1. Aha do na dihalomohon natua-tua sian gellengna?

 HAMU akka natua-tua, pasti lomo do rohamuna mangurupi gellengmuna asa mananda jala makkaholongi Jahowa. Alai dang boi taida Debata. Attong, songon dia do hamu mangurupi gellengmuna asa boi porsea na adong Debata jala mangurupi nasida jonok tu Ibana?​—Jak. 4:8.

2. Songon dia do natua-tua mangajari gelleng ni nasida taringot sifat ni Jahowa?

² Sada cara na mangurupi anakkotta asa jonok tu Jahowa i ma rap mamparsiajari Bibel dohot nasida. (2 Tim. 3:14-17) Alai dipaboa Bibel do muse adong cara na asing lao marsiajar taringot Jahowa. Di bukku Poda dipaboa do taringot sahalak ama na paingotton anakna asa unang lupa tu sifat ni Jahowa na tarida sian akka toppaan. (Poda 3:19-21) Di artikel on, tabahas ma songon dia cara ni natua-tua mamakke toppaan lao mangurupi gelleng ni nasida marsiajar taringot akka sifat ni Jahowa.

3. Aha do na porlu dibahen natua-tua lao mangurupi gellengna?

³ Bibel mandok, “Nang pe dang boi taida Debata, alai boi do taattusi akka pangalahona molo taparsiajari songon dia portibi on ditoppa. Boi do taboto aha na dihalomohon rohana molo taparsiajari akka na dibahen Ibana.” (Rom 1:20) Hamu akka natua-tua, bahen hamu ma tikki rap dohot gellengmuna  mengamati akka toppaan. Urupi ma nasida marsiajar taringot sifat ni Jahowa sian akka toppaan i. Saonari tabahas ma jo aha do na boi diparsiajari natua-tua sian cara ni Jesus mangajari.

4. Songon dia do Jesus mamakke toppaan tikki mangajari? (Lukas 12:24, 27-30)

⁴ Parrohahon ma songon dia Jesus mamakke toppaan tikki mangajari. Hea do dijujui Jesus akka siseanna asa mamparrohahon burung gagak dohot akka bunga di ladang. (Jaha Lukas 12:24, 27-30.) Boi do sasittongna dipakke Jesus akka toppaan na asing. Alai dipillit ibana do bunga dohot pidong na takkas ditanda akka siseanna. Jotjot do ra diida akka siseanna akka bunga di ladang dohot burung gagak na habang. Boi do dibayakkon hamu huhut makkatai Jesus, ditudu ibana do doppak pidong dohot bunga i. Dung i dipaboa ibana ma sada parsiajaran na penting taringot haburjuon ni Jahowa: Pasti paradeon ni Jahowa do pakkean dohot sipanganon ni sude naposona na setia, dos songon na dibahen Ibana tu burung gagak dohot akka bunga na di ladang i.

5. Songon dia do natua-tua mangajari gelleng ni nasida taringot Jahowa?

⁵ Hamu akka natua-tua, songon dia do caramuna maniru Jesus tikki mangajari gellengmuna? Paboa ma toppaan na menarik di hamu, misalna binatang manang tanaman kesukaanmuna. Paboa ma muse aha do na boi diparsiajari hamu taringot Jahowa sian toppaan i. Boi do muse disukkun hamu tu gellengmuna taringot binatang manang tanaman kesukaanna. Molo makkatai hamu dohot gellengmuna taringot toppaan na menarik di ibana, pasti lam lomo ma rohana marsiajar taringot sifat ni Jahowa sian toppaan i.

