1-2. Boha do carana asa lam taattusi isi ni Bibel? Paboa ma sada tudosan.

 BAYAKKON ma molo naeng manuhor jabu hamu. Aha do na parjolo diida hamu andorang so dituhor hamu jabu i? Sae do holan mangida poto ni bagian jolo ni jabu i? Daong. Pasti lomo do rohamuna langsung mangida jabu i asa boi diida hamu bagian luarna, masuk tu akka ruanganna, jala mamparrohahon sude bagian ni jabu i. Takkas ma, pasti lomo do rohamuna naeng mamboto ganup bagian ni jabu i andorang so dituhor hamu.

² Dos songon i ma tikki manjaha dohot marsiajar Bibel hita. Sahalak pakar mandok “sarupa do Bibel songon bangunan na balga, timbo, jala bagas fondasina”. Jadi songon dia do asa lam takkas taboto isi ni Bibel? Molo holan tajaha sambing Bibel i, gabe holan “ajaran na parjolo sian hata ni Debata” do na taboto. (Heb. 5:12) Alai ikkon manat do hita mamparsiajari Bibel asa lam taattusi isina. Molo taulahon i, hira na “masuk” tu jabu na naeng tatuhor i do hita. Talului ma songon dia ganup bagian ni Bibel adong kaitanna. Marsitutu ma hita mangattusi aha na tahaporseai, jala boasa porsea hita tu hasittongan i.

3. Nasehat aha do na dilehon Apostel Paulus tu akka donganna, jala boasa? (Epesus 3:​14-19)

 ³ Asa boi taattusi sude isi ni Bibel, ikkon bagas do taparsiajari i. Najolo, dijujui Apostel Paulus do akka donganna asa ringgas mamparsiajari Hata ni Debata asa ‘diboto nasida bidangna, ganjangna, timbona, dohot bagasna’. Ala diulahon nasida i, gabe “togu” ma haporseaon ni nasida jala “marsihohot” tusi. (Jaha Epesus 3:​14-19.) Songon i ma nian hita. Saonari taida ma songon dia carana asa lam bagas taparsiajari isi ni Bibel jala asa lam taattusi lapatanna.

4. Aha do na boi taulahon asa jonok hubungatta tu Jahowa? Bahen ma contohna.

⁴ Halak Kristen dang puas holan mangattusi ajaran dasar ni Bibel. Lomo do rohatta mamparsiajari “bisuk ni Debata na bagas i” jala boi do taulahon i marhite pangurupion ni tondi parbadia. (1 Kor. 2:​9, 10) Coba ma riset hamu akka na boi mambahen hamu lam jonok tu Jahowa. Misalna, boi do diriset hamu songon dia Jahowa patuduhon na holong do rohana tu naposona najolo, jala songon dia i patuduhon na holong do rohana tu hamu. Boi do muse diparsiajari hamu songon dia pengaturan ni Jahowa tu halak Israel lao manomba Ibana. Jala bandingkon ma i tu na pinangido ni Jahowa sian hita saonari lao manomba Ibana. Manang boi do muse taparsiajari akka surirang taringot Jesus naung saut tikki di tano on ibana.

5. Topik ni Bibel na dia do na naeng diriset hamu?

⁵ Hea do piga-piga donganta na ringgas marsiajar Bibel disukkun, topik aha naeng bagas diriset nasida. Boi do taida piga-piga topik na dipaboa nasida di kotak “ Akka na Boi Tariset”. Riset hamu ma akka topik i mamakke Tudu-Tudu na Dipakke Saksi Jahowa Lao Marsiajar. Molo diulahon hamu i, gabe lam togu ma haporseaonmuna jala dapotmuna ma “parbinotoan taringot Debata”. (Poda 2:​4, 5) Saonari tabahas ma piga-piga hasittongan ni Bibel na porlu bagas taparsiajari.

6. (a) Boasa sai marhasil sakkap ni Jahowa? (b) Boasa boi tadok “saleleng ni lelengna” do sakkap ni Debata tu jolma dohot tu tano on? (Epesus 3:11)

⁶ Tabahas ma sada contoh hasittongan ni Bibel na porlu bagas taparsiajari, i ma taringot sakkap ni Debata. Didok Bibel, pasti saut do sakkap ni Debata. Boasa? Alana, tikki ditottuhon Jahowa aha na lao diulahon Ibana, dang olo Ibana mamaksahon holan sada cara lao pasautton sakkapna i. Dipakke Ibana do marragam cara lao pasautton lomo ni rohana. Mandok mauliate do hita tu Debata Jahowa ala dang sahali sude dipaboa Ibana ‘sakkapna’ i di Bibel. (Eps. 3:11) Sai marhasil do Jahowa pasautton sakkapna. Alana “dipakke Jahowa do manang aha pe lao pasautton sakkapna” i. (Poda 16:4) Sude naung dipasaut Jahowa lao martahan ma i saleleng ni lelengna. Saonari tabahas ma, aha do sakkap ni Jahowa i? Jala aha do na dibahen Jahowa asa saut sakkapna i?

