1-2. Molo dang rade dope hamu tardidi, boasa unang pola metmet rohamuna? (Ida gambar sampul.)

 MOLO olo hamu tardidi, sada cita-cita na massai denggan do i. Nungnga rade be hamu tardidi saonari? Molo nungnga pos rohamuna lao tardidi jala nungnga setuju akka sintua, unang ma menahan diri hamu. Molo diulahon hamu i, pasti dipasu-pasu do hamu ala nungnga mangalehon diri tu Jahowa.

² Alai hea do adong na mandok tu hamu porlu dope dibahen hamu kemajuan asa boi tardidi? Manang hea do hamu merasa songon i? Molo hea, unang pola metmet rohamuna. Alana sude do hita boi mambahen kemajuan asa boi tardidi dang soal poso dope manang nungnga matua.

3. Aha do na disukkun pejabat Etiopia i tu si Pilippus, jala sukkun-sukkun aha do na boi ro tu rohatta? (Ulaon ni Apostel 8:36, 38)

³ Jaha Ulaon ni Apostel 8:36, 38. Sahalak pejabat sian Etiopia manukkun tu si Pilippus, “Dang boi dope au tardidi?” Lomo do roha ni pejabat Etiopia i asa tardidi. Alai, gabe tubu ma sukkun-sukkun tu rohatta: ‘Tutu do nungnga rade pejabat Etiopia i lao tardidi?’

4. Sian dia taboto na lomo do roha ni halak Etiopia i torus marsiajar?

⁴ Bibel mandok lao do halak Etiopia i “tu Jerusalem manomba Debata”. (Ul. 8:27) Nungnga pinda agama ibana gabe  penganut agama Jahudi. Jadi pasti nungnga diboto ibana taringot Jahowa sian Akka Bukku Heber. Alai lomo do roha ni bawa i asa lam godang na diparsiajari ibana taringot Jahowa. Sian dia taboto? Tikki dijuppangi si Pilippus ibana di pardalanan, aha do na diulahon ibana? Dijaha ibana do bukku ni Panurirang Jesaya. (Ul. 8:28) Dang puas halak Etiopia i holan mamboto ajaran dasar, alai lomo do rohana lam bagas mamparsiajari Bibel.

5. Songon dia do halak Etiopia i mangulahon na diparsiajari ibana?

⁵ Timbo do pangkat ni bawa i “di pamarettaon ni Kandake, ratu ni halak Etiopia”. (Ul. 8:27) Pasti sibuk hian do ibana ala godang tanggung jawabna. Alai dilehon ibana do tikkina lao manomba Jahowa. Dang puas ibana holan mamparsiajari hasittongan, alai diulahon ibana do i. Alani i ma lao ibana sian Etiopia tu Jerusalem lao manomba Jahowa di bagas joro. Pasti godang do habis tikki dohot biaya di pardalananna. Alai dang gabe masalah i di ibana ala lomo rohana manomba Jahowa.

6-7. Boasa boi lam togu holong ni halak Etiopia i tu Jahowa?

⁶ Diurupi si Pilippus do halak Etiopia i mamparsiajari godang hasittongan na penting, termasuk ma taringot ise do Messias. (Ul. 8:34, 35) Hona do i tu rohana dung mamboto sude naung diulahon Jesus tu dirina. Aha do na diulahon ibana dukkon i? Sasittongna boi do tetap halak Etiopia i gabe penganut agama Jahudi na diparsangapi. Alai holongna tu Jahowa dohot tu Anakna i ma na manggerakkon ibana lao tardidi gabe pengikut ni Jesus Kristus. Dung diida si Pilippus nungnga rade be bawa i tardidi, dididihon si Pilippus ma ibana.

⁷ Molo tatiru contoh na dibahen halak Etiopia i, gabe rade ma hita tardidi. Gabe pos ma rohatta songon halak Etiopia i na mandok, “Dang boi dope au tardidi?” Saonari tabahas ma songon dia hita boi mangihutton teladan ni bawa i, i ma torus marsiajar, mangulahon na diparsiajari, jala toktong patoguhon holong tu Jahowa.

