“MOLO adong sian hamu na so olo marporang mangalo Prancis manang Inggris, ikkon mate do hamu!” Songon i do didok tentara ni Nazi tu akka Saksi Jahowa saleleng Perang Dunia II. Nang pe torus diancam akka tentara ni Nazi nasida, alai dang olo akka donganta i kompromi. Barani do nasida. Gabe sitiruon do nasida tu hita sude. Unang ma olo hita terlibat tu akka porang na adong di portibi on. Nang pe ikkon mate hita, tetap do hita netral di urusan politik.

1. HOLAN SADA DO BANGSO NI JAHOWA

Najolo, holan halak Israel do na dipillit Jahowa gabe bangsona. Didok Jahowa do halak Israel, ‘appunana na massai arga’. (2 Mus. 19:5) Ditottuhon Jahowa do muse sada wilayah gabe tano parbagianan ni nasida. Jadi tikki disuru Jahowa halak Israel marporang mangalo bangso na asing, dang mungkin adong sisomba Jahowa na dipamate nasida. *

Saonari, akka sisomba Jahowa ro sian “sude bangso, suku, marga dohot bahasa”. (Pgk. 7:9) Alani i molo dohot nasida marporang, gabe dipamate nasida ma akka sisomba Jahowa na asing.

2. JAHOWA DO NA MAMARETTAHON HALAK ISRAEL MARPORANG

Najolo, Jahowa do na manottuhon andigan jala boasa ikkon lao halak Israel marporang. Contohna disuru Jahowa do halak Israel marporang mangalo halak Kanaan. Kejam do halak Kanaan on. Disomba nasida do akka debata na so  sittong, diulahon nasida do seks na so patut, jala dipelehon do gellengna tu debata na so sittong. Alani i ma disuru Jahowa halak Israel pamatehon halak Kanaan, asa unang adong be nasida di Tano na Dijanjihon jala asa unang ditiru halak Israel pangalaho ni nasida na jahat. (3 Mus. 18:24, 25) Jala dung tinggal halak Israel di Tano na Dijanjihon, disuru Jahowa dope nasida marporang mangalo akka musuna. (2 Sam. 5:17-25) Alai dang hea dipaloas Jahowa halak Israel manottuhon sandiri andigan nasida marporang. Molo dibahen nasida keputusan sisongon i, pasti dang denggan hasilna.​—4 Mus. 14:41-45; 2 Kron. 35:20-24.

Saonari, dang disuru Jahowa be jolma marporang. Akka bangso biasana marporang holan alani kepentingan ni nasida do, jala dang sesuai i tu lomo ni roha ni Debata. Marporang do nasida lao menguasai wilayah na asing, asa lam godang hepengna, manang alani kepentingan politik. Alai boha do molo adong na mandok nasida marporang di bagasan goar ni Debata manang lao mambunu musu ni Debata? Dipaboa di Bibel, lao paluaon ni Jahowa do akka naposona jala pamateonna akka musuna di ari na naeng ro, i ma di porang Armagedon. (Pgk. 16:14, 16) Di tikki i akka suru-suruan na di surgo do na dipakke Jahowa lao marporang, dang akka naposona di tano on.​—Pgk. 19:11-15.

3. HALAK ISRAEL DANG OLO PAMATEHON HALAK NA MARHAPORSEAON TU JAHOWA

Najolo, jotjot do tentara ni Israel marasi ni roha tu halak na patuduhon haporseaon tu Debata. Nasida holan pamatehon akka halak naung ditottuhon Jahowa lao dipamate. Taida ma dua contohna. Tikki disuru Jahowa halak Israel marporang mangalo kota Jeriko, diselamatton halak Israel do si Rahab dohot keluargana, ala dipatudu nasida haporseaon tu Jahowa. (Jos. 2:9-16; 6:16, 17) Dung i diselamatton halak Israel do sude pangisi ni kota Gibeon, ala mabiar nasida tu Debata.​—Jos. 9:3-9, 17-19.

