1. Sesuai tu Mateus 24:9, boasa dang pola heran hita molo sogo roha ni halak tu hita?

LOMO do rohatta dihaholongi jala makkaholongi, ala songon i do hita ditoppa. I do alana haccit rohatta manang mabiar molo adong na marsogo ni roha tu hita. Misalna si Gloria donganta borua na tinggal di Eropa mandok, “Tikki marsiajar Bibel au umur 14 taon, sogo hian do roha ni omakku. Lungun do rohakku alani on. Gabe merasa ma au anak na jugul na so mangoloi natua-tuana.” * Donganta si Danilo paboahon songon on, “Tikki dipukkuli, dihina, jala diancam tentara au ala Saksi Jahowa, gabe mabiar jala maila do au.” Pasti haccit do rohatta molo adong na marsogo ni roha tu hita. Alai dang heran hita disi. Alana nungnga dipaboa Jesus hian, na lao dihasogohon do hita.​—Jaha Mateus 24:9.

2-3. Boasa dihasogohon portibi on hita?

² Sogo do roha ni portibi on tu hita. Boasa? Songon na didok Jesus, ala “dang sian portibi on” hita. (Joh. 15:17-19) Memang unduk do hita tu pamaretta alai dang olo hita terlibat tu politik, salut bendera, manang mangendehon lagu kebangsaan. Alana holan Jahowa do na tasomba. Taakkui do holan Debata na marhak mamaretta jolma. Alai molo Sibolis dohot akka “pinopparna”, dang diakkui i. (1 Mus. 3:1-5, 15) Tabaritahon do holan Harajaon ni Debata na boi pasaehon sude masalah di portibi on. Tabaritahon do muse na lao dihancurhon Harajaon ni  Debata do sude pamarettaon na di portibi on. (Dan. 2:44; Pgk. 19:19-21) Las do roha ni akka halak na lambok roha mambege barita on, alai halak na jahat sogo do rohana.​—Ps. 37:10, 11.

³ Alasan na asing boasa dihasogohon hita, ala standar ni Jahowa do na tadalatton di ngolutta. Hape beda hian do standar ni portibi on tu standar ni Jahowa. Misalna godang do halak saonari marpikkir dang sala mangulahon seks na so patut. Hape ulaon sisongon i do na mambahen Jahowa manghancurhon Sodom dohot Gumora. (Jud. 7) Ala standar ni Bibel do na taihutton, godang ma na mandok hita halak na kaku.​—1 Ptr. 4:3, 4.

4. Songon dia do asa boi hita martahan nang pe dihasogohon manang dihina halak?

⁴ Songon dia do asa boi hita martahan nang pe dihasogohon manang dihina halak? Ikkon pos do rohatta na urupan ni Jahowa do hita. Dos songon perisai do haporseaon i, na boi “pamatehon api na sian panah ni Sibolis”. (Eps. 6:16) Alai dang holan haporseaon na porlu, ikkon adong do holong. Boasa? Alana halak na marholong ni roha i “dang parmuruk”. Tahan do ibana manaon sude hasusaan jala sabar mangadopi manang aha pe. (1 Kor. 13:4-7, 13) Saonari taida ma, songon dia holong tu Jahowa, tu akka dongan, dohot tu musu mangurupi hita martahan nang pe dianiaya.

5. Ala holong roha ni Jesus tu Jahowa, aha do hasilna?

⁵ Di borngin andorang so ditakkup Jesus, didok ibana ma tu akka siseanna, “Huulahon do songon na diparettahon Damang i, [ala] . . . holong do rohakku tu Damang i.” (Joh. 14:31) Ala holong roha ni Jesus tu Jahowa, gabe boi ma ibana martahan manaon penganiayaan. Hita pe boi do martahan songon Jesus, molo holong rohatta tu Jahowa.

