1. Aha do lapatanna ‘manjaga roha’? (2 Timoteus 4:5)

 TIKKI masa tu hita tantangan na maol, olo do diuji kesetiaanta tu Jahowa dohot tu organisasina. Aha do na mangurupi hita mangatasi i? ‘Tajaga ma rohatta’, toktong sadar jala togu di haporseaon. (Jaha 2 Timoteus 4:5.) Manjaga roha lapatanna toktong tenang, marpikkiran positif, jala boi mangida masalahta i sian sudut pandang ni Jahowa. Molo taulahon i, gabe dang perasaanta be na mengendalihon hita.

2. Aha do na lao tabahas di artikel on?

² Di artikel sebelumna, nungnga tabahas tolu tantangan na ro sian akka halak na so manomba Jahowa. Di artikel on tabahas ma tolu tantangan na boi masa di bagasan huria, i ma (1) tikki adong dongan na mambahen na so adil tu hita, (2) tikki dipissang hita, jala (3) tikki maol tahilala mangihutton perubahan di organisasi. Boi do on manguji kesetiaanta tu Jahowa. Tabahas ma muse carana manjaga rohatta jala toktong setia tu Jahowa dohot tu organisasina.

3. Aha do na boi ro tu pikkiranta molo dibahen dongan na so adil tu hita?

³ Hea do adong dongan na martanggung jawab di huria mambahen na so adil tu hamu? Mungkin dang sengaja ibana. (Rom 3:23; Jak. 3:2) Alai na diulahonna i mambahen haccit rohamuna. Gabe sai dipikkiri hamu ma i bahkan gabe maol hamu modom. Olo do ra gabe sukkun-sukkun rohamu, ‘Boasa adong dongan na songon i pangalahona? Tutu do on organisasi ni Debata?’ Lomo do roha ni Sibolis songon i pikkiranta. (2 Kor. 2:11) Boi do dipakke ibana  pikkiran sisongon i lao manirang hita sian Jahowa dohot organisasina. Molo adong dongan na mambahen na so adil tu hita, songon dia ma carana manjaga roha jala asa unang marpikkiran negatif?

4. Songon dia do si Josep manjaga rohana tikki dibahen na so adil tu ibana, jala aha do parsiajaranna? (1 Musa 50:19-21)

⁴ Unang ma muruk tu Jahowa. Tikki remaja si Josep, dibahen akka abangna do na so adil tu ibana. Sogo do roha ni nasida tu si Josep, jala adong abangna na naeng mambunu ibana. (1 Mus. 37:4, 18-22) Dijual nasida ma si Josep gabe hatoban. Gabe susa ma si Josep saleleng 13 taon. Alani on, boi do marpikkir si Josep dang dihaholongi Jahowa be ibana jala merasa naung ditinggalhon Jahowa. Alai dang gabe muruk si Josep tu Jahowa. Dijaga ibana do rohana jala toktong tenang. Tikki adong pe kesempatan lao mambalos akka abangna i, dang diulahon ibana i. Gariada dipatudu si Josep do holong tu nasida jala diampuni do nasida. (1 Mus. 45:4, 5) Dang holan tu masalahna i fokus ni si Josep, alai boi do diida ibana i sian sudut pandang ni Jahowa. (Jaha 1 Musa 50:19-21.) Aha do parsiajaranna? Molo adong dongan na mambahen haccit rohamuna, unang ma gabe muruk hamu tu Jahowa manang merasa naung ditinggalhon Jahowa hamu. Sebalikna rimangi ma songon dia Jahowa mangurupi hamu martahan mangadopi tantangan i. Jala molo adong dongan na mambahen haccit rohamuna, rade ma hamu manalpuhon hasalaanna jala patudu ma holong tu nasida.​—1 Ptr. 4:8.