Saonari, tikki marporang akka bangso dang berupaya nasida menyelamatton naposo ni  Jahowa. Bahkan tega do nasida pamatehon akka halak na so anggota militer.

4. DIIHUTTON HALAK ISRAEL DO PETUNJUK NI JAHOWA TIKKI MARPORANG

Najolo, dilehon Jahowa do petunjuk tu akka tentara ni Israel tikki marporang. Contohna, dipangido Jahowa do nasida asa jolo manogihon halak di kota na lao diporangi asa mardame. (5 Mus. 20:10) Dipangido Jahowa do muse akka tentara ni Israel asa manjaga dirina dohot perkemahan ni nasida toktong ias. Jala ikkon dijaga nasida do pangalahona sesuai tu standar ni Jahowa. (5 Mus. 23: 9-14) Berbeda do i tu akka bangso di sakaliling ni halak Israel najolo. Akka tentara ni bangso na asing, jotjot do memerkosa borua na ditawan nasida. Alai diorai Jahowa do halak Israel mangulahon i. Gariada, ikkon dipaima do sappe sabulan dung ditaluhon sada kota molo naeng menikah nasida tu borua na ditawan di kota i.​—5 Mus. 21:10-13.

Saonari, godang do negara na menandatangani parjanjian taringot porang. Nang pe tujuanna lao melindungi akka rakyat na so anggota militer, alai jotjot do dilanggar nasida parjanjian i.

5. MARPORANG DO JAHOWA LAO MAMBELA BANGSONA

Najolo, marporang do Jahowa mambela halak Israel. Jala jotjot do dibahen Ibana mukjizat asa monang nasida. Diingot hamu dope songon dia Jahowa mangurupi halak Israel manaluhon kota Jeriko? Disuru Jahowa do tentara ni halak Israel ‘marsurak lao mandok porang’. Dung i ruppak ma tembok ni kota i. Gabe ummura ma halak Israel manaluhon kota i. (Jos. 6:20) Diingot hamu dope songon dia halak Israel manaluhon halak Amori? “Dibahen Jahowa ma turun udan batu es na balga sahat tu Azeka. Gabe marmatean ma nasida. Ungodang do na mate alani udan i sian na mate dibunu tentara ni Israel.”​—Jos. 10:6-11.

SIBAHEN DAME DO HALAK KRISTEN

Nungnga taboto be perbedaan ni halak Israel najolo tu hita saonari. Alai dang holan i alasanna boasa dang olo hita marporang. Nungnga dipaboa Jahowa hian, dang marsiajar marporang be akka naposona na mangolu di ari parpudi. Alani i dang olo hita terlibat tu porang. (Jes. 2:2-4) Asing ni i, songon na didok Jesus “dang sian portibi on” akka siseanna. Jadi ikkon netral do nasida di urusan politik.​—Joh. 15:19.

Alai adong dope na diparettahon Jesus tu sude siseanna. Didok Jesus, ikkon tabolokkon do jut ni roha dohot dendam na biasana mambahen halak marporang. (Mat. 5:21, 22) Disuru Jesus do muse hita gabe “sibahen dame” jala makkaholongi akka musutta.​—Mat. 5:9, 44.

Songon dia do carana? Nang pe dang olo hita marporang, alai olo do ra hea jut rohatta tu dongan di huria. Boi do i mambahen huria dang marsada. Jadi sai berupaya ma hita mambolokkon akka perasaan sisongon i.​—Jak. 4:1, 11.

Unang ma olo hita terlibat tu porang na adong di portibi on. Sebalikna berupaya ma hita mardame jala makkaholongi sude halak. (Joh. 13:34, 35) Sai anggiat ma hita torus netral di sude urusan ni portibi on, sambil paimahon Jahowa pasohon porang saleleng ni lelengna.​—Ps. 46:9.