PARSIAJARAN 40
“Mangurupi Godang Halak Mamboto na Sittong”
“Manang ise na mangurupi godang halak mamboto na sittong, na lao marsinondang ma nasida saleleng ni lelengna dos songon bintang.”—DAN. 12:3.
ENDE 151 Hehe ma Akka Naung Mate
NA LAO DIULAS a
1. Peristiwa aha do tapaima-ima saleleng Pamarettaon Saribu Taon?
BAYAKKON ma songon dia las ni rohatta tikki masa haheheon di tano on saleleng Pamarettaon Saribu Taon! Pasti masihol do hita sude naeng pajuppang dohot akka halak na tahaholongi naung mate. Jala songon i do tong perasaan ni Jahowa. (Job 14:15) Bayakkon ma las ni rohatta tikki dipahehe nasida. Songon naung tabahas di artikel sebelumna akka “halak na burju” naung tarsurat goarna di bukku hangoluan, lao dipahehe ma “tu hangoluan”. (Ul. 24:15; Joh. 5:29) Godang do ra sian nasida lao dipahehe dang leleng dukkon Armagedon. b Asing ni i, dipahehe do muse “halak na jahat”, i ma akka halak na so sanga melayani Jahowa tikki mangolu nasida.
2-3. (a) Songon na dipaboa di Jesaya 11:9, 10, boasa ikkon dibahen program pendidikan di saluhut tano on? (b) Aha do na lao tabahas di artikel on?
2 Sude halak na lao dipahehe i porlu do diajari. (Jes. 26:9; 61:11) Alani i ma porlu dibahen program pendidikan di saluhut tano on. (Jaha Jesaya 11:9, 10.) Aha do na lao diajarhon tu nasida? Misalna akka halak na jahat porlu do marsiajar taringot Jesus, Harajaon ni Debata, dohot tobusan. Marsiajar ma nasida songon dia pabadiahon goar ni Debata jala mangakkui holan Jahowa do na marhak mamaretta. Akka naposo ni Jahowa naung leleng mate pe porlu do mandapot pemahaman na terbaru taringot lomo ni roha ni Debata tu tano on. Adong do bahkan sian nasida naung leleng mate sebelum adong Bibel na lengkap. Jadi dang soal halak na dipahehe i na burju manang na jahat, godang do na porlu diparsiajari nasida haduan.
3 Di artikel on, tabahas ma akka sukkun-sukkun on: Songon dia do program pendidikan i diulahon? Pasu-pasu aha do na lao jaloon ni akka halak na mangoloi program pendidikan i? Alai aha do akibatna molo dang mangoloi nasida? Penting do tapikkirhon alus ni akka sukkun-sukkun i saonari. Songon na lao tabahas, piga-piga surirang di bukku Daniel dohot Pangungkapon boi do mangurupi hita asa lam takkas mangattusi aha na masa dung dipahehe akka halak na mate. Saonari tabahas ma jo peristiwa penting naung dipaboa hian di Daniel 12:1, 2.
“NA LAO DIPAHEHE MA GODANG HALAK NA MATE”
4-5. Aha do na taboto sian Daniel 12:1?
4 Jaha Daniel 12:1. Dipaboa do di bukku Daniel akka peristiwa na masa saleleng ari parpudi. Contohna Daniel 12:1 paboahon molo si Mikhael, i ma Jesus Kristus ‘ro lao mangurupi bangso ni Debata’. Sebagian sian surirang i digenapi di taon 1914 tikki dilantik Jesus gabe Raja di Harajaon ni Debata.
5 Didok si Daniel muse, ro do Jesus tikki masa hasusaan. “Dang hea dope masa hasusaan na songon i mulai sian adong akka bangso sahat tu tikki i.” Hasusaan na di bukku Daniel i sarupa do i tu “hasusaan bolon” na dipaboa di Mateus 24:21. Di ujung ni hasusaan bolon i, i ma tikki Armagedon, ro ma Jesus mambela ‘bangso ni Debata’. Di bukku Pangungkapon, bangso ni Debata i digoari do sada punguan bolon “na malua sian hasusaan bolon”.—Pgk. 7:9, 14.
