1-2. Boasa lomo rohatta mamparsiajari bukku Pangungkapon?

 BAYAKKON ma hamu mangida-ida album foto ni donganmuna. Godang do ra halak na adong di album foto i na so ditanda hamu. Alai toppu ma diida hamu sada foto. Dipanotnoti hamu ma foto i, ternyata adong hamu di foto i. Jadi dicoba hamu ma mangingot nandigan foto i dibuat jala didia hamu marfoto. Dicoba hamu ma muse mangingot akka halak na di foto i. Gabe berkesan hian ma foto i di hamu.

² Dos songon album i ma bukku Pangungkapon. Boasa? Adong dua alasanna. Na parjolo, disurat do bukku i tu hita. Di ayat na parjolo di bukku i didok, “On ma pangungkapon sian Jesus Kristus. Dilehon Debata do pangungkapon on tu Jesus lao patuduhon tu akka naposona akka na lao masa satokkin nai.” (Pgk. 1:1) Dang tu sude halak bukku i disurat. Alai holan tu hita do akka naposo ni Jahowa. Jadi dang heran be hita na dohot do hita menggenapi akka surirang di bukku i. Boi didok hira na taida do adong fototta “di album foto i”.

3-4. Mulai nandigan do akka surirang di bukku Pangungkapon i digenapi, jala aha do pengaruhna tu hita?

³ Alasan na paduahon boasa lomo rohatta mamparsiajari akka surirang i, ala taboto do andigan i digenapi. Tikki disurat si Johannes i dipaboa ibana do andigan i lao masa. Didok ibana, “Marhite panogu-noguon ni tondi parbadia, diboan ma au tu ari ni Tuan i.” (Pgk. 1:10) Taon 96 M do disurat si Johannes i, jala mulai sian i sahat tu na dapot “ari ni Tuan i” leleng nai dope. (Mat. 25:14, 19; Luk. 19:12)  Sian akka surirang na adong di Bibel taboto ma molo “ari ni Tuan i” dimulai di taon 1914 tikki mamaretta Jesus di surgo gabe Raja. Mulai sian taon i sahat tu satorusna mulai ma digenapi akka surirang na adong di bukku Pangungkapon. Jala dohot do hita naposo ni Debata menggenapi i. Boi ma tasimpulhon, mangolu di “ari ni Tuan i” do hita saonari.

⁴ Alani i ikkon denggan ma taparrohahon nasehat na disurat di Pangungkapon 1:3 na mandok, “Marlas ni roha ma halak na manjaha surirang on mamakke soara na gogo. Jala marlas ni roha ma halak na manangihon dohot na mangoloi akka na tarsurat di surirang on. Ai nungnga jonok tikki naung ditottuhon i.” Jadi ikkon ‘gogo ma tajaha, tatangihon, jala taoloi’ akka na tarsurat di bukku Pangungkapon. Akka aha ma i?

5. Songon dia do bukku Pangungkapon patuduhon massai penting do mamastihon dijalo Jahowa ibadatta?

⁵ Mulai sian bindu na parjolo di bukku Pangungkapon, taparsiajari do molo Jesus takkas mamboto aha na masa di akka huria. (Pgk. 1:12-16, 20; 2:1) Tarida do i sian suratna tu pitu huria di Asia Kecil. Di suratna i dilehon ibana do petunjuk manang nasehat lao mangurupi halak Kristen di abad na parjolo, asa dipastihon nasida dijalo Debata ibadat ni nasida. Isi ni surat i pe marlakku do tu hita saonari. Aha ma na boi taparsiajari sian i? Jesus Kristus pamimpinta i, takkas do mamboto sadia togu hubunganta tu Jahowa. Taingot ma ibana do pengawasta, dijaga ibana do hita, jala diida ibana do sude na masa di huria. Takkas do diboto ibana aha na tahaporluhon asa boi hita toktong mambahen las roha ni Jahowa. Akka aha ma isi ni surat ni Jesus i, jala songon dia do hita boi mangulahon i saonari?

6. (a) Masalah aha do na diadopi huria di Epesus? (Pangungkapon 2:3, 4) (b) Aha do na boi taparsiajari sian i?

