Saleleng taon 1923, dibahen organisasi ma perubahan lao mangurupi Akka Parsiajar Bibel asa lam marsada. Di Joujou Paboahon mulai ma dibahen komentar ayat naung dibahas di Parpunguan Lao Martangiang, Mamuji Jahowa, dohot Bersaksi di minggu i. Dung i, dibahen Akka Parsiajar Bibel do muse kalender na marisi daftar ni ayat na lao dibahas nasida di parpunguan ganup minggu. Dibahen do muse disi ende ganup ari na lao diendehon nasida saleleng pelajaran pribadi manang ibadat keluarga.

Di parpunguan i, boi do tong Akka Parsiajar Bibel i bersaksi. Contohna, boi do dipaboa nasida pengalamanna tikki marbarita, aha na dihamauliatehon nasida tu Jahowa, marende, dohot martangiang. Donganta si Eva Barney na tardidi taon 1923 tikki marumur 15 taon mandok, “Molo lomo rohamuna naeng bersaksi, ikkon jongjong do hamu. Jala ikkon songon on do hata pamukkamuna, ‘Mandok mauliate do au tu Tuan i di sude haburjuonna tu au.’” Adong piga-piga bawa na lomo rohana bersaksi. Didok donganta si Barney muse, “Adong do donganta si Godwin naung matua, godang do na dihamauliatehon ibana tu Tuan i. Alai molo nga diida istrina busisaon donganta na mamandu parpunguan i ala paganjangku hata ni suamina i, ditarik ibana ma jas ni suamina i asa so ibana makkatai jala hundul muse.”

Sahali sabulan, istimewa do dibahen ganup huria Parpunguan Lao Martangiang, Mamuji Jahowa, dohot Bersaksi. Di Joujou Paboahon 1 April 1923, dipaboa do taringot songon dia dibahen parpunguan i. “Satonga sian acara parpunguan i, dibahen lao paboahon komentar dohot pengalaman taringot ulaon marbarita. . . . Pos do rohanami, parpunguan on boi patoguhon roha ni akka dongan, jala mambahen nasida marsada.”

Si Charles Martin na marumur 19 taon penyiar sian Vancouver, Kanada, mandapot godang manfaat sian akka parpunguan sisongon i. Didok ibana, “Disi ma parjolo sahali au marsiajar songon dia carana mamukka pakkataion tikki marbarita sian jabu tu jabu. Misalna, adong ma disi sasahalak na manceritahon pengalamanna tikki marbarita sian jabu tu jabu. Sian pengalaman ni nasida, gabe boi ma huboto aha na lao sidokkonokku jala songon dia carana mangalusi akka halak na so setuju tu hita.”

Dibahen akka dongan do muse “Ari Lao Marbarita”. Pengaturan on mambahen akka dongan gabe  lam marsada. Joujou Paboahon 1 April 1923 mandok, “Gabe lam marsada do hita ala sarupa do na taulahon. . . . Ditottuhon ma ari Selasa 1 Mei 1923, gabe Ari Lao Marbarita na parjolo. Dukkon i, ditottuhon ma asa dibahen tiap ari Selasa di awal bulan gabe Ari Lao Marbarita. Sude parbarita di huria ikkon dohot do tu ulaon i.”

Akka Parsiajar Bibel na poso pe, dohot do tong di ulaon on. Si Hazel Burford na marumur 16 taon dope di tikki i mandok, “Di brosur Bulletin adong do dibahen sitiruon mamukka pakkataion na lao tahafal. a Ringgas do au dohot oppungku dohot tu ulaon on.” Alai adong do sahalak donganta na so lomo rohana molo dohot donganta si Burford marbarita. Didok si Burford, “Adong sahalak donganta bawa naung matua na mangorai au lao makkatai tikki marbarita. Di tikki i, adong do piga-piga donganta na so mangattusi, molo Akka Parsiajar Bibel, termasuk ma i ‘akka doli-doli dohot akka anak boru’ ikkon dohot mamuji Debata.” (Ps. 148:​12, 13, King James Version) Nang pe songon i, sai toktong do donganta si Burford marbarita. Di pudian ni ari diundang do ibana dohot tu Sikkola Gilead kelas na paduahon. Jala gabe misionaris do ibana di Panama. Ujungna gabe muba do cara pandang ni akka donganta nakkin taringot peran ni akka na poso di ulaon marbarita.

Gabe lam marsada do tong akka dongan ala dibahen kebaktian wilayah dohot kebaktian regional. Saleleng akka kebaktian i, dibahen do sada ari khusus lao marbarita. Contohna, sude na dohot tu kebaktian di Winnipeg, Kanada, diundang lao marbarita di kota i tanggal 31 Maret. Gabe lam godang do halak na dikabari ala dibahen pengaturan songon on. Jala denggan do hasilna. Tanggal 5 Agustus adong hira-hira 7.000 halak na ro tu kebaktian na asing di Winnipeg. Jala on ma jumlah ni hadirin na unggodang sian sude kebaktian na hea dibahen di Kanada.

Sada kebaktian na istimewa di taon 1923, i ma tanggal 18-26 Agustus. Tikki i dibahen di Los Angeles, Kalifornia. Piga-piga minggu sebelum kebaktian i, dibahen do di koran pengumuman na lao adong kebaktian i, jala dibagihon Akka Parsiajar  Bibel do lobi sian 500.000 selebaran. Dibahen nasida do tong akka spanduk di angkutan umum dohot di mobil pribadi lao paboahon kebaktian i.

