1. Boha do perasaan ni Apostel Paulus mangida akka parhobas di huria?

 MASSAI penting do tugas na diulahon akka parhobas di huria. Diargai Apostel Paulus do kerja keras ni nasida. Misalna, tikki mambahen surat tu halak Kristen di Pilippi, ditujuhon ibana do suratna i dang holan tu akka sintua, alai termasuk do tu akka parhobas.—Plp. 1:1.

2. Songon dia do perasaan ni si Luis ala gabe parhobas ibana?

² Dang soal sadia umurna, godang do donganta bawa na marlas ni roha ala boi mangurupi huria gabe sahalak parhobas. Misalna si Devan, ibana dilantik gabe parhobas tikki marumur 18 taon. Molo si Luis, ibana dilantik gabe parhobas dung marumur 50 taon. Songon dia do perasaan ni si Luis tikki gabe parhobas? Didok ibana, “Las hian do rohakku boi mangurupi akka dongan di huria. Nungnga dipatudu nasida holong ni nasida tu au. Jadi saonari lomo rohakku patuduhon holong ni rohakku tu nasida!” Pasti godang do parhobas di huria na makkilala songon i.

3. Sukkun-sukkun aha do na lao tabahas?

³ Molo hamu sahalak bawa naung tardidi jala dang gabe parhobas dope di huria, olo do hamu mambahen cita-cita sisongon i? Aha do alasanna umbahen na olo hamu gabe parhobas? Jala akka aha do persyaratan sian Bibel na ikkon dipatudu hamu asa boi gabe parhobas? Lao tabahas ma alus ni sukkun-sukkun i di artikel on. Alai na parjolo, tabahas ma jo aha do tugas ni parhobas di huria.

AHA DO TUGAS NI AKKA PARHOBAS DI HURIA?

4. Aha do tugas ni akka parhobas di huria? (Ida gambar.)

⁴ Akka parhobas di huria, i ma akka bawa naung tardidi na dilantik marhite tondi parbadia lao mangurupi akka sintua mangulahon piga-piga tugas na penting di huria. Adong do parhobas  na ditugasson lao paradehon publikasi dohot kartu daerah na boi dipakke akka penyiar di ulaon marbarita. Adong do na paiasson jala merawat Bale Harajaon. Adong do na gabe tata tertib jala mangatur peralatan audio video saleleng acara parpunguan. Jadi godang do tugas na penting na diulahon akka parhobas di huria. Alai na terutama, akka parhobas di huria, i ma akka bawa na makkaholongi Jahowa jala toktong mangihutton aturan ni Jahowa di ngolu ni nasida. Holong situtu do roha ni akka parhobas tu akka dongan di huria. (Mat. 22:​37-39) Jadi, aha do na ikkon diulahon sahalak bawa asa memenuhi syarat gabe parhobas di huria?

5. Aha do na ikkon diulahon sahalak bawa molo lomo rohana gabe parhobas di huria?

⁵ Di Bibel, dipaboa do akka persyaratan na ikkon dipatudu akka bawa asa boi dilantik gabe parhobas di huria. (1 Tim. 3:​8-10, 12, 13) Molo lomo rohamuna gabe parhobas lao mangurupi akka dongan di huria, parsiajari ma akka persyaratan na didok di Bibel, jala berupaya ma memenuhi sude persyaratan i. Alai sebelum tusi, sukkun ma dirimuna, ‘Aha do alasanna umbahen na olo au gabe parhobas?’

AHA DO ALASANNA UMBAHEN NA OLO HAMU GABE PARHOBAS?

6. Aha do seharusna alasanmuna mangurupi akka dongan? (Mateus 20:28; ida sampul.)

⁶ Rimangi ma teladan ni Jesus Kristus. Di sude ulaonna, sai dipatudu ibana do holongna tu Bapakna dohot tu akka halak. Holong ni rohana i do na mambahen ibana olo bekerja keras jala mangulahon tugas na dianggap rendah. (Jaha Mateus 20:28; Joh. 13:​5, 14, 15) Jadi molo holong rohamuna tu Jahowa dohot tu akka halak, pasti dipasu-pasu Jahowa do hamu jala diurupi Ibana do hamu asa boi memenuhi syarat gabe parhobas.—1 Kor. 16:14; 1 Ptr. 5:5.

