Sebelum hupaboa aha na masa dukkon i, huceritahon ma jo songon dia mulana au melayani sepenuh waktu.

Au tubu taon 1942 di Pulo Curaçao di Kepulauan Karibia. Sian Suriname do bapakku, alai pinda do ibana tu Pulo Curaçao alani karejona. Piga-piga taon sebelum tubu au, tardidi ma bapakku gabe Saksi Jahowa. Jala ibana ma salah satu Saksi na parjolo di Curaçao. a Marsiajar Bibel do hami dohot bapak ganup minggu, nang pe sipata dang lomo rohanami. Tikki marumur 14 taon au, pinda ma muse keluarganami tu Suriname asa boi diurus bapak oppung boru naung matua.

Di Suriname, mardongan do au tu akka na poso di huria na semangat melayani Jahowa. Saotik do di ginjangku umur ni nasida jala merintis biasa do nasida. Tikki diceritahon nasida pengalamanna di ulaon marbarita, boi ma huida las hian do roha ni nasida. Molo nga sae marpungu, jotjot do au dohot donganku makkata-hatai taringot Bibel. Jala sipata, hundul do hami di luar sambil mangida akka bintang di langit. Diurupi akka dongan i do au manottuhon cita-citakku, lomo do rohakku melayani Jahowa. Jadi tardidi ma au tikki marumur 16 taon, dung i merintis biasa tikki marumur 18 taon.

Godang do parsiajaran na hudapot tikki na merintis i, jala bermanfaat do i saleleng melayani au sepenuh waktu. Misalna gabe marsiajar ma au massai penting do hape mangalatik na asing. Tikki mulai merintis, adong ma sahalak donganta misionaris na margoar si Willem van Seijl mangalatik au. b Dilatik do au cara mandalatton tugas di huria. Marguna hian do pelatihan i,  alana di taon berikutna dilantik ma au gabe perintis istimewa di sada kelompok na terpencil di pedalaman hutan hujan Suriname. Mandok mauliate do au ala olo si Willem dohot akka dongan bawa na asing mangalatik au. Mulai sian i berupaya do au maniru nasida mangalatik na asing.

Parsiajaran na paduahon, gabe huboto ma godang do manfaatna molo sederhana ngolutta jala molo tabahen jadwal asa denggan mardalan ulaonta. Contohna tiap awal bulan, hubahen ma dohot patnerhu daftar ni akka sipanganon dohot kebutuhannami na lao situhoron. Dung i, lao ma sada sian hami tu kota lao manuhor i. Denggan do dipakke hami penggantian ongkosnami tiap bulan, jala berupaya do hami asa hemat. Alana diboto hami do molo habis akka sipanganon dohot kebutuhannami tikki di pedalaman, dang sai adong na boi mangurupi hami. Ala nungnga marsiajar au carana hidup sederhana jala mambahen jadwal na denggan, gabe boi ma au fokus melayani Jahowa saleleng ngolukku.

Parsiajaran na patoluhon na hudapot, godang do manfaatna molo boi taajarhon hasittongan tu akka halak mamakke bahasa ni nasida. Boi do au marbahasa Belanda, Inggris, Papiamento, dohot bahasa Sranantongo (digoari do tong bahasa Sranan). On ma bahasa utama di Suriname. Alai unlomo do roha ni halak na di pedalaman i molo hupasahat barita na uli di bahasa ni nasida. Adong do bahasa disi na maol huparsiajari, i ma bahasa Saramaka na mamakke nada tinggi dohot nada rendah. Nang pe songon i las do rohakku alana dang sia-sia upaya na hubahen. Saleleng martaon-taon disi, boi ma huajarhon hasittongan tu godang halak mamakke bahasa ni nasida.

Alai adong do memang pengalaman na mambahen au maila. Contohna adong ma sahalak borua parsiajar Bibelhu na mamakke bahasa Saramaka. Ala huida haccit butuhana, husukkun ma songon dia pakkilalaanna. Alai na husukkun tu ibana, ‘Na hamil do ho?’ Gabe maila ma borua i. Alai nang pe hea au sala makkatai, dang menyerah au. Sai berupaya do au makkatai mamakke bahasa ni akka halak di daerah tugashu.