7. Dung mangalo si Adam dohot si Hawa, aha do na dibahen Jahowa asa boi saut sakkapna i? (Mateus 25:34)

⁷ Dipaboa Debata do sakkapna tu si Adam dohot si Hawa. Didok Debata, “Marpinoppari ma hamu asa lam godang hamu. Gohi hamu ma tano on jala rajai ma i. Rajai hamu ma akka . . . binatang na di tano on.” (1 Mus. 1:28) Dung dialo si Adam dohot si Hawa Jahowa, gabe mardosa ma sude jolma. Nang pe songon i, pasti saut do sakkap ni Debata. Dibahen Jahowa do cara na asing asa boi saut sakkapna i. Pittor dibahen Debata ma sada Harajaon di surgo na lao pasautton sakkapna tu jolma dohot tu tano on. (Jaha Mateus 25:34.) Jala di tikki naung ditottuhon Debata, disuru Ibana ma Jesus Anakna na sasada i tu tano on lao mangajari akka halak taringot Harajaon i. Jala dilehon Jesus do ngoluna lao manobus hita sian dosa dohot hamatean. Dung i, dipahehe Jahowa ma Jesus tu surgo gabe Raja ni Harajaon ni Debata. Alai adong dope na boi taparsiajari taringot sakkap ni Debata.

8. (a) Aha do tema utama ni Bibel? (b) Songon na disurat di Epesus 1:​8-11, aha do sakkap ni Jahowa? (Ida gambar sampul.)

⁸ Aha do tema utama ni Bibel? Lao dipabadia Jahowa ma goarna tikki saut sakkapna tu tano on marhite Harajaonna na dipimpin Kristus. Dang muba sakkapna i. Alana nungnga marjanji Jahowa lao pasautonna sude sakkapna. (Jes. 46:​10, 11, surat na di toru; Heb. 6:​17, 18) Satokkin nai, bahenon ni Jahowa ma tano on gabe Paradeiso. Disi ma maringanan “saleleng ni lelengna” pinoppar ni si Adam dohot si Hawa naung sempurna. (Ps. 22:26) Alai dang holan i sakkap ni Jahowa. Lao marsada ma bahenon ni Jahowa sude naposona na di surgo dohot na di tano on. Sude ma nasida mangoloi Jahowa jala setia tu Ibana. (Jaha Epesus 1:​8-11.) Pasti longang do rohatta mangida na luar biasa do cara ni Jahowa pasautton sakkapna.

9. Molo tajaha Bibel, aha do na boi taboto taringot ari na naeng ro?

⁹ Parrohahon ma surirang ni Jahowa na dipaboa di Taman Eden, songon na disurat di 1 Musa 3:15. b Surirang i patuduhon akka na lao masa na mambahen saut sakkap ni Debata. Alai marribu taon dukkon i pe asa masa i. Na parjolo, gabe Messias manang Kristus ma sada sian pinoppar ni si Abraham. (1 Mus. 22:​15-18) Dung i, di taon 33 M diropukkon  Sibolis ma tumit ni Jesus. (Ul. 3:​13-15) Na parpudi, diropukkon ma ulu ni Sibolis. Lobi sian 1.000 taon nai ma i masa. (Pgk. 20:​7-10) Jala dipaboa Bibel do muse akka aha na lao masa sebelum dipaujung parmusuon ni portibi na dirajai Sibolis on dohot organisasi ni Jahowa.

10. (a) Akka peristiwa aha do na lao masa di ari na naeng ro? (b) Songon dia do carana asa rade hita tikki masa akka peristiwa i? (Ida surat na di toru.)

¹⁰ Coba ma muse tapikkirhon akka peristiwa na luar biasa na didok di Bibel. Na parjolo, didok akka bangso ma “dame do sude jala dang adong be sihabiaran!” (1 Tes. 5:​2, 3) Alai “toppu” ma masa hasusaan bolon. Masa ma i dung diserang akka bangso sude agama palsu. (Pgk. 17:16) Dukkon i masa ma sada tanda halongangan. ‘Ro ma Anak ni jolma i di atas ni ombun na di langit, mardongan huaso dohot hasangapon na massai balga’. (Mat. 24:30) Lao diuhumi Jesus ma akka jolma, jala dipapulik ma biru-biru sian hambing. (Mat. 25:​31-33, 46) Muruk hian do Sibolis di tikki i. Alani sogo ni rohana, dipapungu ibana ma akka bangso lao menyerang naposo ni Jahowa. Digoari ma nasida Gog sian tano Magog. (Hes. 38:​2, 10, 11) Tikki masa hasusaan bolon i, lao adong ma tikkina dipapungu tu surgo akka halak na miniahan na mangolu dope di tano on. Di ujung ni hasusaan bolon i, marsada ma nasida dohot Kristus rap dohot tentarana na di surgo lao marporang di Armagedon. c (Mat. 24:31; Pgk. 16:​14, 16) Dung i dimulai ma Pamarettaon Saribu Taon ni Kristus di tano on.—Pgk. 20:6.

