Paul: Las hian do rohanami. Tikki i bulan November 1985, jala naeng borhat ma hami tu Liberia, Afrika Barat. I ma tugasnami na parjolo gabe misionaris. Maradi ma pesawatnami di Senegal. Didok si Anne, “Sajom nai ma hita sahat di Liberia.” Hape toppu ma dibege hami pengumuman, “Sude penumpang na naeng tu Liberia dang boi borhat sadari on, alana terjadi kerusuhan disi.” Saleleng sappulu ari dukkon i, tinggal ma hami di jabu ni misionaris di Senegal. Dibege hami ma barita taringot situasi di Liberia. Godang do na dibunu, jala dang diloas pamaretta akka halak kaluar sian jabuna tikki borngin. Alana molo kaluar, pittor dibunu pamaretta ma nasida.

Anne: Sebenarna hami dang halak na barani mengambil resiko. Parbiar do au halakna sian na gelleng. Haru menyeberang dalan pe mabiar do au. Alai lomo do rohanami tu Liberia, nang pe berbahaya situasina.

Paul: Sarupa do hutanami di sabola barat ni Inggris. Dijujui natua-tuakku dohot omak ni si Anne do hami gabe perintis. Jadi merintis ma hami dung tamat SMA. Las hian do roha ni nasida tikki dohot hami tu dinas sepenuh waktu. Tikki marumur 19 taon au, diundang ma au karejo di Betel. Jala di taon 1982, dung menikah au dohot si Anne, gabe dohot ma ibana karejo di Betel.

Anne: Las do rohanami karejo di Betel. Alai mulai sian najolo, lomo do rohanami mangurupi daerah na makkaporluhon parbarita. Kerja sama do hami dohot akka dongan di Betel na hea gabe misionaris. Teladan dohot pengalaman ni nasida mambahen lomo rohanami gabe misionaris songon nasida. Jadi ditangiakkon hami ma i ganup borngin saleleng tolu taon. Di taon 1985, diundang ma hami tu Sikkola Gilead kelas ke-79! Las hian do rohanami. Ditugasson ma hami tu Liberia, Afrika Barat.

Paul: Ujungna adong ma pesawat na diloas borhat tu Liberia. Dapotnami ma tiket pesawat i. Dung sahat di Liberia, diida hami ma godang halak na mabiar. Jala dang diloas pamaretta nasida kaluar sian jabu tikki borngin. Mabiar situtu do akka halak di tikki i. Holan mambege soara knalpot ni mobil pe mabiar do nasida jala lari. Jadi tiap borngin, dijaha hami ma piga-piga ayat sian bukku Psalmen asa boi hami tetap tenang. Nang pe maol situasi di negara i, las  do rohanami mangulahon tugasnami. Molo si Anne, marbarita do ibana ganup ari. Molo au karejo di Betel rap dohot donganta si John Charuk. a Godang do na huparsiajari sian donganta si John. Alana nungnga leleng ibana tinggal di Liberia. Jala diboto ibana do tantangan na diadopi akka dongan disi.

Anne: Las hian do rohanami melayani di Liberia. Dipatudu akka dongan do holong jala setia do nasida tu Jahowa. Pittor akrab do hami tu nasida. Gabe keluarga na baru ma nasida di hami. Godang do dilehon nasida nasehat na patoguhon haporseaonnami. Molo taringot marbarita, luar biasa do daerahna! Dang lomo roha ni akka halak disi molo hatop hita lao sian jabu ni nasida. Las do roha ni nasida makkata-hatai taringot Bibel, bahkan tikki di dalan. Jadi mura do di hami mamukka pakkataion. Massai godang do parsiajar Bibelnami. Alani godangna, dang boi hami mangatur tikki lao mangurupi nasida sude. Jadi, tabo hian do marbarita disi!

Paul: Saleleng hira-hira opat taon, dame ma situasi di Liberia. Alai di taon 1989, masa ma perang sipil jala muba ma situasina. Di tanggal 2 Juli 1990, adong ma akka tentara pemberontak na menguasai daerah di jonok ni Betel. Saleleng tolu bulan, dang boi hami berkomunikasi dohot manang ise pe di luar ni Liberia, bahkan tu keluarganami manang tu kantor pusat. Godang do kekerasan, gaor do sude, holan otik do sipanganon, jala godang do borua na diperkosa. Masa ma i saleleng 14 taon.

