1. Sesuai tu Maleaki 3:16, bukku aha do na disurat Jahowa saleleng marribu taon, jala aha do isi ni bukku i?

 SALELENG marribu taon disurat Jahowa do goar ni akka naposona di sada bukku. Mulai ma i sian naposona na setia, i ma si Abel. b (Luk. 11:50, 51) Dung jaman ni si Abel, lam godang ma goar na tarsurat di bukku i. Jala saonari nungnga adong marjuta goar na tarsurat disi. (Jaha Maleaki 3:16.) Molo di Bibel digoari ma bukku i, “bukku hangoluan”.​—Pgk. 3:5; 17:8.

2. Goar ni ise do na tarsurat di bukku hangoluan i, jala songon dia do asa tarsurat goarta disi?

² Bukku on marisi goar ni akka halak na toktong manomba Jahowa jala pasangappon goarna. Dilehon do tu nasida kesempatan lao mangolu saleleng ni lelengna. Boi do tarsurat goarta di bukku hangoluan i molo togu hubungatta tu Jahowa, jala porsea hita tu tobusan ni Jesus Kristus. (Joh. 3:16, 36) Pasti lomo do rohatta asa tarsurat goarta di bukku i, dang soal harapanta naeng mangolu tu surgo manang di tano on.

3-4. (a) Molo nungnga tarsurat goarta di bukku hangoluan i, na gabe otomatis do dapotta hangoluan saleleng ni lelengna? (b) Aha do na lao tabahas di artikel on dohot di artikel berikutna?

³ Molo nungnga tarsurat goarta di bukku hangoluan i, na gabe otomatis do dapotta hangoluan saleleng ni lelengna? Taboto ma alusna sian hata ni Jahowa tu si Musa na disurat di 2 Musa 32:33. Didok Jahowa, “Manang ise na mardosa  tu Au, goarna do sesaokku sian bukkuki.” Nang pe nungnga tarsurat goarta saonari di bukku i, alai hira na mamakke pensil dope i disurat, jala boi dope i tarsesa. (Pgk. 3:5) Jadi ikkon tapastihon do toktong tarsurat goarta di bukku hangoluan, sappe permanen i disurat songon na mamakke pulpen.

⁴ Alai olo do ra gabe sukkun-sukkun rohatta, ise ma na didok Bibel na tarsurat goarna di bukku hangoluan i? Jala ise ma na so tarsurat goarna disi? Tikki sadihari do akka halak na tarsurat goarna di bukku i mandapot hangoluan na saleleng ni lelengna? Boha do taringot akka halak naung mate na so sanga dope mananda Jahowa? Boi dope tarsurat goar ni nasida di bukku hangoluan i? Lao tabahas ma akka sukkun-sukkun i di artikel on dohot di artikel berikutna.

AKKA ISE DO NA TARSURAT GOARNA DI BUKKU I?

5-6. (a) Sesuai tu Pilippi 4:3, akka ise do na tarsurat goarna di bukku hangoluan i? (b) Andigan do permanen disurat goar ni nasida di bukku hangoluan i?

⁵ Saonari tabahas ma jo lima kelompok ni akka halak, asa taboto goar ni ise na tarsurat di bukku hangoluan i. Adong do sian nasida na tarsurat goarna di bukku hangoluan i, jala adong do na so tarsurat goarna disi.

⁶ Kelompok na parjolo, i ma akka halak na tarpillit lao mamaretta rap dohot Jesus di surgo. Tarsurat do goar ni nasida di bukku hangoluan i? Ido. Sesuai tu surat ni si Paulus tu halak Kristen di Pilippi, goar ni akka halak na tarpillit tu surgo nungnga tarsurat di bukku hangoluan. (Jaha Pilippi 4:3.) Alai ikkon toktong do nasida setia asa torus tarsurat goar ni nasida  di bukku hangoluan i. Molo dung dapot ni nasida materai na parpudi, boi ma disurat permanen goar ni nasida di bukku hangoluan i. Masa ma i sebelum mate nasida manang sebelum dimulai hasusaan bolon.​—Pgk. 7:3.

