1-2. (a) Sukkun-sukkun aha na lao tabahas di artikel on? (b) Aha do na patuduhon na lomo roha ni Jahowa mangurupi hita?

 DIURUPI Jahowa do hita asa martahan jala marlas ni roha mangadopi tantangan. Songon dia do cara ni Jahowa mangurupi hita? Boha do carana asa dapotta godang manfaat sian bantuan ni Jahowa? Tabahas ma i di artikel on. Alai sebelumna tabahas ma jo sukkun-sukkun on: Tutu do lomo roha ni Jahowa mangurupi hita?

² Lao mamboto alusna, taida ma jo hata na dipakke Apostel Paulus di suratna tu halak Heber. Si Paulus mandok, “Jahowa do na mangurupi au, dang mabiar au. Aha ma na boi bahenon ni jolma tu au?” (Heb. 13:6) Sada referensi ni Bibel paboahon, hata “mangurupi” di ayat on dipakke tu sasahalak na pittor ro mangurupi halak na mangido bantuan. Cocok do hatorangan on tu Jahowa. Alana pittor hatop do Ibana ro mangurupi sasahalak na susa alani sitaonon. On patuduhon lomo do roha ni Jahowa mangurupi hita. Molo diurupi Jahowa hita, boi ma hita martahan jala marlas ni roha nang pe adong sitaonon.

3. Aha do tolu cara na dipakke Jahowa tu hita asa martahan jala marlas ni roha mangadopi tantangan?

³ Songon dia cara ni Jahowa mangurupi hita asa martahan jala marlas ni roha mangadopi tantangan? Taida ma alusna sian bukku Jesaya. Alana godang do surirang ni si Jesaya na marlakku dope tu naposo ni Debata saonari. Jala jotjot do si Jesaya mamakke hata dohot ilustrasi na mura attusan lao paboahon hatorangan taringot Jahowa. Misalna di Jesaya bindu 30. Di bindu i dipakke si Jesaya do ilustrasi na manggombarhon songon dia cara ni Jahowa  mangurupi naposona, i ma (1) manangihon jala mangalusi tangiangta, (2) manogu-nogu hita, jala (3) mangalean akka na denggan tu hita saonari dohot di ari naeng ro. Tabahas ma tolu cara on.

4. (a) Songon dia do Jahowa manggombarhon halak Jahudi di jaman ni si Jesaya, jala aha ma na masa tu nasida? (b) Harapan aha do na dilehon Jahowa tu halak Jahudi na setia? (Jesaya 30:18, 19)

⁴ Di mula ni bindu 30, didok Jahowa do halak Jahudi “akka anak sijogal rukkung”, ‘na martamba-tamba dosana’. Didok Jahowa muse, “Pangalo do nasida, . . . na so olo manangihon patik ni Jahowa.” (Jes. 30:1, 9) Ala dang ditangihon nasida Jahowa, disurirakkon si Jesaya ma na lao masa jea tu nasida. (Jes. 30:5, 17; Jer. 25:8-11) Jala tutu do i masa tikki ditawan halak Babel nasida. Alai adong do sian nasida na toktong setia tu Jahowa. Alani i, dipaboa si Jesaya do surirang taringot harapan tu nasida. Surirangna i paboahon lao boanon ni Jahowa ma nasida mulak muse tu Jerusalem. (Jaha Jesaya 30:18, 19.) Alai memang dang pittor masa i. Didok si Jesaya, “Sabar do Jahowa paima-imahon lao patuduhon asi ni rohana tu hamu.” Hata on patuduhon dang langsung dipalua Jahowa akka halak Jahudi na setia. Adong do 70 taon lelengna nasida ditawan di Babel baru pe dipaloas mulak tu Jerusalem. (Jes. 10:21; Jer. 29:10) Tikki di Babel halak Israel, tangis do nasida alani lungun ni rohana. Alai dung mulak nasida tu Jerusalem, tangis do nasida alani las ni rohana.

