1. Sesuai tu bukku Pangungkapon, songon dia do reaksi ni Sibolis ala didabuhon tu tano on?

 DI BUKKU Pangungkapon dipaboa do molo Harajaon ni Debata nungnga dipajongjong jala Sibolis nungnga didabuhon tu tano on. (Pgk. 12:1-9) Alani i gabe marlas ni roha ma akka suru-suruan na di surgo. Alai gabe parohon jea do i tu hita. Boasa? Alana gabe muruk do Sibolis tu akka naposo ni Jahowa na setia di tano on.​—Pgk. 12:12, 15, 17.

2. Songon dia do carana asa toktong hita setia tu Jahowa?

² Songon dia do carana asa toktong hita setia tu Jahowa nang pe diserang Sibolis? (Pgk. 13:10) Asa boi togu haporseaotta, taingot ma aha na lao masa di ari na naeng ro. Misalna dipaboa Apostel Johannes do di bukku Pangungkapon akka pasu-pasu na lao tadapot haduan. Sada sian i, lao dihancurhon ma akka musu ni Debata. Saonari tabahas ma akka ise do musu ni Debata i jala aha do na lao masa tu nasida.

3. Paboa ma piga-piga bahasa lambang na dipakke di bukku Pangungkapon.

³ Di bukku Pangungkapon, dipakke do bahasa lambang lao paboahon taringot musu ni Debata. Digombarhon do nasida songon binatang buas. Contohna adong do binatang buas na ‘kaluar sian laut, pitu uluna jala sappulu tandukna’. (Pgk. 13:1) Adong do muse “binatang buas na asing kaluar sian tano on”. Songon naga do ibana makkatai jala “dipaturun ibana do api sian langit”. (Pgk. 13:11-13) Dung i, adong do muse “binatang buas na merah songon  api”. Jala adong do boru-boru na so hasea hundul di atasna. Akka binatang buas i manggombarhon akka musu ni Debata naung leleng mangalo Ibana dohot Harajaonna. Jadi massai penting do taboto ise nasida.​—Pgk. 17:1, 3.

4-5. Songon dia do Daniel 7:15-17 mangurupi hita mangattusi lapatan ni akka lambang di bukku Pangungkapon?

⁴ Parjolo sahali ikkon taboto do ise na manggombarhon binatang buas dohot boru-boru na so hasea i. Sada cara, boi ma tabandingkon hatorangan i tu hatorangan na asing na adong di Bibel. Godangan sian akka lambang na di bukku Pangungkapon sasittongna nungnga dipaboa di bukku na asing di Bibel. Misalna di nipi ni si Daniel, diida ibana do “opat binatang buas na massai balga” kaluar sian laut. (Dan. 7:1-3) Dipaboa si Daniel do aha lapatanna tu hita. Opat binatang buas na massai balga i manggombarhon opat “raja” manang pamarettaon. (Jaha Daniel 7:15-17.) Sian i takkas ma molo binatang buas na di bukku Pangungkapon pe tong do manggombarhon kuasa politik di portibi on.

⁵ Saonari tabahas ma piga-piga lambang na disurat di bukku Pangungkapon jala tabahas ma aha lapatan ni akka lambang i. Na parjolo tabahas ma jo ise na manggombarhon akka binatang buas na adong di bukku i jala tabahas ma aha na lao masa tu nasida. Dung i tabahas ma aha lapatan ni i tu hita.

6. Manggombarhon ise do binatang buas na pitu uluna? (Pangungkapon 13:1-4)

⁶ Manggombarhon ise do binatang buas na pitu uluna? (Jaha Pangungkapon 13:1-4.) Didok di Bibel songon macan tutul do binatang buas i. Patna songon pat ni beruang, babana songon baba ni singa, jala adong sappulu tandukna. Opat binatang buas na dipaboa di Daniel bindu 7 pe songon i do tong ciri-cirina. Alai molo di bukku Pangungkapon opat ciri-ciri i adong di sada binatang buas, dang di opat binatang buas na berbeda. Jadi binatang buas i dang manggombarhon sada pamarettaon. Asing ni i, didok do ibana mangarajai “saluhut marga, suku, bahasa, dohot bangso”. (Pgk. 13:7) Jadi binatang buas i pasti manggombarhon sude kuasa politik di portibi on na hea mamaretta sahat tu saonari. *​—Pjm. 8:9.

