Boasa didok bawa na disurat di Rut 4:1, 6 “rugi” manang “sega” annon parbagiananna molo menikah ibana tu si Rut?

Di jaman ni Bibel, molo adong sahalak bawa naung mangoli alai mate dang margelleng, songon dia do ujungna tano warisanna? Gabe mago do annon goar ni keluargana saleleng ni lelengna? Dipaboa do alusna di Patik ni si Musa.

Molo adong sahalak bawa na mate manang gabe pogos jala manjual tanona, songon dia do ujungna tano warisanna i? Boi do haha anggina manang keluargana na unjonok manobus tano i muse. Gabe boi ma toktong appuna ni keluargana tano warisanna i.​—3 Mus. 25:23-28; 4 Mus. 27:8-11.

Songon dia do asa toktong adong na mamboan goar ni na mate i? Marhite perkawinan ipar. Artina haha manang anggi ni na mate i ma na mambuat na mabalu i gabe istrina. Molo adong anak ni nasida, anakna i ma annon na mamboan goar ni suamina naung mate i dohot na mewarisi tanona. Alani pengaturan on, gabe boi ma terpenuhi kebutuhan ni na mabalu i. On ma na masa tu si Rut.​—5 Mus. 25:5-7; Mat. 22:23-28.

Taparrohahon ma na masa tu si Naomi. Ibana menikah tu sahalak bawa na margoar si Elimelek. Tikki mate si Elimelek dohot dua anakna, dang adong be bawa di keluarga i na mangurus ibana. (Rut 1:1-5) Alani i dung mulak tu Juda, dipangido si Naomi ma tu si Rut, parumaenna i asa makkatai tu si Boas lao manobus tano warisan ni nasida ala si Boas do keluarga ni si Elimelek na unjonok. (Rut 2:1, 19, 20; 3:1-4) Alai diboto si Boas do adong dope bawa na unjonok hubunganna tu si Elimelek sian ibana. Dang dipaboa di Bibel ise goarna. Ibana ma na lebih marhak manottuhon lao manuhor tano i manang na dang.​—Rut 3:9, 12, 13.

Mulana olo do bawa na marhak manobus i mangurupi si Naomi. (Rut 4:1-4) Memang diboto ibana do ikkon kaluar godang hepengna lao manobus tano i. Alai diboto ibana do muse dang mungkin be si Naomi manubuhon anak lao mewarisi tano ni si Elimelek. Jadi molo dituhor ibana tano i, gabe warisanna ma i jala maruttung ma ibana sian i.

Alai dung diboto bawa i ikkon menikah ibana tu si Rut, gabe muba ma pikkiranna. Didok ibana, “Dang olo au manobus i. Rugi annon au.” (Rut 4:5, 6) Boasa muba pikkiranna?

Molo adong na menikah tu si Rut jala tubu anak ni nasida, gabe anakna i ma na mewarisi tano ni si Elimelek. Attong boasa didok bawa na marhak manobus i rugi annon ibana molo menikah tu si Rut? Dang dipaboa di Bibel alasanna. Alai, taida ma piga-piga kemungkinan.

• Parjolo, gabe sia-sia ma hepeng na dipakke manobus tano i. Alana ujungna dang gabe appunana be tano ni si Elimelek i, gabe tu anak ni si Rut do i.

• Paduahon, gabe ibana ma annon na mangurus si Naomi dohot si Rut.

• Patoluhon, molo adong hian do anak ni bawa i jala tubu muse anakna sian si Rut, ikkon bagionna do tong warisanna tu sude anakna i.

• Paopatton, molo dang adong hian anak ni bawa i jala tubu anakna sian si Rut, gabe anak ni si Rut i ma annon na mewarisi tano ni bawa i dohot tano ni si Elimelek. Jadi molo mate bawa i, sude tanona gabe appuna ni anak na manorusson goar ni keluarga ni si Elimelek i do, dang goar ni bawa i. Alani i ma dang olo bawa i mangurupi si Naomi jala diloas ibana ma si Boas mangurus nasida. Olo pe si Boas mangurupi ala lomo rohana asa toktong tano i gabe appuna ni pinoppar ni si Elimelek.​—Rut 4:10.

Unlomo do roha ni bawa i mampartahatton goarna dohot artana jala dang olo rugi. Alai nang pe berupaya ibana mampartahatton goarna, sasittongna sahat tu sadari on dang taboto ise goar ni bawa i. Asing ni i, gabe mago ma muse kesempatan na istimewa na boi hian dapotna songon na dijalo si Boas gabe oppung ni Messias, i ma Jesus Kristus. Ala egois do bawa i jala dang olo mangurupi halak na susa, gabe dang dapotna be pasu-pasu!​—Mat. 1:5; Luk. 3:23, 32.