1-2. Aha do surirang ni si Haggai na masa saonari?

“HOLAN di bagasan piga-piga menit ruppak ma akka bangunan naung leleng dohot akka toko.” “Panik do akka halak . . . Didok halak i holan dua menit do gempa i. Alai molo di au hira na leleng hian do i.” Songon i ma na didok halak na selamat sian gempa na masa di Nepal taon 2015. Molo hea do dialami hamu sisongon i, pasti maol do i dilupahon hamu.

² Hea do didok Panurirang Haggai songon on, “Didok Jahowa Pamimpin ni Akka Tentara i ma, ‘Satokkin nai, huturokku ma langit, tano i, laut, dohot darat sahali nai.’” (Hag. 2:6) Saonari ma on masa. Dihutur Jahowa do saluhut portibi on, dang holan sada kota manang sada negara. Jala nungnga martaon-taon on masa.

3. Tikki didok Jahowa huturonna akka bangso, dos do i songon gempa bumi?

³ Tikki didok si Haggai dihutur Jahowa akka bangso, dang gempa bumi maksudna. Alana molo gempa bumi, mambahen hancur do. Alai molo on, dang songon i. Gariada didok Jahowa, “Huturokku ma akka bangso jala diboan ma akka arta ni nasida na arga tu jabu i. Ujungna gabe sangap ma jabu i.” (Hag. 2:7) Sian on taboto, adong do hasil na denggan tikki na dihutur Jahowa i akka bangso. Jadi, songon dia do surirang i masa di tikki ni si Haggai? Jala, songon dia do i masa di tikkitta saonari on? Tabahas ma i di artikel on. Tabahas ma muse aha do tugasta saonari.

4. Aha do tugas na dilehon Jahowa tu si Haggai, jala boasa disuru Jahowa ibana mangulahon i?

⁴ Taon 520 SM, dilehon Jahowa ma tugas tu si Haggai lao patoguhon halak Jahudi, asa semangat muse nasida mambangun bagas joro. * (Esr. 6:14, 15) Boasa disuru Jahowa si Haggai mangulahon i? Taparrohahon ma latar belakangna. Taon 537 SM, mulak ma halak Jahudi sian Babel tu Jerusalem. Piga-piga bulan dung sahat di Jerusalem, dibahen nasida ma fondasi ni bagas joro i. (Esr. 3:8, 10) Alai dang leleng dukkon i, adong ma situasi na maol na diadopi nasida. Gabe mabiar do nasida tu akka bangso di sekitar ni halak i. Jadi gabe dipaso nasida ma pembangunan i. (Esr. 4:4; Hag. 1:1, 2) Alani i ma disuru Jahowa si Haggai mangulahon tugas na penting i.

5. Boasa gabe pos roha ni halak Jahudi alani barita na dipasahat si Haggai i?

⁵ Surirang ni si Haggai i mambahen togu haporseaon ni halak Jahudi. Barani do si Haggai paingotton halak Jahudi. Didok ibana do tu nasida, “‘Hamu sude akka bangsokku, togu ma hamu jala ulahon hamu ma ulaon i. Ai donganakku do hamu,’ ninna Jahowa Pamimpin ni Akka Tentara i.” (Hag. 2:4) Istilah “Jahowa Pamimpin ni Akka Tentara”, pasti mambahen pos roha ni nasida massai godang do tentara ni Jahowa, i ma akka suru-suruan. Jadi massai gogo do Jahowa. Alani i, molo naeng marhasil do halak Jahudi, ikkon Jahowa do na diandalhon nasida.

6. Aha do hasilna ala dihutur Jahowa akka bangso?

⁶ Disuru Jahowa do si Haggai paboahon na lao dihutur Jahowa nama akka bangso. Surirang i, boi do patoguhon roha ni halak Jahudi asa unang mabiar nasida mambangun bagas joro i. Dipaboa si Haggai ma muse na lao huturon ni Jahowa do Persia, i ma kuasa dunia di tikki i. Aha ma hasilna? Gabe sae ma dipajongjong bagas joro i. Akka halak na so Jahudi pe, gabe boi ma dohot manomba Jahowa dung sae dipajongjong bagas joro i. Jadi, barita na uli do surirang ni si Haggai i di nasida. Gabe semangat ma nasida muse dung mambege i.—Sak. 8:9.