⁶ Jaha Pangungkapon 2:3, 4. Ikkon torus do tahaholongi Jahowa. Sian surat ni Jesus tu huria na di Epesus, boi ma taida na toktong do nasida togu, sabar, jala dang menyerah nang pe mangadopi hasusaan. Alai nang pe songon i, dang songon najolo i be holong ni nasida tu Jahowa. Molo torus dipasombu nasida songon i, dang dijalo Jahowa be ibadat ni nasida. Dos songon i ma hita saonari. Denggan do memang molo torus hita togu, sabar, jala dang menyerah mangadopi akka hasusaan. Alai dang sae holan i. Na paling penting di Jahowa dang holan aha na taulahon, alai boasa taulahon i. Lomo rohana asa tasomba Ibana ala memang holong rohatta tu Ibana jala taargai sude naung dilehon Ibana tu hita.​—Poda 16:2; Mrk. 12:29, 30.

7. (a) Masalah aha do na diadopi huria di Sardes? (Pangungkapon 3:1-3) (b) Aha ma na boi taparsiajari sian i?

⁷ Jaha Pangungkapon 3:1-3. Toktong ma hita dungo. Asing do masalah na diadopi huria di Sardes. Sebelumna togu do haporseaon ni nasida tu Jahowa. Alai lam leleng dang bersemangat be halak i melayani Debata. Alani i dipasingot Jesus ma nasida asa “dungo”. Aha ma na boi taparsiajari sian i? Pos do rohatta diargai Jahowa sude naung taulahon tu Ibana. (Heb. 6:10) Alai unang ma merasa hita nga cukkup be na taulahon najolo i lao melayani Jahowa. Nang pe terbatas na boi talehon saonari, ikkon torus do hita sibuk  “mangulahon godang ulaon ni Tuhan i”. Jala toktong ma hita dungo sahat tu ujungna.​—1 Kor. 15:58; Mat. 24:13; Mrk. 13:33.

8. Parsiajaran aha do na tadapot sian hata ni Jesus tu huria di Laodikea? (Pangungkapon 3:15-17)

⁸ Jaha Pangungkapon 3:15-17. Ikkon semangat ma hita jala tasomba Jahowa sian nasa rohatta. Dipaboa Jesus do masalah na diadopi huria na di Laodikea. Didok do nasida “dang haru las manang dang haru ngali”. Alani i didok Jesus ma nasida halak ‘na susa jala na dangol’. Ikkon muba do nasida jala semangat muse melayani Jahowa. (Pgk. 3:19) Aha ma parsiajaranna tu hita? Molo tahilala dang semangat be hita melayani Jahowa, taingot ma muse akka na denggan naung dilehon Jahowa dohot organisasina tu hita. (Pgk. 3:18) Unang ma fokus hita mangalului hamoraon ala didok rohatta hamoraon i boi mambahen nyaman ngolutta. Alai tabahen ma melayani Jahowa na uppetting di ngolutta.

9. Parsiajaran aha do na tadapot sian hata ni Jesus tu huria na di Pergamos dohot di Tiatira?

⁹ Ikkon tatolak do ajaran ni halak na murtad. Dipasingot Jesus do huria di Pergamos ala dipasombu nasida adong disi akka halak na mambahen huria dang marsada. (Pgk. 2:14-16) Alai dipuji ibana do huria di Tiatira ala ditolak nasida do “akka na buni di bagasan roha ni Sibolis”. Jala dijujui ma nasida asa toktong “setia” mangihutton ajaran na sittong. (Pgk. 2:24-26) Alani i, porlu do muba halak Kristen na disi, naung gale haporseaonna ala mangihutton ajaran palsu. Songon dia molo hita saonari? Hita pe ikkon menolak ajaran na maralo tu cara marpikkir ni Jahowa. Olo do ra hira na manomba Debata idaon halak na murtad, “alai di parngoluonna dang dipatudu na disomba nasida Debata”. (2 Tim. 3:5) Jadi ikkon ringgas do hita marsiajar Bibel asa boi hita mura menolak ajaran palsu.​—2 Tim. 3:14-17; Jud. 3, 4.