7. Manggombarhon ise do pitu ulu ni binatang buas i?

⁷ Manggombarhon ise do pitu ulu i? Di Pangungkapon 17 dipaboa do ise na manggombarhon patung ni binatang buas na disurat di Pangungkapon bindu 13. Didok di Pangungkapon 17:10, “Lima nungnga salpu, sada adong dope, jala sada nai dang ro dope. Molo ro i, holan satokkin do ibana mangarajai.” Sude kuasa dunia na dipakke Sibolis on dipatudos do songon “ulu” alana balga do huaso ni nasida. Jotjot do dianiaya nasida akka naposo ni Debata na tading di luat na dirajai nasida. Tikki mangolu Apostel Johannes, lima kuasa dunia i nungnga salpu, i ma Mesir, Asiria, Babel, Media Persia, dohot Junani. Jala di tikki mandapot pangungkapon si Johannes, kuasa dunia na paonomhon do na mamaretta, i ma Rom. Attong manggombarhon ise do ulu na papituhon, manang kuasa dunia na parpudi i?

8. Kuasa dunia na dia do na manggombarhon ulu na papituhon i?

 ⁸ Surirang di bukku Daniel boi do mangurupi hita mamboto ise ulu na papituhon i. Kuasa dunia na dia do na mamaretta saleleng ari parpudi on manang saleleng “ari ni Tuan i”? (Pgk. 1:10) I ma kuasa dunia Anglo-Amerika, gabungan sian pamarettaon Inggris dohot Amerika Serikat. Jadi boi ma tasimpulhon Anglo-Amerika ma ulu na papituhon sian binatang buas na dipaboa di bukku Pangungkapon 13:1-4.

9. Manggombarhon ise do binatang buas na “dua tandukna songon tanduk ni anak ni biru-biru”?

⁹ Dipaboa do muse di Pangungkapon bindu 13, binatang buas na pitu uluna i “adong dua tandukna songon tanduk ni anak ni biru-biru, alai songon naga do ibana makkatai”. Dung i “dibahen ibana do muse akka tanda halongangan, jala dipaturun ibana do api sian langit tu tano on di jolo ni akka jolma”. (Pgk. 13:11-15) Di Pangungkapon bindu 16 dohot 19 didok do binatang buas i “panurirang na makkatahon na so tutu”. (Pgk. 16:13; 19:20) Cocok do on tu surirang ni si Daniel na mandok molo binatang buas na manggombarhon kuasa dunia Anglo-Amerika i ‘mambahen hancur saluhutna’. (Dan. 8:19, 23, 24) Tutu do i masa. Saleleng Porang Dunia II, adong dua bom atom na mambahen hancur wilayah Jepang. Akka ilmuwan sian Inggris dohot Amerika do na merancang bom atom i. Jadi takkas ma, kuasa dunia Anglo-Amerika parohon “api sian langit tu tano on”.

10. Manggombarhon ise do “patung ni binatang buas” i? (Pangungkapon 13:14, 15; 17:3, 8, 11)

¹⁰ Saonari tabahas ma binatang buas na asing. Hampir sarupa do ciri-ciri ni binatang i tu binatang buas na pitu uluna. Alai bedana, on warna merah. Digoari do ibana “patung ni binatang buas” jala on ma “raja na paualuhon”. * (Jaha Pangungkapon 13:14, 15; 17:3, 8, 11.) Didok do “raja” i hea adong, dung i dang adong be, alai naeng ro muse. Cocok do on manggombarhon Perserikatan Bangsa-Bangsa (PBB), i ma organisasi na mendukung kerja sama politik di liat portibi on. Mulana digoari do organisasi on Liga Bangsa-Bangsa. Alai bubar do i saleleng Porang Dunia II. Dung i muncul ma i muse jala digoari Perserikatan Bangsa-Bangsa.

