1, 2. (a) Boasa pandidion i ulaon na marsitutu? Patorang ma. (b) Aha do na ingkon diingot sasahalak andorang so tardidi?

MOLO hamu sahalak na poso na rade laho tardidi, sada hak na sumurung do i di hamu. Songon naung taparsiajari, pandidion i ulaon na marsitutu. On patuduhon naung dilehon hamu dirimu tu Jahowa. Alani i, nunga marjanji hamu tu Ibana mangulahon lomo ni rohaNa salelengna jala i ma na rumingkot di ngolumuna. Ala hamu nunga marjanji tu Debata, parjolo ma hamu matoras di partondion asa tardidi. Rade hamu tardidi ala nunga diboto hamu lapatan ni pandidion i.

² Alai, olo do ra pangkilalaanmu ndang rade dope laho tardidi. Manang, nunga rade hamu tardidi, alai olo do ra natuatuamu mandok ndang adong dope pengalamanmu manang paposohu dope hamu laho tardidi. Unang ma gabe mandele. Alai, bahen ma hamajuon di partondion asa boi hamu tardidi. Alani i, marsitutu ma hamu: (1) patoguhon haporseaon, (2) lam denggan marparange jala (3) mandok mauliate.

3, 4. Aha do parsiajaran tu angka na poso sian si Timoteus?

³ Pingkirhon ma, songon dia alusmuna tu sungkunsungkun on: Boasa porsea ahu adong Debata? Boasa pos rohangku, Bibel i hata ni Debata? Boasa huoloi parenta ni Debata, ndang mangihuthon parange ni portibi on? Sungkunsungkun on boi mangurupi hamu mangihuthon poda ni apostel Paulus, ”Asa tau hamu manimbangi lomo ni roha ni Debata, i ma na uli, na hinalashonna dohot na sun denggan.” (Rom 12:2) Boasa ringkot ulahononmuna i?

⁴ Sitiruon sian si Timoteus boi mangurupi hita. Denggan do diantusi ibana Hata ni Debata ala nunga diajarhon omakna dohot ompung boruna i tu ibana. Alai, didok si Paulus dope tu si Timoteus, ”Alai anggo ho, sai mian ma di bagasan angka na ginuruhon jala naung hinaporseaanmi.” (2 Tim. 3:14, 15) Hata ”naung hinaporseaanmi” lapatanna ”lam marpos ni roha tu hasintongan”. Si Timoteus nunga marhaporseaon jala nunga diboto hasintongan na diparsiajari sian Hata ni Debata. Dijalo ibana hasintongan i ndang holan ala disuru omakna manang ompung boruna laho ulahononna, alai ala naung dihaporseai do na pinarsiajaranna.—Jaha Rom 12:1.

5, 6. Boasa ringkot angka na poso marsiajar mamangke ”siala na togu” tingki poso?

⁵ Songon dia molo hamu? Ra, nunga leleng diboto hamu hasintongan. Molo songon i do, lului ma alana boasa dihaporseai hamu hasintongan i. Boi do i patoguhon haporseaonmu asa unang tarelaela tu pandapot ni dongan satorbang, cara marpingkir ni portibi on manang sian pangkilalaanmu sandiri.

⁶ Molo marsiajar hamu mamangke ”siala na togu”, boi ma alusanmu sungkunsungkun sian dongan satorbangmu, songon: ”Sian dia diboto hamu na tutu adong Debata? Molo dihaholongi Debata hita, boasa masa hajahaton? Sian dia do mula ni Debata?” Molo diparade hamu, ndang gabe ganggu rohamu alani angka sungkunsungkun songon i. Alai, boi do on mambahen rohamu taronjar laho mangalului alusna sian Bibel.

7-9. Patorang ma songon dia seri ”Apa yang Sebenarnya Alkitab Ajarkan?” paposhon rohamu asa hot di pangantusion na sintong.

⁷ Marhite parsiajaran Bibel na marsitutu, boi mangurupi hamu mangalusi sungkunsungkun, pasidingkon ganggu ni roha jala boi hot di pangantusion na sintong. (Ul. 17:11) Godang do publikasi na boi mangurupi hamu. Godang do na mandapot laba sian brosur Asal Mula Kehidupan—Lima Pertanyaan yang Patut Direnungkan dohot buku Apakah Ada Pencipta yang Mempedulikan Anda? Jala, godang angka na poso mandapot laba sian seri ”Apa yang Sebenarnya Alkitab Ajarkan?” na adong di jw.org. Lului di AJARAN ALKITAB. Sude panduan belajar on, dipatupa laho mangurupi hamu asa hot di pangantusion na sintong sian Bibel.

