1-2. Ise do na boi mangurupi parsiajar Bibel asa maju jala tardidi?

“LOMO do rohakku marsiajar Bibel. Pos do rohakku on do hasittongan. Alai dung akrab pe au tu akka dongan di huria, baru boi au maju jala tardidi,” ninna si Emi na tinggal di Fiji. * Sian pengalaman ni si Emi on, taboto ma boi do maju sahalak parsiajar Bibel jala tardidi molo sude dongan di huria mangurupi.

² Sude do hita boi mangurupi parsiajar Bibel asa bergabung tu huria. (Eps. 4:16) Sahalak donganta perintis na margoar si Leilani na tinggal di Vanuatu paboahon, “Adong do pepatah na mandok, porlu do upaya ni sahuta lao pagodang-godangkon sahalak dakdanak. Hurasa songon i do tong tikki mangurupi parsiajar Bibel. Porlu do upaya ni akka dongan di huria mangurupi ibana asa gabe sisomba Jahowa.” Asa lam dewasa sahalak dakdanak, porlu do peran ni natua-tua, keluarga, dohot guruna. Dos songon i ma, sude do hita na di huria boi mangurupi, pasingotton, patoguhon, jala gabe sitiruon na denggan tu parsiajar Bibel asa boi ibana maju jala tardidi.​—Poda 15:22.

3. Aha do na boi taparsiajari sian pengalaman ni si Ana, si Daniel, dohot si Leilani?

³ Las do roha ni guru studi molo sude na di huria mangurupi parsiajar Bibelna. Boasa las rohana? Parrohahon ma hata ni  si Ana perintis istimewa di Moldova, “Asa boi maju parsiajar Bibel, dang boi holan guru studina na mangurupi ibana.” Songon i do tong na didok si Daniel perintis istimewa na melayani di Moldova. Didok, “Jotjot do penyiar na asing paboahon hatorangan na hona tu roha ni studikku na so hea au tarpikkir.” Donganta si Leilani pe mandok, “Molo boi dihilala parsiajar Bibel holong ni akka dongan jala boi dirasahon ibana na parduli hita tu ibana, gabe pos ma rohana hita do sisomba Jahowa.”​—Joh. 13:35.

4. Aha do na lao taparsiajari di artikel on?

⁴ Olo do ra didok rohamuna, ‘Boha bahenokku mangurupi parsiajar Bibel i asa maju hape so na au guru studina?’ Tabahas ma di artikel on aha na boi taulahon molo adong na manogihon hita gabe patnerna lao mangajari parsiajar Bibelna. Taparsiajari ma muse aha na porlu bahenotta molo ro parsiajar Bibel marpungu. Jala taulas muse songon dia akka sintua mangurupi parsiajar Bibel i asa maju jala tardidi.

5. Molo adong na manogihon hita tu parsiajar Bibelna, ikkon gabe patner na songon dia do hita?

⁵ Memang, guru studi do na paling martanggung jawab mangurupi studina mangattusi Hata ni Debata. Alai molo ditogihon hita mandongani ibana, gabe patner na mendukung ma hita. (Pjm. 4:9, 10) Songon dia carana?

6. Molo ditogihon hamu gabe patner, songon dia do Poda 20:18 boi mangurupi hamu?

⁶ Bahen ma persiapan. Sukkun ma tu guru studina i informasi taringot parsiajar Bibelna i. (Jaha Poda 20:18.) Sukkun ma latar belakang ni parsiajar Bibelna i, bukku na diparsiajari, dohot topik na dibahas. Sian topik na dibahas i, sukkun ma aha na porlu ditandasson tu parsiajar Bibelna i. Sukkun ma aha na boi dohot na so boi dihatahon hamu. Jala sukkun ma aha na boi dibahen hamu mangurupi parsiajar Bibelna i mambahen kemajuan. Tottu dang sude informasi taringot parsiajar Bibel i dipaboa guru studina i. Alai holan alus ni sukkun-sukkun nakkin pe dipaboa, nga cukkup be i. Godang do manfaatna molo dipaboa informasi taringot parsiajar Bibel tu patner, songon pengalaman na dipaboa donganta si Joy sahalak missionaris. Didok ibana, “Akka informasi i mambahen patnerhu gabe tertarik mangurupi studikku.”