6. Sesuai tu Rom 5:3-5, songon dia perasaan ni naposo ni Jahowa tikki dihasogohon portibi on?

⁶ Godang do naposo ni Jahowa na martahan manaon penganiayaan ala holong roha ni nasida tu Jahowa. Misalna, tikki diparettahon pengadilan tinggi Jahudi akka apostel asa unang marbarita na uli be, dang olo nasida. Ala holong roha ni nasida tu Jahowa, ‘urrikkot do di halak i mangoloi Debata sian jolma’. (Ul. 5:29; 1 Joh. 5:3) Saonari godang do akka donganta na toktong martahan tikki dianiaya pamaretta, ala holong roha ni nasida tu Jahowa. Unang ma menyerah hita tikki dianiaya. Sada hasangapon do manaon na haccit alani goar ni Jesus.​—Ul. 5:41; jaha Rom 5:3-5.

7. Songon dia do seharusna sikapta molo dianiaya keluargatta hita?

⁷ Massai susa do tahilala molo tantangan i ro sian keluargatta sandiri. Tikki marsiajar Bibel hita, adong do ra keluargatta na mandok nga disesatton be hita jala nga rittik. (Bandingkon tu Markus 3:21.) Adong do bahkan sian hita na sappe dianiaya. Alai dang pola heran hita disi. Jesus mandok, “Sasittongna, musu ni sasahalak i ma donganna sajabu.” (Mat. 10:36) Nang pe songon i dibahen keluargatta tu hita, unang ma tabahen nasida songon musutta. Molo holong rohatta tu Jahowa, ikkon lam holong do rohatta tu nasida. (Mat. 22:37-39) Alai unang ma sappe talanggar prinsip ni Bibel holan naeng pasonakkon jolma.

8-9. Aha do na mangurupi si Gloria martahan tikki dibahen na haccit tu ibana?

⁸ Saonari, taida ma pengalaman ni donganta si Gloria na toktong setia nang pe ditentang omakna. Didok ibana, “Mulana rap marsiajar Bibel do au dohot omak. Dung adong sekitar onom bulan marsiajar, marpungu ma au. Tikki naeng lao marpungu, pittor muruk hian ma omak. Hape naung makkatai do ibana tu halak na murtad, jala sai mulak-ulak do dihatahon ibana tuduhan ni na murtad i. Dileai omak  do au, dijanggola, dipokkik, jala dibolokkon do akka bukkukku. Nang pe songon i haccitna dibahen omak, marumur 15 taon nungnga tardidi be au. Torus dope sogo hian roha ni omak mangida au. Dibahen ma au sajabu dohot akka remaja na narkobaon, na mangulahon tindak kriminal, asa unang husomba be Jahowa. Tamba do haccitna molo tantangan i ro sian keluarga na seharusna makkaholongi jala mendukung iba.”

⁹ Boasa boi martahan si Gloria? Didok ibana, “Tikki dibahen omak songon i tu au, nungnga sae be hujaha Bibel. Jadi nga pos hian be rohakku on do hasittongan. Jala hurasa nungnga akrab au tu Jahowa. Jotjot do au martangiang, jala dialusi Jahowa do tangiangki. Tikki sajabu dohot akka remaja na narkobaon i, adong do donganta borua na manogihon au marsiajar Bibel di jabuna. Akka dongan di huria pe sai dipatogu do au. Dibahen nasida do au gabe keluargana. Boi ma huida umgogo do Jahowa sian manang ise pe na menentang hita.”

10. Aha do na mambahen pos rohatta na sai didongani Jahowa do hita tikki susa?

¹⁰ Disurat Apostel Paulus do, “Dang adong na boi manirang hita sian holong ni Debata, na takkas tarida marhite Kristus Jesus Tuanta.” (Rom 8:38, 39) Jadi nang pe susa hita, sai didongani Jahowa do hita jala dilehon gogo asa boi martahan. Sian pengalaman ni si Gloria on, taboto ma diurupi Jahowa do hita marhite akka dongan sahaporseaon.

