1. Aha do na diadopi naposo ni Debata, alai boasa dang porlu hita mabiar?

 DANG heran hita molo ditentang tikki marbarita na uli. Jala taboto lam balga do tantangan i di ari naeng ro. (Dan. 11:44; 2 Tim. 3:12; Pgk. 16:21) Nang pe songon i pos do rohatta diurupi Jahowa do hita. Boasa? Sian najolo torus do diurupi Jahowa akka naposona asa marhasil mangulahon tugasna dang soal songon dia tantangan na diadopi nasida. Saonari marsiajar ma hita sian Panurirang Hesekiel na marbarita tu halak Jahudi na ditawan di Babel.

2. Tu halak na songon dia do si Hesekiel disuru Jahowa marbarita, jala aha do na lao tabahas di artikel on? (Hesekiel 2:3-6)

² Tu halak na songon dia do si Hesekiel marbarita? Tu halak “sijogal rukkung” dohot “pangalo”. Berbahaya do nasida dos songon akka ramba na marsuga dohot kalajengking. Alani i ma jotjot didok Jahowa tu si Hesekiel, “Unang mabiar ho!” (Jaha Hesekiel 2:3-6.) Boi do si Hesekiel mandalatton tugasna marbarita ala (1) Jahowa do na manuru ibana, (2) diurupi tondi parbadia do ibana, jala (3) dipatogu Hata ni Debata do ibana. Di artikel on, tabahas ma songon dia na tolu on mangurupi si Hesekiel, jala songon dia i boi mangurupi hita saonari.

3. Hata ni Jahowa na dia do na patoguhon si Hesekiel, jala songon dia Jahowa paposson rohana?

³ Didok Jahowa do tu si Hesekiel, “Suruokku ma ho.” (Hes. 2:3, 4) Gabe dipatogu do roha ni si Hesekiel mambege i. Boasa? Alana songon i do tong hata ni Jahowa tu si Musa dohot tu si Jesaya, tikki dipillit Jahowa nasida gabe panurirang. (2 Mus. 3:10; Jes. 6:8) Diboto si Hesekiel do urupan ni Jahowa do halak i na dua mangulahon tugasna  nang pe mangadopi tantangan. Jadi tikki dua hali didok Jahowa tu si Hesekiel, “Suruokku ma ho,” gabe pos ma roha ni si Hesekiel pasti diurupi Jahowa do ibana. Jala jotjot do didok di suratna, “Makkatai ma muse Jahowa tu au.” (Hes. 3:16) Gabe pos ma roha ni si Hesekiel Jahowa do na manuru ibana. Asing ni i, ala anak ni sintua ni malim do si Hesekiel, pasti diajarhon bapakna do tu ibana songon dia Jahowa mangurupi akka panurirangna najolo. Contohna didok Jahowa do tu si Isak, si Jakkob, dohot si Jeremia, “Sai na donganakku do ho.”​—1 Mus. 26:24; 28:15; Jer. 1:8.

4. Hata ni Jahowa na dia do muse na patoguhon si Hesekiel?

⁴ Songon dia do tanggapan ni halak Israel tu barita na dipasahat si Hesekiel? Jahowa mandok, “Dang olo halak Israel i manangihon ho. Ai nasida pe dang olo manangihon Au.” (Hes. 3:7) Jadi tikki ditolak nasida si Hesekiel, sasittongna na manolak Jahowa do nasida disi. On ma na mambahen pos roha ni si Hesekiel, nang pe ditolak ibana dang na berarti gagal ibana mangulahon tugasna. Didok Jahowa do tu si Hesekiel molo dung masa annon panguhuman na dipaboa si Hesekiel i, botoon ni nasida ma “na adong panurirang di tonga-tonga ni nasida”. (Hes. 2:5; 33:33) Hasilna gabe barani jala margogo ma si Hesekiel mangulahon tugasna.

