Diboto Hamu Do?
Tutu do Adong si Mordahai?
JOTJOT do dipaboa taringot si Mordahai di akka peristiwa na disurat di bukku Ester na adong di Bibel. Halak Jahudi na ditawan do ibana jala karejo di istana Persia. Masa ma i di pamarettaon Raja Ahasweros, na mulai mamaretta sian taon 496 SM. (Saonari ditanda halak do ibana Raja Serses I.) Marhasil do si Mordahai manggagalhon rencana lao mambunu raja. Jadi lao mangargai jasana i, dibahen raja ma asa dipasangap si Mordahai di jolo ni natorop. Dung mate si Haman, i ma musu ni si Mordahai dohot musu ni halak Jahudi na asing, diangkat raja ma si Mordahai gabe perdana menteri. Dung i, dibahen si Mordahai ma surat paretta na paluahon halak Jahudi na adong di luat na dirajai Persia sian pembantaian.—Est. 1:1; 2:5, 21-23; 8:1, 2; 9:16.
Piga-piga sejarawan di mula ni abad 20 mandok, akka peristiwa na disurat di bukku Ester dang toho. Jala didok nasida si Mordahai na disurat di bukku i dang tutu adong. Alai di taon 1941, dapot ni akka arkeolog ma bukti na mendukung isi ni Bibel taringot si Mordahai. Aha ma i?
Dapot ni akka peneliti ma lempengan tulisan paku Persia. Disi adong do disuratton taringot sahalak bawa, goarna si Marduka (di bahasa Batak Toba, Mordahai). Pejabat istana do ibana, mungkin akuntan do ibana di Susan. Sahalak pakar sejarah di negeri-negeri Timur na margoar si Arthur Ungnad paboahon, “sahat tu tikki i holan lempengan on dope na paboahon taringot si Mordahai, asing ni na tarsurat di Bibel”.
Dung disurat laporan ni si Ungnad i, nungnga diterjemahon akka peneliti marribu lempengan tulisan paku Persia. Termasuk ma i lempengan na didapot di reruntuhan ni kota Persepolis, bekas ni tempat perbendaharaan na jonok tu tembok kota. Akka lempengan on sian jaman ni Raja Serses I mamaretta. Disurat ma i di bahasa Elam, jala disurat do disi piga-piga goar na adong di bukku Ester. a
Goar ni si Mordahai (Marduka) na adong di lempengan tulisan paku Persia
Di piga-piga lempengan Persepolis, dipaboa do taringot bawa na margoar si Marduka. Sekretaris ni raja do ibana di istana Susan saleleng pamarettaon Raja Serses I. Di sada lempengan, dipaboa do si Marduka on sahalak penerjemah. Sesuai do hatorangan on tu na dipaboa Bibel. Pejabat istana do ibana saleleng mamaretta Raja Ahasweros (Serses I), jala boi do ibana makkatai dua bahasa. Somal do muse si Mordahai hundul di gerbang istana ni Susan. (Est. 2:19, 21; 3:3) Massai balga do gerbang on jala disi do akka pejabat istana karejo.
Adong do persamaan ni si Marduka na didok di lempengan i dohot si Mordahai na dipaboa di Bibel. Nasida mangolu di tikki dohot di inganan na sarupa. Kedudukanna pe sarupa, jala ingananna karejo pe sarupa. Jadi sude fakta on patuduhon molo si Marduka i si Mordahai do i.
a Di taon 1992, diterbitton Professor Edwin M. Yamauchi ma sada artikel na paboahon sappulu goar na adong di lempengan Persepolis, na adong tong di bukku Ester.