5. Aha do na dipaboa Jesaya 30:19 tu hita?

⁵ Saonari pe dipatogu do hita alani hata na mandok, “Pasti patuduhononna do asi ni rohana tu ho tikki mangangguki ho mangido asa diurupi Ibana.” (Jes. 30:19) Dipapos si Jesaya do rohatta na olo do Jahowa manangihon pangidoatta jala hatop mangalusi tangiangta. Didok si Jesaya do muse, “Pittor alusanna do ho disi dibege Ibana pangidoanmi.” Hata on paingotton hita na lomo do roha ni Bapakta Jahowa mangurupi halak na mangido bantuanna. Penting do taboto on, asa boi hita martahan jala marlas ni roha nang pe godang tantangan.

6. Songon dia hata ni si Jesaya patuduhon na ditangihon Jahowa do tangiangta masing-masing?

⁶ Aha do na boi taparsiajari sian ayat on taringot tangiang? Manat do ditangihon Jahowa tangiangta masing-masing. Boasa tadok songon i? Di bagian parjolo ni Jesaya bindu 30 dipakke do hata “hamu” alana Jahowa makkatai tu naposona secara kelompok. Alai di ayat 19 dipakke do hata “ho” alana Jahowa makkatai tu naposona secara pribadi. Didok disi, “Dang na lao tangis be ho”; “patuduhononna do asi ni rohana tu ho”; “pittor alusanna do ho”. Ala Bapak na parholong do Jahowa, dang bahenonna metmet roha ni anak manang boruna. Dang didok Ibana, ‘Ikkon kuat do ho songon abangmu manang songon kakakmu.’ Gariada, parduli do Ibana tu hita secara pribadi. Jala ditangihon Ibana do tangiangta masing-masing.​—Ps. 116:1; Jes. 57:15.

7. Songon dia si Jesaya dohot Jesus patuduhon na massai penting do martangiang?

⁷ Tikki tapaboa tu Jahowa akka na takhawatirhon, pittor dilean Jahowa do tu hita gogo asa boi martahan. Molo tung pe dang pittor sae masalahta, unang ma menyerah hita. Torus ma tapangido tu Jahowa asa diurupi hita martahan. Lomo ni roha ni Jahowa molo taulahon i. Tarida  ma i sian hata ni si Jesaya na mandok, “Unang ma pasombu hamu [Jahowa] maradi.” (Jes. 62:7) Aha do maksud ni hata on? Ikkon torus do hita martangiang tu Jahowa seolah-olah dang tapaloas Ibana istirahat. Hata ni si Jesaya on paingotton hita tu ilustrasi ni Jesus taringot tangiang di Lukas 11:8-10, 13. Di ilustrasi i, dijujui Jesus do hita asa ‘sai tajugulhon’ martangiang jala asa ‘sai tapangido’ tondi parbadiana. Boi do muse tapangido tu Jahowa asa diurupi hita mambahen keputusan na denggan.

8. Songon dia do Jesaya 30:20, 21 digenapi najolo?

⁸ Jaha Jesaya 30:20, 21. Tikki ro tentara Babel mengepung Jerusalem saleleng sada satonga taon, massai susa do dihilala halak i. Hasusaan ni nasida i dipatudos songon sipanganon dohot siinumon. Alai sesuai tu ayat 20 dohot 21, marjanji do Jahowa tu halak Jahudi molo bertobat nasida, paluaon ni Jahowa do nasida. Didok si Jesaya do Jahowa i ‘Guru na Sangap’, jala marjanji do Jahowa lao mangajari akka naposona songon dia carana manomba Ibana. Hata on digenapi dukkon mulak halak Jahudi sian tawanan. Ditogu-togu Ibana do naposona mulak muse mangulahon ibadat na sittong. Saonari pe dibuktihon Jahowa do molo Ibana Guru na Sangap di hita, jala mandok mauliate do hita alani i.

9. Aha do cara na parjolo na dipakke Jahowa lao mangajari hita?

⁹ Di akka ayat i didok si Jesaya do hita songon murid na diajari Jahowa marhite dua cara. Na parjolo didok si Jesaya, “Idaonmuna nama Gurum na Sangap i.” Di ilustrasi on digombarhon si Jesaya do Jahowa songon guru na jongjong di jolo ni muridna. Jadi sada hasangapon do di hita saonari ala Debata do na mangajari hita. Songon dia Jahowa mangajari hita? Diajari Jahowa do hita marhite organisasina. Marhite organisasina, dilehon Jahowa do tu hita petunjuk na jelas. Las do rohatta mandapot petunjuk i di parpunguan ganup minggu, di parpunguan wilayah dohot regional, sian akka publikasi, acara broadcasting, dohot na asing. Sudena on mangurupi hita asa toktong martahan jala marlas ni roha nang pe mangadopi situasi na borat.

