1. Boasa dipangido Jesus tu Jahowa asa dijaga akka siseanna?

DI BORNGIN andorang so mate Jesus, dipikkiri ibana do tantangan na lao diadopi akka siseanna. Diboto Jesus do molo dung nakkok ibana tu surgo, diporangi Sibolis do akka siseanna i. Alani i, martangiang ma Jesus tu Jahowa asa ‘dijaga nasida sian Sibolis’. (Joh. 17:14, 15) Jadi pasti jagaon ni Jahowa do akka naposona.

2. Aha do na mambahen pos rohatta na dialusi Jahowa tangiangta?

² Dialusi Jahowa do tangiang ni Jesus i, ala holong rohana tu Anakna i. Hita pe, molo tabahen las roha ni Jahowa, dihaholongi do hita. Jadi, molo martangiang hita mangido asa diurupi jala dijaga Jahowa, dialusi Jahowa do i. Bapak na parholong do Jahowa jala Kepala keluarga na burju, na torus manjaga akka gellengna. Molo dang dibahen Jahowa songon i, gabe roa ma goarna manang reputasina.

3. Boasa porlu dijaga Jahowa hita saonari?

³ Dung diusir Sibolis sian surgo tu portibi on, massai “muruk situtu” do ibana. (Pgk. 12:12) I do alana porlu hian hita dijaga Jahowa saonari. Dibahen Sibolis do, asa porsea halak molo dianiaya sisomba Jahowa, na “marhobas tu Debata” do i. (Joh. 16:2) Adong do muse na menganiaya hita ala dang taihutton standar ni portibi on. Nang pe songon i, unang pola mabiar hita. Boasa? Alana didok Bibel, “Boi do tahaporseai Tuan i, bahenonna do hamu margogo jala jagaonna do hamu sian Sibolis.” (2 Tes. 3:3) Songon dia do dibahen Jahowa manjaga hita? Tabahas ma dua cara.

4. Sesuai tu Epesus 6:13-17, aha do na diparade Jahowa lao manjaga hita?

⁴ Dilean Jahowa do tu hita perlengkapan porang, asa boi taalo serangan ni Sibolis. (Jaha Epesus 6:13-17.) Massai kuat do perlengkapan porang on! Alai asa marguna i, ikkon sude do perlengkapan i torus tapakke. Akka aha ma i? Taparsiajari ma i di artikel on.

5. Manggombarhon aha do ikat pinggang i, jala boasa ikkon tapakke?

⁵ Ikat pinggang na manggombarhon hasittongan na sian Bibel. Boasa ikkon tapakke on? Asa unang dililuhon Sibolis “ama ni gabus” i hita. (Joh. 8:44) Nungnga marribu taon Sibolis margabus lao “mangaliluhon sude portibi on”! (Pgk. 12:9) Songon dia do carana mamakke ikat pinggang on? Taparsiajari ma hasittongan taringot Jahowa, tasomba ma Ibana marhite “panogu-noguon ni tondi parbadia dohot hasittongan”, jala jujur ma hita di saluhutna.​—Joh. 4:24; Eps. 4:25; Heb. 13:18.

6. Manggombarhon aha do baju partahanan i, jala boasa ikkon tapakke?

⁶ Baju partahanan na manggombarhon standar ni Jahowa na sittong. Boasa ikkon tapakke on? Baju partahanan boi manjaga tentara asa unang hona panah jantungna. Dos songon i ma, standar ni Jahowa boi manjaga rohatta asa unang sega dibahen portibi on. (Poda 4:23) Alani i, gabe sian nasa roha ma hita makkaholongi jala manomba Jahowa. (Mat. 22:36, 37) Sai berupaya do Sibolis mambagi rohatta asa tahaholongi akka na di portibi on. Hape dihasogohon Debata do i. (Jak. 4:4; 1 Joh. 2:15, 16) Molo diida Sibolis dang marhasil upayana i, dibahen ma hita susa. Ala didok rohana, molo susa hita, gabe dang taihutton be standar ni Jahowa.

7. Songon dia do carana mamakke baju partahanan on?

⁷ Songon dia do carana mamakke baju partahanan on? (Ps. 97:10) Taihutton ma standar ni Jahowa taringot na sittong dohot na sala. Adong do na merasa borat mandalatton standar ni Jahowa i. Alai molo tahaholongi do Jahowa, “dang maol” di hita mangulahon akka parettana. (1 Joh. 5:3) Gariada boi do i mambahen lam denggan ngolutta. Molo dang taulahon be akka prinsip ni Bibel, sarupa ma i songon tentara na mambukka baju partahananna tikki marporang, ala paborattu dirasa ibana. Tentara na oto do i.

