Dung lam godang halak na mambege barita na uli na dipasahat akka donganta i, diboto nasida ma porlu do ditambai jumlah ni publikasi na lao dipakke marbarita. Di tikki i, di Betel Brooklyn do dicetak akka majalah. Alai molo naeng mancetak bukku, ikkon lao do nasida tu percetakan. Marbulan-bulan dukkon i, dang sanggup be percetakan i mancetak akka bukku na lao tapakke marbarita. Jadi dijuppangi donganta si Rutherford ma donganta si Robert Martin. Ibana do na mengawasi percetakan di tikki i. Disukkun si Rutherford ma sanggup do nasida mancetak sandiri akka bukku i manang na dang.

Didok donganta si Martin do, “Ide na luar biasa do i. Gabe adong ma annon gedung dohot peralatanta na lengkap lao mancetak akka bukku.” Jadi disewa akka dongan ma sada gedung di 18 Concord Street, Brooklyn, jala dituhor ma akka peralatan na dihaporluhon.

Alai dang sude halak lomo rohana tu rencana ni akka donganta lao mancetak akka bukku i. Pimpinan perusahaan na sebelumna mancetak akka bukkutta ro ma mangunjungi gedung percetakan na baru i. Didok ibana ma, “Mantap hian do akka peralatanmuna on. Alai dang adong nanggo sahalak pe sian hamu na marpengalaman lao mamakke i. Jadi holan di bagasan onom bulan pe, nga sega annon akka peralatan i.”

Didok donganta si Martin do, “Masuk akkal do memang na didokna i. Alai pos do rohanami tu Jahowa, pasti urupanna do hami.” Tutu do na didok donganta si Martin. Dang leleng dukkon i, nga boi be percetakan na baru i mancetak 2.000 bukku di bagasan sadari.

Asing ni mambahen percetakan na baru, dipakke organisasi ma cara na asing lao marbarita na uli, i ma marbarita lewat radio. Parjolo sahali donganta si Rutherford marbarita lewat radio, i ma di ari Sabtu botari tanggal 26 Februari 1922. Di tikki i, dipasahat ibana ma jamita na marjudul, “Marjuta Halak na Mangolu Saonari Dang Makkilala  Hamatean”. Disiarhon ma i melalui stasiun radio KOG di Los Angeles, Kalifornia, AS.

Adong ma hira-hira 25.000 halak na mambege jamita i. Piga-piga sian nasida mangirim surat lao mandok mauliate tu donganta si Rutherford. Contohna si Willard Ashford, na tinggal di Santa Ana, Kalifornia. Dipuji ibana do donganta si Rutherford ala “menarik” carana pasahatton jamita i. Didok ibana muse, “Adong tolu halak na marsahit di jabunami, jala dang boi ditinggalhon hami nasida. Alai mauliate ma ala boi dibege hami jamitamuna i sian radio.”

Dukkon i, lam godang ma jamita na disiarhon lewat radio. Menurut laporan sian The Watch Tower, sahat tu ujung ni taon 1922 nungnga adong “hira-hira 300.000 halak naung mambege barita na uli sian radio”.

Ala denggan do tanggapan ni akka halak, dibangun Parsiajar Bibel ma stasiun radio di Staten Island na jonok tu Betel Brooklyn. Di taon berikutna, dibangun akka Parsiajar Bibel ma stasiun radio ni nasida. Digoari ma i WBBR jala dipakke ma i lao pasahatton barita na uli tu godang halak di godang inganan.

The Watch Tower terbitan 15 Juni 1922 paboahon, lao dibahen ma sada parpunguan na balga di Cedar Point, Ohio mulai tanggal 5 sahat tu 13 September 1922. Las hian do roha ni akka Parsiajar Bibel tikki sahat nasida di kota i.

Lao menyambut akka undangan na ro, didok donganta si Rutherford ma, “Pos hian do rohakku . . . pasu-pasuon ni Jahowa do parpunguan on. Jala dung sae parpunguan on, lam godang ma halak na mambege barita na uli.” Saleleng parpunguan i, mulak-ulak do akka parjamita manjujui akka donganta asa torus semangat marbarita na uli.

Dung i, di ari Jumat tanggal 8 September, adong ma hira-hira 8.000 halak na marpungu di ruangan utama. Tarpaima do nasida naeng mambege jamita ni donganta si Rutherford. Sukkun-sukkun do roha ni nasida, aha do maksud ni hata “ADV” na dibahen di undangan ni parpunguan i. Tikki hundul nasida, godang do na mangida gulungan spanduk na balga di atas ni panggung. Adong ma donganta na margoar  si Arthur Claus na ro sian Tulsa, Oklahoma, AS. Dapotna do tempat duduk na strategis, gabe boi takkas dibege ibana soara ni parjamita. Beruntung do ibana, alana dang adong dope mikrofon manang pengeras suara di tikki i.