Anne: Adong do piga-piga suku na masibunuan. Godang do tentara di dalan na mamboan sinjata. Ngeri do penampilan ni nasida, jala ro do nasida tu ganup jabu lao manakko. Dianggap nasida do mambunu jolma i songon na maneat manuk. Ditutup nasida do dalan asa boi mengendalihon akka halak, jala jotjot do nasida mambunu halak na naeng lewat sian i. Dung i dipapungu nasida ma akka bakke ni na mate i. Hea do on terjadi di jonok ni Betel. Adong do piga-piga donganta na dibunu, termasuk ma dua misionaris.

Molo pajuppang akka tentara i dohot halak na sian suku na dihasogohon nasida, pittor dipamate do i. Jadi martaru hosa do akka dongan na asing lao manabunihon dongan sahaporseaon na sian suku i. I do tong na diulahon akka misionaris dohot anggota Betel. Molo di Betel, adong do na mangungsi jala martabuni di koridor dohot di kantor di lante sada. Adong do muse na martabuni di kamar ni anggota Betel di lante dua. Rap sakamar do hami dohot pitu dongan na asing.

Paul: Ganup ari, sai berupaya do akka tentara i masuk tu Betel lao mangida atik adong do halak na ditabunihon hami. Jadi molo ro nasida, diatur hami  ma asa adong dua donganta bawa na manjuppangi nasida di gerbang. Jala adong ma dua donganta na mangida sian jandela. Molo dibahen dua donganta na di gerbang i tangan ni nasida di jolo, berarti aman. Alai molo dibahen nasida di pudi, berarti akka tentara i mamaksa naeng masuk tu Betel. Jala akka dongan na mangida sian jandela ikkon hatop do lari lao manabunihon akka dongan na asing.

Anne: Sada tikki, adong ma akka tentara na muruk jala marhasil masuk tu Betel. Lao ma au dohot sahalak donganta borua tu kamar mandi na di ginjang, jala hukunci ma pintuna. Disi adong lemari, jala bagian partoruna na gelleng boi gabe inganan martabuni. Martabuni ma donganta borua i disi. Alai nga diboto akka tentara i na di kamar mandi i au. Jadi naik ma nasida tu ginjang mamboan sinjata, jala dipaksa do au mambukka pintu i. Berupaya do si Paul mangabbati nasida. Didok ibana, “Lagi di kamar mandi do istrikku.” Tikki hututup inganan martabuni i, tarbege ma soara. Jala porlu do tikki Iao manusun akka barang tu rak ni lemari i muse. Ninna rohakku pasti curiga do akka tentara i tu au, jala mabiar hian do au sappe hitir-hitir. Molo diida nasida au hitir-hitir, pasti lam curiga annon nasida. Jadi, martangiang ma au di bagasan roha mangido bantuan ni Jahowa. Tikki hubukka pintu, boi ma au tetap tenang mamakkulingi nasida. Adong ma sada sian akka tentara i na mendorong au. Dibukka ma lemari i, jala disursari ma sude. Alai bingung do ibana ala dang dapotna manang aha. Dung i lao ma ibana dohot kelompokna i tu kamar na asing dohot tu loteng. Alai disi pe dang dapot ni nasida manang aha.

Paul: Saleleng marbulan-bulan, tinggal otik nama sipanganonnami. Jotjot do hami dang sarapan. Alai Ibadah Pagi di Betel gabe songon “sarapan” di hami. Alana manjaha dohot mamparsiajari Bibel do na mambahen hami boi martahan ganup ari.

Molo naeng mandapot sipanganon dohot aek, ikkon kaluar do hami sian Betel. Alai molo songon i, dang boi hami melindungi akka dongan na martabuni, jala boi do nasida dibunu. Nang pe songon i, sai dilehon Jahowa do kebutuhannami pas di tikkina. Jala luar biasa do cara ni Jahowa paradehon i. Asing ni i, diurupi Jahowa do hami asa tetap tenang.

Tikki i lam ngeri do situasi di Liberia. Alai gabe margogo do hami alani janji ni Jahowa. Godang do donganta na ikkon mulak-ulak melarikan diri. Alai toktong do togu haporseaon ni nasida, jala tenang mangadopi sude sitaonon i. Adong do sian nasida na mandok, sude sitaonon i songon “pelatihan lao mangadopi hasusaan bolon”. Akka sintua dohot donganta bawa na poso pe barani do mangulahon manang aha pe lao mangurupi akka dongan. Marsiurupan do akka donganta di inganan pengungsian. Marbarita na uli do nasida, jala dipakke do manang aha pe na dapot ni nasida di hutan lao mambahen inganan parpunguan. Ala toktong marpungu dohot marbarita, gabe margogo ma nasida ala torus mangingot janji ni Jahowa. Hea ma sada tikki, hami naeng mambagihon sipanganon, pakkean, dohot kebutuhan na asing. Massai terharu do hami alana godang do donganta na mangido tas dinas daripada pakkean. Di tikki i, godang do halak na trauma alani porang i, jala lomo do  roha ni nasida mambege barita na uli. Kagum do nasida mangida Saksi Jahowa ala toktong marsihaholongan jala marpikkiran positif. Boi ma diida nasida akka donganta i songon panondang di inganan na golap. (Mat. 5:​14-16) Ala mangida semangat ni akka dongan i, adong do piga-piga tentara na gabe Saksi Jahowa, hape sebelumna massai kejam do nasida.