11. Aha do na lao bahenon ni binatang buas i, alai boasa dang porlu hita mabiar?

¹¹ Dipengaruhi binatang buas manang kuasa politik i do akka halak asa mangalo tu Jahowa jala menyerang akka naposona. Didok si Johannes dipapungu nasida do “akka raja na di tano on” tu porang Armagedon, i ma “ari ni Debata Pargogo na So Hatudosan i”. (Pgk. 16:13, 14, 16) Alai dang pola porlu hita mabiar. Alana hatop do Debata Jahowa bertindak paluahon sude halak na mendukung Harajaonna.​—Hes. 38:21-23.

12. Aha do na lao masa tu sude binatang buas i?

¹² Aha do na lao masa tu sude binatang buas i? Pangungkapon 19:20 mandok, “Ditakkup ma binatang buas i dohot panurirang na makkatahon na so tutu na mambahen akka tanda halongangan di jolona. Panurirang i ma na mangaliluhon akka halak na manjalo tanda ni binatang buas i dohot akka na manomba patungna.  Mangolu do na dua i disappatton tu laut api belerang na marsigorgor.” Jadi tikki mamaretta dope akka pamarettaon i, lao dihancurhon ma nasida saleleng ni lelengna.

13. Tekanan aha do na diadopi halak Kristen sian pamaretta?

¹³ Aha do pengaruhna tu hita? Ikkon torus do hita setia tu Jahowa dohot tu Harajaonna. (Joh. 18:36) Alani i ikkon netral do hita di urusan politik jala unang marpihak tu pamarettaon na dia pe di portibi on. Memang dang sai mura mangulahon on. Alana dipangido pamaretta do hita asa mendukung nasida. Jala ikkon tapatudu i sian pakkataion dohot tindakanta. Molo olo halak mendukung nasida dapotna ma tanda sian binatang buas i. (Pgk. 13:16, 17) Alai taboto do akka halak na manjalo tanda i, na mangalo Jahowa do ibana disi jala dang boi dapotna hangoluan saleleng ni lelengna. (Pgk. 14:9, 10; 20:4) Alani i massai penting ma hita toktong netral di urusan politik, dang soal sadia balga tekanan ni pamaretta tu hita!

14. Sesuai tu Pangungkapon 17:3-5, aha do muse na diida si Johannes?

¹⁴ Didok si Johannes do muse diida ibana adong sahalak boru-boru na hundul di atas ni binatang buas. “Heran situtu” do si Johannes mangida i. (Pgk. 17:1, 2, 6) Boru-boru na so hasea do ibana jala digoari “Babel na Balga”. Didok Bibel, “Diulahon ibana do seks na so patut tu akka raja na di tano on.”​—Jaha Pangungkapon 17:3-5.

15-16. Ise do “Babel na Balga” i?

¹⁵ Ise do “Babel na Balga” i? Dang manggombarhon organisasi politik on. Alana didok do ibana mangulahon seks na so patut dohot akka raja na di tano on. (Pgk. 18:9) Sasittongna ibana do na mangarajai akka pamaretta, alana didok do ibana hundul di atas ni nasida. Asing ni i dang manggombarhon sistem perdagangan na tamak Babel na Balga on. Molo di bukku Pangungkapon didok do sistem perdagangan sebagai “partiga-tiga na di tano on”.​—Pgk. 18:11, 15, 16.

¹⁶ Di Bibel, hata “boru-boru na so hasea” boi do lapatanna akka halak na mangakku manomba Debata, alai tong do manomba debata na so sittong manang marale-ale tu portibi on. (1 Kron. 5:25; Jak. 4:4) Sebalikna akka halak na setia tu Debata didok do songon “perawan na badia”. (2 Kor. 11:2; Pgk. 14:4) Najolo kota Babel do pusat ni agama na so sittong. Alani i, Babel na Balga manggombarhon sude agama na so sittong di portibi on.—Pgk. 17:5, 18; ida artikel di jw.org na marjudul “Apa Babilon Besar Itu?”