7. Boasa ikkon persiapan hita molo ditogihon gabe patner?

⁷ Molo ditogihon hamu gabe patner, denggan do jolo persiapan hamu. (Esr. 7:10) Si Daniel donganta na dipaboa nakkin mandok songon on, “Las do rohakku molo persiapan patnerhu. Gabe boi ma ibana mambahen komentar tambahan na pas.” Asing ni i molo dibereng parsiajar Bibel persiapan guru studina dohot patnerna, gabe ditiru ibana ma i.  Jala molo tung pe dang pola bagas persiapanmuna, pikkirhon ma pokok penting sian parsiajaran i na boi ditandasson hamu.

8. Boha do carana asa boi tangiangta hona tu roha ni parsiajar Bibel?

⁸ Ala bagian na penting do tangiang tikki marsiajar Bibel, denggan do molo tapikkirhon aha na porlu tatangiakkon, asa hona tu roha ni parsiajar Bibel i. (Ps. 141:2) Contohna pengalaman ni donganta si Hana na tinggal di Jepang. Diingot ibana dope tangiang ni patner ni guru studina. Didok ibana, “Sian tangiangna i, boi do huhilala na jonok hian ibana tu Jahowa. Jala lomo do rohakku asa songon ibana au. Tikki didok ibana goarhu di tangiangna i, gabe boi ma hurasahon na holong do rohana tu au.”

9. Sesuai tu Jakobus 1:19, songon dia do carana asa gabe patner na denggan tikki marsiajar Bibel?

⁹ Gabe patner na denggan ma hita. Donganta si Olivia perintis istimewa di Nigeria mandok, “Patner na denggan i, patner na konsentrasi saleleng marsiajar Bibel. Dilean ibana do komentar tambahan na pas alai dang pagodangku, ala guru studina i do na mamandu parsiajaran i.” Boha do carana asa boi mangalehon komentar tambahan na denggan? (Poda 25:11) Denggan ma tatangihon aha na dihatai guru studi i dohot parsiajar Bibelna. (Jaha Jakobus 1:19.) Asa boi talean komentar tambahan na pas, ikkon tapikkirhon do aha sidokkonotta. Unang ma pagodangku hita makkatai, unang ma potong percakapan, jala unang ma tabahen topik na baru. Molo naeng patakkasson topik na dibahas, boi do tabahen komentar tambahan na singkat, tudosan, manang sukkun-sukkun. Molo tahilala nungnga jelas dipatorang guru studina, dang porlu be adong komentar tambahan. Alai tetap do adong na boi taulahon lao mangurupi parsiajar Bibel i asa maju. Tapuji ma ibana jala tapatudu ma na parduli do hita tu ibana.

10. Aha do manfaatna molo tapaboa pengalamanta tu parsiajar Bibel?

¹⁰ Tapaboa ma pengalamanta. Molo cocok do, tapaboa ma songon dia hita mananda hasittongan, aha tantanganta, jala songon dia Jahowa mangurupi hita. (Ps. 78:4, 7) Olo do ra pengalamanta i cocok tu situasi ni parsiajar Bibel i. Gabe dipatogu ma haporseaonna, gabe semangat ma ibana mambahen kemajuan, jala tardidi. Asing ni i, gabe diboto ibana ma songon dia carana mangatasi akka tantanganna. (1 Ptr. 5:9) Contohna pengalaman ni si Gabriel na tinggal di Brasil. Didok ibana, “Tikki marsiajar Bibel dope au, adong do akka dongan na paboahon pengalamanna tu au. Dung hubege i, gabe huboto ma diida Jahowa do sude tantanganta. Molo boi nasida marhasil mangatasi i, au pe pasti boi.” Saonari nungnga gabe perintis be donganta on.

11-12. Boasa ikkon tasambut parsiajar Bibel na ro tu parpunguan?

¹¹ Asa boi maju jala tardidi parsiajar Bibel, ikkon taratur do ibana ro marpungu. (Heb. 10:24, 25) Alani i ma diundang guru studina ibana tu parpunguan. Alai molo nungnga ro ibana, sude do hita boi mangurupi asa ro muse ibana marpungu. Songon dia carana?

