis do “aek na ditakko” i ala dirippu nasida dang adong na lao mamboto i. Alai sasittongna na mangoto-otoi dirina sandiri do nasida disi, alana diida Jahowa do sudena i. Dang adong be na umhaccit molo sega parale-aleotta tu Jahowa, jala pasti dang “manis” i. (1 Kor. 6:9, 10) Alai adong dope alasan na asing.

¹⁰ Molo taulahon seks na so patut boi do i parohon ila tu hita, mambahen hita merasa dang mararga, kehamilan yang tidak diinginkan, jala mambahen hancur keluarga. Takkas ma na marbisuk do hita molo tatolak undangan ni borua na oto i. Godang do halak na mangulahon seks na so patut dang holan sega parale-aleonna tu Jahowa, alai gabe marsahit ma nasida jala ujungna gabe hatop mate. (Poda 7:23, 26) Sesuai do i tu Poda 9:18 na mandok, “Di bagasan Kuburan do akka tamuna.” Attong boasa ma godang halak manjalo undangan ni borua na oto i hape ujungna parohon jea do i tu nasida?—Poda 9:13-18.

11. Boasa ikkon tahindari pornografi?

¹¹ Sada na mambahen godang halak tergoda manjalo undangan ni borua na oto i, i ma alani pornografi. Adong do halak na marpikkir dang sala mangida pornografi. Alai sasittongna berbahaya do i. Gabe leas rohana mangida dirina sandiri dohot halak na asing, jala maol do pasohon kebiasaan mangida pornografi. Molo diida sasahalak gambar na rorang, maol do ibana mangalupahon i. Pornografi dang mangurupi sasahalak mambolokkon keinginan na sala, gariada gabe lam kuat do keinginan i. (Kol. 3:5; Jak. 1:14, 15) Godang do halak na mangida pornografi ujungna gabe mangulahon seks na so patut.

12. Songon dia do hita patuduhon na tahindari akka gambar na rorang?

¹² Aha do na ikkon taulahon molo toppu taida pornografi di perangkat elektronikta? Unang ma torus taida i. Ummura do hita mangulahon i molo taingot hubungatta tu Jahowa do na ummarga di hita. Ikkon tahindari do muse akka gambar na boi mambahen hita mamikkirhon na rorang, nang pe i dang pornografi. Alana boi do akka gambar i mambahen hita mangulahon seks na so patut bahkan di bagasan rohatta. (Mat. 5:28, 29) Sahalak sintua di Thailand na margoar si David mandok, “Husukkun do dirikku, ‘Tung pe dang pornografi akka gambar i, alai las do roha ni Jahowa molo sai huida i?’ Sukkun-sukkun on mangurupi au asa denggan pangalahokku.”

13. Aha do na boi mangurupi hita asa denggan pangalahotta?

¹³ Molo tahabiari Jahowa, dang olo hita mambahen haccit rohana. Boi do on mangurupi hita asa denggan pangalahotta. Biar mida Jahowa do “parmulaan ni bisuk”. (Poda 9:10) Saonari tabahas ma taringot borua na asing na manggombarhon bisuk, na dipaboa di Poda bindu 9.

14. Undangan aha do muse na dipaboa di Poda 9:1-6?

¹⁴ Jaha Poda 9:1-6. Di ayat i, tajaha do undangan sian Jahowa, Sitoppa hita dohot Mual ni bisuk. (Poda 2:6; Rom 16:27) Disi dipaboa do taringot sada jabu na balga dohot pitu tiang. On manggombarhon Debata na burju  do Jahowa i. Disambut Ibana do sude halak na olo marsiajar taringot bisukna.

