1-2. Akka situasi na songon dia do na sipata taadopi?

 HEA do dipaboa Jesus ilustrasi taringot sahalak ina na mabalu na mangido tu sahalak hakim asa dibahen na adil tu ibana. Boi do diattusi akka sisean ni Jesus songon dia perasaan ni borua di ilustrasi i. Alana godangan halak di tikki i hea do mangadopi ketidakadilan. (Luk. 18:​1-5) Hita pe boi do mangattusi perasaan ni borua i, alana pasti sude do hita hea mangadopi ketidakadilan.

² Godang do ketidakadilan, prasangka, dohot hajahaton na masa di portibi on. Jadi dang heran be hita molo sipata taadopi situasi na sarupa. (Pjm. 5:8) Alai molo dongan sahaporseaon na mambahen na so adil tu hita, olo do gabe lebih kecewa hita. Nang pe songon i, taboto do dang sempurna akka donganta i. Dang sarupa nasida songon akka musu na so lomo rohana tu hasittongan. Jadi molo adong dongan sahaporseaon na mambahen na so adil tu hita, marsiajar ma hita sian teladan ni Jesus tikki mangadopi ketidakadilan sian akka musuna. Haru tu akka musu boi hita sabar, tarlumobi ma tu akka dongan sahaporseaon. Alai molo adong dongan sahaporseaon manang halak na asing mambahen na so adil tu hita, songon dia do perasaan ni Jahowa? Parduli do Ibana tu hita?

3. Parduli do Jahowa tikki taadopi ketidakadilan, jala boasa tadok songon i?

³ Diboto Jahowa do molo adong na mambahen na so adil tu hita. Jala dang lomo rohana mangida i. Alana didok di Bibel, “Dihaholongi Jahowa do akka ulaon na tigor.” (Ps. 37:28) Dipapos Jesus do rohatta, ‘hatop do bahenon ni Jahowa hukum  na tigor’ tu akka naposona di tikki na pas. (Luk. 18:​7, 8) Jala lao salpuhonon ni Jahowa nama sude ketidakadilan na mambahen hita susa.—Ps. 72:​1, 2.

4. Songon dia do Jahowa mangurupi hita tikki taadopi ketidakadilan?

⁴ Nang pe saonari ikkon tapaima dope Jahowa bertindak, alai diurupi Ibana do hita asa toktong sabar mangadopi ketidakadilan. (2 Ptr. 3:13) Dipaboa Jahowa do ikkon songon dia seharusna sikapta tikki mangadopi ketidakadilan. Tujuanna, asa unang gabe lam parah masalah na taadopi. Misalna, dipaboa Jahowa do di Bibel songon dia reaksi ni Jesus tikki dibahen na so adil tu ibana. Jala dilehon Jahowa do akka nasehat di Bibel na boi mangurupi hita tikki taadopi ketidakadilan.

KENDALIHON MA REAKSIMUNA

5. Boasa ikkon takendalihon reaksitta tikki taadopi ketidakadilan?

⁵ Pasti marsak jala massai haccit do rohatta molo adong na mambahen na so adil tu hita. (Pjm. 7:7) Songon i do tong na dihilala akka naposo ni Jahowa na setia, songon si Job dohot si Habakuk. (Job 6:​2, 3; Hab. 1:​1-3) Jadi wajar do molo songon i perasaanta. Alai ikkon takendalihon do reaksitta tikki taadopi ketidakadilan. Alana molo dang takendalihon reaksitta, boi do gabe taulahon na sala na mambahen lam parah situasina.