11. Songon dia do ngolutta annon di Paradeiso? (Ida gambar.)

¹¹ Saonari pikkirhon ma jo dao tu ari na naeng ro. Bibel mandok dibahen Jahowa do tu rohatta “sakkap lao mangolu saleleng ni lelengna”. (Pjm. 3:11) Bayakkon ma songon dia annon ngolutta dohot hubungatta tu Jahowa dung gabe Paradeiso tano on.  Bukku Mendekatlah kepada Yehuwa halaman 319 mandok, “Dung mangolu hita marratus, marribu, marjuta, jala marmiliar taon, torus do tamba parbinotoanta taringot Jahowa, lobi sian parbinotoanta saonari. Alai nang pe songon i, godang nai dope tahilala na ikkon taparsiajari. . . . Tabo hian do annon ngolutta disi, jala pasti las hian do rohatta. Jala na uppetting, boi ma hita torus jonok tu Jahowa.” Saonari, aha dope na porlu bagas taparsiajari sian Bibel?

12. Aha do na dipaboa di Bibel taringot surgo? Paboa ma contohna.

¹² Adong do dipaboa Bibel taringot aha na masa “di inganan na timbo” di jolo ni Jahowa. (Jes. 33:5) Dipaboa Bibel do akka na luar biasa taringot Jahowa dohot organisasina na di surgo. (Jes. 6:​1-4; Dan. 7:​9, 10; Pgk. 4:​1-6) Misalna dipaboa si Hesekiel do akka na luar biasa tikki ‘bukka langit jala mandapot parnidaan ibana sian Debata’.—Hes. 1:1.

13. Songon dia do perasaanmuna tikki mangarimangi aha na diulahon Jesus sian surgo? (Heber 4:​14-16)

¹³ Tapikkirhon ma muse taringot Jesus naung gabe Raja dohot Sintua ni Malim di surgo. Takkas do diattusi ibana perasaanta. Marhite ibana, boi ma tapajonok “diritta tu tahta ni Debata na patuduhon asi ni roha na massai balga” marhite tangiang. Boi ma tapangido asi ni roha dohot bantuan ni Jahowa “di tikki na tahaporluhon”. (Jaha Heber 4:​14-16.) Alani i, porlu do ganup ari tapikkirhon aha naung dibahen Jahowa dohot Jesus, jala aha na dibahen nasida saonari tu hita sian surgo. Molo tarimangi holong ni nasida, gabe lam semangat ma hita manomba Jahowa.—2 Kor. 5:​14, 15.

14. Boha do caratta patuduhon pangargaion tu Jahowa dohot tu Jesus? (Ida gambar.)

¹⁴ Sada cara lao patuduhon pangargaion tu  Debata dohot tu Anakna, i ma berupaya mangurupi na asing asa gabe Saksi Jahowa jala gabe sisean ni Jesus. (Mat. 28:​19, 20) On ma na diulahon Apostel Paulus. Diboto ibana do na lomo roha ni Jahowa “asa malua saluhut jolma jala boi mandapot parbinotoan na bagas taringot tu hasittongan i”. (1 Tim. 2:​3, 4) Jadi dibahen ibana do sian nasa gogona mangurupi akka halak di ulaon marbarita asa boi “selamat deba sian nasida”.—1 Kor. 9:​22, 23.

15. Songon na disurat di Psalmen 1:​2, aha do na mambahen hita marlas ni roha?

¹⁵ Panurat Psalmen mandok, halak na marlas ni roha jala na marhasil, i ma halak na makkalomohon “patik ni Jahowa” jala “dirimangi ibana do patik i arian nang borngin”. (Ps. 1:​1-3) Taringot ayat on sahalak penerjemah Bibel mandok, “halak na lomo rohana tu petunjuk ni Debata, pasti dilului ibana do i, diparsiajari, jala dibahen ibana do tikkina lao mangarimangi i. Molo di bagasan sadari dang dijaha Bibel, hira na marisuang ma tikkina di sadari i”. Jadi boi do gabe lomo rohatta mamparsiajari Bibel molo tasulikkiti isi ni Bibel jala molo nga tadapot aha kaitan ni sude isi ni Bibel i!

16. Aha do na lao tabahas di artikel na mangihut?

¹⁶ Akka hasittongan na arga na adong di Bibel sasittongna boi do taattusi. Di artikel na mangihut, lao tabahas ma sada hasittongan na massai penting, i ma taringot bagas joro ni Jahowa na mulia. Dipatorang si Paulus do on di suratna tu halak Kristen na di Heber. Anggiat ma lomo rohamuna mamparsiajari on.