8. Manggombarhon aha do sipatu i?

⁸ Sipatu na manggombarhon rade paboahon barita na uli taringot tu hadameon. Jadi, ikkon sai rade do hita marbarita na uli taringot tu Harajaon ni Debata. Tikki tapaboa barita na uli tu na asing, gabe lam togu ma haporseaotta. Massai las do rohatta mangida naposo ni Jahowa di liat portibi on na berupaya marbarita na uli manang didia pe. Misalna di parkarejoan, di sikkola, tikki marbarita na uli sian jabu tu jabu dohot di daerah bisnis, tikki belanja, tikki manjuppangi keluarga na so Saksi, jala tikki makkata-hatai tu manang ise pe. Molo dang olo be hita marbarita na uli ala mabiar, sarupa ma i songon tentara na mambukka sipatuna tikki marporang. Gabe haccit ma patna, mura ma ibana diserang, jala maol ma ibana mangihutton paretta ni komandanna.

9. Boasa ikkon sai taboan perisai on?

⁹ Perisai na manggombarhon haporseaotta tu Jahowa. Porsea do hita pasauton ni Debata do sude janjina. Haporseaon i, boi mangurupi hita “pamatehon api na sian panah ni Sibolis”. Boasa ikkon sai taboan perisai on? Asa boi hita dijaga sian ajaran ni halak na murtad jala asa toktong hita setia tikki direhei haporseaotta. Molo dang adong haporseaotta,  dang boi hita togu tikki digoda mangalanggar standar ni Jahowa. Alai molo toktong hita setia, tapartahatton haporseaotta di sikkola manang di inganatta karejo, dos songon na mamboan perisai do hita disi. (1 Ptr. 3:15) Molo tatolak karejo na balga gajina asa boi hita rutin marpungu dohot marbarita, sarupa do i songon na mamboan perisai. (Heb. 13:5, 6) Jadi molo torus hita setia tu Jahowa nang pe adong tantanganna, berarti na sai tapakke do perisai i manjaga hita.​—1 Tes. 2:2.

10. Manggombarhon aha do takkuluk bosi i, jala boasa ikkon tapakke?

¹⁰ Takkuluk bosi na manggombarhon harapan, manang mamikkirhon haluaon sian Jahowa. Pos do rohatta, leanon ni Jahowa do upa tu akka halak na mangulahon lomo ni rohana. Jala pos do rohatta paheheonna do hita molo tung pe mate hita. (1 Tes. 5:8; 1 Tim. 4:10; Tit. 1:1, 2) Songon takkuluk bosi na manjaga ulu ni tentara, harapan pe boi do manjaga pikkiranta. Aha maksudna? Molo sai tapaima-ima do akka janji ni Debata, dang menyerah hita nang pe godang masalahta. Songon dia do carana mamakke takkuluk bosi i? Ikkon tasesuaihon do cara marpikkirta tu cara marpikkir ni Jahowa. Misalna taringot tu hepeng. Dang marhaposan  tu hamoraon be hita, alai marhaposan tu Debata.​—Ps. 26:2; 104:34; 1 Tim. 6:17.

11. Manggombarhon aha do podang na sian tondi parbadia i, jala boasa ikkon tapakke?

¹¹ Podang na sian tondi parbadia, na manggombarhon Hata ni Debata. Podang on, boi mangaruppakkon ajaran na sala jala boi mangurupi hita asa unang torus mangulahon hasomalan na sala. (2 Kor. 10:4, 5; 2 Tim. 3:16, 17; Heb. 4:12) Songon dia do carana mamakke podang i? Belajar pribadi ma hita, jala taulahon ma pelatihan na tajalo sian organisasi ni Jahowa. (2 Tim. 2:15) Asing ni perlengkapan porang on, adong dope na dilean Jahowa lao manjaga hita. Aha ma i?

12. Aha dope na tahaporluhon asa boi monang mangalo Sibolis, jala boasa?

¹² Sahalak tentara naung berpengalaman pe, molo holan sahalakna do na marporang, dang boi ibana monang. Ikkon adong do donganna. Hita pe, dang boi monang mangalo Sibolis dohot akka na mangihutton ibana molo holan sahalakta do na marporang. Porlu do hita diurupi akka donganta. Sude do dongan sahaporseaon boi dipakke Jahowa lao mangurupi hita.​—1 Ptr. 2:17.