7. Boasa dang olo hamu gabe na ussangap?

⁷ Jotjot do berupaya akka halak di portibi on asa gabe na ussangap. Alai, dang boi adong sikap sisongon i di organisasi ni Jahowa. Molo holong roha ni sahalak bawa tu akka donganna, pasti ditiru ibana do Jesus. Dang olo ibana mangatur halak na asing jala dang olo ibana gabe na ussangap. Alai boha do molo adong na dipillit gabe parhobas, hape lomo rohana gabe na ussangap? Pasti dang olo ibana mangulahon tugas na dianggap rendah manang tugas na asing lao mangurus biru-biru ni  Jahowa. Didok rohana, tumagon ma halak na asing na mangulahon tugas sisongon i, unang ibana. (Joh. 10:12) Pasti dang dipasu-pasu Jahowa akka halak na mambangga-banggahon dirina jala na mambahen dirina gabe na ussangap.—1 Kor. 10:​24, 33; 13:​4, 5.

8. Aha do nasehat na dilehon Jesus tu akka apostelna?

⁸ Haru ale-ale ni Jesus pe, hea do berupaya asa mandapot tugas na istimewa. Alai dang denggan alasan ni nasida mangulahon i. On ma na diulahon Apostel Jakobus dohot Johannes. Dipangido nasida do asa dilehon Jesus jabatan na sangap di Harajaonna. Alai dang las roha ni Jesus mambege pangidoan ni nasida i. Gariada, didok Jesus do tu 12 apostelna, “Manang ise na naeng sangap di tonga-tongamuna ikkon rade do ibana makkobasi na asing. Jala manang ise sian hamu na naeng parjolo, ikkon gabe hatoban ni sude jolma do ibana.” (Mrk. 10:​35-37, 43, 44) Jadi akka bawa na rade mangurupi akka donganna sian ias ni roha pasti gabe pasu-pasu di huria.—1 Tes. 2:8.

AHA DO NA MAMBAHEN HAMU ASA RADE MANGURUPI AKKA DONGAN SIAN IAS NI ROHA?

9. Aha do na boi mangurupi hamu asa adong keinginanmuna gabe parhobas?

⁹ Pasti holong do rohamuna tu Jahowa, jala lomo do rohamuna mangurupi akka dongan di huria. Alai ra, dang adong dope keinginanmuna gabe parhobas. Attong molo songon i, aha do na boi mangurupi hamu? Pikkirhon ma sadia balga las ni roha na boi dihilala hamu molo rade mangurupi akka dongan. Didok Jesus, “Umlas do roha ni halak na mangalehon sian na manjalo.” (Ul. 20:35) Jala dang holan hata on di Jesus. Diulahon ibana do i. Dihilala ibana do las ni roha na massai balga ala rade mangurupi na asing. Hamu pe boi do makkilala sisongon i.

10. Songon dia do Jesus patuduhon na las rohana mangurupi na asing? (Markus 6:​31-34)

¹⁰ Saonari, tabahas ma songon dia Jesus patuduhon na las do rohana mangurupi na asing. (Jaha Markus 6:​31-34.) Di sada tikki, loja hian do Jesus dohot akka apostelna. Sebenarna, naeng lao do nasida tu inganan na lungun asa boi istirahat. Hape nga godang halak naung parjolo sahat di inganan i, jala mangido asa diajari Jesus. Sebenarna, boi do Jesus manolak pangidoan ni nasida. Alana dang sanga dope Jesus dohot akka apostelna mangan jala istirahat. Manang boi do ra holan sada manang dua topik na diajarhon Jesus tu nasida, dung i disuru Jesus ma nasida lao. Alai dang songon i na dibahen Jesus. Ala holong rohana tu nasida, “godang ma diajarhon ibana tu nasida” bahkan sappe botari. (Mrk. 6:35) Boasa olo Jesus mangulahon i? Diulahon ibana pe songon i dang alani kewajiban. Alai ala ‘asi do rohana’ mangida nasida. Lomo do roha ni Jesus mangajari nasida ala holong rohana tu nasida. Jadi takkas ma tarida sian on, las situtu do roha ni Jesus ala mangurupi na asing.