10. Songon dia do carana mambege soara ni Debata ‘sian puditta’?

¹⁰ Dipaboa si Jesaya do muse cara na paduahon songon dia Jahowa mangajari  hita. Didok ibana, “Begeonmuna ma hata sian pudimuna.” Digombarhon Panurirang Jesaya do Jahowa i songon guru na mardalan di pudi ni akka muridna jala mangalehon petunjuk tu dia nasida lao. Saonari pe tabege do soara ni Debata sian puditta. Boasa tadok songon i? Petunjuk ni Debata nungnga disurat di Bibel leleng andorang so tubu dope hita. Jadi tikki tajaha Bibel, hira na mambege soara ni Jahowa sian puditta do hita disi.​—Jes. 51:4.

11. Asa boi hita martahan jala marlas ni roha, aha do na ikkon taulahon?

¹¹ Songon dia do carana mandapot manfaat sian petunjuk ni Jahowa na dilean marhite organisasi dohot Bibel? Parrohahon ma dua kalimat na didok si Jesaya. Na parjolo, “on do dalan i”. Na paduahon, “ihutton ma i”. (Jes. 30:21) Jadi dang sae holan tatanda “dalan” i, alai porlu do ‘taihutton dalan’ i. Asa boi hita mangihutton dalan i, ikkon taboto aha do na dipangido Jahowa sian hita. Carana, marsiajar ma hita sian Bibel dohot organisasina. Dung taboto i, taulahon ma i. Ikkon taulahon do na dua i asa boi hita martahan jala marlas ni roha. Asing ni i, molo taulahon aha na taparsiajari pasti dilehon Jahowa do upa tu hita.

12. Sesuai tu Jesaya 30:23-26, pasu-pasu aha do na dilehon Jahowa tu naposona?

¹² Jaha Jesaya 30:23-26. Songon dia do surirang on digenapi? Dung mulak halak Jahudi tu Israel, godang do akka na denggan na dilehon Jahowa tu nasida. Contohna, dilehon Jahowa do godang sipanganon tu nasida. Jala na uppetting dilehon Jahowa do sude na dihaporluhon nasida asa boi jonok tu Ibana jala boi muse mangulahon ibadat na sittong. Sahat tu tikki i dang hea dope songon i godang ni pasu-pasu na dilehon Jahowa tu naposona. Asing ni i dipaboa di ayat 26, dilehon Jahowa do sinondang tu nasida. Maksudna diurupi Jahowa do nasida mangattusi hatana. (Jes. 60:2) Pasu-pasu na dilehon Jahowa i mambahen “sonang roha ni nasida”.​—Jes. 65:14.

13. Songon dia do surirang taringot ibadat na sittong digenapi di jamanta saonari?

¹³ Marlakku dope surirang taringot ibadat na sittong i di jamanta saonari. Sian dia taboto? Mulai taon 1919, nungnga marjuta halak na dipalua sian Babel na Balga i ma sude agama palsu. Ditogu-togu do nasida tu sada “luat” na dao undenggan sian Tano na Dijanjihon. Luat on,  i ma situasi na aman na mambahen akka halak boi marale-ale tu Debata jala marsada manomba Ibana.​—Jes. 51:3; 66:8.

14. Pasu-pasu aha do na dinikmati halak na harapanna mangolu di surgo dohot ‘biru-biru na asing’, jala aha do na porlu diulahon nasida?

