1. Songon dia do reaksi ni akka halak tikki tapaboa hasittongan tu nasida?

DIINGOT hamu dope songon dia hamu boi mananda hasittongan? Sude na diparsiajari hamu sian Bibel mura hian do attusan. Jadi didok rohamuna, na asing pe pasti lomo do rohana mamparsiajari hasittongan i. Pos do rohamuna molo marsiajar Bibel nasida gabe lam denggan ma ngolu ni nasida, jala dapot ni nasida ma hangoluan saleleng ni lelengna di ari na naeng ro. (Ps. 119:105) Gabe semangat ma hita paboahon hasittongan i tu akka donganta dohot tu keluargatta. Alai songon dia do reaksi ni nasida? Godang do na so olo manangihon.

2-3. Sude do halak porsea molo Jesus i do Messias?

² Dang pola heran hita molo ditolak halak barita na tapasahat. Alana Jesus sandiri pe ditolak do. Hape nungnga godang mukjizat dibahen ibana, na patuduhon didongani Debata do ibana. Misalna hea do dipahehe ibana si Lasarus jala dang adong na boi mandok na so tutu i masa. Alai tong do dang olo pamimpin ni halak Jahudi mangakkui Jesus i do Messias. Gariada naeng dibunu halak i do Jesus dohot si Lasarus.​—Joh. 11:47, 48, 53; 12:9-11.

³ Diboto Jesus do godang do halak na so porsea ibana Messias. (Joh. 5:39-44) Alani i ma didok Jesus tu akka sisean ni si Johannes Pandidi, “Marlas ni roha ma halak na so tartuktuk alani au.” (Mat. 11:2, 3, 6) Alai boasa godang halak na manolak Jesus?

4. Aha do na lao tabahas di artikel on?

⁴ Di artikel on dohot di artikel na mangihut, tabahas ma alasanna boasa akka halak di abad na parjolo dang porsea tu Jesus. Tabahas ma muse boasa godang halak saonari  dang olo manangihon barita na tapasahat. Alai na lebih penting tabahas ma songon dia carana patoguhon haporseaotta tu Jesus, asa torus taihutton ibana.

5. Boasa godang halak dang porsea Jesus i do Messias?

⁵ Godang do halak dang olo porsea tu Jesus alani latar belakang ni Jesus. Diakkui nasida do molo Jesus i sahalak guru na massai malo. Jala diboto nasida do boi Jesus mambahen mukjizat. Alai didok roha ni nasida Jesus i holan anak ni tukkang hau na pogos do. Jala Jesus pe sian Nasaret do, sada huta na gelleng na dianggap halak dang penting. Bahkan si Natanael pe sebelum gabe sisean ni Jesus hea do didok songon on, “Tarbahen ma na denggan ro sian Nasaret?” (Joh. 1:46) Mulana leas do roha ni si Natanael tu Jesus ala sian Nasaret ibana. Olo do ra diingot ibana Mika 5:2 na mandok di Betlehem do Messias tubu, dang di Nasaret.

6. Aha do na ikkon diulahon akka halak di jaman ni Jesus asa porsea nasida Jesus do Messias?

⁶ Aha do na didok di Surat na Badia? Nungnga didok si Jesaya hian, ‘dang adong na parduli sian dia haroro ni Messias’. (Jes. 53:8) Hape godang do informasi taringot parngoluan ni Jesus naung dipaboa hian. Molo dilehon nasida tikki mamareso i, botoon ni nasida ma molo Jesus i tubu di Betlehem jala ibana pinoppar ni Raja Daud. (Luk. 2:4-7) Jadi sesuai do inganan hatubuan ni Jesus dohot na tarsurat di Mika 5:2. Attong boasa dang porsea akka halak tu Jesus? Ala pahatoppu nasida mambahen kesimpulan. Dang jolo dilului nasida buktina, gabe ditolak nasida ma Jesus.