⁸ Molo jotjot hamu marsiajar Bibel, olo do ra nunga diboto hamu alus ni angka sungkunsungkun na adong di buku na pinarsiajaranmu. Alai, pos do rohamu tu alusmuna i? Buku i boi mangurupi hamu denggan mamboto isi ni Bibel jala mangonjar rohamu laho manurat taringot haporseaonmu. On boi mangurupi hamu patorangkon  haporseaonmu tu halak na asing. Molo boi do diida hamu di internet, i ma seri ”Apa yang Sebenarnya Alkitab Ajarkan?”, boi do pangkeonmu i di parsiajaran Bibelmu laho pahothon pangantusion na sintong.

⁹ Ingkon pos do rohamu tu hasintongan na pinarsiajaranmu asa boi hamu tardidi. Sahalak donganta borua na poso mandok, ”Andorang so tardidi, huparsiajari do Bibel jala huboto on do agama na sintong. Lam leleng, pos ma rohangku jala lam hot di pangantusion na sintong.”

10. Boasa dipangido sian halak Kristen naung tardidi haporseaon na marulaon?

¹⁰ Bibel mandok, ”Haporseaon i pe songon i do: Anggo so adong pangulaonna, naung mate do.” (Jak. 2:17) Molo togu do haporseaonmu, ingkon patuduhononmu do i sian parniulaon. Adong ma di hamu ”parange na badia dohot hadaulaton” songon na dipaboa di Bibel.​—Jaha 2 Petrus 3:11.

11. Patorang ma aha do na nidokna ”parange na badia”.

¹¹ Aha do ”parange na badia” i? Molo badia parniulaonta, ias ma parangenta. Umpamana, saleleng onom bulan on, hea do adong elaela tu hamu laho mangulahon na sala? Dipillit hamu do mangulahon na sintong? (Heb. 5:14) Diingot hamu do nandigan hamu parpudi ndang mangihuthon elaela ni dongan? Dipatudu hamu do parange na denggan tu dongan na asing tingki di parsingkolaan? Tongtong do hamu marsihohot tu Jahowa manang diihuthon hamu do ulaon ni dongan sakalasmu asa unang diinsahi? (1 Ptr. 4:3, 4) Tutu do, ndang adong jolma na sempurna. Halak naung martaontaon manomba Jahowa pe, olo do maila manang maol dihilala paboahon haporseaonna tu halak na asing. Alai, sasahalak naung mangalehon diri tu Debata, ndang maila paboahon ibana sahalak Sitindangi jala dipatudu do sian parangena na ias.

12. Aha do na nidokna ”hadaulaton” jala songon dia do pangkilalaanta taringot i?

¹² Aha do na nidokna ”hadaulaton”? Hadaulaton, i ma sude ulaonmuna di huria, songon parpunguan dohot marbarita. Na asing muse, ulaon na so diida halak songon tangiang dohot parsiajaran Bibel. Ndang gabe ulaon na dokdok on di sasahalak naung mangalehon diri tu Jahowa. Ingkon hilalaonna do songon na nidok ni Raja Daud, ”Dipangido rohangku do patupahon lomo ni roham, ale Debatangku, jala di parsitongaan ni rohangku do patikmi.”​—Ps. 40:9.

13, 14. Aha do na boi mangurupi hamu mangulahon ”hadaulaton” jala songon dia do donganta na poso mandapot laba sian i?

¹³ Adong do lembar kerja di buku Pertanyaan Kaum Muda​—Jawaban yang Praktis, Jilid 2 di halaman 308 dohot 309 na boi mangurupi hita laho mandapot na tahirim. Disi, boi do suratonmu alus ni sungkunsungkun songon: ”Aha do na ditangiangkon hamu jala songon dia do i patuduhon holongmuna tu Jahowa?” ”Aha do dipangke hamu di parsiajaran Bibelmu?” ”Laho do hamu marbarita na uli nang pe natuatuamu ndang laho?” Di lembar kerja i, boi do surathononmu aha na ringkot laho ulahononmu taringot tangiang, parsiajaran Bibelmu dohot di ulaon marbarita na uli.

¹⁴ Godang angka na poso na rade laho tardidi mandapot laba sian lembar kerja on. Donganta borua na margoar si  Hilda mandok, ”Husurat do di lembar kerja i aha na laho ulahononku. Huulahon ma sadasada na husurat i jala rade ma ahu tardidi dungkon sataon.” Donganta baoa na margoar si Patrick tongtong do mandapot laba, didok ibana, ”Huboto do aha na laho huulahon, alai dung husurat ingkon marsitutu do ahu mangulahon i.”