5. Songon dia hata na di Jesaya 44:8 mambahen hita barani?

⁵ Boi do hita gabe barani ala taboto Jahowa do na manuru hita marbarita. Didok Ibana do hita ‘saksina’. (Jes. 43:10) Sada hasangapon do on di hita. Najolo didok Jahowa tu si Hesekiel, “Unang  mabiar ho.” Songon i do tong didok Jahowa tu hita, “Unang pola busisaon hamu.” Boasa dang porlu hita mabiar tu akka penentang? Ala Jahowa do na manuru hita, jala dukungonna do hita songon si Hesekiel.​—Jaha Jesaya 44:8.

6. (a) Songon dia Jahowa paposson rohatta na dukungonna do hita? (b) Aha do na patoguhon rohatta asa toktong semangat marbarita?

⁶ Marjanji do Jahowa mendukung hita. Sebelum didok Jahowa, “Hamu do akka saksikku,” didok Ibana do, “Tikki ditaripari ho laut, donganakku do ho, tikki ditaripari ho sunge, dang maup ho bahenon ni aekna. Tikki dibolus ho api, dang mosok ho bahenonna, jala dang matutung ho dibahen apina na marsigorgor.” (Jes. 43:2) Tikki marbarita na uli hita, olo do taadopi tantangan na songon banjir manang songon api. Nang pe songon i, sai diurupi Jahowa do hita asa toktong marbarita na uli. (Jes. 41:13) Songon na masa di jaman ni si Hesekiel, saonari pe godang do halak na manolak barita na tapasahat. Alai taingot ma, molo ditolak pe hita dang na berarti gagal hita gabe Saksi Jahowa. Dipatogu do hita mamboto las do roha ni Jahowa molo toktong hita semangat marbarita. Apostel Paulus mandok, ‘Na lao jalootta do upatta sesuai tu na taulahon.’ (1 Kor. 3:8; 4:1, 2) Sahalak donganta borua naung leleng merintis mandok, “Las do rohakku mamboto na dipasu-pasu Jahowa do upaya na tabahen tikki marbarita.”

7. Aha do pengaruh ni parnidaan i tu si Hesekiel? (Ida gambar sampul.)

⁷ Dipatogu do roha ni si Hesekiel dung mamboto massai gogo do tondi parbadia ni Jahowa i. Di sada parnidaan, diida ibana do songon dia tondi parbadia ni Jahowa mangurupi akka suru-suruan na massai gogo jala mangarahon kereta surgawi ni Jahowa. (Hes. 1: 20, 21) Boha do reaksi ni si Hesekiel? Didok ibana, “Tikki huida i, marsomba ma au.” (Hes. 1:28) Longang situtu do roha ni si Hesekiel mangida i. Parnidaan i paposson rohana boi do ibana marhasil mangulahon tugasna molo diurupi tondi parbadia ni Jahowa.

8-9. (a) Aha do paretta ni Jahowa tu si Hesekiel? (b) Aha do muse dibahen Jahowa lao patoguhon si Hesekiel?

⁸ Diparettahon Jahowa do tu si Hesekiel, “Ale anak ni jolma, jongjong ma ho, asa makkatai au tu ho.” Paretta i dohot tondi parbadia ni Debata mambahen si Hesekiel margogo lao jongjong muse. Didok si Hesekiel, “Ro ma tondi parbadiana tu au jala dibahen ma au jongjong.” (Hes. 2:1, 2) Mulai sian i, boi ma dirasahon si Hesekiel na ditogu-togu tondi parbadia ni Jahowa do ibana. (Hes. 3: 22; 8:1; 33:22; 37:1; 40:1) Tondi parbadia i do tong na mangurupi si Hesekiel marbarita tu akka halak “sijogal rukkung” jala na ‘takkang rohana’. (Hes. 3:7) Didok Jahowa do tu si Hesekiel, “Nungnga hubahen ho tegas jala karas songon nasida. Nungnga hubahen ho songon batu intan, ukkaras sian batu api. Unang pola mabiar ho tu nasida manang makkahitir mangida bohi ni nasida.” (Hes. 3: 8, 9) Hira na didok Jahowa ma tu si Hesekiel, ‘Unang pola metmet roham molo songon i tanggapan ni halak i. Sai na donganakku do ho.’