7. Boi do hita dohot makkutur akka bangso? Patorang ma.

⁷ Aha do maksud ni surirang ni si Haggai di jamanta saonari? Sahali nai, huturon ni Jahowa do akka bangso. Jala boi do hita dohot mendukung ulaon i. Di taon 1914 mamaretta ma Harajaon ni Debata di surgo. (Ps. 2:6) Alai dang lomo roha ni akka pamaretta na di portibi on mamboto i. Alana dung mamaretta Jesus di Harajaon ni Debata, berarti nungnga berakhir be “tikki naung ditottuhon tu akka bangso”. Dang na lao adong be pamarettaon ni jolma na mewakili Jahowa di portibi on. (Luk. 21:24) Alani i ma di taon 1919, semangat do akka donganta marbarita na uli taringot tu Harajaon ni Debata. Dipaboa nasida do, holan Harajaon ni Debata do na sanggup manalpuhon sude hasusaanta. Ulaonta marbarita na uli i ma na makkutur akka bangso.—Mat. 24:14.

8. Sesuai tu Psalmen 2:1-3, songon dia do reaksi ni akka halak mambege barita na uli taringot tu Harajaon i?

⁸ Songon dia do reaksi ni akka halak mambege barita na uli taringot tu Harajaon i? Godang do halak na menolak. (Jaha Psalmen 2:1-3.) Gabe gaor do akka bangso. Ditolak nasida do Pamimpin naung dipillit Jahowa. Dang dianggap nasida barita taringot tu Harajaon i, “barita na uli”. Buktina, adong do piga-piga pamaretta na mangorai ulaonta marbarita. Nang pe nasida mangakku manomba Debata, alai dang diakkui nasida pamarettaon ni Debata. Sarupa  do nasida songon akka pamimpin di jaman ni Jesus. Dianiaya nasida do akka sisean ni Jesus di tikki i, alai sasittongna na mangalo Jesus do nasida disi, i ma Pamimpin na Dipillit Jahowa.—Ul. 4:25-28.

9. Kesempatan aha do na dilehon Jahowa tu akka halak na menolak barita na tapasahat?

⁹ Nang pe godang halak na menolak barita na tapasahat i, alai kesempatan aha do na dilehon Jahowa tu nasida? Di Psalmen 2:10-12 didok, “Ale hamu akka raja, marbisuk ma hamu. Ale hamu akka hakim na di tano on, jalo ma pissang-pissang. Somba hamu ma Jahowa jala habiari ma Ibana, marlas ni roha ma hamu lao pasangappon Ibana. Pasangap ma anak i, asa unang muruk Debata asa unang dipalao Ibana hamu sian dalan ni halak na tigor marroha, ai hatop do marsigorgor rimasna. Marlas ni roha ma sude halak na marlinggom tu Ibana.” Jadi dilehon Jahowa do kesempatan tu akka halak. Boi dope nasida manguba keputusan ni nasida, asa dohot mendukung Harajaon ni Debata. Alai dang godang be tikkina. Alana nungnga mangolu di “ari parpudi” hita. (2 Tim. 3:1; Jes. 61:2) Saonari ma tikkina, ikkon dibahen nasida keputusan lao manomba Jahowa manang na dang.

10. Tikki dihutur Jahowa akka bangso, aha do hasilna? (Haggai 2:7-9)

¹⁰ Tikki dihutur Jahowa akka bangso, adong do hasilna na denggan. Si Haggai paboahon tu hita, gabe diboan akka bangso i ma “akka arta ni nasida na arga [akka halak na tulus marroha]” lao manomba Jahowa. * (Jaha Haggai 2:7-9.) Si Jesaya dohot si Mika pe, hea do paboahon surirang na sarupa na lao masa “di ari parpudi”.—Jes. 2:2-4; Mik. 4:1, 2.

11. Dung dibege si Ken barita na uli taringot tu Harajaon ni Debata, aha do pengaruhna tu ibana?

¹¹ Taida ma jo pengalaman ni donganta si Ken na melayani di kantor pusat saonari. Diingot ibana ma tikki parjolo sahali dibege ibana barita na uli hira-hira 40 taon naung salpu. Didok si Ken, “Parjolo sahali hubege  taringot Harajaon ni Debata, las hian do rohakku. Huparsiajari ma nungnga mangolu di ari parpudi be hita. Gabe husadari ma, ikkon Harajaon ni Debata do na hudukung, dang pamarettaon na di portibi on. Molo huulahon i, las ma roha ni Jahowa jala dapottu ma hangoluan na saleleng ni lelengna i. Jadi, i ma na pittor huulahon jala hutangiakkon do i tu Jahowa. Dang olo be au terlibat tu pamarettaon na di portibi on. Alai holan Harajaon ni Debata nama na hudukung. Alana holan Harajaon i do na martahan saleleng ni lelengna.”

