1. Sian dia taboto na lomo do roha ni Jahowa asa jonok hita tu Ibana?

 DIUNDANG Jahowa do hita asa jonok tu Ibana. (Jak. 4:8) Lomo do rohana gabe Bapakta, Debatanta, dohot Donganta. Dialusi do tangiangta jala diurupi do hita tikki susa. Marhite organisasina, diajari jala dijaga do hita. Alai aha do na ikkon taulahon asa jonok tu Jahowa?

2. Songon dia do hita boi jonok tu Jahowa?

² Boi do hita jonok tu Jahowa molo martangiang hita tu Ibana, tajaha Bibel, jala tarimangi na tajaha i. Molo taulahon i, gabe lam tamba ma holong dohot pangargaionta tu Jahowa. Gabe taronjar ma rohatta mangoloi jala mamuji Jahowa, ala tama do Ibana manjalo i. (Pgk. 4:11) Lam tatanda Jahowa, lam pos ma rohatta tu Ibana dohot tu organisasi na dipakke Ibana lao mangurupi hita.

3. Songon dia do dibahen Sibolis lao manirang hita sian Jahowa, alai aha do na boi mangurupi hita asa unang maninggalhon Jahowa dohot organisasina? (Psalmen 31:13, 14)

³ Berupaya do Sibolis manirang hita sian Jahowa, tarlumobi tikki susa hita alani akka tantangan. Songon dia carana? Dibahen Sibolis do lam moru pos ni rohatta tu Jahowa dohot tu organisasina. Alai boi do hita dang tartipu tu taktikna i. Molo togu haporseaotta tu Jahowa, pasti dang olo hita maninggalhon Jahowa dohot organisasina.​—Jaha Psalmen 31:13, 14.

4. Aha do na lao tabahas di artikel on?

⁴ Di artikel on, tabahas ma tolu tantangan na ro sian akka halak na so manomba Jahowa. Boi do i mambahen hita dang marpos ni roha be tu Jahowa dohot tu organisasina. Songon dia do akka tantangan i boi manirang hita sian Jahowa? Jala aha do na ikkon taulahon asa unang marhasil Sibolis manjorat hita?

5. Songon dia hasusaan na taadopi mambahen gale haporseaotta tu Jahowa dohot tu organisasina?

⁵ Adong do sian hita na ditentang keluarga manang susa mangalului hepeng. Songon dia akka hasusaan on boi mambahen gabe dang pos be rohatta tu organisasi ni Jahowa, bahkan boi manirang hita sian Jahowa? Molo leleng hita manaon hasusaan, bisa jadi hita merasa dang adong be harapanta jala gabe mandele. Dipakke Sibolis do akka hasusaatta i mambahen hita marpikkir dang holong be roha ni Jahowa tu hita. Lomo do muse roha ni Sibolis asa ro tu pikkiranta ala melayani Jahowa jala bergabung tu organisasina do hita makana susa. Songon i do tong na masa tu halak Israel tikki di Mesir. Mulana, porsea do halak i Jahowa do na mamillit si Musa dohot si Aron lao paluahon nasida. (2 Mus. 4:29-31) Alai tikki dibahen si Firaun nasida lam susa, gabe disalahon nasida ma si Musa dohot si Aron. Didok nasida, “Alani hamu, gabe sogo do roha ni si Firaun dohot pejabatna tu hami. Ai songon na mangalehon podang do hamu tu tangan ni nasida lao pamatehon hami.” (2 Mus. 5:19-21) Gabe disalahon nasida ma akka wakil ni Jahowa i. Jadi molo tung pe leleng hamu manaon hasusaan, songon dia do carana asa toktong togu haporseaonmuna tu Jahowa dohot tu organisasina?