6. Aha do na taparsiajari sian tindakan ni si Absalom? (Ida gambar.)

⁶ Molo adong na mambahen na so adil tu hita manang tu halak na tahaholongi, olo do ra naeng tabalos nasida. Alai molo songon i do reaksitta, boi do gabe lam parah masalahna. Tabahas ma contoh na so denggan sian si Absalom, anak ni Raja Daud. Muruk situtu do ibana dung mamboto na diperkosa si Amnon do itona si Tamar. Mangihutton Patik ni si Musa, ikkon dipamate do si Amnon alani tindakanna i. (3 Mus. 20:17) Wajar do molo muruk si Absalom tu si Amnon. Alai dipamate si Absalom do si Amnon. Gabe sala ma ibana, alana dang marhak ibana mangulahon i.—2 Sam. 13:​20-23, 28, 29.

7. Di mulana, songon dia do reaksi ni panurat psalmen tikki mangida ketidakadilan?

⁷ Tikki taida halak na mambahen na so adil i hira na so dihukum, olo do didok rohatta dang adong gunana mangulahon na sittong. Taparrohahon ma songon dia perasaan ni panurat psalmen tikki diida ibana hira na sonang do ngolu ni akka parjahat. Didok ibana, “Songon i ma na masa tu parjahat. Sonang do torus  ngoluna.” (Ps. 73:12) Muruk situtu do ibana alani ketidakadilan na diida ibana. Jala didok rohana dang adong gunana melayani Jahowa. Didok ibana ma muse, “Sai hupikkir-pikkiri ma i asa dapot rohakku. Alai gabe marsak do au.” (Ps. 73:​14, 16) Bahkan didok ibana do, “Alai molo au, nungnga naeng lilu au. Nungnga naeng tarsulandit pathu.” (Ps. 73:2) On ma na masa tu sahalak donganta bawa na margoar si Alberto.

8. Aha do na dihilala sahalak donganta bawa ala mangadopi ketidakadilan?

⁸ Adong ma piga-piga dongan na menuduh si Alberto manakko hepeng sian sumbangan ni huria. Ujungna, dang gabe sintua be si Alberto. Jala akka dongan di huria na mamboto kasusna i pe dang olo be mangargai ibana. Didok si Alberto, “Di tikki i, muruk hian do au, jala kecewa.” Alani murukna, dang olo be ibana ro marpungu. Gabe dang aktif ibana di huria saleleng lima taon. Jadi sian pengalaman on, boi ma taboto aha na terjadi molo dang takendalihon reaksitta tikki dibahen na so adil tu hita.

TIRU MA JESUS

9. Ketidakadilan na songon dia do na diadopi Jesus? (Ida gambar.)

⁹ Dilehon Jesus do teladan na sempurna taringot carana mangadopi ketidakadilan. Godang do na mambahen na so adil tu Jesus,  termasuk ma keluargana. Didok keluargana, halak na rittik do ibana. Didok pamimpin agama, sian suru-suruan na jahat do huaso na dipakke Jesus lao mambahen mukjizat. Akka tentara ni Rom pe mangarehei, menganiaya, jala mambunu ibana. (Mrk. 3:​21, 22; 14:55; 15:​16-20, 35-37) Nang pe songon i, sabar do Jesus mangadopi sude ketidakadilan i, jala dang hea ibana mambalos nasida. Aha do na boi tatiru sian teladan ni Jesus?

10. Songon dia do reaksi ni Jesus tikki mangadopi ketidakadilan? (1 Petrus 2:​21-23)

¹⁰ Jaha 1 Petrus 2:​21-23. a Dilehon Jesus do teladan na sempurna taringot cara mengendalihon reaksi tikki mangadopi ketidakadilan. Diboto Jesus do andigan tikkina hohom, jala andigan tikkina makkatai. (Mat. 26:​62-64) Sipata molo adong na makkatahon gabus taringot tu ibana, sip do Jesus. (Mat. 11:19) Alai molo makkatai pe ibana, dang kasar ibana manang mengancam musuna. Boi do dikendalihon Jesus dirina, alana “dipasahat [ibana] do dirina tu Debata na tigor manguhumi”. Pos do roha ni Jesus, diida Jahowa do sude ketidakadilan na masa tu ibana. Jala pasti bahenonna do na adil tu Jesus di tikki na pas.

