1. Boasa godang halak saonari maol porsea tu na asing?

 SAONARI maol do akka halak porsea tu na asing. Alana jotjot do nasida dikecewahon na asing songon akka pengusaha, tokoh politik, manang pamimpin agama. Maol do nasida porsea tu donganna, tetanggana, bahkan tu keluargana sandiri. Alai dang pola heran hita disi. Alana nungnga didok Bibel hian akka jolma ‘di ari parpudi dang setia, paroa-roahon donganna, jala mangulahon na jahat tu donganna’. Pangalaho ni nasida na jahat i patuduhon Sibolis do na ditiru nasida, i ma debata ni portibi on na so boi dihaporseai.​—2 Tim. 3:1-4; 2 Kor. 4:4.

2. (a) Boasa hita porsea tu Jahowa, tu Jesus, dohot tu Bibel? (b) Sukkun-sukkun aha do na mungkin tapikkirhon taringot akka dongan di huria?

² Hita halak Kristen porsea do tu Debata Jahowa. (Jer. 17:7, 8) Pos do rohatta na holong rohana tu hita jala dang lao tadikkononna hita. (Ps. 9:10) Porsea do hita muse tu Jesus Kristus ala rade ibana mate lao manobus hita. (1 Ptr. 3:18) Porsea do hita tu Bibel ala nungnga tarasahon manfaatna di ngolutta. (2 Tim. 3:16, 17) Jadi adong do alasanna porsea hita tu Jahowa, tu Jesus, dohot tu Bibel. Alai olo do didok rohatta, ‘Boi do tahaporseai akka dongan di huria? Jala boasa ikkon porsea hita tu nasida?’

3. Kesempatan aha do na dilehon Jahowa tu hita? (Markus 10:29, 30)

³ Nungnga dipillit Jahowa hita gabe keluargana. Sada hasangapon do i di hita, jala godang do pasu-pasu na tahilala alani i. (Jaha Markus 10:29, 30.) Godang do akka donganta di liat portibi on na makkaholongi Jahowa jala mangulahon parettana. Nang pe berbeda bahasa, budaya, dohot gaya berpakaian ni akka donganta, alai holong do rohatta tu nasida. Bahkan tikki parjolo sahali hita pajuppang  tu nasida, boi do hita langsung akrab tu nasida. Las hian do rohatta tikki rap dohot akka dongan mamuji jala manomba Jahowa.​—Ps. 133:1.

4. Boasa ikkon marsada hita dohot akka dongan di huria?

⁴ Saonari ikkon lam bertekad do hita asa marsada dohot akka dongan di huria. Alana boi do nasida mangurupi hita tikki marsitaonon. (Rom 15:1; Gal. 6:2) Boi do muse nasida patoguhon hita asa toktong jonok tu Jahowa jala semangat melayani Ibana. (1 Tes. 5:11; Heb. 10:23-25) Coba ma jo tapikkirhon songon dia keadaanta molo dang adong akka dongan di huria. Pasti dang sanggup hita mangalo Sibolis dohot akka halak na jahat di portibi on. Satokkin nai diserang Sibolis dohot akka halak di portibi on nama naposo ni Jahowa. Pasti las hian do rohatta ala toktong hita marsiurupan dohot akka dongan sahaporseaon saleleng on!

5. Boasa adong na maol porsea tu akka dongan di huria?

⁵ Alai adong do piga-piga na maol porsea tu dongan sahaporseaon ala dang boi donganna i menepati janji. Manang hea do ra nasida dikecewahon ala dipaboa-boa urusan pribadina tu na asing. Adong muse na hea dibahen haccit rohana alani hata dohot pambahenan ni donganna. Memang molo hea dialami sasahalak songon i, gabe maol do ibana porsea tu akka dongan. Alai songon dia do asa torus hita porsea tu akka donganta?

