1, 2. (a) Aha do na mambahen las roha ni angka na poso ni Jahowa saonari on? (b) Songon dia do natuatua ni halak Kristen dohot angka sintua mangurupi na poso mangantusi lapatan ni pandidion?

SAHALAK sintua mandok tu si Christopher na marumur 12 taon ”Nunga hutanda ho sian mulai tubu jala las do rohangku tingki hubege ho laho tardidi.” Didok sintua i muse, ’Aha do na mangonjar roham laho tardidi?’ Adong do alana boasa disungkun sintua i songon i. Las do roha mangida marribu angka na poso na tardidi ganup taon. (Pjm. 12:1) Alai, porlu botoon ni natuatua dohot sintua, na taronjar sian rohana do na poso umbahen na tardidi  jala nunga mangantusi lapatan ni tardidi.

² Bibel paboahon, dung tardidi sasahalak, i ma mulana ibana gabe sahalak Kristen. Dilehon Jahowa do godang pasupasu dung tardidi sasahalak. Alai, ndang lomo roha ni Sibolis hita mangulahon i. (Poda 10:22; 1 Ptr. 5:8) I do alana, porlu ajaran ni natuatua ni halak Kristen ianakhonna mangantusi lapatan ni sisean ni Kristus. Molo ndang di hasintongan natuatuana, angka sintua di huria ma mangurupi na poso laho mangantusi lapatan ni pandidion. (Jaha Lukas 14:27-30.) Umpamana, songon na paradehon na porlu laho pajongjong jabu, adong do siparadeon ni na poso andorang so tardidi asa boi marsihohot nasida sahat ”ro di ujung”. (Mat. 24:13) Aha do na boi mangurupi na poso laho mamillit manomba Jahowa salelengna? Taida ma alusna.

3. (a) Songon dia do Mateus 28:19, 20; 1 Petrus 3:21 mangajarhon tu hita ringkot ni pandidion? (b) Sungkunsungkun aha do na laho taalusi jala boasa?

³ Molo hamu sahalak na poso naung rade laho tardidi, denggan ma i. Hak na sumurung do gabe sahalak Sitindangi Ni Jahowa jala tardidi. I do na ingkon ulahonon ni halak Kristen. Ringkot do on asa boi malua sian hasusaan bolon. (Mat. 28:19, 20; 1 Ptr. 3:21) Tingki tardidi, patuduhon naung marjanji do hamu mangoloi Jahowa salelengna. Asa tongtong ingotonmu janjimu, sungkunsungkun na mangihut on boi mangurupi hamu mangantusi molo naung rade do hamu tardidi: (1) Nunga boi ahu tardidi? (2) Ahu do mamillit sandiri laho tardidi? (3) Huantusi do lapatan ni mangalehon diri tu Jahowa? Taulas ma saonari sungkunsungkun on.

4, 5. (a) Boasa ndang umur na manontuhon asa boi tardidi? (b) Aha do lapatan ni halak Kristen na togu di partondion?

⁴ Ndang ditontuhon di Bibel umur ni sasahalak asa boi tardidi. Molo tajaha di Poda 20:11 na mandok, ”Nang dakdanak tartanda do marhite sian angka parulaonna, manang na toman [burju], manang na tigor ulaonna.” Alani i, dakdanak pe boi do mangantusi na sintong dohot mangantusi lapatan ni mangalehon diri tu Jahowa. Alani i, marhite pandidion ma dipatuduhon sahalak na poso naung togu ibana di partondion jala naung dilehon dirina tu Jahowa.—Poda 20:7.

⁵ Aha do lapatan ni togu di partondion? Ndang alani umur manang balga ni sasahalak mambahen ibana togu di partondion. Dipaboa di Bibel, halak na togu di partondion, i ma sasahalak na marpangantusion laho mamboto dia na denggan manang na roa. (Heb. 5:14) Diboto sasahalak naung togu di partondion do dia na sintong jala dipillit rohana do laho mangulahon i. Alani i, ndang mura be ibana tarelaela laho mangulahon na sala. Jala, ndang ingkon adong na paboahon tu ibana laho mangulahon na sintong. I do alana, ingkon pilliton ni sahalak na poso naung tardidi do mangulahon na sintong nang pe ndang disi natuatuana.—Bandingkon Plp. 2:12.

6, 7. (a) Aha do na masa tu si Daniel tingki di Babilon. (b) Songon dia do si Daniel patuduhon na togu partondionna?