⁹ Dung i, diboan tondi parbadia ni Jahowa ma si Hesekiel tu daerahna marbarita. Didok si Hesekiel, “Huhilala ma tondi parbadia ni Jahowa na massai gogo  manogu-nogu au.” Porlu do tikki saminggu di si Hesekiel asa boi botul-botul mangattusi barita na lao paboaonna jala asa barani ibana paboahon i tu akka halak. (Hes. 3:14, 15) Dung i diarahon Jahowa ma ibana tu sada rura, jala ‘ro ma tondi parbadia ni Debata tu bagasan dirina’. (Hes. 3:23, 24) Gabe rade ma si Hesekiel memulai pelayananna.

10. Aha do na mangurupi hita asa marhasil di ulaon marbarita, jala boasa tadok songon i?

¹⁰ Aha do na boi mangurupi hita asa marhasil di ulaon marbarita? Taingot ma contoh ni si Hesekiel. Sebelum dimulai si Hesekiel tugasna, dilehon Jahowa do tu ibana tondi parbadiana. Saonari pe boi do hita marhasil di ulaon marbarita molo diurupi tondi parbadia. Boasa tadok songon i? Alana berupaya keras do Sibolis pasohon ulaon marbarita. (Pgk. 12:17) Godang halak marpikkir dang boi hita monang mangalo Sibolis ala umgogo do ibana sian hita. Alai sasittongna tikki marbarita hita, nungnga tataluhon Sibolis! (Pgk. 12:9-11) Boasa tadok songon i? Tikki marbarita hita, tapatudu ma na so mabiar hita tu ancaman ni Sibolis. Sian on aha ma na boi tasimpulhon? Nang pe godang na menentang hita, alai boi do hita marhasil di ulaon marbarita. Dibahen Jahowa do hita margogo marhite tondi parbadiana. Jala las roha ni Jahowa mangida hita.​—Mat. 5:10-12; 1 Ptr. 4:14.

11. Songon dia do tondi parbadia mangurupi hita, jala songon dia carana mandapot i?

¹¹ Aha do muse na taparsiajari sian cara ni Jahowa mangurupi si Hesekiel? Boi do dibahen tondi parbadia hita margogo tikki mangadopi tantangan manang aha pe di ulaon marbarita. (2 Kor. 4:7-9) Attong aha do na ikkon taulahon? Ikkon torus do hita martangiang tu Jahowa mangido tondi parbadiana. Pos ma rohatta dialusi Jahowa do tangiangta i. Didok Jesus  do tu akka siseanna, “Sai pangido hamu ma, . . . sai lului hamu ma, . . . sai tuktuki hamu ma.” Pos ma rohatta, lehonon ni Jahowa do “tondi parbadia tu halak na mangido tu Ibana”.​—Luk. 11:9, 13; Ul. 1:14; 2:4.

12. Sesuai tu Hesekiel 2:9-3:3, sian dia do ro gulungan i jala aha do isina?

¹² Tondi parbadia ni Debata mambahen barani si Hesekiel marbarita. Alai dang holan i, dipatogu do haporseaon ni si Hesekiel alani Hata ni Debata. Di sada parnidaan, diida si Hesekiel ma adong tangan na maniop sada gulungan. (Jaha Hesekiel 2:9-3:3.) Sian dia do ro gulungan i? Aha do isina? Jala songon dia do gulungan i mambahen si Hesekiel margogo? Taida ma. Gulungan i ro sian tahta ni Debata. Dipakke Jahowa do sada sian opat suru-suruan na hea diida si Hesekiel sebelumna lao mangalehon gulungan i tu ibana. (Hes. 1:8; 10:7, 20) Gulungan i marisi Hata ni Debata, i ma barita panguhuman na lao dipasahat si Hesekiel tu halak Jahudi na mangalo. (Hes. 2:7) Timbal balik do disurat gulungan i.

