1. Boasa boi hita marsiajar sian akka dongan naung matua?

 SUDE do hita porlu diurupi asa boi tabahen keputusan na denggan. Boi ma tadapot bantuan sisongon i sian akka sintua di huria, manang sian akka dongan na togu haporseaonna. Molo uttua do nasida sian hita, unang ma hita merasa nungnga ketinggalan jaman be nasehat ni nasida i. Alana lomo do roha ni Jahowa asa marsiajar hita sian akka dongan naung matua. Dibandingkon tu hita, nga ulleleng nasida mangolu. Jadi, godang do pengalaman dohot bisuk na boi dibagihon nasida tu hita.—Job 12:12.

2. Aha do na lao tabahas di artikel on?

² Dipaboa di Bibel, dipakke Jahowa do akka naposona naung matua lao patoguhon dohot mangurupi akka naposona na asing. Misalna si Musa, si Daud, dohot Apostel Johannes. Nasida mangolu di jaman na berbeda, jala situasi ni nasida pe berbeda. Tikki naeng mate nasida, dilehon nasida do nasehat na denggan tu akka naposo ni Jahowa na upposo sian nasida. Dipaboa akka bawa na setia on do na massai penting mangoloi Jahowa. Dibahen Jahowa do asa disurat hata ni nasida i di Bibel lao mangajari hita. Dang soal poso dope hita manang nungnga matua, boi do tadapot manfaat sian i. (Rom 15:4; 2 Tim. 3:16) Di artikel on, lao tabahas ma nasehat ni akka bawa na setia i, jala aha do parsiajaranna tu hita.

“MAMBAHEN HAMU LELENG MANGOLU”

3. Sian dia taboto na bekerja keras do si Musa melayani Jahowa?

³ Bekerja keras do si Musa melayani Jahowa saleleng ni ngoluna. Sahalak panurirang do ibana, hakim, pamimpin, jala penulis catatan sejarah. Pasti massai godang do pengalaman ni si Musa. Ibana do na mamimpin bangso Israel kaluar sian Mesir, jala diida si Musa do godang mukjizat na dibahen Jahowa. Dipakke Jahowa do si Musa lao manurat lima bukku na parjolo di Bibel,  Psalmen 90, jala kemungkinan Psalmen 91 dohot bukku Job.

4. Ise do na dipatogu si Musa, jala boasa?

⁴ Tikki marumur 120 taon si Musa, dijou ibana do sude halak Israel. Dipaingot ibana do nasida tu akka bantuan na dilehon Jahowa. Marpulu taon sebelumna, diida piga-piga halak Israel do akka mukjizat na dibahen Jahowa jala songon dia Jahowa menghukum halak Mesir. (2 Mus. 7:​3, 4) Diida nasida do songon dia Jahowa mambola Laut Merah. Gabe boi ma nasida menyeberangi laut i, jala mangida songon dia Jahowa pamatehon si Firaun dohot sude tentarana. (2 Mus. 14:​29-31) Tikki di padang gurun pe, dilindungi Jahowa do nasida jala diparade do sude kebutuhan ni nasida. (5 Mus. 8:​3, 4) Saonari nga jonok be nasida tu Tano na Dijanjihon i. Jadi andorang so mate si Musa, lomo do rohana patoguhon nasida. a

5. Songon na disurat di 5 Musa 30:​19, 20, aha do na didok si Musa tu bangso Israel?

⁵ Aha do na didok si Musa? (Jaha 5 Musa 30:​19, 20.) Dipapos si Musa do roha ni bangso i tu upa na lao jaloon ni nasida. Alani bantuan ni Jahowa, boi ma nasida tinggal di luat na dijanjihon Ibana. Massai uli do luat i, jala godang suan-suanan disi. Didok si Musa do tu nasida, “Godang do di luat i akka kota na balga jala na uli na so dipajongjong hamu. Godang do akka jabu disi jala gok do akka barang na arga di jabu i, na so sian hasil ni ulaonmuna. Adong do disi inganan panampungan ni aek jala dang hamu na manggali i. Adong do akka ladang anggur dohot akka hau jetun disi jala dang hamu na manuan i.”—5 Mus. 6:​10, 11.

6. Boasa diloas Jahowa akka bangso na asing manaluhon halak Israel?

⁶ Alai, dipaboa si Musa do tong sipasingot tu halak Israel. Asa boi nasida toktong mangolu disi, ikkon dioloi nasida do paretta ni Jahowa. Dijujui si Musa do nasida asa mamillit “hangoluan”, lapatanna manangihon Jahowa jala “toktong setia tu Ibana”. Alai dialo nasida do Jahowa. Akibatna, diloas Jahowa ma halak Asiria dohot halak Babel manaluhon nasida jala mamboan nasida lao sian luat i.—2 Raj. 17:​6-8, 13, 14; 2 Kron. 36:​15-17, 20.