11. Aha do muse na diulahon Jesus lao mangurupi na asing? (Ida gambar.)

¹¹ Jesus dang holan mangajarhon hasittongan tu akka halak di tikki i. Alai, dilehon ibana do tong kebutuhan ni nasida. Buktina, dibahen Jesus do mukjizat lao paradehon sipanganon tu nasida. Jala dipangido ibana do tu akka siseanna asa mambagihon sipanganon i. (Mrk. 6:41) Ala diulahon Jesus songon i, gabe boi ma diajari ibana akka siseanna taringot carana mangurupi na asing. Dipatudu Jesus do na massai penting do tugas na diulahon akka siseanna i. Jala akka tugas sisongon i do na jotjot diulahon akka parhobas saonari. Bayakkon ma las ni roha na dihilala akka apostel i ala rap bekerja sama dohot Jesus lao mambagihon sipanganon ‘sappe butong’ sude halak na ro i. (Mrk. 6:42) Godang nai dope bukti na patuduhon sai diutamahon Jesus do kebutuhan ni halak na asing. Jala torus do diulahon Jesus songon i saleleng pelayananna  di tano on. (Mat. 4:23; 8:16) Las situtu do roha ni Jesus tikki mangajari dohot tikki mangalehon kebutuhan ni akka halak. Pos ma rohamuna, hamu pe boi do makkilala las ni roha molo rade gabe parhobas di huria.

12. Molo tahilala dang adong keterampilanta, boasa unang pola metmet rohatta?

¹² Alai molo dihilala hamu dang adong keterampilanmuna, unang ma metmet rohamuna. Pasti adong do akka sifatmuna na denggan na mambahen hamu boi mangulahon akka tugas di huria. Pikkirhon ma na didok si Paulus di 1 Korint 12:​12-30. Di ayat i, dipaboa si Paulus do na arga situtu do sude naposo ni Jahowa, termasuk ma hamu disi. Jala marragam do tugas ni nasida di huria. Jadi rimangi ma hata ni si Paulus i, jala tangiakkon ma i. Alai, molo dang memenuhi syarat dope hamu gabe parhobas saonari, unang ma menyerah. Gariada ulahon ma aha na boi diulahon hamu lao melayani Jahowa dohot mangurupi akka dongan. Pos ma rohamuna, pasti diparrohahon akka sintua do hamu. Jala dilehon nasida do tugas na boi diulahon hamu andorang so gabe parhobas dope hamu.—Rom 12:​4-8.

13. Sebenarna, godangan sian persyaratan tu akka parhobas i marlakku tu ise do?

¹³ Maol do dihilala hamu memenuhi syarat gabe parhobas? Pikkirhon ma on: Sebenarna, godangan sian persyaratan tu akka parhobas nungnga diulahon sude halak Kristen. Misalna, ikkon jonok tu Jahowa, rade mangurupi na asing, jala toktong mangihutton aturan ni Jahowa. Pasti nungnga diulahon hamu persyaratan i. Alai, aha do muse persyaratan na spesifik na porlu diupayahon hamu asa boi gabe parhobas?

AHA DO NA PORLU DIUPAYAHON HAMU?

14. Aha do artina sahalak parhobas ikkon “martanggung jawab”? (1 Timoteus 3:​8-10, 12)

¹⁴ Saonari, tabahas ma piga-piga persyaratan na dipaboa di 1 Timoteus 3:​8-10, 12. (Jaha.) Sahalak parhobas ikkon “martanggung jawab”. Hata on boi do diterjemahon gabe “serius” manang “tama dipasangap”. Dang na berarti gabe so boi be hamu mekkel manang marlas ni roha. (Pjm. 3:​1, 4) Alai, ikkon serius do hamu pasaehon sude tugas na dilehon tu hamu. Molo ditanda hamu gabe halak na martanggung jawab jala denggan mangulahon tugasmuna, gabe diargai akka dongan ma hamu.

15. (a) Aha do artina “dang pargabus”? (b) Aha do artina “dang holongan di hepeng manang holan mangalului uttung tu dirina sandiri”?

¹⁵ “Dang pargabus.” Artina, ikkon jujur do  hamu jala boi dihaporseai. Ikkon ditepati hamu do janjimuna, jala dang dioto-otoi hamu halak na asing. (Poda 3:32) “Dang holongan di hepeng manang holan mangalului uttung tu dirina sandiri.” Artina, ikkon jujur do hamu tikki kerja sama bisnis dohot na asing. Jala ikkon boi do hamu dihaporseai tikki mangurus keuangan di huria. Asing ni i, dang olo hamu memanfaatton akka dongan di huria holan asa mandapot hepeng.

16. (a) Aha do artina “dang parmabuk”? (b) Aha do artina “di bagasan panggora ni roha na denggan”?

¹⁶ “Dang parmabuk.” Artina, dang pagodangku hamu manginum minuman beralkohol, jala dang ditanda hamu gabe halak na pajotjottu manginum minuman beralkohol. “Di bagasan panggora ni roha na denggan.” Artina, ikkon diihutton hamu do aturan ni Jahowa di ngolumuna. Nang pe dang sempurna hamu, alai ikkon togu do hubunganmuna tu Jahowa. Alana i do na mambahen hamu makkilala dame ni roha.