¹² Tasambut ma parsiajar Bibel i. (Rom 15:7) Molo tasambut parsiajar Bibel tikki ro tu parpunguan, gabe lomo ma rohana muse ro marpungu. Denggan ma tasambut ibana jala tapatandahon ma tu akka dongan na asing. Alai unang ma tabahen ibana merasa dang nyaman. Taattoi ma ibana, alana olo do ra dang sahat dope guru studina tu Bale Harajaon, manang adong tugas na asing na ikkon dikarejohon. Tatangihon ma ibana tikki makkatai jala tapatudu ma na parduli hita tu ibana. Molo tasambut ibana, adong do manfaatna? Taparrohahon ma pengalaman ni si Dimitri. Didok ibana, “Tikki parjolo sahali au ro tu Bale Harajaon, segan hian do hurasa. Di luar ma au paima-imahon guru studikku. Alai adong ma mandapotton au tu luar jala mandongani au masuk tu Bale Harajaon. Pittor godang do na ro manjalangi au. Songgot do rohakku ala songon i dibahen nasida menyambut au. Las hian do rohakku, gabe sai tarpaima-ima do au marpungu muse. Dang hea dope huida sisongon i.” Baru piga taon on dope donganta on tardidi, jala saonari nungnga gabe parhobas di huria.

13. Molo denggan pangalahotta, adong do pengaruhna tu parsiajar Bibel?

¹³ Tabahen ma sitiruon na denggan. Molo diida ibana denggan pangalahotta, gabe pos ma rohana on do hasittongan. (Mat. 5:16) Si Vitali, perintis na melayani di Moldova mandok, “Tikki marsiajar dope au, huparrohahon do akka dongan di huria. Huparrohahon do parngoluon ni nasida, cara marpikkirna, dohot pangalahona. Gabe pos ma rohakku, Saksi Jahowa on do agama na sittong.”

14. Boasa boi pangalahotta na denggan mangurupi sasahalak mambahen kemajuan?

¹⁴ Asa memenuhi syarat parsiajar Bibel tardidi, porlu do diulahon aha na diparsiajari ibana. Memang dang sai mura mangulahon i. Alai molo diida ibana hita berupaya mangulahon prinsip ni Bibel, jala diida ibana hita mandapot manfaatna, olo do ra gabe ditiru ibana hita. (1 Kor. 11:1) Si Hana donganta naung dipaboa nakkin mandok, “Boi do huida songon dia akka dongan di huria mangulahon akka na huparsiajari i. Sian nasida, marsiajar do au songon dia patoguhon na asing, patuduhon holong, jala songon dia asa boi manalpuhon hasalaan. Dang olo nasida pahata-hatahon dongan na asing. Porlu do tiruokku nasida.”

15. Sesuai tu Poda 27:17, boasa ikkon tabahen parsiajar Bibel naung taratur marpungu gabe donganta?

 ¹⁵ Tabahen ma ibana gabe donganta. Molo nungnga taratur ibana ro marpungu, torus ma tapatudu na parduli hita tu ibana. (Plp. 2:4) Makkata-hatai ma hita tu ibana asa lam takkas tatanda ibana. Tapuji ma ibana ala nungnga lam maju. Boi do muse tasukkun nga sahat tudia halak i marsiajar Bibel, baru tasukkun ma muse keluargana, manang parkarejoanna. Molo taulahon i, boi ma hita lam jonok tu ibana. Molo olo hita gabe donganna, boi do i mangurupi ibana maju jala ujungna tardidi. (Jaha Poda 27:17.) Si Hana donganta naung gabe perintis biasa saonari, paboahon pengalamanna tikki parjolo sahali ibana ro marpungu. Didok ibana, “Ala olo do akka dongan di huria mardongan tu au, gabe taratur ma au marpungu nang pe lagi loja. Sai las do rohakku pajuppang dohot akka donganku na baru i. On mangurupi au maninggalhon donganku na so sisomba Jahowa. Gabe boi ma au jonok tu Jahowa dohot tu akka dongan na di huria. Ujungna, hubahen ma keputusan lao tardidi.”

