1-2. Boasa ikkon tapatudu holong na manoktong?

BOASA ikkon tapatudu holong na manoktong? Taparrohahon ma aha na didok di bukku Poda. Misalna didok do, “Sai toktong ma ho setia jala patuduhon ma holong ni roha. . . . Dung i lomo ma roha ni Debata dohot jolma tu ho jala ditanda ma ho halak na marbisuk.” “Molo dipatudu sahalak bawa holong na manoktong, parohon laba do i tu dirina sandiri.” “Manang ise na marsitutu mangulahon na sittong jala patuduhon holong . . . dapotna ma hangoluan.”—Poda 3:3, 4; 11:17, surat na di toru; 21:21.

² Sian bukku Poda i taboto ma, adong do tolu alasanna boasa ikkon tapatudu holong na manoktong. Na parjolo, gabe lomo ma roha ni Debata tu hita. Na paduahon, parohon laba do i tu hita. Misalna, gabe boi ma hita marale-ale dohot na asing. Na patoluhon, dapotta ma pasu-pasu di ari na naeng ro, termasuk ma i hangoluan saleleng ni lelengna. Jadi massai penting do taihutton poda ni Jahowa on, “Patuduhon hamu ma holong na manoktong dohot asi ni roha tu donganmuna.”​—Sak. 7:9, surat na di toru.

3. Sukkun-sukkun aha na lao tabahas di artikel on?

³ Di artikel on, lao taulas ma alus ni opat sukkun-sukkun on: Tu ise do porlu tapatudu holong na manoktong? Aha do na boi taparsiajari taringot holong na manoktong sian bukku Rut? Songon dia do hita boi patuduhon holong na manoktong i? Jala aha do manfaatna molo tapatudu holong na manoktong?

4. Tu ise do dipatudu Jahowa holongna na manoktong i, jala songon dia do hita maniru Ibana? (Markus 10:29, 30)

⁴ Songon na taparsiajari di artikel sebelumna, dipatudu Jahowa do holong na manoktong i holan tu akka halak na makkaholongi jala na manomba Ibana. (Dan. 9:4) Jadi ‘ala anak na dihaholongi Debata do hita tatiru ma Ibana’. (Eps. 5:1) Tapatudu ma holong na manoktong i holan tu akka dongan sahaporseaotta.​—Jaha Markus 10:29, 30.

5-6. Paboa ma contoh ni halak na patuduhon burju ni roha.

⁵ Molo lam takkas taattusi lapatan ni holong na manoktong gabe lam berupaya ma hita patuduhon i tu akka donganta. Saonari, asa lam takkas taattusi songon dia do halak na patuduhon holong na manoktong i, tabandingkon ma jo i tu halak na patuduhon haburjuon. Taparrohahon ma contohna.

 ⁶ Contoh ni halak na patuduhon haburjuon, i ma akka halak na di pulo Malta. Tikki i hea do karam kapal si Paulus dohot na asing. Marlange ma halak i tu pulo Malta asa boi selamat. Diurupi akka halak na di pulo i ma si Paulus dohot akka donganna. Hape dang adong kewajiban ni nasida lao mangurupi si Paulus dohot akka donganna i, jala dang ditanda halak i nasida. Alai olo do nasida patuduhon haburjuon. (Ul. 28:2, 7) Boi do tadok molo halak Malta on patuduhon holong na manoktong? Daong. Dipatudu halak i pe haburjuon dang alana holong rohana tu si Paulus dohot tu akka donganna i, na kebetulan do masa i di huta ni halak i makana gabe diurupi.

7-8. (a) Aha do beda ni halak na patuduhon haburjuon dohot na patuduhon holong na manoktong? (b) Aha do na boi taparsiajari sian bukku Rut?

⁷ Songon na taida di  paragraf onom nakkin, adong do beda ni halak na patuduhon haburjuon dohot halak na patuduhon holong na manoktong. Asa lam takkas taboto aha bedana, taida ma jo saonari naposo ni Jahowa na patuduhon holong na manoktong. Misalna si Daud, dipatudu ibana do holong na manoktong tu donganna si Jonatan nang pe bapak ni si Jonatan naeng mambunu ibana. Jala martaon-taon dung mate si Jonatan, torus dope dipatudu si Daud holongna na manoktong i tu anak ni si Jonatan, i ma si Mepiboset. Boasa olo si Daud mangulahon i? Ala massai holong do rohana tu si Jonatan. Jadi nga takkas be taboto aha beda ni halak na patuduhon burju ni roha dohot halak na patuduhon holong na manoktong.​—1 Sam. 20:9, 14, 15; 2 Sam. 4:4; 8:15; 9:1, 6, 7.

