1, 2. (a) Sipaingot aha do na paluahon torop halak sian parmaraan? (Ida gombar di mula ni parsiajaran.) (b) Tudutudu aha do na dilehon tu naposo ni Debata.

”SO, IDA, PARROHAHON.” Nunga adong 100 taon naung salpu sipaingot on disurat di papan peringatan jonok ni rel kereta api di Amerika Utara. Boasa? Asa unang dilanggar kereta api mobil na lewat sian rel i. Godang do na malua sian parmaraan ala mamparrohahon sipaingot on.

² Dilehon Debata Jahowa do tu hita sipaingot na dumenggan sian na disurat di papan peringatan i. Ditogutogu Ibana do naposoNa asa malua sian parmaraan jala boi nasida mandapot hangoluan salelengna. Songon sahalak parmahan, dilehon Jahowa do tudutudu tu birubiruNa asa unang hona mara.—Jaha Jesaya 30:20, 21.

3. Boasa sude jolma mardosa jala mate?

³ Dilehon Jahowa do parenta manang tudutudu tu jolma  tingki ditompa nasida. Umpamana, di porlak Eden, dilehon Jahowa do tudutudu tu si Adam dohot si Hawa na manogunogu nasida tu hangoluan salelengna. (1 Mus. 2:15-17) Alai, ndang dioloi si Adam dohot si Hawa tudutudu i. Ditangihon si Hawa do hata ni ulok jala ditangihon si Adam hata ni si Hawa. Aha ma pangkorhon ni i? Susa ma nasida, ujungna matua jala mate. Dung i, alani dosanasida sude jolma manean dosa dohot hamatean.

4. (a) Aha do tudutudu na dilehon dungkon aek na sumar? (b) Aha do na taparsiajari sian patik ni Debata taringot mudar?

⁴ Dilehon Debata do tu si Noak tudutudu asa malua sian aek na sumar. Dung i, dilehon ma muse tudutudu na baru. Diloas Jahowa jolma mangallang jagal, alai diorai do nasida mangallang mudar. Didok Debata, ”Unang pangan hamu juhut [jagal], molo di bagasan dope hosana, mandok mudarna i.” (1 Mus. 9:1-4) Sian patik on, taboto ma pangkilalaan ni Debata taringot hangoluan. Ibana do nampuna hangoluan jala na mangalehon i tu hita, alani i Ibana do na tama mangalehon patik taringot hangoluan. Umpamana, patikNa mangorai jolma mambunu donganna. Badia do hangoluan dohot mudar di Debata jala ripashonon ni Jahowa do halak na so mangoloi patikNa taringot mudar.—1 Mus. 9:5, 6.

5. Aha do na laho taparsiajari jala aha do labana tu hita?

⁵ Tongtong do ditogutogu Debata naposoNa dungkon aek na sumar. Di parsiajaran on, taida ma tudosan songon dia Jahowa manogunogu nasida. Tudutudu sian Jahowa di tingki naung salpu, patoguhon rohanta asa mangihuthon tudutuduNa di ari na naeng ro.

6. Boasa dihaporluhon bangso Israel patik ni Debata jala boasa ingkon dioloi nasida i?

⁶ Dilehon Jahowa do tu bangso Israel tudutudu laho manomba Ibana. Boasa? Ala nunga muba na masa di parngoluon ni nasida. Lobi sian 200 taon, halak Israel tading di humaliang ni halak Mesir na manomba ganaganaan, tondi ni na mate dohot angka na asing na dihasogohon Debata. Alani i, porlu tudutudu na baru tu halak Israel dung malua nasida sian Mesir. Ala nasida nunga gabe sada bangso na ingkon mangihuthon patik ni Jahowa. Sada buku referensi paboahon, hata Heber ”patik” dos do lapatanna dohot ”tudutudu, panogunoguon manang parenta”. Patik mangurupi halak Israel asa unang mangulahon parmainanon dohot panombaon na sala, songon na diulahon ni bangso na asing di humaliang ni nasida. Molo dioloi nasida Debata, dapot nasida ma pasupasuNa. Alai molo ndang dioloi, hasusaan ma na masa tu nasida.—Jaha 5 Musa 28:1, 2, 15.

7. (a) Patorang ma boasa dilehon Jahowa tudutudu tu bangsoNa. (b) Songon dia do patik gabe panjaga na manogunogu halak Israel?