6. Aha do na boi tatiru sian omak ni si Christoper?

⁶ Dang pola ikkon dibahen natua-tua riset taringot sada jenis binatang tertentu sebelum dibahas nasida i dohot gellengna. Alana Jesus pe dang pola ganjang dipatorang ibana taringot songon dia cara ni burung gagak mangallang sipanganon, manang songon dia partubu ni akka bunga di ladang. Olo do ra lomo roha ni gellengmuna bagas mamparsiajari taringot toppaan. Alai sipata sukkun-sukkun dohot hata na sederhana pe nga cukkup lao mangurupi anakkotta mangattusi parsiajaranna. On ma na dihilala sahalak donganta na margoar si Christoper. Didok ibana, “Tikki gelleng dope hami, sederhana do cara ni omak mangurupi hami mangargai akka toppaan di sakalilingnami. Misalna tikki lao hami mendaki didok omakku ma, ‘Bereng ma balga ni dolok on, luar biasa Jahowa ate.’ Manang tikki lao hami mardalani tu pantai didok omakku ma, ‘Bereng ma balga ni ombak i, luar biasa do gogo ni Jahowa ate.’” Didok si Christoper ma muse, “Nang pe sederhana hata ni omak i, alai balga do pengaruhna tu hami.”

7. Songon dia do carana mangalatik gellengmuna asa marsiajar sian akka toppaan?

⁷ Dung lam magodang gellengmuna, latik ma nasida asa lam godang mamikkirhon taringot toppaan jala marsiajar taringot Jahowa. Paboa hamu ma tu nasida taringot sada toppaan jala sukkun ma, “Aha do na boi diparsiajari ho taringot Jahowa sian toppaan on?” Olo do ra songgot rohamuna mambege alusna.​—Mat. 21:16.

8. Kesempatan aha do na dipakke natua-tua ni Israel “tikki di pardalanan” dohot gellengna?

⁸ Dijujui do akka natua-tua ni Israel asa mangajari gelleng ni nasida taringot paretta ni Jahowa “tikki di pardalanan”. (5 Mus. 11:19) Tikki mardalani nasida mangalewati  akka huta ni Israel, boi do diida nasida marragam binatang, pidong, dohot bunga. Boi ma dipakke natua-tua kesempatan i lao mangajari anakkon ni nasida taringot toppaan ni Jahowa. Hamu akka natua-tua, pakke hamu ma kesempatan sisongon i lao mangajari anakkonmuna taringot toppaan ni Jahowa. Taida ma akka natua-tua naung marhasil mangulahon i.

9. Aha do na boi taparsiajari sian donganta si Punitha dohot si Katya?

⁹ Sahalak ina na margoar si Punitha na tinggal di kota besar di India mandok, “Tikki lao hami mengunjungi keluarga di luar kota, disi ma kesempatannami mengurupi gellengnami marsiajar taringot toppaan ni Jahowa. Huhilala ummura do diattusi nasida taringot toppaan molo dao nasida sian kota na padat.” Akka natua-tua, pos ma rohamuna dang dilupahon gellengmuna tikki rap hamu dohot nasida mangida toppaan. Si Katya, sahalak donganta borua sian Moldova mandok, “Tikki gelleng au, jotjot do au dohot natua-tuakku mardalani tu luar kota. Mandok mauliate do au tu nasida ala sian na gelleng nungnga diajari nasida au mengamati toppaan ni Jahowa jala marsiajar taringot Ibana.”

10. Aha do na boi diulahon natua-tua molo maol nasida sakaluarga mardalani tu luar kota? (Ida kotak “ Bantuan tu Akka Natua-tua.”)