⁸ Boi do muse lam godang na taboto taringot holong na manoktong on sian bukku Rut. Aha do na boi taparsiajari taringot holong na manoktong sian si Rut dohot si Boas? Jala songon dia do hita boi maniru nasida? *

9. Boasa dirippu si Naomi na sogo roha ni Jahowa tu ibana?

⁹ Sian bukku Rut, boi ma taboto cerita taringot si Naomi, parumaenna si Rut, dohot si Boas. Naposo ni Jahowa do si Boas on, jala martondong dope dohot suami ni si Naomi. Sada tikki masa ma kelaparan di Israel. Gabe pinda ma si Naomi, suamina, dohot dua anakna tu Moab. Disi, mate ma suami ni si Naomi. Mangoli ma anakna na dua i, alai dang leleng dukkon i mate ma nasida. (Rut 1:3-5; 2:1) Pasti lungun hian do roha ni si Naomi alani i, gabe dirippu ibana ma na so lomo roha ni Jahowa tu ibana. Didok ibana do, ‘Nungnga dihukum Jahowa be au.’ “Susa hian do ngolukku dibahen Debata.” Dung i didok ibana do muse,  “Sogo do roha ni Jahowa tu au jala susa do ngolukku dibahen Debata.”​—Rut 1:13, 20, 21.

10. Songon dia do tanggapan ni Jahowa tu hata ni si Naomi?

¹⁰ Songon dia do tanggapan ni Jahowa tu hata ni si Naomi i? Dang gabe muruk Jahowa, gariada diattusi Jahowa do boasa songon i pakkilalaan ni si Naomi. Alana diboto Jahowa do, “boi do gabe maoto halak na marbisuk molo susa ibana”. (Pjm. 7:7) Alai porlu do si Naomi diurupi Jahowa, asa boi dihilala ibana na so ditinggalhon Jahowa ibana. Songon dia ma dibahen Jahowa mangurupi? (1 Sam. 2:8) Dipakke Jahowa ma si Rut patuduhon holong na manoktong tu si Naomi. Diurupi si Rut ma simatuana i asa boi muse semangat melayani Jahowa. Aha ma na boi taparsiajari sian si Rut?

11. Aha do na mambahen hita berupaya mangurupi akka donganta?

¹¹ Molo adong holong na manoktong di hita, berupaya do hita mangurupi akka dongan na marsak. Songon si Rut na mangurupi si Naomi, godang do donganta saonari na mangurupi akka dongan sahaporseaon na susa jala marsak. Ala holong roha ni nasida tu akka donganta sahaporseaon i, gabe berupaya ma halak i sian nasa gogona lao mangurupi akka donganta i. (Poda 12:25; 24:10) Na diulahon nasida i sesuai do tu na nidok ni si Paulus. Didok si Paulus do, “Patogu hamu ma roha ni na marsak, urupi hamu ma akka na gale, jala sabar ma hamu tu sude halak.”​—1 Tes. 5:14.

12. Aha do cara na dumenggan lao mangurupi akka donganta na marsak?

¹² Sada cara na dumenggan na boi taulahon lao mangurupi akka donganta na marsak, rade ma hita manangihon nasida. Jala tapapos ma roha ni halak i na holong do rohatta tu nasida. Taingot ma diida Debata do sude na taulahon i. (Ps. 41:1) Alana di Heber 6:10 didok do, “Tigor do Debata, dang lupahononna . . . holong naung dipatudu hamu.”

13. Aha do keputusan na dibahen si Rut dohot si Orpa, jala songon dia do si Rut patuduhon holong na manoktong tu si Naomi? (Ida gambar sampul.)