13. Sesuai tu Heber 10:24, 25, aha do manfaatna molo ro hita marpungu?

¹³ Di parpunguan do boi hita dipatogu akka dongan. (Jaha Heber 10:24, 25.) Sipata olo do hita marsak. Alai tikki ro hita marpungu, gabe dipatogu ma muse. Dipatogu do hita tikki mambege komentar ni akka dongan, tikki mambege jamita, pertunjukan, manang tikki makkata-hatai dohot akka dongan di parpunguan. (1 Tes. 5:14) Jala gabe las do rohatta tikki taurupi akka dongan na asing di parpunguan. (Ul. 20:35; Rom 1:11, 12) Asing ni i, di parpunguan diajari do muse hita asa lam terampil marbarita dohot mangajari. Misalna diajari do hita mamakke publikasi na adong di Akka Alat lao Mangajari. Alani i, tapersiappon ma akka bahan na lao dibahas di parpunguan. Tikki marpungu, denggan ma tatangihon. Dung i taulahon ma sude na taparsiajari i. Molo taulahon i, boi ma hita gabe “tentara ni Kristus Jesus na burju”.​—2 Tim. 2:3.

14. Ise ma muse na dipakke Jahowa lao mangurupi hita?

¹⁴ Asing ni i, adong do muse marjuta suru-suruan na mangurupi hita. Bayangkon ma aha na boi diulahon sada suru-suruan! (Jes. 37:36) Saonari, bayangkon ma songon dia molo na mangurupi hita marjuta suru-suruan. Dang adong nanggo sada pe jolma manang suru-suruan na jahat na boi mangalo suru-suruan ni Jahowa on. Jahowa do Debata Pargogo na so Hatudosan. Jadi, molo jonok hita tu Jahowa, dang adong na boi manaluhon hita dang soal sadia godang musutta. (Pangh. 6:16) Sai taingot ma on, asa unang menyerah hita tikki haccit rohatta dibahen dongan sakarejo, dongan sasikkola, manang keluargatta na so Saksi. Taingot ma muse, dang sahalakta na marporang. Sai urupan ni Jahowa do hita.

15. Sesuai tu Jesaya 54:15, 17, boasa boi torus marbarita na uli naposo ni Jahowa?

¹⁵ Torus dope hita di hasogohon portibi na dirajai Sibolis on, ala dang dohot hita marporang jala dang terlibat tu politik. Asing ni i, tabaritahon do goar ni Jahowa, tapaboa do holan Harajaon ni Debata na boi mambahen dame portibi on. Dung i, standar ni Jahowa do na taihutton. Tapaboa do molo na mangarajai portibi on, i ma Sibolis pargabus jala pambunu. (Joh. 8:44) Tabaritahon do muse na lao dihancurhon nama portibi na  dirajai Sibolis on. Dang tolap Sibolis dohot na mangihutton ibana mangabbati hita mangulahon i. Gariada setiap adong kesempatan, tapaboa do i. Nang pe marhagogoon Sibolis, alai dang boi ibana pasohon barita na uli sahat tu liat portibi on. Alana torus do dijaga Jahowa hita.​—Jaha Jesaya 54:15, 17.

16. Songon dia do Jahowa manjaga naposona tikki masa hasusaan bolon?

¹⁶ Satokkin nai masa ma hasusaan bolon. Taida ma songon dia Jahowa paluahon hita. Na parjolo, dijaga Jahowa do hita tikki dihancurhon akka raja na di portibi on agama palsu manang Babel na Balga. (Pgk. 17:16-18; 18:2, 4) Na paduahon, dijaga Jahowa do hita muse tikki dihancurhon portibi ni Sibolis on di Armagedon.​—Pgk. 7:9, 10; 16:14, 16.

17. Aha do pasu-pasuna molo torus hita jonok tu Jahowa?

¹⁷ Molo torus hita jonok tu Jahowa, dang boi Sibolis mangaripasson hita. Gariada, Sibolis do na lao diripasson saleleng ni lelengna. (Rom 16:20) Jadi, torus ma pakke sude perlengkapan porang i! Jala unang ma marporang sahalakta mangalo Sibolis. Masiurupan ma hita dohot akka dongan. Torus ma taihutton petunjuk ni Jahowa. Pos ma rohatta, molo taulahon i bahenon ni Bapakta na di surgo i do hita margogo jala jagaonna do hita.​—Jes. 41:10.