7. Aha do na taparsiajari sian hata ni si Musa? (Ida gambar.)

⁷ Aha do parsiajaranna tu hita? Molo taoloi Jahowa, boi ma hita mangolu salelengna. Songon halak Israel na naeng masuk tu Tano na Dijanjihon, hita pe nungnga massai jonok tu tano na imbaru na dijanjihon Jahowa. Bahenon ni Jahowa ma tano on gabe Paradeiso muse. (Jes. 35:1; Luk. 23:43) Di tikki i, dang adong be Sibolis dohot suru-suruan na jahat. (Pgk. 20:​2, 3) Dang adong be agama na so sittong, na mambahen akka halak gabe dao sian Jahowa. (Pgk. 17:16) Dang adong be pamarettaon ni jolma na mambahen godang hasusaan. (Pgk. 19:​19, 20) Jala dang adong be akka parjahat disi. (Ps. 37:​10, 11) Akka halak na mangoloi patik ni Jahowa do na mangolu di Paradeiso. Marsada do nasida jala makkilala dame ni roha. Marsihaholongan do nasida jala porsea tu akka donganna. (Jes. 11:9) Pasti tarpaima do hita saut akka janji on! Alai dang holan i. Molo toktong taoloi Jahowa, boi ma hita mangolu di Paradeiso dang holan saleleng marratus taon, alai sahat tu saleleng ni lelengna.—Ps. 37:29; Joh. 3:16.

8. Aha do manfaat na dihilala sahalak misionaris ala mangarimangi janji taringot Paradeiso? (Judas 20, 21)

⁸ Molo torus tarimangi janji ni Jahowa taringot Paradeiso, boi do i mangurupi hita  toktong setia tu Jahowa, dang soal songon dia sitaonon na taadopi. (Jaha Judas 20, 21.) Asing ni i, gabe margogo ma hita lao manolak keinginan na sala. Adong ma donganta bawa naung martaon-taon gabe misionaris di Afrika. Dipaboa ibana ma molo najolo jotjot do ibana targoda lao mangulahon na sala. Alai didok ibana, “Husadari ma molo dang huoloi Jahowa, dang boi au mangolu salelengna di Paradeiso. Gabe lam bertekad ma au asa manolak keinginan na sala jala lam jotjot martangiang. Alani bantuan ni Jahowa, boi ma au marhasil manolak keinginan na sala.”

“ASA MARHASIL SUDE NA NIULAM”

9. Akka tantangan aha do na hea diadopi si Daud?

⁹ Si Daud, i ma raja na mamimpin naposo ni Jahowa, jala setia do ibana tu Jahowa. Malo do ibana marmusik dohot mambahen puisi. Asing ni i, sahalak tentara do ibana jala panurirang. Godang do tantangan na hea diadopi si Daud. Misalna saleleng martaon-taon, ikkon martabuni do ibana ala berupaya Raja Saul mambunu ibana. Bahkan dung gabe raja, ikkon lari do si Daud jala martabuni ala berupaya anakna, si Absalom, mambunu ibana jala mambuat tahtana. Nang pe borat sitaonon na diadopi si Daud jala hea do ibana mangulahon dosa na balga, alai toktong do ibana setia tu Jahowa sahat tu na mate. Didok Jahowa do si Daud i ‘halak na boi mambahen las rohana’. Jadi, pasti lomo do rohatta mamboto nasehat ni si Daud.—Ul. 13:22; 1 Raj. 15:5.

10. Boasa dilehon si Daud nasehat tu si Salomo?

¹⁰ Tabahas ma nasehat na dilehon si Daud tu anakna na lao manggattihon ibana, i ma si Salomo. Nungnga dipillit Jahowa si Salomo lao mambangun bagas joro, asa gabe inganan ni akka halak manomba Jahowa. (1 Kron. 22:5) Pasti godang do na ikkon diulahon si Salomo, jala ikkon diurupi Jahowa do ibana asa denggan mamimpin bangso Israel. Aha do na didok si Daud tu ibana? Tabahas ma.

11. Songon na disurat di 1 Raja-Raja 2:​2, 3, aha do na didok si Daud tu si Salomo, jala boasa boi tadok na tutu do hatana i? (Ida gambar.)