6. Tikki mangadopi hasusaan, aha do na boi tatiru sian Panurirang Habakuk? (Habakuk 3:17-19)

⁶ Paboa ma sude na adong di rohamuna tu Jahowa tikki martangiang jala pangido ma bantuanna. Godang do hasusaan na masa tu Panurirang Habakuk, jala hea do ibana merasa dang parduli be Jahowa tu ibana. Dipaboa ibana do songon dia pakkilalaanna di tangiangna tu Jahowa. Didok ibana, “Ale Jahowa, sadia leleng nai au jou-jou tu Ho lao mangido asa diurupi? Andigan do tangihononmu au? . . . Boasa ma dipasombu Ho halak manusai na asing?” (Hab. 1:2, 3) Dialusi Jahowa do tangiang ni si Habakuk. (Hab. 2:2, 3) Dung dirimangi si Habakuk songon dia Jahowa paluahon naposona, gabe marlas ni roha ma ibana muse. Gabe lam pos ma rohana na parduli do Jahowa tu ibana jala diurupi asa toktong martahan mangadopi akka hasusaan. (Jaha Habakuk 3:17-19.) Aha do parsiajaranna tu hita? Tikki masa hasusaan, martangiang ma hita tu Jahowa paboahon sude perasaanta. Dung i, pangido ma bantuanna. Molo taulahon i, gabe pos ma rohatta pasti lehonon ni Jahowa do gogo tu hita asa boi hita martahan. Jala molo nungnga tahilala diurupi Jahowa hita, lam togu ma haporseaotta tu Ibana.

7. Aha do na didok abang ni si Serli tu ibana, jala aha do na diulahon ibana asa toktong porsea tu Jahowa?

⁷ Ulahon hamu ma akka ulaon na mambahen hamu jonok tu Jahowa. I do na mangurupi si Serli, donganta na tinggal di Papua Nugini tikki mangadopi hasusaan. b Pogos do keluargana, sipata ikkon berjuang do halak i asa boi mandapot sipanganon. Asing ni i berupaya do abangna mambahen asa unang pos be rohana tu Jahowa. Didok abangna i, “Nimmu tondi parbadia na mangurupi ho, alai dia do, diurupi do ho? Tong do pogos keluargam. Habis do tikkim holan na marbarita na uli.” Didok si Serli, “Gabe sukkun-sukkun do rohakku, ‘Tutu do parduli Jahowa tu hami?’ Alani i, pittor  martangiang ma au tu Jahowa paboahon sude na di rohakki. Jala torus do hujaha Bibel dohot akka publikasi, marbarita na uli, jala ro tu parpunguan.” Gabe disadari ibana ma sai diurupi Jahowa do keluargana saleleng on. Nang pe pogos nasida alai dang sappe haraparon, gariada marlas ni roha do keluargana. Didok si Serli muse, “Dialusi Jahowa do tangiakku.” (1 Tim. 6:6-8) Jadi molo torus do taulahon akka ulaon na mambahen hita jonok tu Jahowa, gabe dang taloas hasusaatta manang keraguanta manirang hita sian Jahowa.

8. Aha do na masa tu piga-piga donganta bawa na martanggung jawab di organisasi?

⁸ Dipakke musu do laporan berita dohot media sosial lao paboahon informasi na sala taringot akka donganta bawa na martanggung jawab di organisasi. (Ps. 31:13) Piga-piga donganta on adong na ditakkup jala ditudu sebagai parjahat. Songon i do na masa di abad na parjolo tikki ditakkup Apostel Paulus jala ditudu mangulahon na sala. Alai songon dia do reaksi ni halak Kristen di tikki i?

9. Aha do na diulahon piga-piga halak Kristen tikki dipenjarahon si Paulus?

⁹ Adong do piga-piga halak Kristen di abad na parjolo na maninggalhon si Paulus tikki dipenjara ibana di Rom. (2 Tim. 1:8,15) Boasa? Na maila do nasida dipenjarahon si Paulus ala ditudu sebagai parjahat? (2 Tim. 2:8, 9) Manang na mabiar do nasida gabe dianiaya annon? Dang soal aha pe alasan ni nasida, boi do tabayakkon songon dia perasaan ni si Paulus tikki ditinggalhon ibana. Hape nungnga dilean ibana ngoluna tu nasida jala nungnga godang ditaon ibana hasusaan. (Ul. 20:18-21; 2 Kor. 1:8) Unang ma tatiru akka halak na maninggalhon si Paulus! Jadi aha do na porlu taingot molo dianiaya donganta bawa na martanggung jawab di organisasi?