⁷ Porlu muse tudutudu na baru tu halak Israel asa diboto nasida sangkap ni Jahowa. Patik na dilehon tu halak Israel manogunogu nasida mananda Messias. Patik mangurupi halak Israel laho mamboto molo nasida ndang tipak (sempurna). Dung i, mangurupi nasida mangantusi tobusan na paluahon nasida sian dosa. (Gal. 3:19; Heb. 10:1-10)  Patik mangondingi keluarga ni Messias jala mangurupi halak Israel mamboto sian pinompar ni ise ro Messias. Patik i songon panjaga na manogunogu tu Kristus.—Gal. 3:23, 24.

8. Boasa ringkot hita ditogutogu prinsip na adong di Patik ni si Musa?

⁸ Halak Kristen pe, boi do mandapot laba sian patik na dilehon tu halak Israel. Songon dia i boi? Boi do hita so satongkin jala mangida prinsip ni patik i. Nang pe hita ndang mangihuthon patik na dilehon tu halak Israel, alai boi do tapangke patik i tingki manomba Jahowa manang di parngoluonta saonari. Disurat do patik i di Bibel jala boi tadapot laba sian angka prinsip na adong di patik i. Hita pe, boi mandok mauliate ala nunga taboto patik na dumenggan na diajarhon ni Jesus. Parrohahon ma hata ni Jesus, ”Dibege hamu do hata na tu angka ompu na robi: ’Unang ho mangalangkup!’ Alai Ahu mandok tu hamu: Manang ise na mamereng boruboru huhut marsangkap na roa, nunga saut dilangkup i di bagasan rohana.” Alani i, ingkon tajaga do pingkiran dohot hagiot ni daging asa unang mamingkirhon ulaon parmainanon.—Mat. 5:27, 28.

9. Aha do na masa umbahen porlu tudutudu na baru sian Debata?

⁹ Dung ro Messias, i ma Jesus, dilehon Jahowa ma tudutudu na baru na paboahon lam tangkas sangkapNa. Boasa dihaporluhon i? Ala ndang dijangkon Jahowa be bangso Israel, dipillit ma halak Kristen gabe sada bangso di Ibana. Alani i, muba ma muse na masa di parngoluon ni angka naposo ni Debata.

10. Boasa dilehon patik na baru tu huria Kristen jala aha do imbar ni i dohot patik na dilehon tu halak Israel?

¹⁰ Dilehon Jahowa do patik tu halak Israel asa diboto nasida laho manomba Ibana. Di abad na parjolo, naposo ni Debata ndang dipillit sian sada bangso, alai dipillit do sian sude bangso jala didok ma nasida saonari Israel ni Debata. Nasida do huria Kristen na mangihuthon padan na imbaru. Dilehon Jahowa do tudutudu na baru tu nasida laho manomba Ibana. Tutu ma, ”dos do dibahen Debata tu ganup jolma. Manang aha pe bangso ni i, asal ma dioloi Debata jala diulahon na sintong di joloNa, dihalomohon Debata do i”. (Ul. 10:34, 35, Bibel siganup ari) Diihuthon nasida do ”patik ni Kristus” na tarsurat di rohanasida. Patik on marlaba jala manogunogu halak Kristen didia pe nasida maringanan.—Gal. 6:2.

11. Aha do dua parenta na dilehon tu halak Kristen marhite ”patik ni Kristus”?

¹¹ Israel ni Debata mandapot laba sian panogunoguon ni Jahowa marhite Jesus. Andorang so dibahen Jesus dope padan na imbaru, dilehon ma dua parenta. Na parjolo, taringot marbarita na uli. Na paduahon, parange ni halak Kristen maradophon donganna. Tudutudu on ingkon ulahonon ni sude halak Kristen jala i do na taihuthon saonari nang pe hita mangkirim mangolu di surgo manang di tano on.

12. Aha do parenta na baru taringot ulaon marbarita?

¹² Najolo, marroan do halak sian bangso na asing tu Israel laho manomba Jahowa. (1 Raj. 8:41-43) Alai, di  Mateus 28:19, 20. (Jaha.) disuru Jesus do siseanna ”laho” tu sude bangso. Di ari Pentakoste taon 33 M, tarida ma, dihalomohon Jahowa barita na uli dipasahat di liat portibi on. Hirahira 120 halak ruas ni huria di tingki i, digohi tondi parbadia jala mangkatai di angka hata na asing tu halak Jahudi dohot angka proselit. (Ul. 2:4-11) Dungkon i, dibaritahon ma barita na uli i sahat tu Samaria. Taon 36 M, dipararat ma muse barita i sahat tu halak na so marsunat. On patuduhon, halak Kristen nunga marbarita tu godang halak di liat portibi on!