7. Boasa dang lomo roha ni akka halak tu Saksi Jahowa?

⁷ Songon i do na masa saonari? Ido. Godangan Saksi Jahowa, halak na biasa-biasa do, dang halak na mora jala ‘dang parsikkola’. (Ul. 4:13) Adong do akka halak na merasa dang cocok Saksi Jahowa mangajarhon taringot Bibel. Alana nasida dang lulusan sikkola teologia. Adong do muse na mandok Saksi Jahowa on, “agama ni halak Amerika”. Hape hira-hira holan 14 persen do Saksi Jahowa di Amerika Serikat. Na asing mandok, dang porsea Saksi Jahowa tu Jesus. Jala piga-piga taon na parpudi on, adong do na manudu Saksi Jahowa “Komunis”, “mata-mata Amerika”, dohot “ekstremis”. Jadi godang do halak dang olo gabe Saksi Jahowa, ala porsea nasida tu cerita i. Jala dang olo nasida mangalului songon dia fakta na sasittongna.

8. Sesuai tu Ulaon ni Apostel 17:11, boasa ikkon jolo tapareso fakta taringot tu Saksi Jahowa?

⁸ Aha do na ikkon diulahon hamu? Pareso ma faktana. I do na diulahon si Lukas. ‘Ditakkasi ibana do sudena sian mulana’, asa takkas botoon ni akka halak sittong do sude na dibege nasida taringot Jesus. (Luk. 1:1-4) Songon i do tong halak Jahudi na tinggal di Berea. Tikki dibege nasida barita na uli taringot Jesus, dipareso nasida do Akka Bukku Heber lao mamastihon sittong do na dibege nasida i manang na dang. (Jaha Ulaon ni Apostel 17:11.) Songon nasida, pareso ma faktana. Bandingkon hamu ma na diajarhon Saksi Jahowa tu isi ni Bibel. Jala porlu do muse dipareso hamu akka ulaon ni Saksi Jahowa di tikkitta saonari on. Molo dipareso hamu faktana, dang berprasangka be hamu jala dang porsea be hamu tu cerita na so tutu.

9. Songon dia do reaksi ni akka halak ala dang dioloi Jesus pangidoan ni nasida?

⁹ Nang pe malo Jesus mangajari alai dang cukkup dope i dihilala akka halak. Dipangido nasida do asa “dipatudu [Jesus] tanda halongangan sian Debata”, baru pe porsea nasida Jesus i do Messias. (Mat. 16:1) Bisa jadi dipangido nasida pe i, ala diingot nasida do Daniel 7:13, 14. Alai tikki i, dang tikkina dope Jahowa pasautton i. Sasittongna holan ajaran ni Jesus pe, nungnga cukkup be i mambuktihon ibana do Messias. Alai ala dang dioloi Jesus pangidoan ni nasida i, ditolak nasida ma Jesus.​—Mat. 16:4.

10. Aha do na disurat si Jesaya taringot tu Messias jala songon dia do i masa?

¹⁰ Aha do na didok di Surat na Badia? Hea do disurat Panurirang Jesaya taringot Messias songon on, “Dang olo ibana marsurak manang mambahen gogo soarana, jala dang olo ibana tarbege soarana di akka dalan.” (Jes. 42:1, 2) Saleleng marbarita Jesus, dang hea ibana mangalului hasangapon tu dirina sandiri. Dang olo ibana mambangun bagas joro na megah, mamakke jubah songon akka pamimpin agama, jala dang olo ibana dijou mamakke gelar kehormatan. Jala tikki diadili pe ibana di jolo ni si Herodes, dang olo ibana mambahen mukjizat. Hape sasittongna, boi do i mambahen las roha ni si Herodes. (Luk. 23:8-11) Nang pe hea dibahen Jesus mukjizat, alai marbarita na uli do fokus utamana. Jala “alani i do umbahen na ro” ibana, songon na didok Jesus tu akka siseanna.​—Mrk. 1:38.