¹⁰ Alai boha do molo maol hamu sakaluarga mardalani tu luar kota lao mengamati akka toppaan? Si Amol na tinggal di India mandok, “Di daerahnami leleng do natua-tua mulak karejo, jala biasana arga do ongkos pardalanan tu luar kota. Alai boi do hami mengamati akka toppaan jala marsiajar taringot sifat ni Jahowa tikki lao hami tu taman manang tikki makkata-hatai di balkon.” Sasittongna godang do akka toppaan di sakalilingmuna na boi dipakke hamu lao mangajari gellengmuna. (Ps. 104:24) Misalna boi do diamati hamu akka pidong, serangga,  suan-suanan, dohot na asing. Si Karina sian Jerman mandok, “Lomo do roha ni omakku mangida bunga. Tikki poso dope au, jotjot do dipatudu omak akka bunga na bagak tikki rap hami mardalan pat.” Hamu akka natua-tua, boi do dipakke hamu akka video dohot publikasi taringot toppaan na diparade organisasi lao mangajari gellengmuna. Jadi dang soal didia hamu tinggal, boi do diurupi hamu gellengmuna mengamati toppaan ni Jahowa. Saonari tabahas ma akka sifat ni Jahowa na boi diajarhon hamu tu gellengmuna.

11. Songon dia do natua-tua mangurupi gellengna marsiajar taringot holong ni Jahowa?

¹¹ Lao mangurupi gellengmuna mangattusi holong ni Jahowa, boi do dipatudu hamu songon dia induk ni binatang mangurus anakna. (Mat. 23:37) Boi do muse tapatorang tu nasida taringot marragam toppaan ni Jahowa na mambahen las rohatta. Si Karina naung dipaboa nakkin mandok, “Tikki rap mardalan pat hami, jotjot do dijujui omak au asa so satokkin mengamati keunikan ni setiap bunga, jala songon dia i patuduhon holong ni Jahowa. Martaon-taon dukkon i, lomo dope rohakku mengamati bentuk dohot warna ni akka bunga. Gabe dipaingot do au na massai holong do roha ni Jahowa tu hita.”

12. Songon dia do natua-tua mangurupi gellengna marsiajar taringot bisuk ni Jahowa? (Psalmen 139:14) (Ida gambar.)

¹² Dao do umbisuk Jahowa sian hita. Alani i, urupi ma gellengmuna marsiajar taringot bisuk ni Jahowa. (Rom 11:33) Misalna boi do tapaboa tu gellengta songon dia aek nakkok tu ginjang membentuk ombun, jala songon dia ombun i boi pinda sian sada inganan tu inganan na asing. (Job 38:36, 37) Boi do muse tapaboa tu gellengta songon dia Jahowa merancang pamatangta. (Jaha Psalmen 139:14.) On ma na diulahon sahalak ama na margoar si Vladimir. Didok ibana, “Hea ma madabu anaknami tikki bersepeda jala gabe lukka ma patna. Alai dung piga-piga ari malum do lukkana i. Dipaboa hami ma dirancang Jahowa do pamatangta on asa boi pamaluppon lukka sandiri. Jala dipaboa hami ma muse dang adong rancangan ni jolma na songon on hebatna. Misalna molo sega mobil alani kecelakaan, dang boi i denggan sandiri.  Sian on gabe diurupi ma anaknami marsiajar taringot bisuk ni Jahowa.”

13. Songon dia do akka natua-tua boi mangurupi gellengna marsiajar taringot huaso ni Jahowa? (Jesaya 40:26)

¹³ Disuru Jahowa do hita asa mamparrohahon doppak langit jala mamikkirhon balga ni huaso ni Jahowa lao mangatur akka bintang asa toktong di ingananna. (Jaha Jesaya 40:26.) Hamu natua-tua, jujui hamu ma gellengmuna mangida langit jala mamikkirhon huaso ni Jahowa. Taida ma pengalaman ni si Tingting sian Taiwan. Didok ibana, “Tikki gelleng dope au, diboan omak ma au camping dao sian kota asa boi takkas diida hami akka bintang di langit. Di tikki i, khawatir do au boi do au setia tu Jahowa manang na dang, alana direhei akka donganku do au di sikkola. Alani i dijujui omak ma au asa mamikkirhon huaso ni Jahowa na manoppa sude bintang. Gabe dipaingot do au pasti lehonon ni Jahowa do gogo tu au lao mangadopi tantangan i. Dung mulak hami sian i, gabe lam bertekad ma au lam mananda Jahowa jala melayani Ibana.”