15. Patorang ma, boasa ingkon hamu sandiri na mamillit tingki mangalehon diri tu Debata.

¹⁵ Sada sungkunsungkun na adong di lembar kerja i, i ma ”Molo natuatuamuna manang donganmuna ndang be mangoloi Jahowa, tongtong do oloanmuna Jahowa?” Tingki dilehon hamu dirimu tu Jahowa jala tardidi, nunga maraleale hamu tu Jahowa. Alani i, dioloi hamu Jahowa ndang ala mangihuthon natuatuamuna manang halak na asing. Parangemuna na badia dohot hadaulaton, patuduhon hamu nunga mangantusi hasintongan jala mangihuthon aturan ni Debata. Dung i, boi ma hamu tardidi.

16, 17. (a) Aha do na mangonjar roha ni sasahalak gabe halak Kristen? (b) Songon dia do pangargaionmuna tu tobusan? Bahen ma tudosan.

¹⁶ Sada tingki, sahalak baoa na mangantusi Patik ni si Musa manungkun tu Jesus, ”Dia do patik raja sian angka patik i?” Didok Jesus ma, ”Sihaholonganmu do Tuhan Debatam sian nasa ateatem, sian nasa hosam dohot sian nasa roham!” (Mat. 22:35-37) Jesus patorangkon, ingkon holong tu Jahowa do na mangonjar roha ni sasahalak tardidi jala gabe halak Kristen. Dung i, cara na asing muse na patoguhon holongta tu Jahowa, i ma mangarimangi tobusan. (Jaha 2 Korint 5:14, 15; 1 Johannes 4:9, 19.) Molo tarimangi, taronjar ma rohanta mandok mauliate.

¹⁷ Mandok mauliate alani tobusan, boi dipatorang songon tudosan on. Pingkirhon ma hamu maup di sunge, alai adong sasahalak na manogu hamu. Pintor mulak do hamu tu jabu, marganti baju dung i ndang diingot hamu be halak na manogu i? Ndang! Mandok mauliate do hita ala naung dipalua ngolunta. Songon i ma, mandok mauliate do hita tu Jahowa alani tobusan ni Jesus. Alani i, marutang hangoluan do hita tu Jahowa ala naung dipalua hita sian dosa dohot hamatean. Alani holong ni nasida, tadapot ma pangkirimon hangoluan salelengna di Paradeiso!

18, 19. (a) Boasa ndang mabiar hita mangalehon diri tu Jahowa? (b) Songon dia do mangoloi Jahowa mambahen denggan ngolumuna?

 ¹⁸ Mandok mauliate do hamu tu sude naung binahen ni Jahowa? Patuduhon ma i marhite mangalehon diri tu Jahowa jala tardidi. Dung dilehon hamu dirimu jala tardidi, nunga marjanji hamu mangulahon lomo ni rohaNa salelengna. Mabiar do hamu marjanji tu Jahowa? Ndang! Na dumenggan do dilehon Jahowa tu hamu jala dipasupasu do sude halak na mangulahon lomo ni rohaNa. (Heb. 11:6) Tingki dilehon hamu dirimu tu Debata jala tardidi, ndang mambahen susa ngolumu alai mambahen denggan do! Sada donganta baoa naung marumur 24 taon na tardidi tingki poso mandok, ”Boi do gumodang pangantusionku dung balga ahu, alai marhite mangalehon diri tu Jahowa, mangondingi ahu asa unang mangalului hasangapon di portibi on.”

¹⁹ Na dumenggan do dihalomohon Jahowa, alai Sibolis ndang hea disarihon hamu. Ndang adong na denggan lehononna tu hamu molo diihuthon hamu ibana. Songon dia bahenonna mangalehon na so adong di ibana? Ndang adong di ibana barita na uli jala ndang adong pangkirimon. Holan angka na roa do na boi dilehon Sibolis tu hita, ala holan i do na adong di ibana!—Pgk. 20:10.

20. Aha do na boi ulahonon ni na poso mambahen hamajuon asa boi tardidi? (Ida kotak ”Na Mangurupi Hamu Mambahen Hamajuon.”)

²⁰ Na dumenggan di hita, i ma mangalehon diri tu Jahowa. Rade do hamu mangulahon i? Unang ma mabiar hita marjanji tu Ibana. Alai molo ndang rade dope hamu, bahen ma parsiajaran on patoguhon rohamu mambahen hamajuon. Dipaboa apostel Paulus tu halak Kristen na di Pilippi asa tongtong mambahen hamajuon. (Plp. 3:16) Molo diihuthon hamu do sipaingot on, boi do i mangonjar rohamu mangalehon diri tu Jahowa jala tardidi.