¹¹ Aha do na didok si Daud? (Jaha 1 Raja-Raja 2:​2, 3.) Didok si Daud do tu si Salomo, molo dioloi ibana Jahowa, boi ma ibana gabe pamimpin na burju, jala pasu-pasuon ni Jahowa ma ibana. Saleleng martaon-taon, dilehon Jahowa do godang pasu-pasu tu si Salomo, jala sai diurupi Jahowa do ibana asa marhasil di sude ulaonna. (1 Kron. 29:​23-25) Dibangun si Salomo do bagas joro na massai bagak, jala disurat ibana do piga-piga bukku di Bibel. Bahkan disuratton do piga-piga hatana di akka bukku na asing di Bibel. Gabe terkenal ma si Salomo alani bisuk dohot hamoraonna. (1 Raj. 4:34) Alai songon na didok si Daud nakkin, marhasil pe si Salomo mangulahon i sude ala dioloi ibana do Jahowa. Hape dung matua, disomba  si Salomo ma akka debata na asing. Dang lomo roha ni Jahowa mangida i. Akibatna, dang dilehon Jahowa be bisuk tu si Salomo. Gabe dang denggan be cara ni si Salomo mamaretta bangso i.—1 Raj. 11:​9, 10; 12:4.

12. Aha do na taparsiajari sian hata ni si Daud?

¹² Aha do parsiajaranna tu hita? Molo taoloi Jahowa, pasti dipasu-pasu jala diurupi Jahowa do hita. (Ps. 1:​1-3) Memang, dang marjanji Jahowa lao mangalehon hamoraon dohot hasangapon songon si Salomo. Alai molo taoloi Jahowa, pasti dilehon do bisuk tu hita asa boi tabahen keputusan na denggan. (Poda 2:​6, 7; Jak. 1:5) Akka prinsip na adong di Bibel boi manogu-nogu hita mambahen keputusan na denggan taringot karejo, sikkola, hiburan, dohot hepeng. Molo taihutton nasehat sian Bibel, toktong ma denggan hubungatta tu Jahowa, jala boi ma hita mangolu salelengna. (Poda 2:​10, 11) Tadapot ma ale-ale na burju, jala marlas ni roha ma keluargatta.

13. Aha do na diulahon si Carmen asa boi marhasil?

¹³ Adong ma donganta na margoar si Carmen, na tinggal di Mozambik. Didok rohana, ikkon kuliah do ibana asa boi sukses manang marhasil. Jadi dibuat ibana ma jurusan arsitektur. Didok ibana, “Las do rohakku na kuliah on. Alai gabe habis do tikki dohot gogokku. Alana holan na di kampus ma au mulai sian jam tonga ualu pagi sahat tu jam onom botari. Dang boi be au marpungu, jala lam leleng gabe gale ma hubunganku tu Jahowa. Husadari ma, na berupaya do hape au manomba dua tuan.” (Mat. 6:24) Jadi martangiang ma si Carmen, jala dibahen ma riset sian publikasitta. Didok ibana, “Dung hujalo nasehat sian akka sintua dohot sian omakku, hubahen ma keputusan asa unang kuliah be, jala hupillit ma lao melayani Jahowa sepenuh waktu. Huhilala pilihan na terbaik do on, jala dang hea husolsoli keputusankon.”

14. Aha do inti ni nasehat na dilehon si Musa dohot si Daud?

¹⁴ Massai holong do roha ni si Musa dohot si Daud tu Jahowa. Diboto nasida, massai penting do mangoloi Jahowa. Jadi dijujui nasida do halak na asing asa maniru nasida, jala toktong setia tu Jahowa. Asing ni i, dilehon nasida do sipasingot. Molo dang setia sasahalak tu Jahowa, dang boi be ibana gabe ale-ale ni Jahowa jala dang mandapot pasu-pasu be sian Ibana. Marguna dope nasehat ni nasida i tu hita saonari.  Marratus taon dukkon i, adong do muse sahalak naposo ni Jahowa na patorakkon massai penting do toktong setia tu Jahowa.

“DANG ADONG BE LAS NI ROHAKKU NA UMBALGA”

15. Paboa ma songon dia pengalaman ni Apostel Johannes.

¹⁵ Ale-ale dohot apostel ni Jesus Kristus do si Johannes. (Mat. 10:2; Joh. 19:26) Dilehon si Johannes do godang tikkina rap marbarita dohot Jesus, jala diida ibana do akka mukjizat na dibahen Jesus. Toktong do setia si Johannes tu Jesus, nang pe dang mura situasina. Diida ibana do tikki Jesus dipamate. Jala dung hehe Jesus, pajuppang do si Johannes dohot Jesus. Diida si Johannes do songon dia huria Kristen di abad na parjolo lam martamba. Jala diida ibana do songon dia barita na uli i “dibaritahon tu sude toppaan na di tano on”.—Kol. 1:23.