Asa unang adong na mangganggu acara i, didok ketua ma dang diloas akka na tarlambat masuk tu ruangan utama tikki marjamita si Rutherford. Jam 9.30 pagi, dikutip donganta si Rutherford ma hata ni Jesus di Mateus 4:17 na mandok, “Nungnga jonok Harajaon banua ginjang i.” Tikki dibahas si Rutherford songon dia akka halak boi mambege barita na uli taringot Harajaon, didok ibana ma muse, “Nungnga didok Jesus hian ibana sandiri do na manguluhon ulaon marbarita. Papunguonna ma akka halak na setia jala na tulus marroha asa gabe siseanna.”

Tikki i hundul di ruangan utama do donganta si Arthur Claus. Didok ibana, “Manat do ditangihon hami jamita i.” Alai toppu ma haccit butuhana, gabe ditinggalhon si Arthur ma ruangan i, nang pe dang lomo rohana. Ala diboto ibana do, molo kaluar ibana sian i dang boi be ibana masuk tu bagas mambege jamita i.

Dung piga-piga menit tabo ma dihilala si Arthur. Jadi mulak ma muse ibana tu gedung i. Dibege ibana ma suara ni na bertepuk tangan. Gabe penasaran ma ibana. Jadi berencana ma ibana nakkok tu atap ni gedung i, ala naeng dibege ibana sappe habis jamita i. Tikki i, marumur 23 taon dope si Arthur Claus. Jadi ala poso dope ibana boi dope dijakkit ibana gedung i. Bukka do langit-langit ni gedung i. Jadi didok donganta si Arthur boi do takkas dibege ibana jamita i.

Alai ternyata dang holan sahalak ni si Arthur na nakkok tusi. Nungnga adong halak na asing di atap i. Sada sian nasida, i ma si Frank Johnson. Didok si Frank ma tu si Arthur, “Adong do piso lipatmu?”

 Dialusi si Arthur ma, “Adong.”

Didok si Frank ma, “Nga martangiang hami asa adong nian sian hamu na mamboan piso. Diida ho do gulungan na balga on? Spanduk do i, na diikkatton tu akka pakku. Manat ma bege Hakim Rutherford. * Molo didok ibana, ‘baritahon, baritahon’, pittor putusson ma tali ni spanduk na opat i.”

Sai ditiop donganta si Arthur dohot dongan na asing ma piso lipat i, sambil paimahon donganta si Rutherford mandok, ‘baritahon, baritahon’. Di ujung ni jamitana, semangat ma si Rutherford mandok, “Ikkon gabe saksi na setia do hamu di Jahowa. Torus ma hamu maju sappe dihancurhon Babel na Balga saleleng ni lelengna. Paboa ma barita on di sude inganan. Ikkon botoon ni sude halak do holan Jahowa do Debata jala Jesus do Raja ni saluhut raja dohot Tuan ni saluhut tuan. Ida ma, nungnga mamaretta Raja i. Hamu ma na ditugasson lao paboahon i. Jadi, baritahon, baritahon, baritahon ma Raja dohot Harajaonna!”

Didok donganta si Arthur, pittor diponggolhon nasida ma akka tali i, gabe tarbukka ma spanduk i. Tarsurat do disi, “Advertise the King and Kingdom” (Baritahon ma Raja dohot Harajaonna). Ujungna gabe diboto akka hadirin i ma aha do lapatan ni hata “ADV”.

Parpunguan na dibahen di Cedar Point i mangurupi akka donganta asa fokus marbarita na uli. Alana i do ulaon na paling penting. Sude na dohot tu ulaon i makkilala las ni roha. Adong sahalak perintis sian Oklahoma, AS mandok, “Godang halak di daerah dinasnami karejo di pertambangan batu bara. Pogos hian do nasida.” Didok donganta i, jotjot do akka halak tangis tikki mambege barita na uli sian majalah Golden Age. Didok ibana muse, “Las hian do roha ala boi hami menghibur nasida.”

Gabe diboto akka Parsiajar Bibel i ma massai penting do hata ni Jesus na tarsurat di Lukas 10:2 na mandok, “Bidang do nian sisabion, alai otik do akka panabi.” Sahat tu ujung ni taon i, lam bertekad do nasida torus paboahon barita na uli taringot tu Harajaon ni Debata.