13. Boasa disuru Jahowa si Hesekiel mangallang gulungan i, jala boasa didok si Hesekiel manis rasa ni gulungan i?

¹³ Didok Jahowa tu si Hesekiel ikkon allangonna do gulungan i “asa butong” ibana. Dioloi si Hesekiel do paretta i, sude do diallang ibana gulungan i. Aha do arti ni parnidaan on? Ikkon botul-botul do diattusi si Hesekiel barita na lao dipasahat ibana, jala ikkon hona do i tu rohana asa taronjar rohana paboahon i. Dung diallang si Hesekiel gulungan i, didok ibana “manis do i songon madu”. (Hes. 3:3) Boasa didok ibana songon i? Ala las roha ni si Hesekiel mandapot hasangapon boi mewakili Jahowa paboahon hatana. (Ps. 19:8-11) Mandok mauliate do ibana dipillit Jahowa gabe panurirangna.

14. Aha do na mangurupi si Hesekiel mangulahon tugasna?

¹⁴ Dung i didok Jahowa ma tu si Hesekiel, “Tangihon ma sude na hudok tu ho, jala sippan ma i di bagasan roham.” (Hes. 3:10) Disuru Jahowa do asa berupaya si Hesekiel mangingot sude na tarsurat di gulungan i jala mangarimangi i. Molo diulahon si Hesekiel i, lam togu ma haporseaonna. Jala boi ma ibana pasahatton barita i tu akka halak. (Hes. 3:11) Molo nungnga takkas diattusi si Hesekiel jala porsea ibana tu barita i, gabe rade ma ibana pasahatton barita i sahat tu na sae tugasna.​—Bandingkon tu Psalmen 19:14.

15. Boasa porlu ‘tasippan tu rohatta’ sude Hata ni Debata?

¹⁵ Songon si Hesekiel, ikkon ‘tasippan do tu rohatta’ Hata ni Debata asa boi hita toktong setia mangulahon tugasta marbarita na uli. Saonari sian Bibel do Jahowa makkatai tu hita. Jadi songon dia carana asa boi Hata ni Debata mempengaruhi pikkiran, perasaan, dohot rohatta?

16. Tikki mamparsiajari Hata ni Debata, aha do na porlu taulahon?

¹⁶ Molo taallang sipanganon boi do lam gogo dagingta. Dos songon i ma, molo taparsiajari Hata ni Debata jala tarimangi i lam togu ma haporseaotta. Lomo do roha ni Jahowa “asa butong” hita tu Hatana, lapatanna taattusi aha na didok Jahowa. Boi do taulahon i molo martangiang hita,  manjaha Bibel, jala mangarimangi i. Parjolo martangiang ma hita asa rade rohatta manjalo pikkiran ni Debata. Dung i tajaha ma Bibel, baru tarimangi ma na tajaha i. Aha do hasilna molo taulahon i? Molo taattusi Hata ni Debata, lam togu ma haporseaotta.

17. Boasa massai penting mangarimangi akka na tajaha di Bibel?

¹⁷ Boasa massai penting manjaha Bibel jala mangarimangi i? Alana boi do i mambahen hita margogo pasahatton barita Harajaon dohot paboahon barita panguhuman di ari na naeng ro. Asing ni i muse, molo tarimangi akka sifat ni Jahowa gabe lam togu ma parale-aleotta tu Ibana. Hasilna marlas ni roha ma hita ala puas jala dame rohatta.​—Ps. 119:103.

18. Aha do ujungna na disadari akka halak di daerahta?

¹⁸ Memang dang panurirang hita songon si Hesekiel. Alai bertekad do hita asa toktong paboahon hata ni Jahowa na tarsurat di Bibel sahat tu na didok Jahowa nungnga sae ulaon i. Molo nga ro ari panguhuman ni Jahowa dang boi be dohonon ni akka halak dang hea dibege nasida barita na uli, manang mandok dang parduli Debata tu nasida. (Hes. 3:19; 18:23) Sebalikna gabe disadari nasida ma na sian Debata do barita na tapaboa i.

19. Aha do na mambahen hita margogo di ulaon marbarita?

¹⁹ Aha do na mangurupi hita asa tetap setia mangulahon tugas marbarita? Songon si Hesekiel, torus ma hita marbarita ala nungnga taboto Jahowa do na manuru hita, dilehon Debata tondi parbadiana tu hita, jala dipatogu Hata ni Debata do hita. Pos ma rohatta molo diurupi Jahowa hita, boi do hita torus semangat marbarita “sahat tu ujungna”.​—Mat. 24:13.