11. Aha do na dihalomohon godang halak, alai songon dia do molo Saksi Jahowa?

¹¹ Songon i do na masa saonari? Ido. Godang do halak saonari lomo rohana mangida gareja na balga, na megah, jala na godang akka hiasanna. Lomo do rohana mangida akka pamimpin agama na timbo gelarna, jala lomo rohana mangarayahon akka perayaan na so sesuai tu isi ni Bibel.  Alai nang pe diulahon nasida akka perayaan i, dang adong diparsiajari nasida taringot Debata dohot lomo ni rohana. Molo Bale Harajaonta, sederhana do jala ias. Akka sintua pe dang mamakke baju khusus, jala dang adong gelar ni nasida na timbo. Alai molo ro akka halak tu parpunguan ni Saksi Jahowa, boi ma diparsiajari nasida lomo ni roha ni Jahowa. Jala boi ma disesuaihon nasida parngoluonna tu naung diparsiajarina i. Alana sesuai do sude na diajarhon dohot na dihaporseai Saksi Jahowa tu Hata ni Debata. Nang pe songon i godang do na manolak hita. Alana dang tarayahon akka perayaan na dihalomohon nasida, jala barita na tapaboa pe, dang barita na dihalomohon nasida.

12. Sesuai tu Heber 11:1, 6, songon dia do carana patoguhon haporseaonta tu Debata?

¹² Aha do na ikkon taulahon? Didok Apostel Paulus do tu halak Kristen na tinggal di Rom songon on, “Ikkon jolo dibege sasahalak do barita i asa boi ibana porsea. Jala begeonna ma i molo dung adong na mambaritahon taringot tu Kristus.” (Rom 10:17) Berarti asa togu haporseaonta, ikkon taparsiajari do Bibel. Dang na ikkon ro hita tu akka perayaan na so sesuai tu isi ni Bibel, nang pe hira na menarik perayaan i. Porlu do tapabagas parbinotoanta, asa togu haporseaonta. Alana “molo dang porsea sasahalak tu Debata, dang boi bahenonna las roha ni Debata”. (Jaha Heber 11:1, 6.) Molo tapareso ajaran ni Bibel, nga cukkup be i lao paposson rohatta naung dapotta hasittongan. Dang pola porlu ikkon jolo idaotta mukjizat sian Debata.

13. Boasa godang halak dang olo mangihutton Jesus?

¹³ Bingung do akka sisean ni si Johannes Pandidi ala dang marpuasa sisean ni Jesus. Jadi dipatorang Jesus ma dang porlu nasida marpuasa saleleng mangolu dope ibana. (Mat. 9:14-17) Halak Parise dohot halak na asing pe sogo do rohana  mangida Jesus, ala dang olo ibana mangihutton tradisi ni nasida. Muruk do nasida ala dipamalum Jesus halak na marsahit tikki ari Sabat. (Mrk. 3:1-6; Joh. 9:16) Dang sesuai na didok ni halak Parise i tu na diulahon nasida. Didok nasida do na diargai nasida ari Sabat, hape diloas nasida do martiga-tiga halak di bagas joro. Jala muruk do halak i ala ditegur Jesus nasida. (Mat. 21:12, 13, 15) Jala tikki marbarita Jesus di sinagoga na di Nasaret, gabe sogo do roha ni akka halak tu Jesus. Alana dang dioloi Jesus pangidoan ni nasida. Gariada dipaboa Jesus do na hea masa tu halak Israel na patuduhon dang marhaporseaon halak i. (Luk. 4:16, 25-30) Alani hata ni Jesus i, gabe godang ma halak na so olo mangihutton ibana.​—Mat. 11:16-19.

14. Boasa ditegur Jesus akka halak na mambahen peraturan dohot tradisi na so sesuai tu Surat na Badia?

¹⁴ Aha do na didok di Surat na Badia? Marhite Panurirang Jesaya, dipaboa Jahowa do, “Didok pamangan ni bangso on do na disomba nasida Au, jala didok nasida do na dipasangap bibir ni nasida Au, alai dao do roha ni nasida sian Au, jala dihabiari nasida pe Au, holan alani paretta ni jolma na diajarhon tu nasida do.” (Jes. 29:13) Jadi, wajar do molo ditegur Jesus nasida ala mandalatton tradisi na so sesuai tu Surat na Badia. Alana akka halak na mambahen peraturan dohot tradisi sisongon i, na manolak Jahowa dohot Messias do nasida disi.