15. Undangan aha do na dilehon Jahowa tu hita?

¹⁵ Sian akka ayat di Poda bindu 9 na paboahon taringot borua na manggombarhon “bisuk”, marsiajar do hita Debata na burju do Jahowa jala mangalehon godang akka na denggan tu hita. Nungnga diparade borua i jagal, dicampur ibana anggur, jala diparade ibana ma i sude di meja. (Poda 9:2) Dung i di ayat 4 dohot 5, didok borua i ma tu akka halak na oto, “Ro ma hamu tuson, allang ma rotikku.” Boasa ikkon tajalo undangan i? Alana lomo do roha ni Jahowa asa marbisuk sude anakna jala tetap aman. Dang olo Ibana taulahon na sala na ujungna tasolsoli jala mambahen susa ngolutta. I do alana “disippan Ibana do bisuk dos songon arta tu akka halak na tigor marroha”. (Poda 2:7) Molo tahabiari Jahowa, pasti berupaya do hita mambahen las rohana. Tatangihon ma akka nasehatna, jala las rohatta mangulahon i di ngolutta.—Jak. 1:25.

16. Songon dia do biar tu Jahowa mangurupi si Aldo mambahen keputusan na marbisuk, jala aha do hasilna?

¹⁶ Taida ma songon dia biar tu Debata mangurupi si Aldo mambahen keputusan na marbisuk. Sahalak sintua do ibana jala guru di sikkola. Didok ibana, “Godang do guru na mandok dang sala manonton pornografi, alana pendidikan seks do i menurut nasida.” Alai diboto si Aldo sala do i. Didok ibana, “Ala mabiar au tu Jahowa, tegas do hudok tu nasida dang olo au manonton akka film sisongon i, jala hupaboa do alasanna.” Takkas ma, diihutton si Aldo do “dalan ni bisuk”. (Poda 9:6) Adong do piga-piga guru na terkesan tu sikap ni si Aldo. Saonari marsiajar Bibel do nasida jala ro tu parpunguan.

17-18. Manfaat aha do na dihilala akka halak na manjalo undangan ni “bisuk” i saonari dohot di ari na naeng ro? (Ida gambar.)

¹⁷ Dipakke Jahowa do tudosan taringot dua borua lao patuduhon songon dia carana asa boi marlas ni roha hita di ari na naeng ro. Akka halak na manjalo undangan sian “borua na oto”, sip-sip do nasida mangulahon seks na so patut. Hira na “manis” do i, alai dang dipikkiri nasida akibatna di ari na naeng ro. Bibel mandok lao masuk ma nasida ‘tu bagasan Kuburan’.—Poda 9:13, 17, 18.

¹⁸ Alai imbar do na dihilala akka halak na manjalo undangan ni “bisuk” i! Marlas ni roha do nasida ala boi mandapot sude na dihaporluhon nasida asa toktong jonok tu Jahowa. (Jes. 65:13) Marhite Panurirang Jesaya didok Jahowa do, “Tangihon hamu ma Au,  allang hamu ma sipanganon na denggan, jala las situtu ma rohamuna mangallang tabo-tabo.” (Jes. 55:1, 2) Marsiajar do hita makkaholongi akka na dihaholongi Jahowa jala makkasogohon akka na dihasogohon rohana. (Ps. 97:10) Las do muse rohatta mangundang akka halak asa marsiajar jala mandapot manfaat sian bisuk ni Debata. Hira na “jou-jou do hita sian inganan na timbo di kota mandok, ‘Manang ise na so marpengalaman, ro ma tuson’”. Manfaat na tadapot dohot akka halak na menyambut undanganta dang holan tahilala saonari. Alai leleng do i martahan. Molo torus taihutton “dalan ni bisuk”, boi ma hita mangolu saleleng ni lelengna.—Poda 9:3, 4, 6.

19. Sesuai tu Parjamita 12:13, 14, aha do tekadta? (Ida kotak “ Labana Makkabiari Debata.”)

¹⁹ Jaha Parjamita 12:13, 14. Sai anggiat ma biar tu Jahowa manjaga rohatta, mangurupi hita asa toktong ias pangalahotta, jala toktong jonok tu Jahowa saleleng ari parpudi na jahat on. Jala sai anggiat ma biar tu Jahowa menggerakkon hita asa torus mangundang akka halak lao mangalului bisuk ni Jahowa jala mandapot manfaat sian i.