Di taon 1970, dilantik ma au gabe pengawas wilayah. Di taon i lao ma au tu godang kelompok terpencil di pedalaman hutan lao mamutarhon pertunjukan slide na marjudul “Visiting the World Headquarters of Jehovah’s Witnesses” (“Mangunjungi Kantor Pusat ni Saksi Jahowa”). Lao ma au dohot akka dongan mamakke parau na ganjang mangalewati sunge di hutan i. Diboan hami ma genset, tangki bensin, lampu sapporong, dohot akka peralatan na asing. Ikkon diboan hami do sude peralatan i asa boi diputarhon hami slide pertunjukan i. Sai huingot do songon dia las ni roha ni akka halak na disi tikki diputar hami slide pertunjukan i. Las do muse rohakku boi mangurupi nasida marsiajar taringot Jahowa dohot organisasina. Tikki huida akka halak gabe  jonok tu Jahowa, las hian ma rohakku jala puas do huhilala ala unggodang do pasu-pasu na hudapot sian pengorbanan na hubahen.

Nang pe huboto unggodang do na boi huulahon tu Jahowa molo lajang au, alai lomo do rohakku menikah. Jadi martangiang ma au tu Jahowa. Takkas do hupangido di tangiangku asa dapottu istri na rade mendukung au mandalatton tugas na maol gabe pengawas wilayah di pedalaman hutan hujan i. Hira-hira sataon dukkon i, marhallet ma au dohot si Ethel sahalak perintis istimewa na semangat melayani Jahowa jala na olo berkorban. Sian na poso, lomo do rohana maniru Apostel Paulus jala berupaya do ibana mangulahon nasa tolapna di ulaon marbarita. Menikah ma hami di bulan September 1971. Mulai sian i rap ma hami mangunjungi akka huria.

Ala di keluarga na sederhana do si Ethel dipagodang-godang, mura do ibana menyesuaihon diri tu ulaonnami mangunjungi akka huria di pedalaman hutan hujan i. Misalna dang pola godang barang na diboan hami. Di sunge do hami manucci baju dohot maridi. Asing ni i, olo do hami mangallang sipanganon manang aha pe na diparade tu hami. Misalna iguana, ikan piranha, dohot akka binatang na diburu di hutan i manang na dapot sian sunge. Molo dang adong piring, mangan mamakke daun pisang ma hami. Molo dang adong sendok, mangan pakke tangan ma hami. Ala rap hami melayani Jahowa, gabe boi ma huhilala lam togu do perkawinannami songon tolu tali na dipudun. (Pjm. 4:12) Dang olo hami manggattihon pengalaman on tu manang aha pe!

Sada tikki dung mulak hami sian kelompok na terpencil i, masa ma kejadian songon na hupaboa nakkin. Tikki dilewati hami aliran sunge na doras, toppu ma masuk paraunami tu bagasan aek, alai pittor nakkok  muse parau i tu ginjang. Tuani ma dipakke hami jaket keselamatan, na mambahen hami gabe dang lonong. Alai nga gok be aek masuk tu bagasan ni parau i. Jadi dipakaluar hami ma akka sipanganon sian tempatna jala dipakke hami ma tempatna i lao mambolokkon aek sian paraunami.

Ala dang adong be sipanganonnami, makkail ma hami di sunge i. Alai dang adong dapotnami manang aha. Jadi martangiang ma hami tu Jahowa. Hupangido hami ma asa dilean sipanganonnami sadari i. Dung martangiang hami, adong ma sahalak sian dongannami i manappatton hailna. Dapotna ma sada dekke na balga na cukkup allangonnami na lima di borngin i.

Dung lima taon melayani sebagai pengawas wilayah, dapotnami ma pasu-pasu na so tarduga. Las hian do rohakku lao marianakkon nama hami, nang pe dang huboto aha na lao masa annon. Bertekad do au dohot si Ethel asa toktong melayani sepenuh waktu. Ditaon 1976 tubu ma anaknami siakkangan, i ma Ethniël. Dua satonga taon dukkon i, tubu ma muse adekna, i ma si Giovanni.