10. Parsiajaran aha dope na tadapot sian hata ni Jesus tu huria di Pergamos dohot di Tiatira?

¹⁰ Ikkon sogo do rohatta tu sude jenis ni seks na so patut jala tatolak ma i. Adong muse masalah na diadopi huria na di Pergamos dohot di Tiatira. Dipasingot Jesus do nasida ala dipasombu nasida adong halak na mangulahon seks na so patut di huria i. (Pgk. 2:14, 20) Aha do parsiajaranna  tu hita? Ikkon sogo do rohatta tu sude jenis ni seks na so patut. Unang ma hita marpikkir ala nungnga martaon-taon hita melayani Jahowa jala adong tanggung jawabta di huria, pasti dimaapon Jahowa do molo taulahon seks na so patut. (1 Sam. 15:22; 1 Ptr. 2:16) Lomo do roha ni Jahowa asa torus taihutton standar moralna, dang standar moral ni portibi on.​—Eps. 6:11-13.

11. Aha do na boi tasimpulhon sian subjudul on? (Ida muse kotak “ Parsiajaranna tu Hita Saonari”.)

¹¹ Jadi aha ma na boi tasimpulhon sian subjudul on? Ikkon tapastihon ma dijalo Jahowa ibadatta. Molo adong taulahon na so sesuai tu lomo ni roha ni Jahowa, ikkon hatop ma hita muba asa las roha ni Jahowa mangida hita. (Pgk. 2:5, 16; 3:3, 16) Adong do muse na ditaringoti Jesus di suratna tu akka huria i. Aha ma i?

12. Aha do na boi taparsiajari sian surat ni Jesus tu huria Smirna dohot Piladelpia? (Pangungkapon 2:10)

¹² Tabahas ma muse surat ni Jesus tu huria Smirna dohot Piladelpia. Didok Jesus do tu nasida asa unang mabiar tikki dianiaya. Alana dipasu-pasu Jahowa do nasida molo toktong setia. (Jaha Pangungkapon 2:10; 3:10) Aha do parsiajaranna tu hita saonari? Ikkon siap ma hita dianiaya jala toktong ma hita setia. (Mat. 24:9, 13; 2 Kor. 12:10) Boasa penting sipasingot on?

13-14. Sesuai tu Pangungkapon bindu 12, aha do pengaruh ni porang na di surgo tu naposo ni Debata?

¹³ Sian bukku Pangungkapon, taboto ma na lao dianiaya do akka naposo ni Debata di “ari ni Tuan i”, i ma di jamanta saonari. Di Pangungkapon bindu 12 dipaboa ma dung mamaretta Jesus gabe Raja, adong ma porang di surgo. Marporang do Jesus Kristus na digoari si Mikhael rap dohot suru-suruanna mangalo Sibolis dohot akka suru-suruan na jahat. (Pgk. 12:7, 8) Talu do akka musu ni Debata i jala disappatton ma nasida tu tano on. Ujungna gabe susa ma portibi on dibahen nasida. (Pgk. 12:9, 12) Aha do pengaruh ni i tu akka naposo ni Debata?

¹⁴ Dipaboa do muse di bukku Pangungkapon songon dia reaksi ni Sibolis dung didabuhon tu tano on. Ala dang boi be ibana mulak tu surgo, gabe muruk ma ibana tu akka halak na dimiahi na mangolu dope di tano on. Nasida ma na mewakili Harajaon ni Debata dohot “na paboahon taringot tu Jesus”. (Pgk. 12:17; 2 Kor. 5:20; Eps. 6:19, 20) Songon dia do surirang on digenapi?

15. Manggombarhon ise do ‘dua saksi’ na dipaboa di Pangungkapon bindu 11, jala aha ma na masa tu nasida?

 ¹⁵ Dipakke Sibolis do akka musu ni Debata lao menyerang akka halak na dimiahi na mamimpin ulaon marbarita. Nasida ma na digombarhon ‘dua saksi’ na dibunu, na disurat di bukku Pangungkapon. * (Pgk. 11:3, 7-11) Di taon 1918 adong do ualu donganta bawa na ditudu mangulahon na sala jala divonis ma nasida asa leleng dipenjara. Alani i godang do na marpikkir nungnga so be ulaon ni akka dongan na dimiahi i.