8. Sesuai tu Johannes 17:3, aha do na ikkon taulahon?

⁸ Jaha Johannes 17:3. Godang do sian hita na olo marsiajar Bibel dung manjaha hata ni Jesus di ayat i. Alai sasittongna ayat i pe manjujui hita do asa torus marsiajar. Alana ikkon torus do hita mananda Debata na sasada i, “Debata na sittong” i. (Pjm. 3:11) Jadi ikkon torus do hita marsiajar saleleng ni lelengna. Lam godang na taparsiajari taringot Jahowa, gabe lam jonok ma hita tu Ibana​—Ps. 73:28.

9. Cukkup do holan mamparsiajari ajaran dasar ni Bibel, jala boasa?

 ⁹ Tikki mulai hita marsiajar Bibel, holan ajaran dasarna dope na taparsiajari. Di suratna tu halak Heber didok si Paulus do i “ajaran na parjolo sian hata ni Debata”. Dang didok ibana molo ajaran dasar i dang penting, alana dipatudos ibana do i songon susu na mambahen poso-poso magodang. (Heb. 5:12; 6:1) Nang pe songon i, dijujui ibana do sude halak Kristen asa unang holan mamparsiajari ajaran dasar alai ikkon bagas do diparsiajari nasida Hata ni Debata. Balga do keinginanmuna marsiajar lam bagas taringot ajaran ni Bibel? Olo do hamu torus marsiajar taringot Jahowa dohot lomo ni rohana?

10. Boasa adong na merasa maol mandapot manfaat tikki marsiajar?

¹⁰ Godang do ra sian hita na merasa maol mandapot manfaat tikki marsiajar. Songon i do tong dirasa hamu? Tikki di sikkola, diajari do hamu cara manjaha dohot marsiajar na denggan? Boi do dinikmati hamu tikki marsiajar jala dihilala hamu do manfaatna? Manang na merasa do hamu dang parsiajar na denggan? Molo ido, dang holan hamu na songon i. Alai pos ma rohamuna olo do Jahowa mangurupi hamu, alana sempurna do Ibana jala Guru na terbaik di hamu.

11. Aha do buktina ‘Guru na Sangap’ do Jahowa i?

¹¹ Didok Jahowa do dirina ‘Guru na Sangap’. (Jes. 30:20, 21) Sabar do Ibana, burju, jala masuk akkal. Akka na denggan do diida Ibana sian muridna. (Ps. 130:3) Jala dang hea dipangido tu hita lobi sian na boi taulahon. Taingot ma muse Jahowa do na merancang otakta, jala silehon-lehon na massai luar biasa do i. (Ps. 139:14) I do alana adong di hita keinginan lao marsiajar. Lomo do roha ni Jahowa asa marlas ni roha hita marsiajar taringot Ibana salelengna. Alani i, sian saonari ikkon “mauas” hita tu hasittongan ni Bibel. (1 Ptr. 2:2) Bahen ma tujuan na boi diraih hamu jala toktong ma ihutton jadwal naung dibahen hamu lao marsiajar. (Jos. 1:8) Marhite pangurupion ni Jahowa, boi ma lam dinikmati hamu tikki marsiajar jala mangarimangi taringot Ibana.

12. Boasa ikkon taparsiajari taringot parngoluon dohot pelayanan ni Jesus?

¹² Bahen ma tikki lao mangarimangi taringot parngoluon dohot pelayanan ni Jesus. Asa boi hita marhasil melayani Jahowa ikkon tatiru do teladan ni Jesus, tarlumobi di tikki na maol saonari on. (1 Ptr. 2:21) Nungnga dipaboa Jesus hian tu akka siseanna, godang do tantangan na lao diadopi nasida. (Luk. 14:27, 28) Alai pos do rohana boi do akka siseanna i toktong setia tu Debata songon ibana. (Joh. 16:33) Alani i parsiajari hamu ma taringot parngoluon ni Jesus jala bahen ma tujuan lao maniru ibana di ngolumuna siganup ari.