¹³ Asa takkas taboto songon dia do halak na patuduhon holong na manoktong i, taida ma jo aha na masa tu si Naomi dukkon mate suamina dohot anakna na dua i. Di pudian ni ari, diputusson si Naomi ma mulak muse tu hutana. Alana “nungnga dipasu-pasu Jahowa muse akka naposona di Israel. Jala dang maol be nasida mangalului sipanganon”. (Rut 1:6) Dohot do parumaenna na dua i mandongani ibana. Alai di pardalanan tolu hali ma didok si Naomi tu nasida asa mulak tu Moab. Aha do na masa? “Dung diumma si Orpa simatuana i, lao ma ibana. Alai molo si Rut dang olo lao.” (Rut 1:7-14) Dioloi si Orpa do na nidok ni si Naomi, mulak do ibana tu hutana. Alai anggo si Rut dang olo mulak, torus do didongani ibana simatuana na marsak i, hape sasittongna boi do ibana mamillit lao mulak. (Rut 1:16, 17) Torus pe didongani si Rut si Naomi dang alana wajib ibana mangulahon i, alai alana holong do  rohana tu si Naomi. Takkas ma dipatudu si Rut do holong na manoktong. Aha ma na boi taparsiajari sian i?

14. (a) Songon dia do akka donganta saonari maniru si Rut? (b) Sesuai tu Heber 13:16, aha do na ikkon taulahon lao palasson roha ni Debata?

¹⁴ Molo adong holong na manoktong di hita, pasti berupaya do hita sian nasa tolapta lao mangurupi na asing. Godang do akka donganta saonari na patuduhon holong na manoktong tu akka dongan sahaporseaotta, nang pe dang pola takkas ditanda nasida donganta i. Misalna tikki masa bencana alam, pittor hatop do nasida mangurupi. Molo adong na susa di parhepengon, dipikkirhon nasida do aha na boi diulahon lao mangurupi donganta i. Songon i do tong na diulahon halak Kristen di Makedonia di abad na parjolo. Dibahen halak i do pengorbanan, “gariada lobi dope” sian na tolap ni nasida lao mangurupi akka dongan na makkaporluhon bantuan. (2 Kor. 8:3) Pasti las hian do roha ni Jahowa mangida akka naposona na patuduhon holong na manoktong.​—Jaha Heber 13:16.

15-16. Songon dia do si Rut patuduhon na so menyerah ibana mangurupi si Naomi?

¹⁵ Adong dope muse parsiajaran na denggan na boi tadapot sian kisah ni si Rut dohot si Naomi. Taida ma piga-piga contohna.

¹⁶ Unang ma menyerah. Tikki parjolo sahali ditawarhon si Rut lao mandongani simatuana i mulak tu Juda, ditolak si Naomi do bantuanna i. Alai dang menyerah si Rut mangurupi simatuana i. Aha ma hasilna? “Ala sai didok si Rut na ikkon dohot ibana, dang diorai si Naomi be ibana.”​—Rut 1:15-18.

17. Songon dia do carana asa unang mura hita menyerah tikki mangurupi dongan na asing?

¹⁷ Parsiajaranna tu hita: Ikkon sabar do hita tikki mangurupi akka dongan na marsak jala unang mura menyerah. Misalna adong do ra sahalak donganta borua na menolak bantuan na talean. * Alai ala adong holong na manoktong di hita, torus do hita berupaya mangurupi ibana. (Gal. 6:2) Alana berharap do hita olo ibana manjalo bantuanta i asa boi muse ibana semangat.

18. Boha do tanggapan ni si Rut mambege hata ni si Naomi tu akka tetanggana?

¹⁸ Unang ma mura haccit rohatta. Tikki baru sahat si Naomi dohot si Rut di Betlehem, pajuppang ma si Naomi dohot tetanggana hian. Didok ibana ma tu nasida, “Godang do na huboan tikki pinda sian on. Alai saonari dang adong be huboan manang aha tuson dibahen Jahowa.” (Rut 1:21) Bayakkon ma songon dia perasaan ni si Rut mambege hata ni simatuana i. Di tikki i sai diurupi si Rut do si Naomi. Ibana do na mangurupi si Naomi tikki lungun rohana, na patoguhon rohana, jala na mandongani si Naomi saleleng di pardalanan. Alai tetap dope didok si Naomi, “Dang adong be huboan manang aha tuson dibahen Jahowa.” Tikki didok si Naomi songon i hira na so diargai ibana ma sude pambahenan ni si Rut, na sai torus mandongani ibana. Pasti lungun hian do roha ni si Rut mambege i. Nang pe songon i tetap do diurupi ibana si Naomi.

19. Aha do na boi mangurupi hita asa toktong semangat mangurupi akka donganta na susa?

¹⁹ Parsiajaranna tu hita: Adong do ra donganta, alani marsakna mandok hata na mambahen haccit rohatta. Hape nga berupaya hita mangurupi ibana. Alai unang ma pittor hatop hita tersinggung. Torus ma taurupi donganta i jala martangiang ma hita mangido gogo sian Jahowa, asa unang menyerah hita mangurupi ibana.​—Poda 17:17.