17. Aha do na lao masa tu Babel na Balga i?

¹⁷ Aha do na lao masa tu Babel na Balga i? Taboto ma alusna sian Pangungkapon 17:16, 17 na mandok, “Sogo ma roha ni na sappulu tanduk dohot binatang buas na niidami tu boru-boru na so hasea i. Buaton ni nasida ma sude artana jala bahenon ni nasida ma ibana dang marpakkean. Allangon ni nasida ma dagingna jala tutungon ni nasida ma ibana dohot api. Ai Debata do na mangonjar roha ni nasida lao mangulahon lomo ni rohana.” Jadi bahenon ni Jahowa ma akka bangso i mamakke binatang buas na merah songon api manang PBB, lao manghancurhon sude agama palsu saleleng ni lelengna.​—Pgk. 18:21-24.

18. Songon dia do caratta patuduhon na so dohot hita mangulahon akka dosa ni Babel na Balga?

 ¹⁸ Aha do pengaruhna tu hita? Ikkon torus do taulahon ibadat “na so ramun jala na ias di jolo ni Debata”. (Jak. 1:27) Unang ma taihutton akka ajaran na so sittong. Unang ma tarayahon akka perayaan na so sesuai tu prinsip ni Bibel, jala unang ma taulahon pangalaho na so hasea dohot ulaon spiritisme sian Babel na Balga. Torus ma tapasingot akka halak asa “kaluar” sian Babel na Balga, asa unang dohot nasida mangulahon akka dosana.​—Pgk. 18:4.

19. Ise do ‘naga na balga na merah songon api’?

¹⁹ Di bukku Pangungkapon dipaboa do muse taringot “sada naga na balga, merah do naga i songon api”. (Pgk. 12:3) Dialo naga i do Jesus dohot akka suru-suruanna. (Pgk. 12:7-9) Diserang ibana do muse akka naposo ni Jahowa jala dilehon do huaso tu ‘binatang buas na pitu uluna’. (Pgk. 12:17; 13:4) Ise do naga i? “Ibana do ulok na parjolo i, na laos margoar Sibolis dohot Setan.” (Pgk. 12:9; 20:2) Ibana do na mangendalihon sude musu ni Jahowa.

20. Aha do na lao masa tu naga i?

²⁰ Aha do na lao masa tu naga i? Didok di Pangungkapon 20:1-3 adong ma sada suru-suruan na manappatton Sibolis tu lombang na massai bagas. Saleleng disi Sibolis, ‘dang boi be dililuhon ibana akka bangso sahat tu na marujung 1.000 taon i’. Dung i, disappatton ma ibana dohot akka suru-suruan na jahat tu “laut api na mardongan belerang”. Lapatanna lao dihancurhon ma nasida saleleng ni lelengna. (Pgk. 20:10) Bayakkon ma keadaan ni tano on tikki dang adong be Sibolis dohot suru-suruan na jahat. Pasti luar biasa do i!

21. Boasa gabe dipatogu rohatta dung manjaha bukku Pangungkapon?

²¹ Dipatogu do rohatta dung taboto aha lapatan ni akka lambang di bukku Pangungkapon. Nungnga taboto be akka ise musu ni Jahowa. Alai dang holan i. Taboto do muse aha na lao masa tu nasida. Jadi takkas ma “marlas ni roha ma halak na manjaha surirang on mamakke soara na gogo. Jala marlas ni roha ma halak na manangihon dohot na mangoloi akka na tarsurat di surirang on”. (Pgk. 1:3) Molo nungnga dihancurhon Debata akka musuna i saleleng ni lelengna, pasu-pasu aha ma na lao jaloon ni akka naposo ni Jahowa na setia? Lao tabahas ma i di artikel berikutna.