13. Aha do na ikkon tapangido tu Jahowa, jala boasa?

¹³ Memang porlu do adong parbinotoan asa mura hita marsiajar taringot Jahowa jala asa boi tapatudu sifat na denggan songon holong dohot haporseaon. Alai dang sae holan i. (1 Kor. 8:1-3) Tikki marsiajar hita, tapangido ma tu Jahowa asa lam togu haporseaotta. (Luk. 17:5) Dialusi Jahowa do tangiang sisongon i. Haporseaon na togu alani parbinotoan na sittong taringot Debata ma na mangurupi hita mambahen kemajuan.​—Jak. 2:26.

14. Songon dia do Apostel Petrus patuduhon massai penting mangulahon na taparsiajari? (Ida gambar.)

¹⁴ Takkas do dipaboa Apostel Petrus boasa massai penting akka pengikut ni Kristus mangulahon na diparsiajari nasida. Dipaboa  ibana do contoh taringot si Noak di Bibel. Didok Jahowa do tu si Noak paroonna nama banjir na balga lao pamatehon akka parjahat di tikki i. Dang boi malua si Noak dohot keluargana holan mamboto na lao ro banjir. Didok si Petrus, andorang so ro do banjir i ‘dipature si Noak parau i’. (1 Ptr. 3:20) Takkas ma, diulahon si Noak dohot keluargana do paretta ni Debata lao mambangun parau na balga. (Heb. 11:7) Dung i dipatudos si Petrus do na diulahon si Noak i tu pandidion. Didok ibana, “Akka na masa di tikki i manggombarhon pandidion, na paluahon hamu nuaeng.” (1 Ptr. 3:21) Jadi sarupa do ulaon ni si Noak dohot keluargana mambangun parau i saleleng martaon-taon tu upaya na dibahen hamu saonari asa boi tardidi. Aha do na ikkon diulahon hamu asa rade tardidi?

15. Songon dia do hita patuduhon naung bertobat hita sian dosatta?

¹⁵ Ikkon bertobat do hamu sian akka dosamuna. (Ul. 2:37, 38) Molo botul-botul do hamu bertobat, berarti ikkon dibahen hamu do perubahan. Nungnga marhasil hamu mambolokkon akka ulaon na dihasogohon Jahowa, songon mangulahon seks na so patut, mamakke tembakau, manang mandokkon hata na rorang? (1 Kor. 6:9, 10; 2 Kor. 7:1; Eps. 4:29) Molo dang marhasil dope hamu, unang ma menyerah. Torus ma berupaya mambahen perubahan. Pangido ma bantuan ni guru studimuna manang sintua di huria. Molo poso dope hamu jala tinggal dohot natua-tua, pangido ma bantuan ni nasida asa boi hamu mambolokkon kebiasaan na so denggan na mangabbati hamu tardidi.

16. Aha do na ikkon taulahon asa lam togu hubungatta tu Jahowa?

¹⁶ Penting do muse mangulahon akka ulaon na mambahen togu parale-aleotta tu Jahowa, termasuk ma i ro tu parpunguan jala mangalehon komentar. (Heb. 10:24, 25) Molo nungnga memenuhi syarat hamu lao marbarita, pastihon ma asa taratur hamu mangulahon i. Lam sering hamu marbarita na uli, lam dinikmati hamu ma i. (2 Tim. 4:5) Molo poso dope hamu jala tinggal dohot natua-tua, sukkun ma dirimuna, ‘Ikkon jolo dipaingot natua-tuakku do au asa lao marpungu manang marbarita?’ Molo sian keinginanmuna  sandiri mangulahon i, on patuduhon na massai balga do holong dohot haporseaonmuna tu Jahowa. Jala diargai hamu do sude na dilehon Ibana tu hamu. On ma buktina na ‘marsitutu hamu manomba Debata’, jala songon pelean do i tu Jahowa. (2 Ptr. 3:11; Heb. 13:15) Las do roha ni Jahowa molo diulahon hamu sudena i dang ala na tarpaksa. (Bandingkon tu 2 Korint 9:7.) Alai ala na las do rohamuna mangalehon na dumenggan tu Jahowa.