17. Aha do artina “ikkon jolo diuji”? (1 Timoteus 3:10; ida gambar.)

¹⁷ “Ikkon jolo diuji do nasida lao mamboto tama manang dang nasida gabe parhobas.” Artina, ikkon tarbukti do hamu halak na boi diandalhon jala denggan mangulahon tugasmuna. Jadi, molo dilehon akka sintua tugas tu hamu, denggan ma ihutton petunjuk ni nasida dohot petunjuk sian organisasi. Pastihon ma nga diattusi hamu aha tugasmuna i, songon dia cara mangulahon i, jala andigan hamu ikkon pasaehon tugas i. Molo denggan jala ringgas hamu mangulahon tugasmuna i, boi ma diida akka dongan di huria molo hamu halak na martanggung jawab. Hamu akka sintua, latik ma akka bawa naung tardidi di huria. (Jaha 1 Timoteus 3:10.) Pikkirhon hamu ma sukkun-sukkun on: Adong do donganta bawa naung tardidi na marumur 10 sahat tu 14 taon di huriamuna? Taratur do nasida mambahen pelajaran pribadi? Denggan do nasida mempersiappon akka bahan na dibahas di parpunguan? Taratur do nasida mangalehon komentar di parpunguan jala aktif di ulaon marbarita? Molo ido, lehon ma tugas na cocok sesuai tu umur dohot keadaan ni nasida. Molo dibahen hamu songon i, disi ma nasida ‘diuji lao mamboto tama manang dang nasida gabe parhobas’. Ujungna, molo nasida nungnga marumur hira-hira 17 sahat tu 19 taon, boi do ra nasida memenuhi syarat gabe parhobas di huria.

18. Aha do artina “dang adong siissakan”?

 ¹⁸ “Dang adong siissakan di nasida.” Artina, dang adong halak na boi menuduh hamu mangulahon dosa na balga. Memang, olo do sipata hita gabe korban tuduhan. Jesus pe hea do dituduh mangulahon na sala. Jala nungnga dipaboa ibana hian, akka siseanna pe olo do sipata gabe korban tuduhan. (Joh. 15:20) Alai songon Jesus, molo dijaga hamu pangalahomuna toktong ias, boi ma denggan reputasimuna di huria.—Mat. 11:19.

19. Aha do artina “ikkon sada do istri ni parhobas”?

¹⁹ “Ikkon sada do istri ni parhobas.” Molo nga menikah hamu, ikkon toktong do dioloi hamu pengaturan naung dibahen Jahowa sian mulana taringot perkawinan, i ma hubungan antara sada bawa dohot sada borua. (Mat. 19:​3-9) Jadi, unang ma diulahon hamu seks na so patut. (Heb. 13:4) Alai dang holan i. Ikkon setia do hamu tu istrimuna, jala dang patuduhon minat romantis tu borua na asing.—Job 31:1.

20. Aha do na ikkon diulahon sahalak bawa asa ‘denggan mamimpin keluargana’?

²⁰ “Ikkon denggan do ibana mamimpin ianakkonna dohot keluargana.” Molo sahalak kepala keluarga do hamu, ikkon denggan do hamu mangulahon tanggung jawabmuna. Taratur ma bahen hamu ibadat keluargamuna. Jotjot ma hamu rap marbarita dohot istrimuna, songon i nang dohot gellengmuna. Urupi ma gellengmuna asa marale-ale tu Jahowa. (Eps. 6:4) Molo denggan sahalak bawa mamimpin keluargana, on patuduhon na boi do ibana denggan mangurus huria.—Bandingkon tu 1 Timoteus 3:5.

21. Molo dang gabe parhobas dope hamu saonari, aha do na boi diulahon hamu?

²¹ Hamu akka bawa, molo dang gabe parhobas dope hamu saonari, tolong ma rimangi artikel on jala tangiakkon ma on. Parsiajari ma akka persyaratan lao gabe parhobas, jala marsitutu ma hamu memenuhi persyaratan i. Rimangi ma sadia balga holongmuna tu Jahowa dohot tu akka dongan di huria. Pabagas ma holongmuna tu akka dongan, jala pikkirhon ma aha do alasanmuna mangurupi nasida. (1 Ptr. 4:​8, 10) Molo olo hamu gabe parhobas jala rade mangurupi akka dongan di huria, hilalaonmuna do annon las ni roha na massai balga. Sai anggiat ma dipasu-pasu Jahowa upayamuna asa boi gabe parhobas di huria!—Plp. 2:13.