10. Aha do na porlu taingot molo dianiaya akka donganta bawa na martanggung jawab di huria?

 ¹⁰ Ingot ma boasa hita dianiaya jala ise do na menganiaya hita. Dua Timoteus 3:12 mandok, “Sasittongna, dibahen do na haccit tu sude halak na naeng manomba Debata dohot tu sude na gabe sisean ni Kristus Jesus.” Jadi dang heran be hita molo diserang Sibolis akka dongan na martanggung jawab di huria. Lomo do rohana asa unang setia be donganta on tu Jahowa jala gabe mabiar hita alani i.​—1 Ptr. 5:8.

11. Aha do na boi taparsiajari sian si Onesiporus? (2 Timoteus 1:16-18)

¹¹ Urupi ma akka donganta bawa na dianiaya jala setia ma tu nasida. (Jaha 2 Timoteus 1:16-18.) Di abad na parjolo, adong do sahalak Kristen na setia tu si Paulus, goarna si Onesiporus. “Dang maila ibana nang pe dipenjara [si Paulus].” Dibahen ibana do sian nasa gogona lao mangalului si Paulus. Dung pajuppang berupaya do ibana lao mangurupi si Paulus. Hape boi do i parohon jea tu dirina sandiri. Aha do na boi taparsiajari sian on? Unang ma mabiar hita mangurupi akka dongan na dianiaya, gariada berusaha ma hita mangurupi nasida. (Poda 17:17) Alana massai porlu do nasida diurupi jala dipatogu.

12. Aha do na boi tatiru sian akka donganta di Rusia?

¹² Taida ma jo songon dia akka donganta di Rusia mangurupi akka dongan sahaporseaon ni nasida na dipenjara. Godang do sian nasida na ro tu pengadilan lao mendukung akka dongan i. Aha ma parsiajaranna tu hita? Unang ma mabiar hita molo adong donganta na difitnah, dipenjara, manang dianiaya. Tatangiakkon ma nasida, taparrohahon ma keluarga ni nasida, jala talului ma cara lao mangurupi nasida.​—Ul. 12:5; 2 Kor. 1:10, 11.

13. Aha do muse na mambahen lam moru pos ni rohatta tu Jahowa dohot tu organisasina?

¹³ Adong do ra keluarga na so sahaporseaon, dongan sakarejo, manang dongan sasikkola na mangarehei hita ala marbarita na uli dohot mangihutton standar ni Jahowa. (1 Ptr. 4:4) Olo do didok nasida, “Lomo do rohakku mangida ho, alai pakakuhu do agamami jala nungnga ketinggalan jaman.” Adong do muse na mangkritik hita taringot caratta berurusan tu halak na dipecat. Didok nasida, “Didok hamu parholong do hamu, alai hurasa pakejamhu do caramuna i.” Olo do gabe ganggu rohatta alani hata sisongon i. Gabe sukkun-sukkun ma rohatta, ‘Sittong do nuaeng patik ni Jahowa i? Na pakakuhu do organisasi on?’ Molo songon i do perasaanmuna, boha ma carana asa boi toktong jonok hamu tu Jahowa dohot tu organisasina?

14. Ikkon songon dia do sikapta molo direhei hita ala mandalatton standar ni Jahowa? (Psalmen 119:50-52)

¹⁴ Torus ma ihutton standar ni Jahowa. Torus do diihutton si Job standar ni Jahowa nang pe adong na mangarehei ibana. Sada donganna mandok, dang parduli Jahowa nang pe diulahon si Job standar ni Jahowa na sittong. (Job 4:17, 18; 22:3) Alai dang olo si Job manangihon gabus i. Pos do rohana standar ni Jahowa i do na sittong jala berupaya do ibana mangihutton i. Dang dipaloas ibana manang ise pe mambahen ibana gabe dang setia tu Jahowa. (Job 27:5, 6) Aha ma parsiajaranna tu hita? Unang ma ala direhei hita, gabe ragu hita tu standar  ni Jahowa. Molo taingot pengalamanta saleleng on, godang do manfaat na tarasahon ala mangulahon standar ni Jahowa. Alani i, torus ma tadukung organisasi na mandalatton standar ni Jahowa. Molo taulahon i, dang taloas be akka pangarehei manirang hita sian Jahowa.​—Jaha Psalmen 119:50-52.