13, 14. (a) Aha do ”patik na imbaru” na dilehon Jesus? (b) Aha do na taparsiajari sian sitiruon na pinatuduhon ni Jesus?

¹³ Dilehon Jesus do muse ”patik na imbaru” asa mangkaholongi dongan sahaporseaon. (Jaha Johannes 13:34, 35.) Ingkon tapatuduhon do holongta tu nasida ganup ari jala ingkon rade do hita mangalehon ngolunta tu nasida. Ndang adong parenta sisongon on di patik ni si Musa.—Mat. 22:39; 1 Joh. 3:16.

¹⁴ Jesus ma sitiruon di hita na patuduhon holong tu sude halak. Dihaholongi do angka siseanna jala rade mate humongkop nasida. Alani i, lomo roha ni Jesus asa tatiru ibana. Hita pe, ingkon rade do manaon hasusaan jala mangalehon ngolunta humongkop dongan sahaporseaonta.—1 Tes. 2:8.

15, 16. Boasa boi muba na masa di parngoluonta jala songon dia do Debata manogunogu hita?

¹⁵ Dipillit Jesus do ”naposo haposan jala na marroha” mangalehon halak Kristen ”mangan di tingkina”. (Mat. 24:45-47) Sipanganon partondion, dohot do i angka tudutudu na ringkot tu naposo ni Debata molo muba na masa di parngoluon ni nasida. Songon dia do na masa di parngoluonta boi muba?

¹⁶ Hita mangolu di ”tingki parpudi” jala ndang sadia lelengnai, masa ma haporsuhon bolon. (2 Tim. 3:1; Mrk. 13:19) Godang masa hasusaan saonari ala nunga didabu Sibolis dohot surusuruanna tu tano on. (Pgk. 12:9, 12) Asing ni i, hita mangoloi parenta ni Jesus pasahathon barita na uli tu godang halak jala di godang bahasa!

17, 18. Songon dia do pandapotta tu tudutudu na dilehon tu hita?

¹⁷ Dilehon organisasi do tu hita godang tudutudu laho marbarita na uli. Taihuthon do i? Di parpunguan, diajari do hita asa denggan mangulahon tudutudu i. Pos do rohanta molo tudutudu i sian Debata?

¹⁸ Asa tajalo pasupasu sian Debata, porlu taparrohahon sude tudutudu na dilehon tu hita marhite huria. Molo taihuthon tudutudu i sian saonari, mura ma hita mangihuthon tudutudu na dilehon tu hita saleleng ”haporsuhon” bolon. (Mat. 24:21) Dung diripashon Sibolis, tahaporluhon muse tudutudu na imbaru laho mangolu di Paradeiso.

19, 20. Buku aha do na laho dibuka jala aha do pangkorhon ni i tu hita?

¹⁹ Dung ruar sian Mesir, dihaporluhon halak Israel tudutudu na baru. Alani i, dilehon Debata ma patik tu nasida. Halak Kristen mangihuthon ”patik ni Kristus”. Di tano na imbaru, tajalo ma muse tudutudu na baru. (Jaha Pangungkapon 20:12.) Tudutudu na tajalo di tano na  imbaru patorangkon aha na dipangido ni Jahowa sian sude jolma di tingki i. Marhite tudutudu on, halak na dipahehe dohot sude jolma na mangolu di tano on boi mangantusi lomo ni roha ni Debata. Tudutudu on mangurupi hita lam mananda Debata Jahowa. Boi ma muse hita lam mangantusi Bibel, na mangurupi sude halak patuduhon holong ni roha tu sude halak na mangolu di Paradeiso. (Jes. 26:9) Pingkirhon ma angka tudutudu na laho diajarhon jala na laho taparsiajari dung mamarenta Jesus gabe raja!

²⁰ Molo taihuthon tudutudu na disurat di ”buku hangoluan” jala marsihohot tu Jahowa sahat tu ujung ni pamarentaon saribu taon, tarsurat ma goarta di ”buku hangoluan” i. Mangolu ma hita salelenglelengna! Alani i, porlu hita SO manjaha Bibel, IDA laho mangantusi lapatanna jala PARROHAHON laho mangihuthon tudutudu ni Debata saonari. Molo taulahon on, malua ma hita sian haporsuhon bolon jala boi ma hita marsiajar taringot Jahowa salelengna.—Pjm. 3:11; Rom 11:33.