11. Songon dia do carana mengendalihon aha na naeng tadokkon? (Ida gambar.)

¹¹ Molo adong na mambahen na so adil tu hita, tatiru ma Jesus. Manat ma tapikkirhon aha na naeng tadokkon. Misalna, molo dang pola serius masalahna, dang porlu tadok manang aha tu nasida. Manang boi do hita sip asa unang gabe lam parah situasina. (Pjm. 3:7; Jak. 1:​19, 20) Alai sipata, ikkon barani do hita mambela halak na gabe korban ketidakadilan manang mambela haporseaonta. (Ul. 6:​1, 2) Nang pe songon i, tikki taalusi nasida,  berupaya ma asa tetap lambok jala sopan tu nasida.—1 Ptr. 3:15. b

12. Aha do maksudna pasahatton diritta “tu Debata na tigor manguhumi”?

¹² Molo tapasahat diritta “tu Debata na tigor manguhumi”, na maniru Jesus do hita disi. Tikki adong na mambahen na so adil tu hita, pos ma rohatta diboto Jahowa do i. Taingot ma, pasti disalpuhon Jahowa do ketidakadilan na taadopi di tikki na pas. Molo taboto on, boi ma hita tetap sabar. Molo pos rohatta tu Jahowa jala tapaima Ibana bertindak, dang sai muruk be hita manang gabe sogo rohatta tu na asing. Alai molo torus hita muruk, ujungna gabe taulahon ma na sala. Gabe dang marlas ni roha be hita, jala gabe sega ma parale-aleonta tu Jahowa.—Ps. 37:8.

13. Aha do na boi mangurupi hita asa toktong sabar mangadopi ketidakadilan?

¹³ Memang, dang boi hita sempurna maniru Jesus. Sipata, olo do ra tahatahon manang taulahon na sala, na ujungna gabe tasolsoli. (Jak. 3:2) Jala alani pambahenan ni na asing, olo do ra gabe susa hita jala torus marsak saleleng ngolutta. Molo songon i na masa tu hamu, pos ma rohamuna diboto Jahowa do i, jala diattusi Ibana do perasaanmuna. Diattusi Jesus do tong perasaanmuna, alana nga hea ibana mangadopi ketidakadilan. (Heb. 4:​15, 16) Alai asing ni mangalehon contoh taringot tu Jesus, dilehon Jahowa do akka nasehat di Bibel na boi mangurupi hita tikki mangadopi ketidakadilan. Saonari tabahas ma dua ayat di bukku Rom na boi mangurupi hita.

“PASOMBU MA DEBATA PATUDUHON RIMASNA”

14. Aha do maksudna “pasombu ma Debata patuduhon rimasna”? (Rom 12:19)

¹⁴ Jaha Rom 12:19. Dijujui Apostel Paulus do halak Kristen di abad na parjolo asa ‘dipasombu nasida Debata patuduhon rimasna’. Aha do maksudna? Molo ‘tapasombu Debata patuduhon rimasna’, on berarti na taloas do Jahowa lao mambahen keadilan di tikki na pas jala sesuai tu carana. Adong ma sahalak donganta bawa na margoar si John na mangadopi ketidakadilan. Didok ibana, “Ikkon hukendalihon do dirikku asa unang muruk, jala asa unang huulahon na sala. Memang dang sai mura mangulahon i. Alai Rom 12:19 mangurupi au asa tetap sabar jala toktong paimahon Jahowa.”