16. Aha do na masa di taon 1919, alai aha do na torus dibahen Sibolis mulai sian i?

¹⁶ Di Pangungkapon bindu 11 dipaboa ma molo ‘dua saksi’ i dang leleng mate. Dipangolu Debata do muse nasida. Saut do surirang i, alana dang gok sataon pittor dibebasson do akka donganta i sian penjara. Di bulan Maret 1919, bebas ma nasida jala dicabut ma tuduhan i. Dung kaluar sian penjara, pittor diatur nasida ma muse ulaon marbarita na uli dohot mangajari. Alai Sibolis dang menyerah, torus do dibahen ibana penganiayaan na songon “sunge” tu naposo ni Debata. (Pgk. 12:15) Alani i “ikkon togu, ikkon sabar, jala ikkon marhaporseaon” do hita sude.​—Pgk. 13:10.

17. Bantuan aha do na dapot ni naposo ni Debata?

¹⁷ Dipaboa do di Pangungkapon bindu 12, lao adong ma bantuan na so tarduga tu naposo ni Debata. Didok diboddut “tano” i do “sunge” na manggombarhon penganiayaan i. (Pgk. 12:16) Tutu do i masa. Adong do piga-piga pengadilan di portibi on na mambahen keputusan na adil tu naposo ni Debata. Hasilna jotjot do Saksi Jahowa monang di kasus pengadilan jala dilehon ma kebebasan tu nasida. Songon dia do nasida mamakke kebebasan i? Marbisuk do nasida mamakke tikkina mangulahon tugas sian Jahowa. (1 Kor. 16:9) Tugas aha ma i?

18. Aha do tugasta saleleng ari parpudi on?

¹⁸ Nungnga disurirakkon Jesus hian na lao “dibaritahon ma barita na uli taringot tu Harajaon i di liat portibi on” sebelum ro ujungna. (Mat. 24:14) Tikki diulahon  naposo ni Jahowa i, diurupi suru-suruan do nasida. Didok di Bibel, akka suru-suruan i dohot do paboahon “barita na uli sisaleleng ni lelengna tu akka jolma di tano on, tu saluhut bangso, suku, marga, dohot bahasa”.​—Pgk. 14:6.

19. Aha do muse barita na dipaboa naposo ni Jahowa?

¹⁹ Alai dang holan barita na uli na dibaritahon naposo ni Debata. Songon dipaboa di Pangungkapon bindu 8 sahat tu 10, ditugasson ma suru-suruan lao paboahon barita panguhuman tu akka halak na menolak Harajaon ni Debata. Jadi hita Saksi Jahowa ikkon taurupi do akka suru-suruan i. Haduan lao tapaboa ma barita panguhuman tu portibi na jahat on. Dipatudos do barita i songon “udan es” dohot “udan api”. (Pgk. 8:7, 13) Ikkon diboto akka halak do nga jonok be ari rimas ni Jahowa. Jadi ikkon hatop ma nasida muba asa boi selamat. (Sep. 2:2, 3) Alai dang sude lomo rohana mambege barita i. Jadi ikkon barani do hita. Saleleng hasusaan bolon lam sogo ma roha ni akka halak tu barita na tapasahat i.​—Pgk. 16:21.

20. Aha do na lao taulas di dua artikel na mangihut?

²⁰ Ikkon tapastihon do nungnga taulahon “akka na tarsurat di surirang on”. Alana dohot do hita menggenapi isi ni bukku Pangungkapon. Alai songon dia ma carana asa boi hita setia nang pe adong penganiayaan? Jala songon dia ma carana asa boi hita barani paboahon barita na uli dohot barita panguhuman? Na parjolo, taingot ma lao dihukum do akka musu ni Debata songon na dipaboa di bukku Pangungkapon. Na paduahon, molo toktong hita setia dapotta ma godang pasu-pasu haduan. Lao taulas ma on di dua artikel na mangihut.