12. Sian dia do taboto naung gok ‘akka arta na arga’ di bagas joro ni Debata na di tano on?

¹² Saonari, boi do takkas taida songon dia Jahowa mamasu-masu akka naposona. Torus do martamba godang ni halak na gabe sisomba Jahowa. Di taon 1914, sekitar 5.000 halak dope Saksi Jahowa, alai saonari nga lobi sian 8 juta. Jala ganup taon, marjuta do halak na ro tu Borngin Parningotan. On patuduhon, nungnga gok be ‘akka arta na arga’ di alaman ni bagas joro ni Debata na di tano on, i ma pengaturan ni Jahowa taringot ibadat na sittong. Dipasangap do muse Jahowa, ala olo do nasida maninggalhon pangalaho na leleng jala mamakke pangalaho na imbaru.—Eps. 4:22-24.

13. Ala torus do tamba godang ni Saksi Jahowa, surirang na dia do muse na digohi? (Ida gambar sampul.)

¹³ Torus do tamba godang ni Saksi Jahowa saonari. Gabe saut ma surirang di Jesaya 60:22 na mandok, “Na otik gabe saribu, jala na gelleng gabe bangso na balga. Au sandiri Jahowa na mambahen i hatop masa di tikkina.” Akka halak na tulus marroha on, olo do mamakke tikki dohot keterampilanna lao mendukung ulaon marbarita na uli. Alani i gabe saut ma muse surirang ni si Jesaya na mandok, “Paradeon ni akka bangso dohot akka raja ma sude na porlu” di naposo ni Jahowa. (Jes. 60:5, 16) Ala songon i do semangat ni naposo ni Jahowa, denggan do hasilna. Saonari nga adong be Saksi Jahowa di 240 negeri jala nga tersedia be publikasitta di lobi sian 1.000 bahasa.

14. Keputusan aha do na ikkon dibahen sude halak saonari?

¹⁴ Saonari, ikkon dibahen sude halak do keputusan, mendukung pamarettaon ni Debata do manang pamarettaon ni portibi on. Alana,  otik nai nama tikkina. (Rom 13:1-7) Nang pe ikkon unduk hita tu pamarettaon na di portibi on, alai ikkon netral do hita di masalah politik. Alana dang sian portibi on Harajaon ni Debata. (Joh. 18:36, 37) Jala takkas do taboto, holan Harajaon ni Jahowa do na boi pasaehon sude masalah na adong di portibi on.

15. Ujian aha do na lao masa tu akka naposo ni Debata satokkin nai?

¹⁵ Sian bukku Pangungkapon, taboto do na lao diuji ma akka naposo ni Jahowa di ari parpudi. Ditentang jala dianiaya ma hita. Lomo do roha ni akka pamaretta na di portibi on asa unang setia hita tu Jahowa, alai mendukung pamarettaon ni nasida. Molo dang olo hita mendukung nasida, dianiaya ma hita. (Pgk. 13:12, 15) “Dipaksa [nasida] ma sude halak, na lea dohot na sangap, na mora dohot na pogos, na merdeka dohot hatoban, asa mambahen tanda di tangan kanan ni nasida manang di dahi ni nasida.” (Pgk. 13:16) Sarupa songon hatoban najolo, dibahen tuanna do tanda tu hatobanna i lao patuduhon hatoban ni ise ibana. Songon i do tong sistem politik na di portibi on, dipangido do asa dibahen akka halak tanda simbolis lao patuduhon ise na didukung halak i. Diharappon akka pamarettaon na di portibi on do asa didukung akka halak sistem politik ni nasida i, jala dipatudu ma i sian tindakan dohot pikkiranna.

16. Boasa ikkon tapatogu hubungatta saonari tu Jahowa?

¹⁶ Olo do hita manjalo tanda simbolis i jala mendukung akka pamarettaon na di portibi on? Molo dang olo hita manjalo tanda i, gabe susa ma ngolutta. Alana di bukku Pangungkapon didok, “Dang adong halak na boi manggadis dohot manuhor situhoron, molo dang adong tanda i di ibana.” (Pgk. 13:17) Alai takkas do taboto sian bukku Pangungkapon 14:9, 10, na lao dihukum do sude halak na manjalo tanda sian akka pamarettaon na di portibi on. Jadi unang ma tajalo tanda i, alai tapatudu ma na “appuna ni Jahowa” do hita. (Jes. 44:5) Saonari ma tikkina patoguhon hubungatta tu Jahowa, asa diakkui Jahowa hita appunana.

17. Nang pe sabar Jahowa sahat tu saonari, alai aha do na porlu taingot?

¹⁷ Sabar dope Jahowa paimahon akka halak muba sahat tu saonari, ala dang lomo rohana manang ise pe mate diripasson. (2 Ptr. 3:9) Dilehon Jahowa dope kesempatan tu akka halak mambahen keputusan lao manomba Ibana. Alai adong do batas hasabaron ni Jahowa. Molo dang taargai hasabaron dohot kesempatan na dilehon Jahowa i, gabe dihukum ma hita songon si Firaun. Sabotulna dilehon Jahowa do kesempatan tu si Firaun. Didok Ibana, “Sasittongna, boi do hupakke huasokku lao pamatehon ho dohot sude rakyatmu marhite sahit na posi, asa unang adong be hamu na mangolu di tano on. Alai, hupasombu dope ho mangolu, asa hupatudu tu ho huasokku, jala asa ditanda sude halak goarhu di sude liat portibi on.” (2 Mus. 9:15, 16) Satokkin nai botoon ni sude bangso ma holan Jahowa do Debata na sittong. (Hes. 38:23) Alai songon dia Jahowa membuktihon i?

18. (a) Surirang aha do na dipaboa di Haggai 2:6, 20-22? (b) Songon dia do surirang na dipaboa si Haggai i masa di ari na naeng ro?

¹⁸ Martaon-taon dung mate si Haggai, disurat Apostel Paulus ma suratna tu halak Heber. Dipaboa si Paulus do songon dia surirang di Haggai 2:6, 20-22 masa di ari na naeng ro. (Jaha.) Didok ibana, “Alai saonari dijanjihon Ibana do, ‘Huturokku ma sahali nai tano on, alai dang holan i dohot do langit i.’ Hata ‘sahali nai’ patuduhon na lao pasidingon ni Debata do akka na tarhutur i, i ma akka na so dibahen  tanganna. Bahenonna do songon i asa boi toktong adong akka na so tarhutur i.” (Heb. 12:26, 27) Asing do na didok si Paulus di ayat on tu na didok si Haggai di Haggai 2:7. Molo na didok si Paulus, akka halak na so mendukung Harajaon ni Debata, na lao dipasiding jala dihancurhon do salelengna songon si Firaun.

19. Tikki didokkon si Paulus “akka na so tarhutur”, aha do maksudna?

¹⁹ Tikki didok si Paulus akka na so tarhutur, aha do maksudna? Didok ibana, “Ala naeng jalootta do Harajaon na so tarhutur i, toktong ma tajalo asi ni roha ni Debata na massai balga i. Ai i do na mambahen hita boi manomba Ibana marhite cara na sesuai tu lomo ni rohana mardongan biar ni roha dohot unduk ni roha.” (Heb. 12:28) Alani i tikki dihutur Jahowa sahali nai tano on, holan Harajaon ni Debata do na so tarhutur manang na martahan saleleng ni lelengna.—Ps. 110:5, 6; Dan. 2:44.

20. Keputusan aha do na ikkon dibahen akka halak, jala songon dia do caratta mangurupi nasida?

²⁰ Saonari ma tikkina ikkon dibahen akka halak keputusan lao mendukung Harajaon ni Debata manang na dang. Alana molo portibi on do na didukung halak i, dihukum Jahowa ma nasida jala dipamate. Alai molo dipillit halak i do mendukung Harajaon ni Debata, boi ma nasida mangolu saleleng ni lelengna. (Heb. 12:25) Molo marbarita na uli hita tu nasida, boi ma taurupi nasida mambahen keputusan na penting lao mamillit ise do dukungonna. Sai anggiat ma godang halak na boi taurupi asa olo mendukung Harajaon ni Debata. Jala sai anggiat ma torus taingot hata ni Jesus na mandok, “Dibaritahon ma barita na uli taringot tu Harajaon i di liat portibi on, asa saluhut bangso mambege barita i. Dung masa i ro ma ujungna.”—Mat. 24:14.