6. Songon dia do holong mangurupi hita asa porsea tu akka dongan? (1 Korint 13:4-8)

⁶ Asa boi tahaporseai akka dongan, ikkon tahaholongi do nasida. Di 1 Korint bindu 13, dipaboa do songon dia halak na marholong ni roha i. Akka sifat na adong disi boi mangurupi hita asa toktong  porsea tu akka dongan di huria. (Jaha 1 Korint 13:4-8.) Contohna di ayat 4 didok do molo ‘halak na marholong ni roha i sabar jala burju’. Sabar do Jahowa tu hita nang pe jotjot hita mambahen haccit rohana. Jadi tatiru ma Jahowa. Molo adong na mambahen haccit rohatta, sabar ma hita. Di ayat 5 didok do, ‘[Halak na marholong ni roha i] dang parmuruk, jala dang dipaingot-ingot ibana hasalaan ni halak.’ Jadi unang ma sai torus taingot-ingot hasalaan ni akka dongan na mambahen haccit rohatta. Di Parjamita 7:9 didok do asa ‘unang mura-mura haccit rohatta’. Dumenggan do molo taihutton poda na adong di Epesus 4:26 na mandok, “Unang ma muruk hamu sadari manipat.”

7. Songon dia do akka prinsip na disurat di Mateus 7:1-5 mangurupi hita asa porsea tu akka donganta?

⁷ Cara na asing asa boi porsea hita tu akka donganta, i ma maniru cara pandang ni Jahowa tu nasida. Holong do roha ni Jahowa tu nasida, jala dang hea dipaingot-ingot Jahowa dosa ni nasida. Hita pe ikkon songon i do. (Ps. 130:3) Unang ma talului hasalaan ni akka donganta. Alai berfokus ma hita tu sifat ni nasida na denggan. (Jaha Mateus 7:1-5.) Holong i “porsea di sasude”. Jadi porsea ma hita lomo do roha ni akka dongan mangulahon na denggan, jala dang adong keinginan ni nasida mambahen haccit rohatta. (1 Kor. 13:7) Alai dang na berarti gabe asal porsea hita tu akka dongan. Dipangido Jahowa pe hita porsea tu akka dongan, ala nungnga dipatudu nasida do na layak nasida dihaporseai. b

8. Aha do na ikkon taulahon asa boi tahaporseai akka dongan di huria?

⁸ Porlu do godang tikki asa boi tahaporseai akka dongan di huria. Aha ma na ikkon taulahon? Ikkon tatanda do nasida. Makkata-hatai ma hita dohot nasida di parpunguan, rap bekerja sama ma hita dohot nasida di ulaon marbarita, jala sabar ma hita tu nasida. Talehon ma kesempatan tu akka donganta lao mambuktihon memang layak do nasida dihaporseai. Mulana, dang pittor tapaboa masalah pribaditta tu dongan na baru tatanda. Alai lam leleng, gabe lam akrab ma hita tu ibana. Gabe nyaman ma hita paboahon perasaanta tu donganta i. (Luk. 16:10) Alai boha molo dikecewahon hita? Unang ma pittor tadok dang olo be hita mardongan tu donganta i. Taingot ma lam leleng salpu do annon masalah i. Jala molo tung pe hea hita dikecewahon sasahalak, unang ma gabe tu sude dongan hita dang porsea. Di artikel on tabahas ma aha na boi tatiru sian akka naposo ni Jahowa najolo na toktong porsea tu na asing, nang pe hea nasida dikecewahon.

9. (a) Songon dia do si Hanna patuduhon na porsea ibana tu pengaturan ni Jahowa? (b) Aha do na boi diparsiajari hamu sian si Hanna? (Ida gambar.)

⁹ Hea do haccit rohamuna dibahen dongan na terlantik di huria? Molo hea, pikkirhon ma taringot si Hanna. Di tikki i, Sintua ni Malim Eli do na manguluhon ulaon panombaon tu Jahowa di Israel. Alai dang sitiruon keluargana. Nang pe malim akka anakna, diulahon nasida do ulaon na rorang. Alai dang tegas bapakna pasingotton nasida. Nang pe songon i, diloas Jahowa dope si Eli martugas gabe sintua ni malim. Boha do reaksi  ni si Hanna? Torus do diihutton ibana pengaturan ni Jahowa. Lao do ibana tu tabernakel, inganan ni si Eli marhobas. Tikki diida si Eli martangiang si Hanna, pittor didok si Eli do na mabuk si Hanna. Dang jolo dipastihon ibana aha do na mambahen si Hanna tertekan. (1 Sam. 1:12-16) Alai nungnga marjanji si Hanna molo tubu anakna, lehononna do i tu Jahowa. Ditepati ibana do janjina i, nang pe diboto ibana Sintua ni Malim Eli ma annon na mengawasi anakna i di tabernakel. (1 Sam. 1:11) Dipasombu Jahowa do torus akka anak ni si Eli melayani di tabernakel? Daong. Ujungna dipamate Jahowa do nasida. (1 Sam. 4:17) Dipasu-pasu Jahowa do si Hanna. Ditubuhon ibana do sada anak na margoar si Samuel.​—1 Sam. 1:17-20.