5. Songon dia do si Miqueas manjaga rohana tikki dibahen na so adil tu ibana?

⁵ Parrohahon ma pengalaman ni si Miqueas, sahalak sintua di Amerika Selatan. b Adong ma piga-piga sintua di huria mambahen na so adil tu ibana. Didok ibana, “Dang hea songon on stresna huhilala, jala gabe holsoan do au. Dang boi au modom bornginna i, jala tangis do au ala merasa dang adong na boi hubahen.” Alai dijaga si Miqueas do rohana jala dikendalihon ibana do perasaanna. Torus do ibana martangiang mangido tondi parbadia dohot gogo asa boi martahan. Dijaha ibana do muse akka publikasi na boi mangurupi ibana. Aha do parsiajaranna? Molo adong dongan na mambahen na so adil tu hamu, tetap ma hamu tenang jala berupaya ma mambolokkon pikkiran na negatif. Dang sai taboto aha na masa tu donganta i umbahen na songon i ibana makkatai manang bertindak. Alani i, martangiang ma hamu tu Jahowa jala pangido ma asa boi diattusi hamu situasina. Molo diulahon hamu i, gabe marpikkiran positif ma hamu jala rade manalpuhon hasalaan ni nasida. (Poda 19:11) Ingot ma, diboto Jahowa do songon dia situasimuna, jala lehononna do gogo asa boi hamu martahan.​—2 Kron. 16:9; Pjm. 5:8.

6. Boasa dipissang Jahowa hita, jala aha do na porlu taingot? (Heber 12:5, 6, 11)

⁶ Molo dipissang hita, olo do gabe lungun rohatta. Alai molo holan tusi fokusta, boi do gabe merasa hita dang adil cara ni Jahowa mamissang hita, jala merasa dang cocok sipasingot i tu hita. Ujungna gabe dang boi be taida tujuan ni sipasingot i. Dipissang Jahowa pe hita ala na holong do rohana tu hita. (Jaha Heber 12:5, 6, 11.) Taingot ma molo berfokus hita holan tu perasaanta, gabe dimanfaatton Sibolis  ma i lao menyerang hita jala manolak sipasingot ni Jahowa. Ujungna gabe tatinggalhon ma Jahowa dohot organisasina. Molo dipissang hamu, songon dia ma carana asa boi manjaga roha?

7. (a) Songon na dipatudu di gambar, pasu-pasu aha do na dapot ni si Petrus ala dijalo ibana sipasingot? (b) Aha do na boi taparsiajari sian si Petrus?

⁷ Jalo ma pissang-pissang jala bahen ma perubahan. Adong piga-piga hali dipasingot Jesus si Petrus di jolo ni akka apostel na asing. (Mrk. 8:33; Luk. 22:31-34) Pasti maila do si Petrus tikki na dipasingot i ibana. Alai dijalo ibana do i jala marsiajar do ibana sian kesalahanna. Ala toktong setia si Petrus, dipasu-pasu Jahowa do ibana. Dilehon do tu ibana akka tugas na massai penting di huria. (Joh. 21:15-17; Ul. 10:24-33; 1 Ptr. 1:1) Aha ma na boi taparsiajari sian si Petrus? Memang maila do hita tikki dipissang, alai molo tajalo i jala rade hita mambahen perubahan, pasti godang do manfaatna tu hita dohot tu na asing. Gabe godang ma na boi taulahon tu Jahowa dohot tu akka dongan.

8-9. Boha do perasaan ni si Bernardo tikki dipissang ibana, jala songon dia ibana padenggatton cara marpikkirna?

⁸ Taparrohahon ma pengalaman ni si Bernardo di Mozambik. Dicabut do hak istimewana sebagai sintua. Songon dia do perasaan ni si Bernardo? Didok ibana, “Muruk do au ala dang lomo rohakku dipissang.” Khawatir do ibana tu pandangan ni akka dongan di huria. Didok ibana, “Porlu do di au tikki marbulan-bulan asa boi denggan cara marpikkirhu, jala asa boi muse porsea tu Jahowa dohot tu organisasina.” Aha do na mangurupi si Bernardo manguba cara marpikkirna?