14. Songon dia do natua-tua mangurupi gellengna mamboto Debata na marlas ni roha do Jahowa i?

¹⁴ Sian toppaan ni Jahowa, taboto ma Debata na marlas ni roha do Ibana jala lomo rohana asa marlas ni roha hita. Akka ilmuwan mengamati godang do binatang na lomo rohana marmeam-meam, termasuk ma pidong dohot dekke. (Job 40:20) Hea do diida hamu gellengmuna mekkel tikki mangida binatang marmeam-meam? Bisa jadi olo do diida nasida anak ni huting marmeam-meam bola manang anak ni biang margulat dohot donganna. Molo diida hamu gellengmuna mekkel tikki mangida keunikan ni akka binatang, boi ma dipakke hamu kesempatan i lao paingotton nasida molo Debata na tasomba, i ma Debata na marlas ni roha.​—1 Tim. 1:11.

15. Songon dia do carana asa mura natua-tua makkata-hatai dohot gellengna? (Poda 20:5) (Ida gambar.)

¹⁵ Sipata maol do akka natua-tua makkata-hatai dohot gellengna taringot masalah na diadopi nasida. Molo songon i situasimuna,  ikkon berupaya do hamu lao mamboto aha na dipikkirhon gellengmuna. (Jaha Poda 20:5.) Adong do natua-tua na merasa ummura do nasida mangulahon i molo rap rekreasi dohot gellengna. Boasa? Alana tikki na rap rekreasi i nasida, dang godang gangguan jala lebih leluasa do nasida makkata-hatai. Sahalak ama na margoar si Masahiko sian Taiwan paboahon alasan na asing. Didok ibana, “Tikki rekreasi hami dohot gellengnami songon mendaki gunung manang mardalan di pantai, biasana lebih tenang do perasaan ni nasida. Gabe ummura ma hami makkata-hatai dohot nasida jala mamboto aha na dipikkirhon nasida.” Si Katya na dipaboa nakkin mandok, “Dung mulak sikkola, diajak omak do au lao tu taman na bagak. Ala tenang suasanana, gabe ummura ma au paboahon aha na huadopi di sikkola manang aha na hukhawatirhon.”

16. Songon dia do akka keluarga boi menikmati toppaan ni Jahowa?

¹⁶ Bibel mandok, “Adong do tikkina mekkel.” (Pjm. 3:1, 4) Tikki rap sada keluarga menikmati akka toppaan, gabe kesempatan ma i di nasida lao bersantai, marlas ni roha, jala gabe lam kompak. Nungnga ditoppa Jahowa akka inganan na bagak di tano on asa boi tanikmati. Godang do keluarga na lao tu luar kota, tu dolok-dolok, manang tu pantai. Adong do muse dakdanak na lomo rohana marmeam di taman, lao tu kebun binatang, marlange di sunge, di danau, manang di laut. Godang do kesempatan di hita asa boi menikmati alam dohot akka toppaan ni Jahowa!

17. Boasa ikkon diurupi akka natua-tua gellengna asa menikmati toppaan ni Debata?

¹⁷ Di tano na imbaru, sude keluarga boi do annon marlas ni roha menikmati toppaan ni Jahowa, lobi sian na boi diulahon nasida saonari. Dang porlu be mabiar hita tu binatang jala akka binatang pe dang mabiar be tu hita. (Jes. 11:6-9) Marlas ni roha ma hita ala boi menikmati akka toppaan ni Jahowa saleleng ni lelengna. (Ps. 22:26) Alai sasittongna mulai sian saonari boi do diurupi akka natua-tua gellengna menikmati akka toppaan. Molo dipakke hamu akka toppaan i lao mangajarhon taringot Jahowa tu gellengmuna, gabe sarupa ma perasaan ni nasida tu Raja Daud na mandok, “Ale Jahowa, dang adong na boi mambahen songon na binahenmi.”​—Ps. 86:8.