16. Ise do na mandapot manfaat sian akka surat ni si Johannes?

¹⁶ Dung matua si Johannes, dapotna do tugas na istimewa lao manurat bukku Pangungkapon. (Pgk. 1:1) Si Johannes do tong na manurat sada sian bukku Injil dohot tolu surat na asing di Bibel. Suratna na patoluhon i ditujuhon tu dongan sahaporseaonna na margoar si Gayus, naung dianggap ibana songon anak na massai dihaholongi. (3 Joh. 1) Pasti godang do akka dongan na dianggap si Johannes songon anakna. Akka na disurat si Johannes i pasti patoguhon sude sisean ni Jesus sahat tu saonari.

17. Songon na disurat di 3 Johannes 4, aha do na mambahen si Johannes marlas ni roha?

¹⁷ Aha do na disurat si Johannes? (Jaha 3 Johannes 4.) Didok si Johannes, massai las do rohana mangida akka dongan sahaporseaonna toktong mangoloi Jahowa. Di tikki i, adong do piga-piga halak na mangajarhon gabus, jala on mambahen huria gabe dang marsada. Alai adong do muse na toktong “mangihutton dalan hasittongan i”. Dioloi nasida do Jahowa, jala ‘torus do diihutton nasida akka parettana’. (2 Joh. 4, 6) Pasti dang holan si Johannes na marlas ni roha mangida akka dongan na setia on. Jahowa pe marlas ni roha do mangida nasida.—Poda 27:11.

18. Aha do na taparsiajari sian hata ni si Johannes?

¹⁸ Aha do parsiajaranna tu hita? Molo toktong hita setia tu Jahowa, pasti las ma rohatta jala na asing pe marlas ni roha. (1 Joh. 5:3) Misalna, las do rohatta ala taboto nungnga tabahen las roha ni Jahowa. Las do roha ni Jahowa tikki marhasil hita mangalo godaan sian portibi on, jala toktong mangoloi parettana. (Poda 23:15) Akka suru-suruan di surgo pe dohot do marlas  ni roha. (Luk. 15:10) Hita pe marlas ni roha do molo taida akka dongan sahaporseaotta toktong setia, tarlumobi tikki dianiaya nasida manang digoda lao mangulahon na sala. (2 Tes. 1:4) Jala tikki dihancurhon portibi na dirajai Sibolis on, las ma rohatta ala taboto nungnga terbukti hita setia tu Jahowa.

19. Aha do na didok si Rachel taringot tugas lao mangajarhon hasittongan tu na asing? (Ida gambar.)

¹⁹ Na uppetting, las hian do rohatta tikki taurupi halak na asing marsiajar taringot Jahowa. On ma na dihilala si Rachel, sian Republik Dominika. Didok ibana, sada hasangapon do di ibana boi mangajari na asing taringot Jahowa. Adong do piga-piga halak naung diurupi ibana gabe Saksi Jahowa. Didok ibana, “Dang tardokkon be songon dia las ni rohakku tikki huida nasida makkaholongi Jahowa, mangandalhon Ibana, jala mambahen perubahan di ngoluna asa las roha ni Jahowa. Umbalga do las ni roha na huhilala dibandingkon tu sude pengorbanan na hubahen lao mangurupi nasida.”

MANFAATNA MOLO TAOLOI NASEHAT SIAN AKKA BAWA NA SETIA I

20. Aha do persamaanta dohot si Musa, si Daud, dohot si Johannes?

²⁰ Songon naung tabahas, mangolu di tikki naung salpu do si Musa, si Daud, dohot si Johannes. Massai berbeda do situasi ni nasida tu situasitta saonari. Alai godang do persamaanta dohot nasida. Misalna rap manomba Debata na sittong do hita, martangiang do hita tu Jahowa, taandalhon Ibana, jala tapangido bantuan dohot nasehat sian Ibana. Songon akka bawa na setia i, pos do rohatta pasti dipasu-pasu Jahowa do akka halak na mangoloi Ibana.

21. Aha do pasu-pasu na tadapot molo taoloi nasehat na dilehon si Musa, si Daud, dohot si Johannes?

²¹ Jadi, sai anggiat ma taoloi paretta ni Jahowa, songon nasehat na dilehon si Musa, si Daud, dohot si Johannes. Molo taoloi Jahowa, boi ma hita marhasil di sude na taulahon. Jala boi ma hita “leleng mangolu”, lapatanna mangolu saleleng ni lelengna! (5 Mus. 30:20) Asing ni i, boi ma tahilala las ni roha ala tabahen las roha ni Bapakta, Jahowa. Pos ma rohatta, satokkin nai dilehon Jahowa ma godang pasu-pasu lobi sian na boi tabayakkon.—Eps. 3:20.