Ala adong kebutuhan pengawas wilayah di Suriname, diputusson kantor cabang ma asa toktong au melayani sebagai pengawas wilayah sambil pagodang-godangkon anakkonnami. Tikki poso dope gellengnami, otik do huria na hukunjungi. Di bagasan sabulan holan piga-piga minggu do au melayani sebagai pengawas wilayah. Sisana i merintis ma au di huriakku. Molo jonok do huria na hukunjungi, boi do si Ethel dohot anakkonnami mandongani au berkunjung. Alai molo dao huria i jala molo adong kebaktian di pedalaman hutan i, holan sahalakku do na lao berkunjung.

Ikkon hubahen do jadwal asa denggan hudalatton sude tanggung jawabhu. Sai hupastihon do asa dibahen hami ibadat keluarga ganup minggu. Molo lao au mangunjungi akka huria, si Ethel ma na memandu ibadat keluarga di jabu. Nang pe songon i, sai diupayahon hami do asa boi hami rap ibadat keluarga. Jotjot do au dohot si Ethel mangajak gellengnami rekreasi. Contohna mambahen permainan, manang lao mangunjungi akka tempat na bagak di jonok ni jabunami. Sering do au leleng modom lao mempersiappon akka tugas. Alai burju do  si Ethel, songon istri na di Poda 31:15 i do ibana. Nungnga dungo ibana tikki golap dope ari. Dipastihon ibana do asa boi hami sude ayat harian di manogotna i jala rap sarapan sebelum lao anaknami tu sikkola. Mandok mauliate do au tu Jahowa ala dapottu istri na olo berkorban jala na sai rade mangurupi au mandalatton tugashu.

Sebagai natua-tua, berupaya do hami mangurupi gellengnami makkaholongi Jahowa jala asa lomo rohana marbarita. Lomo do rohanami asa dipillit nasida dinas sepenuh waktu sebagai karirna. Alai unang ma ala na dipaksa hami, naeng ma nian halak i sandiri na mamillit. Sai diceritahon hami do tu nasida songon dia las ni roha molo melayani sepenuh waktu. Memang adong do tantanganna, alai sai hupaboa hami do tu nasida pasti diurupi Jahowa do hita. Asing ni i, diurupi hami do akka gellengnami asa bergaul dohot akka dongan na mangutamahon Jahowa di ngoluna.

Sai diparade Jahowa do kebutuhannami sekeluarga. Alai huulahon do tong tanggung jawabhu sebagai kepala keluarga. Tikki gabe perintis istimewa lajang au, nungnga huparsiajari songon dia carana berhemat. Alai sipata nang pe nga berusaha hami berhemat, olo do maol hami mandapot kebutuhannami. Nang pe songon i, pos do rohakku sai diurupi Jahowa do hami. Contohna, sian taon 1986 sahat tu taon 1992, masa ma perang sipil di Suriname. Saleleng masa i, maol do di hami mandapot kebutuhan dasar. Nang pe songon i, sai diparade Jahowa do kebutuhannami.​—Mat. 6:32.

Saleleng ngolukku, dirasahon hami do na parduli Jahowa tu hami jala diurupi do hami asa toktong marlas ni roha dohot merasa puas. Las do muse rohanami ala boi pagodang-godangkon gellengnami melayani Jahowa. Dibahen nasida do dinas sepenuh waktu gabe karir di ngolu ni nasida. Lulusan sikkola teokratis do si Ethniël dohot si Giovanni jala saonari melayani di kantor cabang Suriname rap dohot istri ni nasida.

Saonari nungnga matua au dohot si Ethel. Alai toktong dope hami melayani sebagai perintis istimewa. Sibuk hian do hami, sappe dang sanga au marsiajar marlange! Alai dang pola boha i. Molo huingot-ingot muse keputusanku na hubahen tikki poso lao melayani sepenuh waktu, dang hea husolsoli i. Gariada i ma salah satu keputusan terbaik na hea hubahen di ngolukku.