7. Sesuai tu Pangungkapon 7:16, 17, andigan do permanen disurat goar ni punguan bolon i di bukku hangoluan?

⁷ Kelompok na paduahon, i ma punguan bolon. Tarsurat do goar ni nasida di bukku hangoluan i? Ido. Toktong dope tarsurat goar ni nasida di bukku i molo dung selamat sian Armagedon? Ido. (Pgk. 7:14) Termasuk do nasida bagian ni biru-biru na asing na lao mandapot “hangoluan na saleleng ni lelengna”. (Mat. 25:46; Joh. 10:16) Alai nang pe nungnga selamat nasida mangalewati Armagedon, dang otomatis dapot ni nasida hangoluan na saleleng ni lelengna i. Sahat tu tikki i, hira na mamakke pensil dope disurat goar ni nasida. Saleleng Pamarettaon Saribu Taon, ‘diparmahan [Jesus] ma nasida. Boanonna ma nasida tu mata mual ni aek hangoluan’. Jadi asa boi permanen disurat goar ni nasida di bukku hangoluan, ikkon dioloi nasida do petunjuk ni Jesus jala terbukti setia tu Jahowa.​—Jaha Pangungkapon 7:16, 17.

8. Akka ise do na so tarsurat goarna di bukku hangoluan, jala aha do na lao masa tu nasida?

⁸ Kelompok na patoluhon, i ma akka halak na songon hambing na lao dipamate di Armagedon. Dang tarsurat goar ni nasida di bukku hangoluan. Jesus mandok “tu hamatean na saleleng ni lelengna ma halak sisongon i”. (Mat. 25:46) Si Paulus pe mandok, “Hukumon ni Tuan i ma nasida. Mate ma nasida saleleng ni lelengna.” (2 Tes. 1:9; 2 Ptr. 2:9) Termasuk ma di kelompok on, akka halak na sengaja mardosa tu tondi parbadia tikki mangolu nasida. Dang dapot ni nasida hangoluan na saleleng ni lelengna, jala dang na lao dipahehe nasida. (Mat. 12:32; Mrk. 3:28, 29; Heb. 6:4-6) Saonari tabahas ma dua kelompok ni halak na lao dipahehe di tano on.

AKKA NA LAO DIPAHEHE

9. Sesuai tu Ulaon ni Apostel 24:15, ise do dua kelompok na lao dipahehe di tano on, alai aha do perbedaan ni nasida?

⁹ Dipaboa do di Bibel adong dua kelompok ni halak na lao dipahehe di tano on jala mandapot kesempatan lao mangolu salelengna, i ma “halak na burju” dohot “halak na jahat”. (Jaha Ulaon ni Apostel 24:15.) “Halak na burju”, i ma akka halak na setia tu Jahowa sahat tu na mate. Molo “halak na jahat”, i ma halak na so sanga marsiajar taringot Jahowa. Diulahon nasida do ulaon na dihasogohon Jahowa tikki mangolu dope nasida. Ala dipahehe do dua kelompok on, boi do tadok tarsurat goar ni nasida di bukku hangoluan i? Asa taboto alusna, tabahas ma jo taringot dua kelompok on.

10. Boasa dang disesa goar ni akka “halak na burju” i sian bukku hangoluan, jala kesempatan aha do na dilehon tu piga-piga sian nasida? (Ida “Sukkun-Sukkun sian na Manjaha” di majalah on taringot haheheon na di tano on.)

¹⁰ Kelompok na paopatton, i ma akka “halak na burju”. Sebelum mate nasida, nungnga tarsurat goar ni nasida di bukku hangoluan i. Gabe tarsesa do goar ni nasida sian bukku i tikki mate nasida? Daong, ala toktong do nasida diingot Jahowa. Bibel mandok, “Dang Debata ni na mate Ibana, alai Debata ni na mangolu do. Ai mangolu do nasida sude di adopanna.”  (Luk. 20:38) Jadi tikki dipahehe nasida haduan, toktong dope tarsurat goar ni nasida di bukku i nang pe dang permanen dope i tarsurat. (Luk. 14:14) Bahkan adong do piga-piga sian nasida na lao dipillit “gabe pamimpin di saluhut tano on”.—Ps. 45:16.