11. Songon dia do holong na didok Jesus di Johannes 15:12, 13 boi mangurupi akka sisean? Paboa ma contohna.

¹¹ Di borngin andorang so mate Jesus, dipaingot ibana do akka siseanna asa masihaholongan. (Jaha Johannes 15:12, 13.) Diboto ibana do molo masihaholongan akka siseanna, gabe marsada jala martahan ma nasida tikki dihasogohon portibi on. Adong do contoh na disurat di Bibel, i ma huria Tessalonik. Mulai sian dibentuk huria i, nungnga dianiaya nasida. Alai toktong do nasida setia jala masihaholongan. Gabe sitiruon na denggan do on tu hita. (1 Tes. 1:3, 6, 7) Dijujui si Paulus do asa torus nasida masihaholongan jala ‘lam marsitutu mangulahon i’. (1 Tes. 4:9, 10) Molo masihaholongan nasida, gabe dipatogu ma akka na marsak, jala diurupi akka na gale. (1 Tes. 5:14) Diihutton nasida do poda ni si Paulus i, alani i dipuji si Paulus do nasida di suratna na paduahon.  Didok, “Lam balga do holongmuna tu donganmuna na asing.” (2 Tes. 1:3-5) Jadi holong do na mangurupi nasida boi martahan tikki dianiaya.

12. Songon dia do akka dongan patuduhon holong tikki masa porang?

¹² Taparrohahon ma muse pengalaman ni donganta si Danilo dohot istrina. Tikki masa porang di daerahna torus do nasida marpungu, marbarita, jala mangurupi akka dongan sahaporseaon. Di sada tikki ro ma tentara tu jabu nasida. Songon on ma didok si Danilo, “Dipaksa tentara i do au asa unang gabe Saksi Jahowa be. Ala hutolak, mangamuk ma halak i. Dipukkul ma au, dibahen ma pistol tu ulukku naeng manembak au. Sebelum lao sian jabu, diancam do hami. Didok nasida naeng ro do muse halak i memperkosa istrikku. Alai pittor hatop do ro akka dongan mamboan hami tu stasiun kereta api asa pinda tu kota na asing. Dang tarlupahon au holong ni akka dongan i. Jala tikki sahat hami di kota na baru i, pittor ro do akka dongan disi mangurupi hami. Dilean do hami mangan, jala diurupi hami mangalului jabu dohot karejo. Gabe sitiruon do on di hami. Huurupi hami ma akka dongan na lari sian kota nasida alani porang.” Sian pengalaman on, taboto ma molo masihaholongan hita, boi do hita martahan nang pe masa penganiayaan.

13. Songon dia do tondi parbadia mangurupi hita tikki dihasogohon?

¹³ Didok Jesus do tu siseanna, “Toktong ma haholongi musum.” (Mat. 5:44, 45) Mura do i? Daong. Alai boi do taulahon i molo diurupi tondi parbadia ni Debata. Alani tondi parbadia, boi ma tapatudu holong, hasabaron, haburjuon, lambok ni roha, jala boi ma hita mangarajai diri. (Gal. 5:22, 23) Akka sifat on ma na mangurupi hita martahan manaon na haccit. Sian pengalaman ni akka dongan, boi do muba halak na menentang molo dipatudu akka sifat on. Gariada adong do na tertarik gabe Saksi. Molo maol tahilala patuduhon holong tu halak na marsogo ni roha tu hita, martangiang ma hita asa diurupi tondi parbadia. (Luk. 11:13) Sai taihutton ma cara ni Jahowa, ai i do na undenggan.​—Poda 3:5-7.

14-15. Songon dia Rom 12:17-21 mangurupi si Jasmin toktong makkaholongi suamina?

¹⁴ Taparrohahon ma pengalaman ni si Jasmin na tinggal di Timur Tengah. Dung Saksi  Jahowa ibana, didok suamina do naung disesatton ibana. Berupaya do suamina i mangorai ibana manomba Jahowa. Alani sogo ni rohana, dileai suamina i do si Jasmin. Disuru do akka tondongna, pandita, dohot datu mangancam ibana. Jala ditudu do si Jasmin mambahen sursar rumah tangga ni nasida. Dang holan i, hea do ro suamina i berteriak palea-leahon akka dongan tikki marpungu. Jotjot do tangis si Jasmin alani pangalaho ni suamina i.