10. Nang pe adong na mangecewahon si Daud, alai gabe tu sude halak do ibana dang porsea?

¹⁰ Hea do hamu dihianati dongan akrabmuna? Molo hea, marsiajar ma hamu sian pengalaman ni Raja Daud. Adong do dongan akrabna na margoar si Ahitofel. Alai di sada tikki, memberontak ma si Absalom anak ni si Daud. Berupaya do ibana manggattihon si Daud gabe raja. Jala didukung si Ahitofel do pemberontakan ni si Absalom. Pasti haccit hian do roha ni si Daud ala dihianati anakna dohot ale-alena ibana. Nang pe adong na mangecewahon si Daud, alai dang tu sude halak ibana gabe dang porsea. Toktong do ibana porsea tu akka donganna na asing songon si Husai, na so bergabung tu pemberontakan i. Jala memang terbukti do si Husai on boi dihaporseai. Rade do ibana mate demi si Daud.​—2 Sam. 17:1-16.

11. Songon dia do parkarejo ni si Nabal patuduhon na porsea ibana tu si Abigail?

¹¹ Parrohahon ma contoh sian parkarejo ni si Nabal. Hea do sada tikki, dilindungi si Daud dohot akka tentarana ma akka parkarejo ni si Nabal. Belakangan dipangido si Daud ma tu si Nabal asa dilehon sipanganon tu ibana dohot akka tentarana. Alai ditolak si Nabal do pangidoanna i. Gabe muruk ma si Daud jala berencana ma ibana mambunu sude bawa na adong di jabu ni si Nabal. Adong ma parkarejo ni si Nabal na paboahon rencana ni si Daud i tu si Abigail, istri ni si Nabal. Dang  gabe melarikan diri ibana. Pos do rohana boi do dipasae si Abigail masalah i, ala diboto ibana borua na marbisuk do si Abigail. Dung diboto si Abigail i, lao ma ibana manjuppangi si Daud. Barani do ibana mangido asa disundati si Daud rencanana i. (1 Sam. 25:2-35) Porsea do si Abigail pasti marbisuk do si Daud mambahen keputusan.

12. Songon dia do Jesus patuduhon na porsea do ibana tu akka siseanna?

¹² Jesus pe torus do porsea tu akka siseanna nang pe jotjot nasida mambahen kesalahan. (Joh. 15:15, 16) Contohna hea do si Jakobus dohot si Johannes mangido tu Jesus asa dilehon kedudukan na sangap di Harajaon ni Debata. Nang pe songon i, dang hea diraguhon Jesus motif ni nasida melayani Jahowa, manang ditolak Jesus nasida gabe apostel. (Mrk. 10:35-40) Di pudian ni ari, sude do sisean ni Jesus maninggalhon ibana tikki ditakkup ibana. (Mat. 26:56) Alai torus do Jesus porsea tu nasida. Jala dihaholongi do nasida “sahat ro di ujungna”, ala diingot Jesus jolma na so sempurna do nasida. (Joh. 13:1) Gariada dung dipahehe Jesus, dilehon ibana do tu 11 apostelna i tanggung jawab lao manguluhon barita na uli dohot mangurus biru-biruna. (Mat. 28:19, 20; Joh. 21:15-17) Terbukti do boi dihaporseai akka apostel ni Jesus i nang pe nasida dang sempurna. Torus do nasida setia sahat tu na mate. Jadi sian si Hanna, si Daud, parkarejo ni si Nabal, si Abigail, dohot Jesus, marsiajar ma hita boi do tahaporseai akka dongan na so sempurna.