11. Aha do na ikkon diulahon “halak na jahat” asa tarsurat goar ni nasida di bukku hangoluan?

¹¹ Kelompok na palimahon, i ma akka “halak na jahat”. Ala dang diboto nasida dope patik ni Jahowa, dang diulahon nasida na sittong tikki mangolu nasida. Alani i ma dang tarsurat goar ni nasida di bukku hangoluan i. Alai haduan, paheheon ni Debata ma nasida jala dilehon kesempatan asa tarsurat goar ni nasida di bukku hangoluan i. Nang pe songon i, porlu do nasida diurupi. Boasa? Alana najolo diulahon nasida do akka na dihasogohon Jahowa. Porlu do nasida diajari asa boi mangulahon standar ni Jahowa. Alani i, lao bahenon ni Debata ma program pendidikan na umbalga di saluhut tano on.

12. (a) Ise do na lao mangajari akka “halak na jahat i”? (b) Aha do akibatna molo dang olo nasida mangoloi standar ni Jahowa?

¹² Ise do na lao mangajari akka “halak na jahat i”? Punguan bolon dohot akka “halak na burju” na dipahehe. Asa boi tarsurat goar ni halak na jahat i di bukku hangoluan, ikkon jonok do hubungan ni nasida tu Jahowa jala olo mangalehon diri lao melayani Ibana. Jesus dohot si 144.000 i ma na mangida sian surgo songon dia tanggapan ni nasida tu standar ni Jahowa na diajarhon tu nasida. (Pgk. 20:4) Molo adong na so mangoloi, dang diloas ibana toktong mangolu, nang pe nungnga marumur 100 taon ibana. (Jes. 65:20) Boi do takkas diida Jahowa dohot Jesus isi ni roha ni jolma. Jala dang na loason ni nasida adong akka halak na mambahen masalah di tano na imbaru.​—Jes. 11:9; 60:18; 65:25; Joh. 2:25.

 NA DIPAHEHE TU HANGOLUAN DOHOT NA DIPAHEHE LAO DIUHUMI

13-14. (a) Sebelumna songon dia do pemahamanta taringot hata ni Jesus na disurat di Johannes 5:29? (b) Aha do na taboto saonari taringot ayat i?

¹³ Dipaboa Jesus do akka ise na lao dipahehe di tano on. Didok ibana do, “Na ro ma tikkina begeon ni saluhut na di kuburan i ma soarana jala kaluar ma nasida. Akka na mangulahon na denggan hehe ma tu hangoluan jala akka na mangulahon na jahat hehe lao diuhumi.” (Joh. 5:28, 29) Aha do maksud ni Jesus disi?

¹⁴ Sebelumna hita mangattusi, hata “mangulahon” di ayat i lapatanna tindakan ni akka halak dukkon dipahehe nasida. Najolo tadok do, adong halak na dipahehe, dung i mangulahon na denggan. Na asing dipahehe, dung i mangulahon na jahat. Alai molo taparrohahon ayat i, dang adong didok Jesus akka halak na dipahehe i lao mangulahon na denggan manang lao mangulahon na jahat. Na didok ibana, i ma akka halak na “mangulahon na denggan” dohot akka halak na “mangulahon na jahat”. Berarti na dimaksud dison akka pangalaho ni nasida sebelum mate do. Masuk akkal do on, alana dang diloas adong halak na mangulahon na jahat di tano na imbaru. Attong aha do lapatan ni hata ni Jesus tikki didok ibana, adong na dipahehe “tu hangoluan” jala adong na dipahehe “lao diuhumi”?

15. Ise do na lao dipahehe “tu hangoluan”, jala boasa?

¹⁵ Halak na burju, i ma halak na mangulahon na denggan andorang so mate nasida. Lao dipahehe do nasida “tu hangoluan” ala nungnga tarsurat goar ni nasida di bukku hangoluan. Akka halak “na mangulahon na denggan” na disurat di Johannes 5:29, sarupa do i tu “halak na burju” na disurat di Ulaon ni Apostel 24:15. Hatorangan on sesuai do tu isi ni Rom 6:7 na mandok, “Molo nungnga mate sasahalak, nungnga malua be ibana sian dosana.” Jadi tikki mate halak na burju nungnga diampuni Jahowa be dosana, jala torus do diingot Ibana kesetiaan ni nasida. (Heb. 6:10) Nang pe songon i, ikkon torus do nasida setia tu Jahowa, asa unang dihapus goar ni nasida sian bukku hangoluan i.