⁹ Dipadenggan si Bernardo do cara marpikkirna. Didok ibana, “Tikki sintua dope au, hupakke do Heber 12:7 mangurupi akka dongan asa denggan cara pandang ni nasida tu sipasingot ni Jahowa. Gabe husukkun ma tu dirikku, ‘Tu ise do marlakku ayat on?’ Tu naposo ni Jahowa, termasuk do au disi.” Dung i, dibahen si Bernardo ma perubahan asa boi muse porsea tu Jahowa dohot tu organisasina. Lam sering ma ibana manjaha Bibel jala mangarimangi i. Nang pe khawatir dope  si Bernardo tu pandangan ni akka dongan di huria, alai toktong do ibana rap marbarita na uli dohot nasida jala aktif di parpunguan. Ujungna dilantik ma muse si Bernardo gabe sintua. Molo dipasingot hamu songon si Bernardo, unang ma berfokus holan tu perasaanmuna. Alai jalo ma sipasingot i jala bahen ma perubahan. c (Poda 8:33; 22:4) Molo diulahon hamu i, pasu-pasuon ni Jahowa ma hamu ala toktong setia tu Ibana dohot tu organisasina.

10. Perubahan aha do na manguji kesetiaan ni piga-piga halak Israel?

¹⁰ Perubahan di organisasi boi do manguji kesetiaanta. Molo dang hati-hati hita, boi do on manirang hita sian Jahowa. Taida ma perubahan tu halak Israel dung marlakku Patik ni si Musa. Sebelum adong Patik i, kepala keluarga do na mandalatton tugas ni malim. Nasida do na mambahen langgatan jala mangalean pelean tu Jahowa mewakili keluargana. (1 Mus. 8:20, 21; 12:7; 26:25; 35:1, 6, 7; Job 1:5) Alai dung marlakku Patik ni si Musa, dang kepala keluarga be na mandalatton tugas i. Akka malim sian pinoppar ni si Aron nama na bertugas mangalehon pelean tu Jahowa. Molo adong kepala keluarga na so sian keluarga ni si Aron na mangulahon i, ikkon dipamate do ibana. d (3 Mus. 17:3-6, 8, 9) Alani perubahan on do si Korah, si Datan, si Abiram, dohot 250 pamimpin mangalo tu si Musa dohot si Aron? (4 Mus. 16:1-3) Dang taboto pastina. Alai aha pe alasanna, dang setia be nasida tu Jahowa. Molo adong perubahan di organisasi, aha do na porlu diulahon hamu?

11. Parsiajaran aha do na tadapot sian pinoppar ni si Kohat?

¹¹ Torus ma dukung perubahan di organisasi. Tikki di padang belantara dope halak Israel, sering do nasida marpinda-pinda perkemahan. Tikki pinda, pinoppar ni si Kohat do na mamboan poti parpadanan, jala nasida ma di jolo mardalan. (4 Mus. 3:29, 31; 10:33; Jos. 3:2-4) Tugas na istimewa do i! Alai dung masuk halak Israel tu Tano na Dijanjihon, gabe muba ma tugas ni nasida. Alana dang porlu be poti parpadanan i dipapinda-pinda. Dung mamaretta Raja Salomo, muba ma tugas ni pinoppar ni si Kohat. Adong do na gabe parende, gabe panjaga gerbang, dohot mangurus gudang. (1 Kron. 6:31-33; 26:1, 24) Alai dang adong disurat di Bibel, na marungut-ungut akka pinoppar ni si Kohat i alani perubahan tugas ni nasida. Manang manuntut asa mandapot tugas na sangap songon na parjolo i. Aha ma parsiajaranna tu hita? Rade ma hamu mangihutton perubahan di organisasi, termasuk na berpengaruh tu tugasmuna. Las ma rohamuna mangulahon tugas aha pe na dilehon tu hamu. Ingot ma, dang tugasmuna na manottuhon arga do hamu di Jahowa manang na dang. Alai molo unduk hamu tu Ibana, i do na paling mambahen las rohana.​—1 Sam. 15:22.

12. Songon dia do perasaan ni si Zaina tikki ditugasson tu lapangan?

¹² Parrohahon ma pengalaman ni si Zaina, donganta borua di Timur Tengah.  Nungnga melayani di Betel ibana lobi sian 23 taon jala massai lomo do rohana tu tugasna i. Hape mandapot perubahan tugas ma ibana tu lapangan. Didok ibana, “Tarsonggot do au alani perubahan on. Merasa ma au dang berguna, jala sukkun-sukkun do rohakku, ‘Aha do na sala na hubahen?’” Tamba do muse lungun ni rohana, ala adong piga-piga dongan di huria mandok, “Molo denggan karejom, pasti di Betel dope ho melayani saonari.” Alani i, hea do kecil hati ibana bahkan sappe tangis ganup borngin. Nang pe songon i didok ibana do, “Dang hea ragu au tu organisasi dohot tu holong ni Jahowa.” Songon dia do si Zaina manjaga rohana?