15. Aha do manfaatna molo tapaima Jahowa manalpuhon sude masalah na taadopi?

¹⁵ Aha do manfaatna molo tapaima Jahowa manalpuhon sude masalah na taadopi? Molo taulahon i, gabe dang berupaya hita pasaehon masalahta mamakke caratta sandiri. Hasilna gabe dang sai marsak be hita manang kecewa. Rade do Jahowa mangurupi hita. Hira na didokkon Jahowa ma tu hita, ‘Pos ma roham tu Au, Hubahen pe na adil tu ho, Husalpuhon pe sude masalahmon.’ Molo porsea hita tu janji ni Jahowa lao manguhumi halak na mambahen na so adil tu hita, dang sai muruk be hita. Alana taboto, pasti na adil jala na terbaik do na diulahon Jahowa. On ma na mangurupi donganta si John na dipaboa nakkin. Didok ibana, “Molo hupaima Jahowa lao manalpuhon sude masalahku, pasti dao do undenggan hasilna daripada berupaya au pasaehon i mamakke carakku sandiri.”

‘TOKTONG MA TALUHON NA JAHAT MARHITE NA DENGGAN’

16-17. Tangiang boi mangurupi hita ‘toktong manaluhon na jahat marhite na denggan’. Boasa boi tadok songon i? (Rom 12:21)

¹⁶ Jaha Rom 12:21. Dijujui Apostel Paulus do muse halak Kristen asa ‘toktong manaluhon na jahat marhite na denggan’. Tikki pasahatton Jamita di Dolok, didok Jesus do, “Toktong  ma haholongi musum jala tangiakkon ma halak na mambahen na haccit tu hamu.” (Mat. 5:44) On do na diulahon Jesus. Taingot do songon dia akka tentara ni Rom menganiaya jala manggattung Jesus di hau partinaonan. Massai kejam do pambahenan ni nasida tu Jesus, jala massai haccit do i ditaon Jesus. Dang boi takkas tabayakkon songon dia perasaan ni Jesus tikki manaon i sude.

¹⁷ Nang pe mangadopi situasi sisongon i, toktong do Jesus patuduhon holong jala setia tu Jahowa. Bahkan dang adong dipangido ibana tu Jahowa asa dihukum akka tentara ni Rom i. Gariada didok Jesus do tu Jahowa, “Ale Amang, sesa ma dosa ni nasida, ai dang diboto nasida na binahen ni nasida i.” (Luk. 23:34) Aha ma parsiajaranna? Molo tatangiakkon akka halak na mambahen na so adil tu hita, gabe lam tenang ma hita jala dang sai muruk be. Bahkan boi do ra gabe muba pandanganta tu nasida.

18. Aha do manfaat na dihilala si Alberto dohot si John ala martangiang nasida?

¹⁸ Taingot ma muse dua donganta bawa na dipaboa nakkin. Ala martangiang nasida, boi ma nasida marhasil mangadopi ketidakadilan. Didok si Alberto, “Hutangiakkon do akka dongan na mambahen na so adil tu au. Mulak-ulak do au mangido bantuan ni Jahowa asa unang torus muruk.” Ujungna, gabe aktif ma muse si Alberto melayani Jahowa. Si John mandok, “Jotjot do au martangiang tu Jahowa asa diurupi Ibana dongan na mambahen na so adil tu au. Jala asa diurupi Ibana au mengampuni ibana. Diurupi Jahowa do au asa unang torus muruk jala dang menghakimi ibana. Akka tangiang i pe mambahen dame rohakku.”

19. Saleleng mangolu di portibi on, aha do na ikkon toktong taulahon? (1 Petrus 3:​8, 9)

¹⁹ Saleleng mangolu di portibi na dirajai Sibolis dope hita, sai adong do na mambahen na so adil tu hita. Alai manang aha pe situasi na masa, toktong ma martangiang mangido bantuan ni Jahowa. Tatiru ma reaksi ni Jesus tikki adong na mambahen na so adil tu ibana. Jala ihutton ma poda na dilehon Jahowa marhite Bibel. Molo taulahon i, pos ma rohatta pasti dapotta do pasu-pasu sian Jahowa.—Jaha 1 Petrus 3:​8, 9.