6. Aha do na masa dukkon malua punguan bolon sian hasusaan bolon i? (Ida “Sukkun-Sukkun sian na Manjaha” di majalah on taringot haheheon na di tano on.)
6 Jaha Daniel 12:2. Aha do na masa dukkon malua punguan bolon sian hasusaan bolon i? Lao adong ma haheheon. Najolo tadok do haheheon na disurat di Daniel 12:2, i ma haheheon tu surgo manang pertumbuhan rohani dukkon masa pelarangan taon 1918. c Alai saonari nungnga disesuaihon be pemahamanta on. Haheheon na nidokna di ayat i, i ma haheheon ni akka halak di tano na imbaru. Haheheon i lao masa dukkon marujung ari parpudi dohot porang Armagedon.
7. (a) Aha do maksudna adong na dipahehe lao “mangolu saleleng ni lelengna”? (b) Boasa didok dipahehe do nasida tu “hangoluan na dumenggan”?
7 Dipaboa do di Daniel 12:2, adong deba halak na dipahehe lao “mangolu saleleng ni lelengna”. Lapatanna, saleleng 1.000 taon akka halak na dipahehe ikkon torus do mananda Jahowa jala mangoloi Ibana dohot Jesus asa boi mangolu saleleng ni lelengna. (Joh. 17:3) Lao dipahehe ma nasida tu “hangoluan na dumenggan”. Dumenggan do i sian haheheon na hea masa najolo. (Heb. 11:35) Boasa? Alana akka halak na hea dipahehe najolo i ujungna mate do muse.
8. Boasa adong na dipahehe “lao dipaila saleleng ni lelengna”?
8 Adong do halak na dipahehe i na so olo diajari. ‘Lao dipaila ma nasida saleleng ni lelengna.’ Ala mangalo nasida tu Jahowa, dang disurat goar ni nasida di bukku hangoluan, jala dang dapot ni nasida hangoluan na saleleng ni lelengna. Alai dipaila ma nasida salelengna manang dipamate salelengna. Jadi Daniel 12:2 paboahon aha na lao masa tu akka halak na dipahehe berdasarkan pangalaho ni nasida dung dipahehe. d (Pgk. 20:12) Adong ma sian nasida na mandapot hangoluan salelengna, na deba nai dipamate salelengna.
“MANGURUPI GODANG HALAK MAMBOTO NA SITTONG”
9-10. (a) Sesuai tu Daniel 12:3, aha dope na lao masa dukkon hasusaan bolon? (b) Ise do ‘na lao marsinondang songon langit na tiur’?
9 Jaha Daniel 12:3. Aha dope na lao masa dung sae “hasusaan” i? Asing ni akka peristiwa na dipaboa di Daniel 12:2, dipaboa dope di ayat 3 aha na lao masa dung sae hasusaan bolon.
10 Ise do ‘na lao marsinondang songon langit na tiur’? Didok Jesus di Mateus 13:43, “Di tikki i, marsinondang ma akka halak na mangulahon lomo ni roha ni Debata di Harajaon ni Ama nasida, songon mataniari na marsinondang.” Na dipaboa Jesus di ayat on, i ma “akka anak Harajaon” na dipillit lao mamaretta rap dohot Jesus di Harajaonna na di surgo. (Mat. 13:38) Jadi boi tasimpulhon, Daniel 12:3 paboahon taringot akka halak na dimiahi dohot ulaon ni nasida saleleng Pamarettaon Saribu Taon.
Jesus dohot si 144.000 ma na mangarahon program pendidikan di tano on saleleng 1.000 taon (Ida paragraf 11)
11-12. Aha do na lao diulahon si 144.000 i saleleng 1.000 taon?