¹⁵ Diurupi akka dongan do si Jasmin jala dibahen do ibana songon keluarga ni nasida. Dijujui sintua do ibana mangulahon prinsip na tarsurat di Rom 12:17-21. (Jaha.) Didok si Jasmin, “Maol do nian i, alai martangiang ma au asa diurupi Jahowa mangulahon prinsip na disurat di ayat i. Tikki disappatton suamikku tano tu dapur, hupaias do i. Tikki kasar ibana makkatai, lambok do hualusi. Jala tikki marsahit ibana, denggan do huurus.”

16-17. Aha do na boi taparsiajari sian pengalaman ni si Jasmin?

¹⁶ Adong do labana ala torus dipatuduhon si Jasmin holong tu suamina. Didok si Jasmin, “Gabe porsea do suamikku tu au, ala diboto ibana dang olo au margabus. Nga olo be ibana manangihon au tikki marcerita taringot haporseaokku. Dang pola olo be ibana muruk-muruk di jabu. Sipata ibana do na paingotton au lao marpungu. Saonari nga lam jonok be hami jala nga lam denggan be keluarganami. Berharap do au olo suamikku marsiajar asa rap manomba Jahowa hami.”

¹⁷ Sian pengalaman ni si Jasmin on taboto ma, molo halak na marholong ni roha “tahan manaon sude hasusaan . . . toktong paimahon akka na denggan di sasude, sabar jala togu do haporseaonna tikki mangadopi manang aha pe”. (1 Kor. 13:4, 7) Memang haccit hian do molo dihasogohon hita. Alai talu do sogo ni roha dibahen holong. Alana molo tapatudu holong, boi do gabe muba pandangan ni sasahalak tu hita dohot tu Jahowa. Jala tabahen ma las roha ni Jahowa. Nang pe sai torus hita dihasogohon, boi do hita toktong marlas ni roha. Boasa?

18. Boasa boi hita marlas ni roha tikki dihasogohon?

¹⁸ Jesus mandok, “Marlas ni roha ma hamu molo sogo roha ni halak tu hamu.” (Luk. 6:22) Dang akka na haccit na mambahen hita marlas ni roha. Attong aha do? Adong tolu alasanna. Na parjolo, molo martahan hita manaon na  haccit gabe tabahen ma las roha ni Debata. (1 Ptr. 4:13, 14) Na paduahon, lam togu ma hita ala nungnga taruji haporseaotta. (1 Ptr. 1:7) Na patoluhon, molo martahan hita dapotta ma hangoluan saleleng ni lelengna.​—Rom 2:6, 7.

19. Boasa boi marlas ni roha akka apostel nang pe dipukkuli?

¹⁹ Dang leleng dukkon dipahehe Jesus, diorai ma akka apostel marbarita na uli jala dipukkuli do nasida. Alai toktong do akka apostel i marlas ni roha. Boasa? “Ai didok roha ni nasida, na patut do nasida manaon na haccit alani goar ni Jesus i.” (Ul. 5:40-42) Saonari pe godang do akka donganta na setia nang pe manaon na haccit. Ala diboto nasida, dang lupa Jahowa tu kerja keras dohot holong na dipatudu nasida tu goarna.​—Heb. 6:10.

20. Aha do na lao tabahas di artikel na mangihut?

²⁰ Memang, torus dope hita dihasogohon portibi na dirajai Sibolis on. (Joh. 15:19) Alai unang pola mabiar hita. Molo toktong setia, bahenon ni Jahowa do hita “margogo jala jagaonna” do hita. (2 Tes. 3:3) On ma na lao tabahas di artikel na mangihut. Jadi toktong ma tahaholongi Jahowa, akka dongan, dohot musutta. Molo taulahon i gabe marsada ma hita, lam togu haporseaotta, gabe sangap ma tabahen goar ni Jahowa, jala boi ma tabuktihon talu do sogo ni roha dibahen holong.