13. Aha do na boi mambahen hita gabe dang porsea tu akka dongan?

¹³ Hea do hamu paboahon informasi rahasia tu sahalak donganta, hape dipaboa-boa ibana tu na asing? Molo hea, pasti haccit do rohamuna. Adong sahalak donganta borua na paboahon masalah pribadina tu sahalak sintua. Marsogotna, ditelepon istri ni sintua i ma donganta borua i lao patoguhon ibana. Ternyata naung dipaboa sintua i do masalah ni donganta borua i tu istrina. Pasti gabe maol do donganta borua i porsea tu sintua i. Alai denggan do cara ni donganta borua on menanggapi i. Makkatai ma ibana tu sintua na asing asa diurupi ibana torus porsea tu akka sintua di huria.

14. Aha do na mangurupi sahalak donganta asa porsea muse tu akka sintua?

¹⁴ Adong ma sahalak donganta bawa naung leleng kecewa tu dua sintua di huria. Alai diingot ibana ma jamita ni sahalak donganta na mandok, “Sibolis do musutta, dang akka dongan di huria.” Gabe sai dipikkiri donganta i ma hata i. Martangiang ma ibana tu Jahowa asa diurupi mardame tu dua sintua i. Jala memang i do diulahon ibana.

15. Sian pengalaman ni si Grete, boasa boi tadok porlu do godang tikki asa boi muse porsea tu dongan na hea mangecewahon hita?

¹⁵ Hea do dicabut tugasmuna di huria? Molo hea pasti haccit do dihilala hamu. Parrohahon ma pengalaman on. Setia do si Grete dohot omakna melayani Jahowa, nang pe adong pelarangan Nazi di Jerman saleleng taon 1930-an. Dilehon do tugas tu si Grete lao manalin Menara Pengawal asa adong dibagihon tu akka dongan. Alai dung diboto akka dongan na sogo roha ni bapakna tu Saksi, gabe dang dilean be tugas i tu si Grete. Alana mabiar akka dongan so tung dipaboa bapakna i annon informasi taringot huria tu akka musu. Dang holan i, saleleng Perang Dunia II dang dilean akka dongan majalah tu si Grete dohot omakna. Jala dang olo nasida  menyapa si Grete molo pajuppang di dalan. Haccit hian ma roha ni si Grete! Leleng do asa boi disalpuhon ibana hasalaan ni akka donganna i jala boi muse porsea tu nasida. Alai disadari ibana ma pasti nungnga diampuni Jahowa nasida. Jadi ibana pe ikkon olo do mengampuni akka dongan i. c

16. Aha do hasilna molo berupaya hita toktong porsea tu akka dongan di huria?

¹⁶ Molo hea hamu dikecewahon, pasti ikkon berupaya do hamu asa boi porsea tu donganta i. Porlu do godang tikki lao mangulahon i, alai dang sia-sia pengorbananmuna i. Coba ma jo pikkirhon on. Molo hea hita keracunan makanan, gabe lebih hati-hati ma hita mamillit sipanganon. Alai dang mungkin alani i gabe dang olo hita mangan. Sarupa songon i ma, molo adong dongan di huria na mangecewahon hita, unang ma gabe dang porsea be hita tu sude dongan di huria. Taingot ma dang sempurna nasida sude. Jadi ikkon berupaya do hita asa toktong porsea tu akka dongan. Aha ma hasilna molo taulahon i? Gabe marlas ni roha ma hita jala fokus ma hita tu akka na boi taulahon lao mangurupi akka dongan na di huria asa porsea tu na asing.

17. Boasa ikkon tahaporseai akka donganta, jala aha do na lao tabahas di artikel na mangihut?

¹⁷ Godang do halak di portibi on na so boi dihaporseai. Alai boi do tahaporseai akka donganta ala marsihaholongan hita. Molo porsea hita tu akka dongan, boi ma hita marsada jala makkilala las ni roha saonari. Haduan pe tikki masa hasusaan, boi ma hita marsiurupan. Aha do na porlu taulahon molo hea hita dikecewahon akka dongan? Tatiru ma cara marpikkir ni Jahowa. Taihutton ma prinsip ni Bibel, tapatudu ma holong tu akka dongan, jala marsiajar ma hita sian akka contoh na adong di Bibel. Molo berupaya hita mangatasi haccit ni rohatta i jala berupaya hita asa boi porsea muse tu akka dongan, dapotta ma godang dongan “na ussolhot sian haha anggi”. (Poda 18:24) Alai hita pe ikkon boi dihaporseai akka donganta. Songon dia carana? Tabahas ma i di artikel na mangihut.