1-2. Aha do na mambahen metmet roha ni akka donganta?

DIPAINGOT si Paulus do si Timoteus asa marhobas ibana tu Debata sian nasa gogona. (2 Tim. 4:5) Molo taihutton poda ni si Paulus i, boi ma hita mangalehon na undenggan tu Jahowa nang pe dang mura mangulahon i. Saonari, adong do akka donganta na mabiar marbarita na uli. (2 Tim. 4:2) Misalna akka dongan na tinggal di negara na mangorai ulaon ni Saksi Jahowa, olo do gabe mabiar marbarita na uli. Alana boi do gabe dipenjarahon halak i.

² Godang do masalah na boi mambahen metmet rohatta. Misalna godang do naposo ni Jahowa na ikkon karejo mangalului hepeng. Ala palojahu karejo, gabe hurang ma tikki dohot gogona lao marbarita na uli. Adong do muse akka donganta na ikkon sai di jabu nama ala marsahit na parah manang ala nga matua. Akka donganta na asing, sai metmet do rohana ala merasa dang mararga be ibana di Jahowa. Donganta si Maria, * na tinggal di Timur Tengah mandok, “Berjuang do au asa unang sai torus marmetmet ni roha. Gabe suda do tikki dohot gogokku alani i. Gabe so adong be tikkikku marbarita na uli, jala sai merasa bersalah do au alani i.”

3. Aha do na lao tabahas di artikel on?

³ Dang soal aha masalahta, boi do dibahen Jahowa hita margogo manaon i. Jala boi do diurupi Jahowa hita lao mangalean na undenggan tu Ibana. Sebelum tabahas songon dia Jahowa mangurupi hita, tabahas ma jo songon dia Jahowa mangurupi si Paulus dohot si Timoteus.

4. Aha do sitaonon ni si Paulus?

⁴ Porlu do si Paulus dipatogu, alana godang do sitaononna.  Misalna dipukkuli do ibana, dilempari pakke batu, jala dipenjarahon. (2 Kor. 11:23-25) Dang holan i, hea do ibana marmetmet ni roha alani kelemahanna sandiri. (Rom 7:18, 19, 24) Adong do muse na songon ‘suga di bagasan dagingna’. Jala nungnga mulak-ulak dipangido ibana tu Debata asa dibolokkon i.​—2 Kor. 12:7, 8.

5. Aha do na diulahon si Paulus nang pe godang tantanganna?

⁵ Terbatas do gogo ni si Paulus. Alai diurupi Jahowa do ibana asa boi torus marhobas nang pe godang tantanganna. Misalna tikki tahanan rumah si Paulus di Rom, barani do ibana marbarita na uli tu akka pamimpin ni halak Jahudi dohot tu akka pejabat na disi. (Ul. 28:17; Plp. 4:21, 22) Marbarita do ibana muse tu akka pengawal ni istana dohot tu akka halak na ro manjuppangi ibana. (Ul. 28:30, 31; Plp. 1:13) Dibahen ibana do muse akka surat lao patoguhon halak Kristen di tikki i jala marguna dope i sahat tu saonari. Tikki diida halak Kristen na tinggal di Rom teladan ni si Paulus i, gabe dipatogu ma nasida jala “lam barani do nasida paboahon hata ni Debata”. (Plp. 1:14) Jadi nang pe dang godang na boi diulahon si Paulus, alai berupaya do ibana mangalean na undenggan tu Jahowa. Hasilna “gabe lam tarbarita do barita na uli alani na masa tu [si Paulus]”.​—Plp. 1:12.

6. Sesuai tu 2 Korint 12:9, 10, aha do na mangurupi si Paulus marhasil mangulahon tugasna?

⁶ Diboto si Paulus do, boi pe ibana mangulahon sude tugasna i dang alani gogona sandiri, alai alani gogo na sian Jahowa do. Didok ibana ‘lam balga do huaso ni Debata alani hagaleonna’. (Jaha 2 Korint 12:9, 10.) Dilean Jahowa do tondi parbadia tu si Paulus asa boi ibana marhasil mangulahon sude tugasna i, nang pe ikkon dianiaya, dipenjarahon, jala mangadopi tantangan na asing.

7. Aha do tantangan ni si Timoteus tikki mangulahon tugasna?

⁷ Si Timoteus pe songon si Paulus do. Jahowa do na diandalhon ibana tikki mangulahon tugasna. Misalna tikki missionaris dope si Paulus, dohot do si Timoteus mandongani ibana. Hea do muse diutus si Paulus si Timoteus makkunjungi akka huria lao patoguhon halak Kristen na disi. (1 Kor. 4:17) Alai dang sai mura i. Hea do merasa dang layak si Timoteus mangulahon tugasna i. Alani i didok si Paulus ma,  “Unang ma adong na leas rohana tu ho ala poso dope ho.” (1 Tim. 4:12) Asing ni i, “jotjot do [si Timoteus] marsahit”. Jala songon suga di bagasan dagingna do sahitna i. (1 Tim. 5:23) Alai pos do roha ni si Timoteus, lehonon ni Debata do tondi parbadia tu ibana asa boi margogo lao marbarita na uli jala patoguhon dongan na asing.​—2 Tim. 1:7.