¹⁴ Mulai sian taon 1919, marsada do akka halak na harapanna mangolu di surgo manomba Jahowa. Dukkon i bergabung ma muse akka ‘biru-biru na asing’, i ma akka halak na harapanna mangolu di tano on. Marsada do nasida manomba Jahowa. Dipalua do nasida sian ajaran na so sittong jala massai godang do akka publikasi na mangurupi nasida marale-ale tu Jahowa. Godang do muse na diulahon nasida lao mendukung ulaon marbarita na uli. Sude do hita boi marale-ale tu Jahowa jala marsada dohot akka dongan. Marsiurupan do hita asa toktong martahan jala marlas ni roha nang pe susa. Sude on boi do tanikmati molo tasomba Jahowa marhite cara na sittong, jala berupaya hita maniru Ibana.​—Joh. 10:16; Jes. 25:6; 65:13.

15. Didia do “luat” na mambahen hita boi marsada manomba Jahowa?

¹⁵ Didia do “luat” na mambahen hita boi marsada manomba Jahowa? Saonari naposo ni Jahowa tinggal di liat portibi on, dang holan di sada inganan. Alai dang soal didia inganatta, boi do hita toktong tinggal di “luat” i molo taulahon ibadat na sittong jala tapatudu i sian pakkataion dohot pangalahotta.

16. Songon dia do carana mangargai akka dongan di huria di liat portibi on?

¹⁶ Asa toktong hita tinggal di luat i, ikkon taargai do akka dongan di huria Kristen di liat portibi on. Songon dia carana? Ikkon berfokus do hita tu sifat ni akka dongan na denggan, unang ma tu hahurangan ni nasida. (Joh. 17:20, 21) Boasa on penting? Pikkirhon ma jo ilustrasi on. Di hutan na bagak, pasti marragam do jenis ni hau na tubu disi. Dos songon i ma, marragam do latar belakang ni akka dongan di huria songon akka hau na di hutan i. (Jes. 44:4; 61:3) Jadi ikkon berfokus do hita tu bagak ni “hutan” i, dang tu sada-sada “hau” na hurang bagak. Alana molo berfokus hita holan tu hahurangan ni akka dongan di huria manang tu hahurangatta, gabe dang taida be bagak ni huria Kristen na marsada di liat portibi on.

17. Songon dia hita boi mambahen huria marsada?

 ¹⁷ Songon dia do hita boi mambahen huria marsada? Gabe siboan dame ma hita. (Mat. 5:9; Rom 12:18) Molo taulahon on, tabahen ma luat i gabe bagak. Taingot ma Jahowa do na manarik hita tu ibadat na sittong. (Joh. 6:44) Jadi pasti las do roha ni Jahowa mangida upayatta asa toktong mardame jala marsada tu akka naposona na massai arga di Ibana.​—Jes. 26:3; Hag. 2:7.

18. Aha do na porlu torus tarimangi, jala boasa?

¹⁸ Godang do pasu-pasu naung dilehon Jahowa tu akka naposona. Attong songon dia do carana asa tadapot manfaat sian i? Ikkon torus do taparsiajari jala tarimangi isi ni Bibel dohot publikasitta. Molo taulahon i, boi ma i mangurupi hita patuduhon akka sifat Kristen jala ‘makkaholongi haha anggitta’ di huria dohot pasangappon nasida. (Rom 12:10) Molo tarimangi akka pasu-pasu naung tajalo saleleng on, gabe lam togu ma hubungatta tu Jahowa. Jala molo tarimangi akka pasu-pasu ni Jahowa di ari na naeng ro, gabe lam nyata ma harapan i di hita. Sudena i mangurupi hita asa marlas ni roha manomba Jahowa saonari.

19. (a) Aha do na boi taparsiajari taringot Jahowa sian Jesaya 30:18? (b) Aha do na boi mangurupi hita asa toktong martahan jala marlas ni roha?

¹⁹ Satokkin nai “ro nama” Jahowa lao manghancurhon portibi na jahat on. (Jes. 30:18) Pos do rohatta “Debata na adil” do Jahowa i, dang mungkin pasombuonna Sibolis torus mangarajai portibi on. (Jes. 25:9) Alani i ikkon sabar do hita paimahon Jahowa paluahon hita. Alai sambil paimahon i, bertekad ma hita asa torus martangiang tu Jahowa, mamparsiajari Bibel jala mangulahon i di ngolutta, dohot mangarimangi akka pasu-pasu na sian Jahowa. Molo taulahon i, urupan ni Jahowa do hita asa toktong martahan jala marlas ni roha manomba Ibana.