11 Songon dia do akka na dimiahi “mangurupi godang halak mamboto na sittong”? Didongani nasida ma Jesus mangarahon program pendidikan di tano on saleleng Pamarettaon Saribu Taon. Dang holan gabe raja nasida, alai dohot do gabe malim. (Pgk. 1:6; 5:10; 20:6) Nasida ma annon na “pamaluppon” akka bangso. Lapatanna, secara bertahap urupan ni nasida ma sude jolma gabe sempurna muse. (Pgk. 22:1, 2; Hes. 47:12) Pasti las hian do roha ni akka halak na dimiahi mangulahon i!
12 Ise do maksudna “godang halak” na diurupi mamboto na sittong? Akka halak na dipahehe jala na selamat sian Armagedon, dohot akka dakdanak na bisa jadi tubu di tano na imbaru. Di ujung ni 1.000 taon, nungnga sempurna be sude jolma. Alai aha do na ikkon diulahon nasida asa permanen tarsurat goar ni nasida di bukku hangoluan?
UJIAN NA PARPUDI
13-14. Aha do na ikkon diulahon sude jolma na sempurna asa boi mandapot hangoluan na saleleng ni lelengna?
13 Taingot ma nang pe nungnga sempurna sasahalak, dang otomatis ibana mangolu saleleng ni lelengna. Pikkirhon ma na masa tu si Adam dohot si Hawa. Sempurna do nasida, alai ala dang dioloi nasida Debata, gabe dang dapot ni nasida hangoluan na saleleng ni lelengna i.—Rom 5:12.
14 Boha do annon keadaan ni tano on di ujung ni 1.000 taon i? Nungnga sempurna be sude jolma di tikki i. Alai sude do nasida olo mendukung pamarettaon ni Jahowa saleleng ni lelengna? Manang, adong do annon na gabe songon si Adam dohot si Hawa na so setia tu Jahowa nang pe nungnga sempurna? Porlu do taboto alus ni akka sukkun-sukkun i.
15-16. (a) Andigan do masa ujian na parpudi i? (b) Songon dia do tanggapan ni akka halak tu ujian na parpudi i?
15 Bibel mandok, lao dipenjarahon do Sibolis saleleng 1.000 taon. Di tikki i dang boi ibana mangaliluhon jolma. Alai di ujung ni 1.000 taon i, dipalua ma ibana jala berupaya ma ibana mangaliluhon akka jolma naung sempurna i. Di tikki i, gabe takkas ma tarida ise do halak na botul-botul pasangappon goar ni Jahowa jala mendukung pamarettaonna. (Pgk. 20:7-10) Tindakan ni nasida di tikki i ma na manottuhon, boi do permanen tarsurat goar ni nasida di bukku hangoluan i manang na dang.
16 Dipaboa Bibel do tu hita, adong do akka halak na so setia, songon si Adam dohot si Hawa. Ditolak nasida do pamarettaon ni Jahowa. Aha ma na masa tu nasida? Pangungkapon 20:15 mandok, “Manang ise na so tarsurat goarna di bukku hangoluan i, disappatton ma ibana tu laut api i.” Jadi akka halak na mangalo i lao dipamate ma saleleng ni lelengna. Alai unggodang do haduan halak na marhasil mangalewati ujian na parpudi i. Ujungna tarsurat ma goar ni nasida secara permanen di bukku hangoluan i.
NA LAO MASA ‘DI UJUNG NI AKKA ARI I’
17. Aha do na dipaboa sada suru-suruan tu si Daniel taringot ari parpudi? (Daniel 12:4, 8-10)
17 Pasti las do rohatta mamikkirhon akka peristiwa na lao masa di Pamarettaon Saribu Taon. Alai adong do sada suru-suruan na paboahon tu si Daniel taringot akka na lao masa ‘di ujung ni akka ari i’, i ma di tikkitta saonari. (Jaha Daniel 12:4, 8-10; 2 Tim. 3:1-5) Didok suru-suruan i, “Massai godang ma parbinotoan na sittong.” Akka naposo ni Jahowa ma na takkas mangattusi akka surirang na disurat di bukku Daniel. Didok suru-suruan i do muse, saleleng ari parpudi “bahenon ni halak na jahat ma akka ulaon na jahat. Jala dang adong sian nasida na mangattusi i”.