Paul: Adong ma lima hali hami maninggalhon Liberia. Tolu hali holan satokkin, jala dua hali saleleng sataon. Sarupa do perasaannami songon donganta borua na gabe misionaris na mandok, “Di Sikkola Gilead, diajari do hami asa makkaholongi akka dongan di tempat tugasnami sian nasa rohanami. Jadi dung dapot tikkina ikkon ditinggalhon hami nasida di situasi sisongon i, lungun hian do rohanami. Sai hira na diribak-ribak ma ate-ate.” Dung borhat sian Liberia, tinggal ma hami di akka negara na jonok sian i. Las do rohanami ala boi tetap mangurupi akka dongan di Liberia sian tempatnami tinggal.

Anne: Di bulan Mei 1996, lao ma hami opat halak mamakke mobil ni kantor cabang tu tempat na lebih aman. Hira-hira 16 kilometer ma daona sian Betel. Diboan hami do akka dokumen na penting taringot ulaonta di Liberia. Alai toppu ma hami diserang. Adong ma akka tentara na manembakkon sinjatana tu langit. Dipaso nasida ma mobilnami, ditarik ma hami na tolu kaluar, jala pittor diboan do mobilnami, hape di mobil i dope si Paul. Tarsonggot hian do hami. Alai diida hami ma si Paul mardalan mandapotton hami jala marmudari do uluna. Mulana, dirippu hami do nungnga ditembak ibana. Alai disadari hami ma, dang mungkin ibana boi mardalan molo nungnga ditembak. Hape sebelum didorong kaluar sian mobil i, adong tentara na mamukkul ibana. Alai tuani ma, dang pola parah lukkana i.

Disi adong do sada truk militer, jala di bagasan truk i godang do halak na mabiar. Naeng borhat nama truk i, jala diputusson hami ma manoppang di truk i. Ala dang adong be tempat duduk, ikkon margantungan ma hami di luar ni truk i. Hatop hian do sopir na mamboan truk i, jala naeng madabu ma hami. Gogo do soaranami mandokkon asa so sopir i satokkin. Alai ala mabiar ibana, dang ditangihon ibana be hami. Tuani ma boi sahat hami di tujuan. Nang pe songon i, loja hian do hami sappe hitir-hitir.

Paul: Marsitatapan ma hami. Nga kotor be bajunami jala nga maribak-ribak. Dang disangka hami boi dope hami mangolu. Diida hami ma adong helikopter di jonoknami naung ditembaki sinjata. Helikopter i do na naeng mamboan hami tu Sierra Leone marsogotna i. Jadi bornginna i, modom ma hami di ladang na jonok tu helikopter i. Dung sahat di Sierra Leone, las do rohanami ala boi dope hami mangolu. Alai marsak do tong hami mamikkirhon akka dongan di Liberia.

Anne: Sahat ma hami di Betel di Freetown, Sierra Leone. Aman do disi, jala denggan do akka dongan mangurus kebutuhannami. Alai ro ma masalah na asing. Sai torus ma ro tu pikkiranku sude peristiwa na ngeri na masa di Liberia. Tikki arian, sai mabiar do au jala dang tenang. Dang boi au takkas marnida. Tikki borngin, jotjot do au tarsunggul jala hitir-hitir. Mabiar do au masa muse peristiwa na ngeri i tu hami. Alani biarna, sappe maol do au marhosa. Di tikki sisongon i, sai dihaol si Paul do au, jala rap martangiang hami. Diendehon hami ma ende Harajaon sappe lebih tenang au. Huhilala nga naeng rittik be au jala dang boi be gabe misionaris.