16. Aha do na boi taulahon asa merasa parsiajar Bibel i keluargana do sude dongan di huria?

¹⁶ Molo nungnga taratur parsiajar Bibel ro marpungu, taurupi ma ibana asa merasa keluargana do sude dongan di huria. Burju ma hita tu ibana. (Heb. 13:2) Si Denis, donganta na melayani di Moldova mangingot pengalamanna tikki marsiajar Bibel dope ibana. Didok ibana, “Jotjot do au dohot istrikku diundang akka dongan tu acara ramah tamah. Diceritahon nasida ma pengalamanna tu hami, gabe huboto ma songon dia Jahowa mangurupi nasida. Gabe lam togu do hami ala mambege i. Gabe pos ma rohanami lao manomba Jahowa. Jala pos do rohanami, pasti lam denggan do ngolunami.” Molo nungnga gabe penyiar parsiajar Bibel, tatogihon ma ibana mardinas. Donganta si Diego na tinggal di Brasil mandok, “Dung gabe penyiar au, godang do donganta na manogihon au mardinas. Alani i, lam takkas ma hutanda nasida. Godang do na boi huparsiajari sian nasida, na mambahen au lam jonok tu Jahowa dohot tu Jesus.”

17. Aha do na boi diulahon akka sintua lao mangurupi parsiajar Bibel?

¹⁷ Parade ma tikkimuna mangurupi parsiajar Bibel. Molo dipatudu akka sintua do na parduli nasida tu parsiajar Bibel, balga do pengaruhna. Boi do diupayahon hamu mangalehon tikki makkata-hatai dohot parsiajar Bibel i di parpunguan? Boi do diatur hamu jadwalmuna asa dohot hamu mangajari ibana? Molo diingot hamu goarna tikki komentar ibana, boi ma dirasahon ibana na parduli hamu tu ibana. Balga do pengaruh ni i tu parsiajar  Bibel i. Donganta si Jack, perintis na tinggal di Nigeria mandok, “Godang do studikku na tarsonggot tikki diboto nasida sintua do na mandongani au. Adong do sahalak studikku na mandok songon on, ‘Molo pastor di garejanami, dang olo mambahen songon i. Holan akka na mora do dikunjungi ibana, ala boi dilehon halak i jalang-jalang.’” Parsiajar Bibel na mandok i, nungnga marpungu be saonari.

18. Sesuai tu Ulaon ni Apostel 20:28, songon dia do akka sintua boi mangurupi penyiar na adong studina?

¹⁸ Latik jala patogu ma akka penyiar na adong studina. Martanggung jawab do akka sintua mangalatik akka penyiar asa lam malo mardinas, termasuk ma i mangajari. (Jaha Ulaon ni Apostel 20:28.) Molo diida hamu songon na so percaya diri ibana ala dohot hamu, tawarhon ma asa hamu na mamandu. Si Jack mandok, “Jotjot do disukkun akka sintua keadaan ni studikku. Olo do akka sintua mangalean saran tu au asa lam denggan mamandu parsiajaran Bibel.” Jadi, godang do na boi dibahen akka sintua lao mangurupi akka penyiar na adong studina. (1 Tes. 5:11) Didok si Jack do muse, “Massai las do rohakku molo dipatogu akka sintua au, jala dipatudu nasida na diargai kerja kerashu. Hata ni nasida i palambokkon roha, songon aek na ngali tikki las ari. Ala dipuji nasida au, gabe lam semangat jala lam percaya diri ma au tikki mamandu studi.”​—Poda 25:25.

19. Aha do na boi mambahen las rohatta?

¹⁹ Molo tung pe dang adong parsiajar Bibelta saonari, alai boi do hita mangurupi parsiajar Bibel asa maju. Gabe patner na denggan ma hita, unang ma pagodangku hita makkatai. Tapersiappon hian ma komentar tambahan, asa boi hita mendukung guru studi i. Molo ro parsiajar Bibel i marpungu, tadongani ma ibana, jala tabahen ma sitiruon na denggan. Akka sintua pe, boi do mangalean tikki makkata-hatai tu parsiajar Bibel lao patoguhon ibana. Asing ni i, boi do muse akka sintua patoguhon guru studina, puji jala latik hamu ma ibana. Pasti las do rohatta molo boi taurupi sasahalak makkaholongi jala manomba Jahowa.