17-18. Sifat aha do na ikkon dipatudu hamu asa boi mambahen kemajuan lao tardidi, jala boasa? (Poda 3:3-6)

¹⁷ Tikki dibahen hamu kemajuan asa boi tardidi, olo do masa tantangan tu hamu. Bisa jadi adong do piga-piga halak na mangejek hamu alani haporseaonmuna. Bahkan olo do nasida menentang hamu. (2 Tim. 3:12) Mungkin nungnga berupaya hamu asa unang mangulahon akka ulaon na diboto hamu sala, alai sipata olo dope diulahon hamu i. Manang olo do gabe metmet rohamuna ala dang tercapai dope cita-citamuna. Aha do na boi mangurupi hamu asa toktong martahan? I ma holong tu Jahowa.

¹⁸ Massai arga do holongmuna tu Jahowa. (Jaha Poda 3:3-6.) Molo togu do holongmuna tu Jahowa, on boi mangurupi hamu asa marhasil mangadopi akka tantangan di ngolumuna. Jotjot do dipaboa di Bibel taringot songon dia Jahowa patuduhon holong na manoktong tu akka naposona. Dang hea Jahowa maninggalhon akka naposona jala torus do dihaholongi Ibana nasida. (Ps. 100:5) Ditoppa Jahowa do hita asa boi maniru sifatna. (1 Mus. 1:26) Attong songon dia do caratta patuduhon holong tu Ibana?

19. Songon dia do carana asa lam diargai hamu sude na dibahen Jahowa tu hamu? (Galatia 2:20)

¹⁹ Patudu ma na diargai hamu sude na dilehon Debata. (1 Tes. 5:18) Ganup ari, sukkun hamu ma dirimuna, ‘Songon dia do Jahowa patuduhon holongna tu au?’ Dung i, mandok mauliate ma hamu tu Jahowa di tangiangmuna jala paboa ma akka na denggan naung dibahen Ibana tu hamu. Anggap ma sudena i bukti holong ni Jahowa tu hamu secara pribadi. Songon i do na diulahon Apostel Paulus. (Jaha Galatia 2:20.) Sukkun ma dirimuna, ‘Hupatudu do na holong rohakku tu Jahowa ala nungnga dibahen Ibana na denggan tu au?’ Holong tu Jahowa mangurupi hamu  manolak godaan jala asa marhasil mangadopi akka tantangan. Jala holong on ma na mangurupi hamu asa torus manomba Jahowa ganup ari.

20. Aha do na porlu diulahon hamu asa boi mangalehon ngolumuna tu Jahowa, jala sadia penting do keputusan on?

²⁰ Ujungna ala lam holong rohamuna tu Jahowa, gabe tergerak ma hamu martangiang paboahon na olo hamu mangalehon ngolumuna tu Ibana. Ingot ma, tikki dilehon hamu ngolumuna tu Jahowa, dapotmuna ma harapan na luar biasa, i ma gabe appuna ni Jahowa saleleng ni lelengna. Marjanji do hamu torus melayani Ibana di tikki susa nang sonang. Jala dang porlu diulangi hamu be janji i. Memang keputusan na massai penting do on. Alai ingot ma: Sian sude keputusan na lao dibahen hamu di ngolumuna, mangalehon diri tu Jahowa ma keputusanmuna na terbaik. (Ps. 50:14) Berupaya do Sibolis mambahen asa moru holongmuna tu Jahowa jala asa unang setia be hamu tu Ibana. Alai unang ma paloas Sibolis monang! (Job 27:5) Molo togu holongmuna tu Jahowa, boi do i mangurupi hamu menepati janjimuna lao manomba Ibana saleleng ni lelengna jala toktong jonok tu Ibana.

21. Boasa pandidion i didok parmulaan dope?

²¹ Dung dilehon hamu dirimuna tu Jahowa, makkatai ma hamu dohot sintua di huria taringot rencanamuna lao tardidi. Ingot ma tikki tardidi hamu, disi ma hamu mulai manomba Jahowa saleleng ni lelengna. Alani i patogu ma holongmuna tu Jahowa sian saonari. Bahen hamu ma tujuan asa lam togu holongmuna ganup ari, alana holong i do na mangonjar rohamuna asa tardidi. Ari na istimewa do ari pandidion i, alai parmulaan dope i. Anggiat ma holongmuna tu Jahowa dohot tu Anakna torus martamba-tamba ro di saleleng ni lelengna!