15. Boasa dang lomo roha ni akka halak tu Saksi Jahowa?

¹⁵ Songon i do na masa saonari? Ido. Godang do halak na marsogo ni roha tu Saksi Jahowa ala dang olo mangarayahon perayaan na so sesuai tu Bibel, songon Natal dohot ulang tahun. Godang do muse na muruk tu Saksi Jahowa, ala dang dohot tu perayaan nasional jala dang didalatton nasida adat na somal dipakke lao makkubur halak na mate. Didok nasida, na manomba Debata do nasida disi. Alai dang boi bahenon ni nasida las roha ni Debata molo diihutton nasida akka tradisi na so sesuai tu Bibel.​—Mrk. 7:7-9.

16. Sesuai tu Psalmen 119:97, 113, 163-165, aha do na ikkon taulahon?

¹⁶ Aha do na ikkon taulahon? Porlu do tapabagas holongta tu aturan ni Jahowa dohot tu akka prinsipna. (Jaha Psalmen 119:97, 113, 163-165.) Ikkon umholong do rohatta tu Jahowa sian manang aha pe. Molo tutu do holong rohatta tu Jahowa, pasti dang olo hita mangihutton akka tradisi na mambahen sogo rohana.

17. Aha do na diharappon akka halak asa diulahon Messias?

¹⁷ Di tikki ni Jesus, lomo do roha ni akka halak asa gatti pamaretta. Diharappon nasida do dipalua Messias nasida sian pamarettaon ni Rom na kejam. Alani i dipaksa nasida ma Jesus asa olo gabe raja ni nasida, alai dang olo Jesus. (Joh. 6:14, 15) Sebalikna molo akka pamimpin agama, termasuk ma i akka malim, mabiar do nasida molo dibahen Jesus perubahan politik. Alana molo dibahen ibana songon i, gabe muruk ma halak Rom jala dibuat ma jabatan ni nasida. Jadi, alani akka masalah politik i, gabe godang ma halak Jahudi na manolak Jesus.

18. Aha do na disurat ni akka panurirang taringot Messias na so diattusi halak Jahudi?

¹⁸ Aha do na didok di Surat na Badia? Memang disurat akka panurirang do na lao marhamonangan Messias i. Alai ikkon  jolo mate do ibana alani dosa ni jolma. (Jes. 53:9, 12) Attong boasa dang diattusi halak Jahudi i? Alana diharappon nasida do pittor dipasae Jesus ma nian masalah ni nasida tikki i. Hape dang songon i na disurat ni akka panurirang.​—Joh. 6:26, 27.

19. Boasa godang halak saonari na manolak hita?

¹⁹ Songon i do na masa saonari? Ido. Godang do halak saonari dang lomo rohana tu Saksi Jahowa ala netral hita di politik. Hape diharappon nasida do asa terlibat hita di pemilihan umum. Alai taboto do molo tapillit jolma gabe pamimpinta, na manolak Jahowa do hita disi. (1 Sam. 8:4-7) Na asing mangharappon tabangun sikkola dohot rumah sakit lao patuduhon na parduli hita tu akka halak. Alai dang tabahen songon i. Fokus do hita marbarita na uli, dang pasaehon masalah. Alani i gabe godang ma na manolak hita.

20. Sesuai tu Mateus 7:21-23, aha do fokus utamatta?

²⁰ Aha do na ikkon taulahon? (Jaha Mateus 7:21-23.) Ikkon fokus do hita mangulahon tugas na dilehon Jesus tu hita, i ma marbarita na uli. (Mat. 28:19, 20) Unang ma gabe dang fokus hita alani masalah politik manang masalah na asing na adong di portibi on. Memang holong do rohatta tu akka halak jala parduli do hita tu nasida. Alai taboto do, cara na paling denggan mangurupi nasida, i ma mangajarhon Harajaon ni Debata tu nasida jala mangurupi nasida marale-ale tu Jahowa.

21. Aha do na ikkon taulahon?

²¹ Di artikel on nungnga tabahas opat alasan na mambahen akka halak manolak Jesus najolo dohot hita saonari. Alai sai anggiat ma toktong hita mangihutton Jesus jala torus patoguhon haporseaotta. Di artikel na mangihut tabahas ma opat nai alasanna na mambahen halak manolak Jesus dohot hita saonari!