8. Aha do na dilean Jahowa lao mangurupi akka naposona saonari?

⁸ Dilehon Jahowa do gogo tu akka naposona ‘lobi sian gogo ni sahalak jolma’, asa boi nasida toktong setia tu Ibana. (2 Kor. 4:7) Saonari taulas ma opat cara ni Jahowa mangurupi hita asa boi toktong margogo jala setia, i ma lewat tangiang, Bibel, akka dongan sahaporseaon, dohot ulaon marbarita.

9. Songon dia do tangiang boi mangurupi hita?

⁹ Margogo alani tangiang. Di Epesus 6:18, dipaingot si Paulus do hita asa martangiang tu Debata “ganup tikki”. Alusan ni Jahowa do tangiangta i. Bahenonna do hita margogo. Si Jonni na tinggal di Bolivia, hea do makkilala songon dia Jahowa mangurupi ibana tikki gok sitaononna. Misalna hea do rap marsahit istrina, bapakna, dohot omakna. Jadi ikkon berjuang do ibana mangurus halak i na tolu jala paradehon kebutuhan ni keluargana. Ujungna mate ma omakna. Jala leleng do malum sahit ni istri dohot bapakna i. Didok si Jonni ma, “Tikki i, holan tangiang do na boi mangurupi au asa unang sai marsak. Hupaboa do sude pakkilalaanku tu Jahowa.” Dibahen Jahowa do si Jonni margogo asa boi ibana martahan manaon hasusaanna i. Molo donganta si Ronal sahalak sintua di Bolivia, baru dope dibege ibana kabar ni omakna na marsahit kanker. Hape sabulan dukkon i, mate ma omakna i. Aha do na mangurupi ibana? Didok ibana, “Martangiang do au tu Jahowa paboahon sude pakkilalaanku. Huboto do holan Jahowa do na paling mangattusi perasaanku.” Alani borat ni sitaononta, sipata dang tarhatahon be manang aha tikki martangiang. Alai nang pe songon i toktong do dipangido Jahowa asa tapaboa sude na di rohatta tu Ibana.​—Rom 8:26, 27.

10. Sesuai tu Heber 4:12, boasa porlu tajaha jala tarimangi isi ni Bibel?

¹⁰ Margogo alani Bibel. Dijaha si Paulus do Surat na Badia asa boi ibana margogo. Hita pe boi do songon i. (Rom 15:4) Molo tajaha Bibel jala tarimangi i, pasti diurupi Jahowa do hita mangulahon na tajaha i marhite tondi parbadiana. (Jaha Heber 4:12.) Si Ronal, naung dipaboa nakkin mandok, “Las hian do rohakku ala nungnga hubiasahon manjaha Bibel tiap borngin. Tikki hurimangi i, gabe huboto ma akka sifat ni Jahowa jala gabe huboto ma songon dia Jahowa mangurupi akka naposona. On mambahen au margogo.”

11. Songon dia do Bibel mangurupi sahalak donganta borua na mabalu?

¹¹ Molo tarimangi Hata ni Debata, diurupi ma hita padenggatton cara marpikkirta. Tabereng ma jo pengalaman ni donganta borua naung mabalu. Dipangido sahalak sintua ma ibana manjaha bukku Job. Tikki dijaha ibana bukku i, disalahon ibana ma cara marpikkir ni si Job. Didok ibana ma di bagas rohana, “Unang holan masalahmi pikkiri Job!” Alai ujungna disadari ibana ma songon si Job do pakkilalaanna. Gabe dang holan tu masalahna be ibana berfokus, alai tu Jahowa  dohot tu harapan na sian Jahowa. On ma na mambahen ibana margogo nang pe lungun dope rohana ala mate suamina.

12. Songon dia do Jahowa patoguhon hita marhite dongan sahaporseaon?

¹² Margogo alani dongan sahaporseaon. Dipatogu Jahowa do hita muse marhite akka dongan sahaporseaon. Misalna si Paulus, lomo do rohana “masipatoguan” dohot akka dongan sahaporseaonna. (Rom 1:11, 12) Si Maria naung dipaboa di paragraf sebelumna pe, lomo do rohana pajuppang dohot akka dongan sahaporseaon. Didok ibana, “Dipakke Jahowa do akka dongan sahaporseaon patoguhon au nang pe sasittongna dang diboto nasida aha masalahku. Dipatogu do au tikki makkata-hatai hami. Adong do muse akka dongan na mangalean surat tu au. Massai huhaporluhon do i sude. Tikki makkata-hatai hami, gabe marsiajar do au sian pengalaman ni akka dongan na tong sarupa masalahna dohot au. Akka sintua pe diparrohahon do au. Alani i gabe pos ma rohakku na holong do roha ni akka dongan tu au.”

13. Songon dia do carana patoguhon akka dongan di parpunguan?

¹³ Di parpunguan ma hita boi masipatoguan dohot akka dongan sahaporseaon. Tikki ro hita tu parpunguan, taparrohahon ma akka dongan na porlu dipatogu. Jala tapatudu ma na taargai do na diulahon nasida saleleng on jala tapaboa ma na holong do rohatta tu nasida. Tabereng ma pengalaman ni donganta si Peter sahalak sintua. Sebelum mulai parpunguan, dijuppangi ibana ma sahalak donganta borua na adong onom anakkonna. Dang Saksi Jahowa suami ni donganta on. Didok sintua i ma, “Molo huparrohahon hami sude na diulahon sus, gabe dipatogu do rohanami. Sai diboan hamu do marpungu akka dakdanak i jala diurupi hamu do nasida paradehon komentar.” Manetek ma ilu ni donganta borua i jala didok ibana ma, “Mauliate ma brur, nga dipatogu hamu au.”

14. Songon dia do ulaon marbarita na uli boi mambahen hita margogo?

¹⁴ Margogo ala marbarita na uli. Molo marbarita na uli hita, gabe dipatogu do rohatta nang pe dang sude jolma olo manjalo barita na uli na tapasahat. (Poda 11:25) Saonari, tabereng ma jo pengalaman ni donganta si Sari. Tikki adong anggota keluargana na dipecat, lungun hian ma rohana. Jala sai dipikkiri si Sari ma songon on, ‘Boha do ate bahenokku mangurupi ibana.’ Gabe sai holan i ma dipikkiri ibana. Aha do na dibahen ibana lao mangatasi i? Marbarita na uli! Tikki marbarita na uli, gabe fokus ma si Sari mangurupi akka halak na dijuppangi ibana. Didok ibana, “Huhilala do na diurupi Jahowa au. Dilehon do studi na hatop maju tu au. Sai torus do au boi margogo ala marbarita na uli.”

15. Aha do na boi taparsiajari sian pengalaman ni si Maria?

¹⁵ Alani keadaan na terbatas adong do piga-piga donganta na makkilala dang godang na boi diulahon ibana. Molo songon i do na dihilala hamu, unang pola metmet rohamuna. Ingot ma molo nungnga dibahen hamu na undenggan, nungnga las roha ni Jahowa. Saonari taida ma jo muse pengalaman ni si Maria. Pinda do ibana tu daerah na marbahasa asing, alai sipata merasa do ibana dang marguna disi. Didok ibana, “Tikki marbarita au, biasa-biasa do kata pengantarhu. Sipata holan manjahahon sada ayat do au manang holan mangalean sada risalah.” Lam metmet do muse rohana ala dibandingkon ibana  kemampuanna tu kemampuan ni akka dongan naung lancar mamakke bahasa di daerah i. Alai diubah ibana ma cara marpikkirna. Gabe disadari ibana ma boi do dipakke Jahowa ibana nang pe dang lancar dope mamakke bahasa i. Didok ibana ma, “Sederhana do isi ni Bibel jala i do na mangurupi akka halak marhamubaon.”

16. Songon dia do asa boi hita toktong marbarita na uli nang pe dang boi kaluar sian jabu?

¹⁶ Diboto Jahowa do na lomo hian rohatta marbarita na uli nang pe dang boi be hita kaluar sian jabu ala marsahit. Alani i, diurupi do hita asa boi toktong marbarita na uli, misalna tu dokter manang tu perawat. Molo sai tabandingkon do na taulahon saonari tu na taulahon najolo i, olo do gabe metmet rohatta. Alai molo sai taingot do songon dia Jahowa mangurupi hita saonari, boi ma hita toktong margogo jala marlas ni roha mangadopi akka tantangan di ari na naeng ro.

17. Songon na disurat di Parjamita 11:6, boasa hita ikkon toktong marbarita na uli?

¹⁷ Tikki marbarita na uli, dang taboto dia barita hasittongan na tubu di roha ni sasahalak. (Jaha Parjamita 11:6.) Misalna, pengalaman ni donganta si Betti naung marumur 80 an. Sering do ibana marbarita na uli lewat telepon dohot surat. Hea do dikirim ibana surat na marisi Menara Pengawal 1 Maret 2014, na marjudul “Apa yang Allah Beri untuk Anda?” Dang diboto si Betti na manjalo surat i ternyata sapasang suami istri naung leleng dipecat. Sai torus ma dijaha halak i majalah i. Tikki dijaha suamina i majalah i, dihilala ibana hira na makkatai do Jahowa tu ibana. Gabe marpungu ma muse halak i jala aktif dukkon 27 taon lobi dipecat. Pasti gabe dipatogu jala las hian do roha ni donganta si Betti mangida halak i mulak muse tu Jahowa!

18. Songon dia do dibahen Jahowa mangurupi hita asa toktong margogo?

¹⁸ Dibahen Jahowa do hita margogo lewat tangiang, Bibel, akka dongan sahaporseaon, dohot ulaon marbarita na uli. Molo tamanfaatton i sude, berarti na pos do rohatta boi jala lomo roha ni Jahowa mangurupi hita. Torus ma hita marpos ni roha tu Debata Jahowa. Ai lomo do rohana “mangurupi akka halak na manomba Ibana sian nasa rohana”.​—2 Kron. 16:9.