20. Aha do na mambahen si Rut toktong semangat mangurupi si Naomi?

 ²⁰ Tapatogu ma akka donganta. Dipatudu si Rut do holong na manoktong tu si Naomi, alai si Rut sandiri pe porlu do tong dipatogu. Alani i dipakke Jahowa ma si Boas lao patoguhon ibana. Didok si Boas do tu si Rut, “Sai dipasu-pasu Jahowa ma ho. Jala sai anggiat ma dapotmu godang upa sian Jahowa Debata ni Israel, i ma Debata na pinangidom lao manjaga ho.” Pasti las do roha ni si Rut mambege hata ni si Boas i. Didok si Rut ma tu si Boas, “Mauliate ma amang, ala burju do ho tu au. Diapuli jala dipapos ho do rohakku.” (Rut 2:12, 13) Ala dipatogu si Boas roha ni si Rut, gabe semangat ma muse si Rut lao mangurupi simatuana i.

21. Sesuai tu Jesaya 32:1, 2, songon dia do akka sintua boi patoguhon na asing?

²¹ Parsiajaranna tu hita: Taingot ma porlu do tong dipatogu akka donganta na patuduhon holong na manoktong. Songon si Boas dipuji ibana do si Rut, jala dipapos do roha ni si Rut dang sia-sia sude na diulahon ibana lao mangurupi si Naomi. Boi do akka sintua maniru si Boas, denggan do molo dipuji hamu akka dongan na semangat mangurupi na asing. Molo dibahen hamu songon i, gabe boi ma nasida torus semangat mangurupi akka donganta na asing.​—Jaha Jesaya 32:1, 2.

22-23. Boasa boi muba pandangan ni si Naomi taringot hasusaanna i? (Psalmen 136:23, 26)

²² Hea do muse si Boas mangalehon sipanganon tu si Rut dohot tu si Naomi. (Rut 2:14-18) Boha do tanggapan ni si Naomi? Didok ibana ma, “Anggiat ma dipasu-pasu Jahowa ibana ala dipatuduhon ibana do holong ni rohana tu halak na mangolu dohot tu halak naung mate.” (Rut 2:20a) Beda hian do hata ni si Naomi on tu hatana sebelumna. Mulana didok ibana do, “Sogo do roha ni Jahowa tu au.” Hape saonari  nga boi be dihilala ibana, ‘na dipasu-pasu Jahowa do ibana’. Aha do na mambahen muba pandangan ni si Naomi tu Jahowa?

²³ Nungnga diboto si Naomi be dang hea ditinggalhon Jahowa ibana. Buktina adong do si Rut na sai torus mandongani ibana sian Moab sahat tu Juda. (Rut 1:16) Dung i muse boi do dihilala si Naomi na dibantu Jahowa ibana lewat si Boas, halak na boi “manobus” * ibana dohot si Rut. Diparade si Boas do muse kebutuhanna dohot kebutuhan ni si Rut. (Rut 2:19, 20b) Songon on ma ra na dipikkirhon si Naomi, ‘Saonari nga huattusi be dang hea ditinggalhon Jahowa au. Sai torus do didongani Ibana au.’ (Jaha Psalmen 136:23, 26.) Pasti las hian do roha ni si Naomi, ala dang hea menyerah si Rut dohot si Boas mangurupi ibana. Jala si Boas dohot si Rut pe, pasti las do tong roha ni nasida mangida si Naomi na semangat muse.

24. Boasa ikkon torus tapatudu holong na manoktong tu akka dongan sahaporseaon?

²⁴ Aha do na boi taparsiajari taringot holong na manoktong sian bukku Rut? Molo adong holong na manoktong di hita, gabe dang mura hita menyerah tikki mangurupi dongan na marsak. Gabe olo ma hita mambahen pengorbanan tikki mangurupi nasida. Akka sintua pe porlu do tong patoguhon akka dongan na patuduhon holong na manoktong. Molo taida semangat muse dongan na taurupi i, hita pe gabe dohot ma marlas ni roha. (Ul. 20:35) Alai alasan na utama boasa ikkon torus tapatudu holong na manoktong, i ma ala naeng tatiru jala tabahen las roha ni Jahowa, Debata na “gok holong ni roha”.​—2 Mus. 34:6; Ps. 33:22.