Alai dang boi hulupahon aha na masa dukkon i. Di minggu i, dapotnami ma dua majalah na baru. Na parjolo, Sedarlah! 8 Juni 1996. Disi adong artikel na marjudul “Menghadapi Serangan Panik”. Dung manjaha artikel i, gabe huattusi ma boasa sai mabiar au. Na paduahon, Menara Pengawal 15 Mei 1996. Di majalah i, adong artikel na marjudul “Dari Manakah Mereka Mendapatkan Kekuatan?” Disarupahon do hita songon kupu-kupu na boi toktong habang nang pe hampir sude sayapna sega. Dipaboa do disi, nang pe loja jala marsak tahilala alani akka sitaononta, dilehon Jahowa do gogo asa boi taurupi na asing. Huhilala marhite artikel on, dilehon Jahowa do gogo tu au di tikki na pas. (Mat. 24:45) Hulului ma muse artikel na sarupa, jala hupapungu ma i di sada bukku. Godang do manfaat na hudapot sian i. Lam leleng, dang sai marsak be au.

Paul: Molo mulak hami muse tu Liberia, sai las do rohanami. Sahat tu ujung ni taon 2004, nga hampir 20 taon hami melayani disi. Nga sae be porang i, jala di tikki i adong do rencana lao merenovasi kantor cabang di Liberia. Alai toppu ma dapotnami tugas na baru.

 Massai maol do on di hami, alana nga akrab hami tu akka dongan di Liberia. Nga songon keluarganami be nasida, jala dang olo hami manadikkon nasida. Alai diingot hami ma tikki naeng lao hami tu Sikkola Gilead. Ikkon ditinggalhon hami do tong keluarganami, alai dipasu-pasu Jahowa do keputusannami i. Jadi dijalo hami ma tugas na baru i. Ditugasson ma hami tu Ghana, negara na jonok tu Liberia.

Anne: Sai tangis do hami tikki naeng borhat sian Liberia. Donganta na matua na margoar si Frank mandok, “Unang be ingot-ingot hami da.” Tarsonggot do hami mambege i. Alai dipaboa ibana do alasanna. Didok ibana, “Diboto hami do, dang mungkin lupahononmuna hami. Alai ikkon dilehon hamu do rohamuna tu tugasmuna na baru. Sian Jahowa do tugas i. Jadi urupi hamu ma akka dongan disi.” Hata ni donganta i patoguhon hami asa dibukka hami rohanami tu akka dongan na baru ditanda, dohot tempat tugas na baru.

Paul: Pittor akrab do hami tu akka dongan di Ghana, na songon keluarga. Massai godang do Saksi Jahowa disi. Marsiajar do hami sian nasida, ala togu do haporseaon ni nasida jala setia tu Jahowa. Dung melayani di Ghana hira-hira 13 taon, dapotnami ma muse tugas na baru. Dipangido ma hami melayani di kantor cabang Afrika Timur, di Kenya. Memang, masihol do hami tu akka dongan di Ghana dohot di Liberia. Alai pittor dapotnami do akka dongan na baru di Kenya. Dison pe godang do kebutuhan tu ulaon marbarita.

Anne: Saleleng ni ngolukkon, godang do hasusaan na huadopi. Jala sipata mabiar hian do au. Marsahit do hami, mabiar, jala marsak tikki tinggal di daerah na berbahaya manang tikki borat situasinami. Diboto hami do dang mungkin sai dilindungi Jahowa hami. Bahkan saonari pe molo hubege soara ni tembakan, pittor haccit do butuhakku jala mati rasa tanganku. Alai marsiajar do au asa torus mangandalhon Jahowa jala manjalo bantuanna, termasuk ma i marhite akka dongan. Jala husadari ma massai penting do toktong marsiajar Bibel, martangiang, marpungu, dohot marbarita. Alana i do cara ni Jahowa mangurupi hami asa toktong martahan mangulahon tugasnami.

Paul: Sipata disukkun do hami, “Aha do na mambahen tabo penugasanmuna?” Memang tabo do molo ditugasson tu sada negara na bagak pemandanganna. Alai sasittongna boi do toppu muba situasi di negara i jala berbahaya. Jadi dang inganan i na mambahen tabo penugasannami, alai akka dongan na disi do, na songon keluarga. Nang pe berbeda latar belakangnami, adong do persamaannami, i ma rap manomba Jahowa jala mambahen las rohana. Tikki ditugasson tu sada inganan, mulana dirippu hami, ikkon hami do na patoguhon nasida. Hape nasida do na patoguhon rohanami.

Tikki naeng pinda hami tu inganan na asing, sai diida hami do mukjizat na dibahen Jahowa di jamanta saonari, i ma holong na dipatudu akka dongan. Jala disadari hami ma saleleng gabe Saksi Jahowa hita, sai adong do keluargatta, jala sai adong do inganatta lao mulak. Jadi pos rohanami, molo toktong diandalhon hami Jahowa, pasti dilehon Jahowa do gogo tu hami mangadopi situasi manang aha pe.—Plp. 4:13.