Di ari Sabtu tanggal 25 Agustus, dipasahat donganta si Rutherford ma jamita na marjudul, “Biru-Biru dohot Hambing”. Di jamitana i takkas do dipaboa ibana “biru-biru” i manggombarhon akka halak na marpangalaho na denggan na lao mangolu salelengna di Paradeiso di tano on. Dijahahon ibana do muse resolusi na marjudul “Sipasingot”. Di resolusi i dipaboa ibana do akka na so denggan na diulahon agama na mangakku Kristen. Jala dijujui ibana do akka na serep roha mangalului Debata, asa kaluar nasida sian “Babel na Balga”. (Pgk. 18:​2, 4) Dukkon i, semangat do Akka Parsiajar Bibel di liat portibi on mambagihon marjuta risalah na marisi resolusi i.

Di ari parpudi kebaktian i, adong lobi sian 30.000 halak na manangihon jamita ni donganta si Rutherford. Judul ni jamitana i ma, “Sude Bangso Dipapungu tu Armagedon, alai Marjuta Halak na Mangolu Saonari Dang na Lao Mate”. Ala didok roha ni Akka Parsiajar Bibel pasti godang do annon na ro tu acara kebaktian i, gabe disewa nasida ma stadion na baru dibangun di Los Angeles. Asa boi takkas ditangihon akka halak na ro acara kebaktian i, dipakke nasida ma loudspeaker di stadion i. Teknologi na canggih do i di tikki i. Asing ni i godang do na manangihon acara i sian radio.

Di taon 1923, lam tamba do ulaon marbarita di Afrika, Eropa, India, dohot Amerika Selatan. Misalna di India, adong ma donganta na margoar si A. J. Joseph naung menikah jala adong onom gellengna. Dohot do ibana mangurupi ulaon mambahen publikasitta di bahasa Hindi, Malayalam, Tamil, Telugu, dohot Urdu.

Donganta si Alfred Joseph dohot si Leonard Blackman na sian Sierra Leone mangirim surat lao mangido bantuan tu kantor pusat Brooklyn, New York. Di tanggal 14 April 1923, dapot ni nasida ma alusna. Didok si Alfred, “Di tonga borngin ari Sabtu na i, adong ma na manelepon au”. Gogo do soarana mandok, “Ho do na mangirim surat tu Lembaga Alkitab lao mangido akka parbarita tu daerahmuna?” Dialusi si Alfred ma, “Ido”. Didok ibana ma muse, “Au do na disuru lao tu daerahmuna.” Soara ni si William R. Brown do i. Nungnga sahat ibana di ari i sian Kepulauan Karibia rap dohot istrina si Antonia, dohot dua boruna, i ma si Louise dohot si Lucy. Dang leleng akka donganta disi paimahon ibana dohot keluargana.

 Didok si Alfred ma muse, “Marsogotna i lao ma au dohot si Leonard mamandu parsiajar Bibel, songon na somal diulahon hami ganup minggu. Alai toppu ma ro sahalak bawa na timbo jongjong di jolo ni pintu. Donganta si Brown do i. Semangat hian do ibana tu hasittongan. Alani semangatna, lomo do rohana pasahatton jamita marsogotna i.” Dang sappe sabulan, nungnga dibagihon donganta si Brown sude sijahaon na diboan ibana. Dang leleng dukkon i, dikirim kantor ma tu ibana 5.000 bukku. Jala dikirim ma muse bukku na asing. Alai dang gabe ditanda halak ibana panggadis bukku. Saleleng ngoluna, Bibel do na sai diandalhon donganta si Brown tikki marjamita. Alani i gabe dijou ma ibana si Bible Brown.

Ala pagellengku kantor cabang na di Barmen, diputusson akka dongan na di Jerman ma asa dipapinda kantor cabang i. Alasan na asing ala dibege akka dongan do tong na lao ro tentara Prancis lao mengepung kota i. Dapot ni Akka Parsiajar Bibel ma sada gedung di Magdeburg na cocok lao gabe inganan percetakan. Jadi di tanggal 19 Juni, sae ma disusun akka dongan akka alat percetakan dohot akka perabot na asing, jala pinda ma nasida tu Betel na baru na di Magdeburg. Dung dibege kantor pusat nungnga sae perpindahan i, laos di tikki i ma dipaboa di koran, naung dikepung Prancis kota Barmen. Mandok mauliate do akka dongan tu Jahowa ala nungnga dilinggomi nasida jala diurupi.

Di Brasil, donganta si George Young na semangat marbarita na uli mampersiappon kantor cabang na baru, jala mulai ma dibagihon ibana Joujou Paboahon bahasa Portugis. Holan piga-piga bulan dukkon i nungnga ditempatton ibana lobi sian 7.000 lektur. Dung sahat ibana di Brasil dijuppangi ibana si Sarah Ferguson dohot keluargana. Massai las do roha ni si Sarah Ferguson pajuppang tu ibana. Nungnga mulai sian taon 1899 dijaha si Sarah Ferguson Joujou Paboahon. Alai dang tardidi dope ibana. Jadi piga-piga bulan dung pajuppang dohot si George Young, tardidi ma ibana dohot opat gellengna.

Di ujung ni taon i, dipaboa ma aha pengaruh ni perubahan na dibahen di parpunguan, kebaktian, dohot ulaon marbarita tu Akka Parsiajar Bibel. Joujou Paboahon 15 Desember 1923 mandok, “Takkas do tarida na massai togu do haporseaon ni akka dongan di huria. Alani i, sai anggiat ma hita toktong semangat jala marlas ni roha manomba Debata di taon na mangihut.”

Tarpaima do Akka Parsiajar Bibel tu taon 1924. Alana saleleng piga-piga bulan dibangun akka dongan na sian Betel akka fasilitas di Pulau Staten, na jonok tu kantor pusat na di Brooklyn. Akka fasilitas i sae ma dibangun di awal taon 1924. Ala nungnga dibangun akka fasilitas i, lam marsada ma akka dongan jala lam maju ma ulaon marbarita.