13. Songon dia do si Zaina mangatasi perasaanna na negatif?

¹³ Songon dia do si Zaina mangatasi perasaan negatifna i? Dijaha ibana ma akka publikasi na cocok tu situasina, contohna artikel “Saudara Dapat Mengatasi Perasaan Kecil Hati!” di Menara Pengawal 1 Februari 2001. Di artikel i, dibahas do songon dia panurat bukku Markus mangadopi tantangan na sarupa tikki muba tugasna. Didok si Zaina, “Contoh ni si Markus on mangurupi au asa unang torus merasa kecil hati.” Toktong do si Zaina bergaul dohot akka dongan na asing. Dang sai torus disalahon ibana dirina. Jala disadari si Zaina ma, tondi parbadia ni Jahowa do na mangarahon sude keputusan na dibahen organisasi. Diboto ibana do muse, na massai holong roha ni akka donganta bawa na martanggung jawab di organisasi tu ibana. Jala disadari ibana do na paling penting songon dia asa denggan mardalan organisasi ni Jahowa.

14. Perubahan aha do na maol diihutton si Vlado, jala aha do na mangurupi ibana?

¹⁴ Taida ma muse pengalaman ni sahalak sintua na margoar si Vlado, na marumur 73 taon di Slovenia. Maol do dijalo ibana pengaturan lao manggabung huriana tu huria na asing dohot manutup Bale Harajaon ni nasida. Didok ibana, “Dang huattusi boasa Bale Harajaon na bagak songon on gabe ditutup. Haccit do rohakku, alana baru dope direnovasi hami Bale Harajaon on. Tukkang do karejokku, jadi dohot do au paturehon piga-piga perabotan na baru di Bale i. Asing ni i, pengaturan on gabe tantangan do tu hami akka  penyiar naung matua.” Aha do na mangurupi si Vlado mangihutton pengaturan i? Didok ibana, “Godang do manfaatna molo taihutton perubahan na dibahen organisasi. Akka perubahan i paradehon hita tu akka perubahan na umbalga di ari na naeng ro.” Molo digabung huriamuna manang molo muba tugasmuna, maol do dihilala hamu mambahen penyesuaian? Pos ma rohamuna diattusi Jahowa do perasaanmuna i. Molo olo hamu mangihutton perubahan na dibahen organisasi jala toktong setia tu Jahowa, pasti dipasu-pasu do hamu.​—Ps. 18:25.

15. Songon dia do carana manjaga rohatta molo adong tantangan sian bagasan huria?

¹⁵ Lam jonok hita tu ujung ni portibi na dirajai Sibolis on, bisa jadi lam godang do tantangan na ro sian huria na manguji kesetiaanta. Jadi tajaga ma rohatta. Molo adong dongan sahaporseaon na mambahen na so adil tu hita, unang ma gabe jut rohatta. Molo dipissang hita, olo do ra maila hita. Alai tajalo ma sipasingot i jala tabahen ma perubahan. Molo dibahen organisasi perubahan na berdampak tu hita, rade ma hita manjalo dohot mangihutton i.

16. Songon dia do carana asa toktong hamu marpos ni roha tu Jahowa dohot tu organisasina?

¹⁶ Boi do hita toktong porsea tu Jahowa dohot tu organisasina nang pe diuji kesetiaanta. Alai asa boi songon i, ikkon tajaga do rohatta, toktong tenang, jala taida ma masalahta i sian cara pandang ni Jahowa. Parsiajari ma akka contoh di Bibel naung marhasil mangadopi tantangan na sarupa songon hamu jala rimangi ma teladan ni nasida i. Martangiang ma hamu tu Jahowa asa diurupi jala toktong ma jonok tu akka dongan di huria. Molo diulahon hamu i, dang soal aha na masa dang na lao marhasil Sibolis manirang hamu sian Jahowa dohot organisasina.​—Jak. 4:7.