⁶ Boi do sahalak na poso patuduhon na togu ibana di partondion? Taparrohahon ma sitiruon sian si Daniel. Poso dope ibana tingki diboan tu Babilon, dao sian natuatuana jala tading dohot halak na so manomba Jahowa. Alai, sangap do ibana dibahen di Babilon. Dipillit do ibana gabe sahalak parkarejo di istana ni Raja. (Dan. 1:3-5, 13) Ra, ndang dapot ni si Daniel ulaon na sumurung sisongon on di Israel.

⁷ Songon dia do pangkilalaan ni si Daniel? Ditiru ibana do halak Babilon manang gabe gale do haporseaonna? Ndang! Bibel paboahon, saleleng di Babilon si Daniel, marsangkap do ibana ”di bagasan rohana, asa unang ramunanna dirina”, alani i ingkon jagaonna do dirina sian sude ulaon na hombar tu agama palsu. (Dan. 1:8) On patuduhon na togu do partondionna!

8. Aha do na taparsiajari sian si Daniel?

⁸ Aha do na boi ditiru na poso sian si Daniel? Sahalak na poso na togu di partondion, ingkon marsihohot do di haporseaonna nang pe marsitaonon. Ndang olo ibana mubauba songon bunglon. Ndang holan di Bale Harajaon ibana aleale ni Debata, alai di singkola gabe aleale ni portibi on. Alani i, ingkon tongtong do marsihohot nang pe adong pangunjunan.—Jaha Epesus 4:14, 15.

9, 10. (a) Aha do labana mamingkirhon hian pangunjunan na laho masa alani haporseaonmu? (b) Aha do lapatan ni pandidion?

⁹ Tutu, sude do jolma mardosa. Songon halak na asing, na poso pe boi do sala. (Pjm. 7:20) Alai molo naeng tardidi hamu, ingkon tangkas do botoonmuna na dihalomohon hamu mangulahon parenta ni Jahowa. Sungkun ma dirimu, ’Nunga huoloi Jahowa saleleng on?’ Ingot ma muse aha  do dibahen hamu tingki diuji haporseaonmuna. Boi do dipillit hamu laho mangulahon na sintong? Songon si Daniel, adong do na manjujui hamu mangalului hasangapon di portibi on? Molo adong na manjujui, boi do botoonmu aha na dihalomohon Jahowa?—Eps. 5:17.

¹⁰ Boasa ringkot mamboto alus ni sungkunsungkun on? Ala on boi mangurupi hamu mangantusi molo pandidion i ulaon na marsitutu. Pandidionmuna patuduhon tu na asing naung marjanji hamu tu Jahowa. Nunga marjanji hamu mangkaholongi jala mangoloi Ibana sian nasa roha salelengna. (Mrk. 12:30) Sude naung tardidi, ingkon tongtong mangingot janjina tu Jahowa.—Jaha Parjamita 5:3, 4.

11, 12. (a) Aha do na ingkon botoon ni sasahalak na laho tardidi? (b) Aha do na boi mangurupi hamu mangantusi lapatan ni pandidion?

¹¹ Bibel mandok, ingkon sian ias ni roha do sude naposo ni Jahowa manomba Ibana. (Ps. 110:3) Alani i, sude na laho tardidi ingkon tangkas do botoonna, ibana sandiri do na mamillit laho tardidi. Tarlumobi, na dipagodanggodang di hasintongan, ingkon manat do on pingkirhonon ni nasida.

¹² Ra, nunga godang naung tardidi diida hamu. Olo do ra nasida aleale manang hahaanggimuna. Alai, ndang ala na tardidi nasida manang alani umurmuna umbahen na ingkon gabe tardidi hamu. Sian dia do boi botoonmu naung diantusi hamu lapatan ni pandidion i? Pingkirhon ma, boasa pandidion i mansai ringkot. Tadapot ma alusna di artikel on dohot di artikel na mangihut.

13. Sian dia do boi botoonmuna naung rade do hamu laho tardidi?

¹³ Sada cara na patuduhon naung rade hamu tardidi, i ma marhite tangiangmuna. Sadia jotjot do hamu martangiang tu Jahowa? Aha do na ditangiangkon hamu? Alus ni sungkunsungkun on, boi patuduhon songon dia do solhot ni paralealeonmuna tu Jahowa. (Ps. 25:4) Jotjot do tangiangta dialusi Jahowa marhite Bibel. Alani i, parrohahon ma parsiajaran Bibelmu laho mamboto na tutu do hamu maraleale jala manomba Jahowa. (Jos. 1:8) Sungkun ma dirimuna, ’Sadia jotjot do ahu marsiajar Bibel? Rade do ahu dohot tu panombaon na sasaripe?’ Marhite alus ni sungkunsungkun on, boi ma botoonmuna naung rade do hamu laho tardidi.

