1. Aha do tantangan na diadopi si Jehoas, si Usia, dohot si Josia?

 BAYAKKON ma nungnga gabe raja hamu lao mamimpin naposo ni Debata, hape dakdanak manang remaja dope hamu. Songon dia do hamu mandalatton tanggung jawabmuna i? Adong do dipaboa di Bibel taringot akka na poso na gabe raja di Juda. Contohna si Jehoas, marumur pitu taon do ibana gabe raja. Si Usia marumur 16, jala si Josia marumur ualu taon. Tottu tanggung jawab na balga do on. Nang pe songon i, diurupi Jahowa dohot akka na asing do nasida lao mangulahon na denggan.

2. Aha do manfaatna molo taparsiajari taringot si Jehoas, si Usia, dohot si Josia?

² Memang dang raja manang ratu hita. Alai godang do na boi taparsiajari sian parngoluan ni si Jehoas, si Usia, dohot si Josia. Dibahen nasida do keputusan na denggan, alai hea do tong dibahen nasida keputusan na sala. Sian contoh ni nasida, lao taida ma boasa ikkon tapillit dongan na burju, toktong marserep ni roha, jala berupaya mangalului Jahowa lao palasson rohana.

3. Ditangihon Raja Jehoas do nasehat ni Malim Kepala Jehoyada?

³ Tiru ma si Jehoas na mambahen keputusan na denggan. Tikki poso dope si Jehoas mate ma bapakna, jala Malim Kepala Jehoyada ma na pagodang-godangkon ibana dohot mangajari ibana taringot Jahowa. Jadi boi pe marbisuk si Jehoas, ala ditangihon ibana do nasehat ni si Jehoyada. Ala teladan ni si Jehoyada, gabe dipillit si Jehoas do manomba Jahowa jala diurupi ibana do naposona asa dohot manomba Jahowa. Dang holan i, dipadenggan ibana do muse bagas joro ni Jahowa.—2 Kron. 24:​1, 2, 4, 13, 14.

4. Aha do manfaatna molo taargai jala taoloi paretta ni Jahowa? (Poda 2:​1, 10-12)

 ⁴ Silehon-lehon na massai arga do molo diajari natua-tuamuna hamu asa makkaholongi Jahowa jala mangihutton standarna. (Jaha Poda 2:​1, 10-12.) Godang do cara ni natua-tua boi mangalatik hamu. Parrohahon ma songon dia bapak ni si Katya mangurupi ibana mambahen keputusan na denggan. Ganup ari sebelum ditaruhon bapakna ibana tu sikkola, jolo mambahas ayat harian do nasida. Didok si Katya, “Ala dibahen hami songon i, gabe boi ma au mangadopi akka tantangan di sadari i.” Alai boha do molo dihilala hamu hira na membatasi akka aturan na dibahen natua-tuamuna? Aha do na boi mangurupi hamu asa lam mura manjalo akka aturan i? Donganta borua na margoar si Anastasia paboahon songon dia natua-tuana mangalehon tikki lao patorakkon alasanna boasa dibahen nasida piga-piga aturan. Didok ibana, “Gabe huattusi ma boasa dibahen nasida akka peraturan i. Alani holong ni nasida do, dang na lao mambatasi au.”

5. Molo dioloi hamu nasehat na sian Bibel, aha do pengaruhna tu natua-tuamuna dohot tu Jahowa? (Poda 22:6; 23:​15, 24, 25)

⁵ Pasti las do roha ni natua-tuamuna molo olo hamu manangihon poda ni nasida na sian Bibel. Na uppetting, pasti las do roha ni Debata tu hamu jala lam togu ma hubunganmuna tu Ibana. (Jaha Poda 22:6; 23:​15, 24, 25.) On ma alasanna boasa ikkon tatiru si Jehoas tikki poso dope ibana.

6. Nasehat ni ise do na ditangihon si Jehoas, jala aha do akibatna? (2 Kronika 24:​17, 18)

⁶ Marsiajar sian keputusan ni si Jehoas na so denggan. Dung mate si Jehoyada mardongan ma si Jehoas dohot akka halak na so denggan. (Jaha 2 Kronika 24:​17, 18.) Ditangihon ibana do akka pejabat ni Juda na so makkaholongi Jahowa. Sasittongna ikkon dipadao ibana do dirina sian akka halak na mangulahon na so denggan. (Poda 1:10) Alai ditangihon ibana do nasida. Gariada tikki dipasingot sepupuna si Sakaria ibana, gabe dipamate ibana do si Sakaria. (2 Kron. 24:​20, 21; Mat. 23:35) Massai kejam jala oto do si Jehoas. Mulana burju do si Jehoas, alai lam leleng gabe manimbil do ibana sian Jahowa jala gabe pambunu. Ujungna, dipamate hatobanna do ibana. (2 Kron. 24:​22-25) Autsugari toktong ditangihon ibana Jahowa, dohot naposona na setia, dang songon i ngoluna. Aha ma na boi taparsiajari sian kisah ni si Jehoas on?

7. Halak na songon dia do na ikkon gabe donganta? (Ida gambar.)

⁷ Sian keputusan na so denggan na dibahen si Jehoas marsiajar do hita, ikkon mardongan do  hita dohot akka halak na makkaholongi Jahowa jala na mambahen las rohana. Alana, boi do nasida mangurupi hita mangulahon na denggan. Unang ma holan akka halak na saumuran dohot hita na gabe donganta. Ingot ma, dao do upposo si Jehoas sian si Jehoyada. Tikki naeng mamillit dongan, pikkirhon ma on: ‘Diurupi nasida do au patoguhon haporseaonku tu Jahowa? Diihutton nasida do standar ni Jahowa di ngoluna, jala dijujui nasida do au mangulahon na sarupa? Taringot Jahowa dohot Bibel do na dihatai nasida? Olo do nasida pasingotton au? Manang holan na tabo begeon do na didok nasida tu au?’ (Poda 27:​5, 6, 17) Molo dang makkaholongi Jahowa donganmuna i, tinggalhon ma nasida. Alai molo dihaholongi nasida Jahowa, torus ma mardongan dohot nasida. Pasti sai urupan ni nasida do hamu!—Poda 13:20.

8. Molo mamakke media sosial hita, aha do na porlu tapikkirhon?

⁸ Boi do media sosial mambahen hita lam jonok tu keluarga manang tu akka dongan. Alai godang do halak mamakke media sosial lao mambahen asa terkesan halak na asing. Diposting nasida ma akka poto dohot video na patuduhon aha na dituhor dohot na diulahon nasida. Molo mamakke media sosial do hamu, pikkirhon ma on: ‘Aha do tujuanku mamakke media sosial? Lao mambagihon akka na denggan do? Manang lao mambahen halak terkesan tu au jala asa dipuji nasida au? Gabe tarihut-ihut do au tu cara marpikkir, cara makkatai, dohot tindakan ni akka halak na di media sosial?’ Donganta si Nathan Knorr, i ma anggota Punguan na Mangaradoti Organisasi mangalehon saran on, “Unang ma berupaya hamu asa mambahen las roha ni akka halak. Dang na lao marhasil hamu. Tabahen ma las roha ni Jahowa. Molo diulahon hamu i, gabe las ma roha ni akka halak na makkaholongi Jahowa.”

9. Songon dia do Jahowa mangurupi si Usia? (2 Kronika 26:​1-5)

⁹ Tiru ma si Usia na mambahen keputusan na denggan. Tikki poso dope Raja Usia, serep do rohana. Marsiajar do ibana “makkabiari Debata na sittong”. Jala dipasu-pasu Jahowa do si Usia sappe hira-hira marumur 68 taon. (Jaha 2 Kronika 26:​1-5.) Godang do musu na ditaluhon si Usia jala toktong do aman kota Jerusalem saleleng mamaretta ibana. (2 Kron. 26:​6-15) Pasti las do roha ni si Usia ala diurupi Debata do sude na diulahon ibana.—Pjm. 3:​12, 13.

10. Aha do na masa tu si Usia?

¹⁰ Marsiajar sian keputusan na so denggan na dibahen si Usia. Somal do Raja Usia mambahen paretta tu akka halak. Alani i do ra, gabe didok rohana boi lomo-lomona mangulahon manang aha pe. Hea ma sada tikki masuk ibana tu bagas joro ni Jahowa jala manutung dupa di langgatan. Hape, dang boi raja mangulahon i. (2 Kron. 26:​16-18) Dipasingot Malim Kepala Azaria ma ibana. Alai muruk do ibana tu si Azaria. Ujungna dang setia ibana tu Jahowa, jala dibahen Jahowa ma ibana marsahit kusta. (2 Kron. 26:​19-21) Autsugari toktong serep rohana pasti dang songon i ngoluna!

11. Aha do na boi mangurupi hita asa toktong marserep ni roha? (Ida gambar.)

¹¹ Dung gogo pamarettaon ni si Usia, lupa do ibana mandok mauliate tu sude bantuan ni Jahowa tu ibana. Aha ma na boi taparsiajari sian on? Taingot ma, sian Jahowa do sude akka na denggan di ngolutta dohot tugas na tadapot. Unang ma diritta na tabangga-banggahon. