1-2. Aha do na didok sahalak penulis taringot Jesus, jala aha do na lao tabahas di artikel on?

MARJUTA halak saonari mandok, porsea do halak i tu Jesus. Alai dang diihutton nasida na diajarhon Jesus. (2 Tim. 4:3, 4) Sahalak penulis mandok, “Molo adong halak na asing na persis songon Jesus saonari, na mangajarhon songon na diajarhon Jesus najolo . . . tolakon ni akka halak do ibana songon na dibahen tu Jesus 2.000 taon naung salpu? . . . Alusna: Ido!”

² Godang do halak di abad na parjolo na mambege ajaran ni Jesus jala mangida ibana mambahen mukjizat. Alai tong do dang porsea nasida tu ibana. Boasa? Di artikel sebelumna, nungnga tabahas opat alasanna. Saonari tabahas ma muse opat nai alasanna. Dung i tabahas ma boasa ditolak akka halak barita na tapasahat jala aha na ikkon taulahon asa torus taihutton Jesus.

3. Boasa godang halak na so olo porsea tu Jesus?

³ Tikki di tano on Jesus, mardongan do ibana tu sude halak. Misalna olo do ibana rap mangan dohot akka na mora, songon i nang dohot akka parhuaso. Alai mardongan do tong ibana tu akka halak na pogos dohot halak na susa. Asing ni i marasi ni roha do ibana tu akka pardosa. Alani i ma gabe godang halak na so olo porsea tu Jesus. Didok halak i do tu sisean ni Jesus, “Boasa mangan minum hamu rap dohot akka sijalo pajak dohot akka pardosa?” Alai dialusi Jesus ma, “Dang porlu pangubati tu halak na sehat,  tu halak na marsahit do. Ai dang na lao manjou halak na mangulahon na sittong au umbahen na ro, alai manjou pardosa i do asa muba nasida.”​—Luk. 5:29-32.

4. Songon na didok si Jesaya, aha do seharusna na ikkon botoon ni halak Jahudi taringot Messias?

⁴ Aha do na didok di Surat na Badia? Leleng andorang so ro Jesus, nungnga dipaboa si Jesaya hian na lao tolakon ni akka halak do Messias. Didok si Jesaya, “Dileai do ibana jala dipasiding akka jolma . . . Songon na ditabunihon ibana do bohina sian hami. Dileai do ibana jala dang marlapatan ibana di hami.” (Jes. 53:3) Ala nungnga dipaboa si Jesaya na ikkon dileai “akka jolma” do Messias, seharusna na ikkon diboto halak Jahudi hian na lao ditolak do Jesus.

5. Songon dia do pandapot ni akka halak taringot siihutton Jesus?

⁵ Songon i do na masa saonari? Ido. Godang do pamimpin agama saonari na las rohana mangida halak na sangap, na mora, jala na timbo sikkolana, nang pe pangalaho dohot parngoluon ni nasida dang sesuai tu prinsip ni Bibel. Alai leas do roha ni akka pamimpin agama i mangida siihutton Jesus, jala dang sangap di nasida akka siihutton Jesus i nang pe denggan pangalaho ni nasida. Songon na didok si Paulus, dipillit Debata do akka halak “na lea” sian portibi on gabe naposona. (1 Kor. 1:26-29) Alai sasittongna molo di Debata, arga do sude naposona.

6. Aha do na didok Jesus di Mateus 11:25, 26, jala songon dia do carana hita maniru ibana?

⁶ Aha do na ikkon taulahon? (Jaha Mateus 11:25, 26.) Unang ma terpengaruh hita tu pandangan ni portibi on taringot Saksi Jahowa. Taingot ma holan akka halak na serep marroha do na dipakke Jahowa mangulahon lomo ni rohana. (Ps. 138:6) Jala pikkirhon ma sadia godang akka halak na so timbo sikkolana na dipakke Jahowa mangulahon lomo ni rohana.

7. Boasa didok Jesus munafik do halak Parise, jala songon dia do reaksi ni nasida mambege hata ni Jesus i?

⁷ Barani do Jesus pasingotton akka pamimpin agama di tikki i. Alana diulahon nasida do akka hasomalan na so sittong. Misalna barani do Jesus mandok nasida halak na munafik. Alana uppenting do di nasida adat ni nasida taringot manussi tangan daripada pasangappon natua-tuana. (Mat. 15:1-11) Gabe tarsonggot do akka sisean ni Jesus mambege i. Jadi didok nasida ma tu Jesus, “Diboto ho do naung haccit roha ni halak Parise i mambege na nidokmi? Dialusi Jesus ma, ‘Ikkon dicabut do sude suan-suanan na so disuan Damang na di banua ginjang i. Pasombu ma disi. Panogu-nogu na mapitung do nasida. Molo na mapitung manogu-nogu na mapitung, rap madabu ma na nasida na dua tu lombang.’” (Mat. 15:12-14) Gabe muruk do akka pamimpin agama mambege hata ni Jesus i, alai nang pe songon i toktong do diulahon Jesus na sittong.

8. Sude do agama dihalomohon Debata?

⁸ Dipaboa Jesus do muse ajaran ni nasida na sala. Jala didok Jesus do dang sude agama dihalomohon Debata. Didok Jesus, godang do halak na mardalan di dalan na bidang na parohon hamagoan. Alai holan saotik do halak na mardalan di dalan na soppit na parohon hangoluan. (Mat. 7:13, 14) Jadi takkas do dipatudu Jesus, adong do halak na merasa manomba Debata hape sasittongna daong. Didok Jesus ma tu halak i, “Manat ma hamu tu akka panurirang na mangajarhon na so  tutu. Ai songon biru-biru do nasida ro tu hamu, alai sasittongna serigala do nasida na naeng mangaribak-ribak hamu. Alai, na lao tandaonmuna ma nasida sian pangalahona.”​—Mat. 7:15-20.

9. Songon dia do Jesus patuduhon na sala do ajaran ni halak Parise dohot Saduse?

⁹ Aha do na didok di Surat na Badia? Nungnga dipaboa panurat Psalmen hian, na holong do roha ni Messias tu jabu ni Jahowa. (Ps. 69:9; Joh. 2:14-17) Holong ni rohana i ma na mambahen Jesus barani patuduhon na sala do ajaran dohot ulaon ni akka halak di tikki i. Misalna diajarhon halak Parise do adong tondi na so olo mate. Alai molo Jesus mangajarhon songon halak na modom do na mate i. (Joh. 11:11) Molo halak Saduse, dang porsea tu haheheon. Hape dipahehe Jesus do si Lasarus. (Joh. 11:43, 44; Ul. 23:8) Halak Parise pe mangajarhon nungnga ditottuhon Debata hian sude na masa. Alai molo Jesus mangajarhon, boi do hita manottuhon aha na lao taulahon, naeng tasomba Debata manang na dang.​—Mat. 11:28.

10. Boasa godang halak na manolak Saksi Jahowa?

¹⁰ Songon i do na masa saonari? Ido. Godang do halak na manolak Saksi Jahowa ala tapaboa dang sesuai ajaran ni agama ni nasida tu isi ni Bibel. Diajarhon pamimpin agama do molo akka halak na jahat disiksa di api naroko. Jala dimanfaatton nasida do ajaran i asa boi lomo-lomona mangatur jemaatna. Alai tapaboa do na so sittong ajaran i. Tapaboa do na so mungkin diulahon Debata parholong i. Diajarhon nasida do muse adong tondi na so olo mate. Alai tapaboa do na so sittong ajaran i. Alana molo sittong i berarti dang adong na porlu dipahehe. Diajarhon nasida do muse, nungnga ditottuhon Debata sude na masa. Alai tapaboa do, boi do hita sandiri na mamillit aha na lao taulahon, naeng tasomba Debata manang na dang. Ala tapaboa i sude, boha do reaksi ni nasida? Gabe muruk do halak i.

11. Songon na didok Jesus di Johannes 8:45-47, aha do buktina na holong rohatta tu hasittongan?

¹¹ Aha do na ikkon taulahon? Molo  holong rohatta tu hasittongan, Hata ni Debata ma na tahaporseai jala taihutton. (Jaha Johannes 8:45-47.) Unang ma hita songon Sibolis. Toktong ma hita hot di bagasan hasittongan. Unang ma taulahon manang aha pe na maralo tu lomo ni roha ni Debata. (Joh. 8:44) Dipangido Debata do ‘ikkon sogo rohatta tu na jahat jala ikkon holong rohatta tu na denggan’ songon Jesus.​—Rom 12:9; Heb. 1:9.

12. Boasa gabe ditolak halak Jahudi Jesus ala dihukum mate ibana di hau?

¹² Tabahas ma muse alasan na asing boasa ditolak halak Jahudi Jesus. Didok si Paulus, “Tabaritahon do taringot tu Kristus na dihukum mate di hau. Alai massai maol do barita i dijalo halak Jahudi.” (1 Kor. 1:23) Ala dihukum mate Jesus di hau, gabe ditolak halak Jahudi ma ibana. Boasa? Alana menurut nasida, parjahat jala pardosa do na dihukum mate di hau, dang Messias.​—5 Mus. 21:22, 23.

13. Aha dope na mambahen godang halak Jahudi dang porsea tu Jesus?

¹³ Godang halak Jahudi dang olo porsea tu Jesus ala dang diboto nasida na so marsala Jesus. Jala dang diboto nasida na dibahen do tuduhan palsu tu ibana. Sasittongna dang adil na masa tu Jesus i. Alana dang diihutton pengadilan ni halak Jahudi aturan na sah lao mangadili Jesus. (Luk. 22:54; Joh. 18:24) Bahkan dilului nasida do hatorangan sian akka saksi palsu asa boi dipamate nasida Jesus. Alai dang adong na sadalan hatorangan ni akka saksi palsu i. Gabe dipaksa nasida ma Jesus mandok hata na boi pakkeon ni nasida manudu Jesus mangulahon na sala. Jadi takkas ma, dang sesuai cara ni nasida i tu aturan na sah lao mangadili. (Mat. 26:59; Mrk. 14:55-64) Dung hehe Jesus, dilaporhon akka tentara ni Rom ma tu sintua ni malim naung kosong kuburan ni Jesus. Jadi dilean nasida ma tu akka tentara i “godang hepeng logam perak”, asa margabus halak i mandok sisean ni Jesus do na manakko bakke ni Jesus i sian kuburan.​—Mat. 28:11-15.

14. Aha do na didok Surat na Badia taringot parmate ni Messias?

 ¹⁴ Aha do na didok di Surat na Badia? Di tikki ni Jesus, godang do halak Jahudi marpikkir dang porlu mate Messias. Alai dang sesuai i tu Surat na Badia na mandok, “Ai nungnga dilehon ibana dirina tu hamatean jala dirippu halak do ibana parjahat, diusung ibana do dosa ni godang halak, jala ibana ma na mambahen pangidoan tu Debata taringot tu halak na mardosa.” (Jes. 53:12) Jadi sabotulna, dang adong alasan ni halak Jahudi manolak Jesus ala ditudu ibana sebagai parjahat jala dihukum mate di hau.

15. Aha do piga-piga tuduhan na dibahen tu Saksi Jahowa?

¹⁵ Songon i do na masa saonari? Ido. Songon Jesus, Saksi Jahowa pe ditudu do mangulahon na sala. Misalna sian taon 1930 sahat tu taon 1950, dilarang do kegiatan ni Saksi Jahowa di Amerika Serikat. Piga-piga hakim sepakat manudu hita mangulahon na sala. Molo di Quebec, Kanada, kerja sama do gareja dohot pamaretta mangorai ulaonta. Godang do donganta na dipenjarahon ala marbarita na uli taringot tu Harajaon ni Debata. Di Jerman, godang do akka donganta na poso na dihukum mate Nazi. Jala piga-piga taon na parpudi on, godang do akka donganta na dipenjarahon di Rusia. Alana didok nasida do kegiatan ni Saksi Jahowa i, kegiatan ekstremis. Dilarang do muse dipakke Bibel Hata ni Debata tu Akka Jolma na Naeng Mangolu di Tano na Imbaru. Didok nasida do Bibel i “bahan ekstremis”, ala dibahen goar ni Jahowa disi.

16. Menurut 1 Johannes 4:1, boasa ikkon jolo tapastihon barita na hurang denggan taringot tu Saksi Jahowa?

¹⁶ Aha do na ikkon taulahon? Molo adong dibege hamu barita na hurang denggan taringot tu Saksi Jahowa, lului ma fakta na sasittongna. Di jamita ni Jesus na di dolok, nungnga didok Jesus na lao “diparoa-roa” do akka siseanna. (Mat. 5:11) Sian Sibolis do gabus on. Dipengaruhi ibana do akka halak na marsogo ni roha tu hita lao paroa-roahon hita. (Pgk. 12:9, 10) Unang ma porsea hita tu gabus i. Unang ma tapaloas gabus i mambahen hita mabiar jala mambahen gale haporseaotta.​—Jaha 1 Johannes 4:1.

17. Aha do na mambahen piga-piga halak dang olo gabe siihutton Jesus?

¹⁷ Andorang so mate Jesus, adong do sada apostelna na menghianati ibana. Adong do muse sada sian apostelna na mandok dang mananda Jesus sappe tolu hali. Jala sude do apostelna maninggalhon Jesus di borngin andorang so mate ibana. (Mat. 26:14-16, 47, 56, 75) Alai dang heran Jesus disi, ala diboto ibana do ikkon masa i. (Joh. 6:64; 13:21, 26, 38; 16:32) Tikki dibereng halak Jahudi na masa tu Jesus i, olo do ra gabe didok rohana, ‘Ah, dang olo au gabe siihutton Jesus molo songon i do hape pangalaho ni akka siseanna!’

18. Aha do na disurat akka panurirang taringot Messias?

¹⁸ Aha do na didok di Surat na Badia? Marratus taon andorang so ro Jesus tu tano on, nungnga dipaboa Jahowa hian na lao dilean do 30 logam perak tu halak na menghianati Messias. (Sak. 11:12, 13) Jala halak na menghianati Messias i, ale-alena sandiri do. (Ps. 41:9) Dung i, nungnga dipaboa si Sakaria hian songon on, “Attukonku ma parmahan i, gabe marserak ma akka biru-biru i.” (Sak. 13:7) Jadi  seharusna molo serep do roha ni sasahalak, dang tolakonna Jesus alani na masa i. Gariada gabe dipatogu do haporseaonna ala diida ibana do saut sude na tarsurat i tu diri ni Jesus.

19. Songon dia do reaksi ni halak na serep marroha tu akka barita na paroa-roahon Saksi Jahowa?

¹⁹ Songon i do na masa saonari? Ido. Saonari piga-piga Saksi Jahowa adong do na maninggalhon hasittongan jala gabe murtad. Berupaya do halak i mempengaruhi akka Saksi na asing asa kaluar sian organisasi. Dibahen na murtad i ma barita na paroa-roahon Saksi Jahowa melalui TV, internet, manang koran. Alai molo halak na serep marroha dang olo terpengaruh tu barita i. Gariada gabe dipatogu do nasida ala nungnga diboto nasida na ikkon masa i.​—Mat. 24:24; 2 Ptr. 2:18-22.

20. Aha do na ikkon taulahon asa toktong hita di bagasan hasittongan? (2 Timoteus 4:4, 5)

²⁰ Aha do na ikkon taulahon? Asa toktong togu haporseaotta taparsiajari ma Bibel, torus ma hita martangiang, jala sibuk ma hita mangulahon ulaon ni Tuan i. (Jaha 2 Timoteus 4:4, 5.) Molo togu haporseaotta, dang terpengaruh hita tu barita na paroa-roahon Saksi Jahowa. (Jes. 28:16) Molo holong do rohatta tu Jahowa, tu Hatana, dohot tu akka dongan, gabe boi ma hita toktong di hasittongan.

21. Boasa toktong hita setia mangihutton Jesus nang pe godang halak manolak hita?

²¹ Di abad na parjolo godang do halak na manolak Jesus, alai godang do tong na mangihutton ibana. Termasuk ma i sahalak anggota ni Sanhedrin dohot “akka malim”. (Ul. 6:7; Mat. 27:57-60; Mrk. 15:43) Saonari, adong do marjuta halak na toktong mangihutton Jesus. Boasa toktong diihutton nasida Jesus? Ala nungnga diboto jala dihaholongi nasida hasittongan. Hata ni Debata mandok, “Dame situtu do dihilala akka halak na makkaholongi patikmu. Dang adong na boi mambahen nasida tartuktuk.”​—Ps. 119:165.