14. Patorang ma lapatan ni mangalehon diri tu Jahowa dohot pandidion.

¹⁴ Torop angka na poso, ndang diboto nasida imbar ni mangalehon diri tu Jahowa dohot pandidion. Olo do ra adong na mandok, nunga dilehon dirina tu Jahowa, alai ndang rade laho tardidi. Alai, tutu do boi songon i? Ndang. Mangalehon diri tu Jahowa, i ma tingki tadok tu Jahowa di tangiangta mangoloi Ibana salelengna. Pandidion, i ma tingki diida na asing naung dilehon hamu dirimu tu Jahowa marhite pandidion. Alani i, andorang so tardidi, ingkon taboto do lapatan ni mangalehon diri tu Debata.

15. Aha do lapatan ni mangalehon diri tu Jahowa?

 ¹⁵ Nunga gabe ampuna ni Jahowa hamu tingki dilehon hamu dirimu tu Ibana. Nunga marjanji hamu laho mangoloi Ibana jala i ma na rumingkot di ngolumuna. (Jaha Mateus 16:24.) Marjanji tu Jahowa, i ma ulaon na ringkot jala marsitutu! (Mat. 5:33) Alani i, songon dia do hamu patuduhon na diboto hamu molo ngolumuna nunga dilehon hamu tu Jahowa?—Rom 14:8.

16, 17. (a) Patorang ma aha do lapatanna mangalehon diri tu Jahowa. (b) Aha do sasintongna na didok sasahalak na mangalehon dirina tu Jahowa?

¹⁶ Taparrohahon ma sada tudosan. Pingkirhon ma sahalak aleale mangalehon tu hita sada hadiah mobil. Diboan mobil i dohot suratsuratna jala didok, ”Hulehon tu ho mobil on.” Alai didok muse, ”Kuncina hutiop jala ingkon ahu do mamboan mobil on.” Songon dia do pangkilalaanmu mangida hadiah i? Songon dia do pangkilalaanmu tu alealemu na mangalehon mobil i?

¹⁷ Tingki sasahalak mangalehon dirina tu Jahowa, didok, ”Hulehon tu Ho ngolungku, punaM do ahu.” Lomo roha ni Jahowa asa marsihohot sasahalak i tu janjina. Alai, songon dia do molo marhallethallet tu halak na so manomba Debata? Manang, manjalo karejo na mambahen ibana maol marpungu dohot marbarita na uli? On patuduhon, ndang marsihohot ibana di janjina tu Jahowa. Sarupa ma on songon na mangalehon hadiah mobil, alai ndang dilehon dohot kuncina. Tingki talehon dirinta tu Jahowa, tadok, ”Ngolunta di Ibana.” Alani i, ingkon taulahon do lomo ni roha ni Jahowa nang pe sipata ndang i na tahalomohon. Tatiru ma Jesus na mandok, ”Ai ndada tuat Ahu sian banua ginjang mambahen roharohangku; na pinangido ni roha ni na marsuru Ahu, i do.”—Joh. 6:38.

18, 19. (a) Songon dia do na dihilala si Rose dohot si Christopher patuduhon, pandidion i hak na sumurung na parohon pasupasu? (b) Songon dia do pangkilalaanta taringot hak na sumurung, i ma tardidi?

¹⁸ Tangkas ma, pandidion i ulaon na ringkot jala marsitutu. Mangalehon diri tu Jahowa jala tardidi, on hak na sumurung di hita. Sahalak na poso na mangkaholongi Jahowa jala na mangantusi lapatan ni mangalehon diri tu Jahowa, ndang marduadua rohana laho tardidi. Ndang manolsoli ibana dung tardidi. Si Rose, sahalak na poso mandok, ”Holong do rohangku tu Jahowa, ndang adong na mambahen las rohangku asing ni mangoloi Ibana. Pos situtu do rohangku tingki hupillit laho tardidi.”

¹⁹ Songon dia do taringot si Christopher na dipaboa di mula ni parsiajaran on? Songon dia do pangkilalaanna tingki tardidi ibana umur 12 taon? Dipaboa ibana, las situtu do rohana mamillit laho tardidi. Perintis biasa ma ibana tingki marumur 17 taon jala umur 18 taon gabe parhobas di huria. Saonari, di Betel do ibana karejo. Didok ibana, ”Tingki hupillit laho tardidi, i ma na dumenggan. Las rohangku ala hulehon godang tingkingku tu Jahowa dohot organisasiNa.” Aha do na porlu taparade molo hita naeng tardidi? Tadapot ma alusna di artikel na mangihut.