15. Boasa direhei si Brizit?

¹⁵ Taparrohahon ma pengalaman ni si Brizit sahalak donganta borua di India. Direhei keluargana do ibana ala gabe Saksi Jahowa. Dang Saksi Jahowa suamina. Dang leleng dukkon tardidi ibana taon 1997, dipecat ma suamina sian karejona. Jadi diputusson suamina i ma asa pinda nasida sakeluarga dohot natua-tua ni suamina i tu kota na asing. Alai umbalga do tantangan na diadopi si Brizit dukkon pinda nasida. Ala dang karejo be suamina, gabe ibana ma na ikkon karejo lao memenuhi kebutuhan ni keluargana. Asing ni i, dao do jarak ni jabuna tu huria na unjonok, hira-hira 350 kilometer ma daona. Ditentang keluarga ni suamina do muse si Brizit alani haporseaonna. Ala lam parah situasina, ikkon pinda ma muse keluarga ni si Brizit tu inganan na asing. Dung i mate ma suamina dohot sada boruna alani kanker tikki marumur 12 taon. Gabe disalahon keluargana do si Brizit alani na masa i. Didok nasida, autsugari ma dang Saksi Jahowa si Brizit, pasti dang masa on tu keluargana. Alai nang pe songon i, toktong do pos roha ni si Brizit tu Jahowa jala jonok do ibana tu organisasina.

16. Pasu-pasu aha do na dihilala si Brizit ala setia tu Jahowa dohot tu organisasina?

¹⁶ Ala dao do huria na unjonok sian inganan ni si Brizit tinggal, disaranton pengawas wilayah ma asa marbarita ibana di daerah tempat tinggalna jala asa dibahen parpunguan di jabuna. Mulana maol do dihilala si Brizit, alai diihutton ibana do saran ni pengawas wilayah i. Marbarita na uli ma ibana disi, dibahen ibana ma parpunguan di jabuna, jala diatur ibana ma ibadat keluarga rap dohot boruna. Aha do hasilna? Godang do halak na diurupi si Brizit marsiajar Bibel,  jala adong do na tardidi. Di taon 2005 gabe perintis biasa ma ibana. Godang do dapotna pasu-pasu ala porsea ibana tu Jahowa jala setia tu organisasina. Setia do akka boruna manomba Jahowa jala saonari nungnga adong dua huria di inganan i! Pos do roha ni si Brizit, alani bantuan ni Jahowa do umbahen na margogo ibana mangadopi hasusaan jala martahan nang pe direhei keluarga.

17. Dung taboto taktik ni Sibolis, aha do tekadta?

¹⁷ Tikki susa hita, lomo do roha ni Sibolis asa marpikkir hita dang olo Jahowa mangurupi hita. Lomo do muse rohana asa porsea hita molo tadukung organisasina, gabe susa ma ngolutta. Tikki adong donganta bawa na martanggung jawab di huria ditudu, dianiaya, jala dipenjarahon, lomo do roha ni Sibolis asa mabiar hita. Tikki adong na mangarehei hita, lomo do roha ni Sibolis asa ragu hita tu standar ni Jahowa dohot tu organisasina. Alai nungnga taboto taktik ni Sibolis on, jadi unang ma olo hita dioto-otoi. (2 Kor. 2:11) Bertekad ma hita manolak akka gabus ni Sibolis i jala toktong ma hita setia tu Jahowa dohot tu organisasina. Ingot ma dang olo Jahowa maninggalhon hamu. (Ps. 28:7) Jadi unang ma paloas manang aha pe manirang hamu sian Jahowa.​—Rom 8:35-39.

18. Aha ma na lao tabahas di artikel na mangihut?

¹⁸ Di artikel on nungnga tabahas akka tantangan na ro sian akka halak na so manomba Jahowa. Alai boi do tantangan ro sian bagasan huria na mambahen moru pos ni rohatta tu Jahowa dohot tu organisasina. Songon dia carana asa marhasil hita mangadopi tantangan sisongon i? Tabahas ma on di artikel na mangihut.