16. Aha do lapatanna dipahehe “lao diuhumi”?

¹⁶ Boha do taringot akka halak na mangulahon na jahat sebelum mate nasida? Memang nungnga diampuni Jahowa be dosa ni nasida tikki mate nasida. Alai ala dang melayani Jahowa dope nasida, dang tarsurat goar ni nasida di bukku hangoluan i. Nasida ma “halak na jahat” na disurat di Ulaon ni Apostel 24:15. Dipahehe ma nasida “lao diuhumi”. c Lapatanna, dung dipahehe nasida idaon ni Jesus ma olo do nasida mangihutton standar ni Jahowa manang na dang. Hira masa uji coba ma on. (Luk. 22:30) Dung i botoon ni Jesus ma layak do tarsurat goar ni nasida di bukku hangoluan i manang na dang. Molo olo nasida maninggalhon pangalaho na leleng jala olo melayani Jahowa, boi ma tarsurat goar ni nasida di bukku hangoluan i.

17-18. Aha do na ikkon diulahon sude halak na lao dipahehe i, jala aha do lapatan ni hata “parniulaon” na disurat di Pangungkapon 20:12, 13?

¹⁷ Sude halak na lao dipahehe, “halak  na burju” manang “na jahat”, ikkon mangoloi patik di sada gulungan na baru. Lao dibukka ma gulungan i saleleng pamarettaon 1.000 taon. Didok Apostel Johannes, “Huida ma akka na mate, na sangap dohot na lea jongjong di jolo ni tahta i jala dibukka ma akka gulungan i. Alai dibukka ma gulungan na asing, i ma bukku hangoluan. Mangihutton akka na tarsurat di bukku i, diuhumi ma akka na mate i sesuai tu parniulaon ni nasida.”​—Pgk. 20:12, 13.

¹⁸ Didok di ayat i, diuhumi do akka halak na dipahehe i sesuai tu parniulaon ni nasida. Parniulaon ni nasida sebelum mate do maksudna? Daong! Taingot ma, dosa na diulahon nasida sebelum mate, nungnga disesa tikki mate nasida. Jadi parniulaon na didokna dison, dang parniulaon ni nasida sebelum mate. Alai on lapatanna, tanggapan ni nasida tu standar ni Jahowa na diajarhon di tano na imbaru. Bahkan akka naposo ni Jahowa songon si Noak, si Samuel, si Daud, dohot si Daniel pe porlu do marsiajar taringot Jesus jala patuduhon haporseaon tu tobusan. Molo nasida sajo porlu marsiajar, apalagi ma akka “halak na jahat” i.

19. Aha do na lao masa tu akka halak na mangalo Jahowa?

¹⁹ Aha do na lao masa tu akka halak na mangalo Jahowa? Pangungkapon 20:15 mandok, “Manang ise na so tarsurat goarna di bukku hangoluan i, disappatton ma ibana tu laut api i.” Lapatanna, na lao dipamate ma nasida saleleng ni lelengna. Alani i, ikkon tapastihon do toktong tarsurat goarta di bukku hangoluan i saleleng ni lelengna!

20. Aha do na lao diulahon saleleng Pamarettaon Saribu Taon? ( Ida gambar sampul.)

²⁰ Godang do pasu-pasu na lao jaloon ni naposo ni Debata saleleng Pamarettaon Saribu Taon. Termasuk ma i program pendidikan na umbalga na lao dibahen di tano on. Disi boi ma dibuktihon akka halak na burju dohot halak na jahat, olo do nasida mangihutton standar ni Jahowa manang na dang. (Jes. 26:9; Ul. 17:31) Songon dia do program pendidikan i diulahon? Lao tabahas ma i di artikel na mangihut.