18. Aha do na lao masa tu akka halak na jahat?
18 Memang saonari dang pittor dihukum akka halak na marpangalaho na jahat. (Mal. 3:14, 15) Alai satokkin nai, sirangon ni Jesus nama akka halak na marpangalaho songon hambing sian akka halak na marpangalaho songon biru-biru. (Mat. 25:31-33) Dang na lao selamat akka halak na jahat i sian hasusaan bolon jala dang na lao dipahehe nasida di tano na imbaru. Alana dang tarsurat goar ni nasida di bukku hangoluan i na dipaboa di Maleaki 3:16.
19. Aha do na ikkon taulahon saonari, jala boasa? (Maleaki 3:16-18)
19 Saonari ma tabuktihon molo hita dang halak na mangulahon na jahat. (Jaha Maleaki 3:16-18.) Nungnga dipapungu Jahowa akka halak gabe sada “bangso na massai arga” di Ibana. Pasti lomo do rohatta boi tarpillit gabe bangsona.
Pasti las hian do rohatta tikki dipahehe si Daniel, akka halak na tahaholongi, dohot godang halak na asing di tano na imbaru (Ida paragraf 20)
20. Aha do janji ni Jahowa tu si Daniel, jala aha do na ikkon diulahon hamu asa boi diida hamu saut janji i?
20 Godang do akka peristiwa na luar biasa di tikkitta saonari. Jala godang nai dope akka peristiwa na lao masa haduan. Satokkin nai taida ma dihancurhon Jahowa sude parjahat. Dung i taida ma saut janji ni Jahowa tu si Daniel, “Hehe do ho muse jala jaloonmu ma upam di ujung ni akka ari i.” (Dan. 12:13) Jadi lao dipahehe do si Daniel dohot sude halak na tahaholongi naung mate. Pasti tarpaima do hita asa hatop masa i. Alani i bertekad ma hamu sian saonari asa toktong setia tu Jahowa. Molo diulahon hamu i pos ma rohamuna, boi do tarsurat goarmuna di bukku hangoluan saleleng ni lelengna.
ENDE 80 ‘Tauji ma Burju ni Jahowa i’
a Di artikel on, tabahas ma pemahaman na terbaru taringot program pendidikan na umbalga songon na disurat di Daniel 12:2, 3. Tabahas ma andigan i masa jala ise na terlibat. Dung i tabahas ma songon dia program pendidikan i mangurupi akka halak na di tano on asa siap mangadopi ujian na parpudi na lao masa di ujung ni Pamarettaon Saribu Taon.
b Olo do ra na parjolo dipahehe, i ma akka naposo ni Jahowa na mate saleleng ari parpudi. Dung i dipahehe ma akka halak na mate sebelum nasida, laos songon i ma satorusna. Molo songon i do dibahen, gabe boi ma ganup generasi menyambut akka halak na ditanda nasida. Bibel mandok akka halak na tarpillit tu surgo, dipahehe “mangihutton urutanna” be. Jadi pos do rohatta akka halak na lao dipahehe di tano na imbaru pe lao dipahehe do mangihutton urutanna be.—1 Kor. 14:33; 15:23.
c Pemahamanta na terbaru on menyesuaihon pemahamanta na leleng na adong di bukku Perhatikanlah Nubuat Daniel! pasal 17, dohot di Menara Pengawal seri 38 tahun 1987, hlm. 17-21.
d Berbeda do on tu “halak na burju” dohot “halak na jahat” na disurat di Ulaon ni Apostel 24:15. Songon i nang tu “akka na mangulahon na denggan” dohot “akka na mangulahon na jahat” na disurat di Johannes 5:29. Akka ayat i paboahon pangalaho ni akka halak na dipahehe sebelum mate do nasida.
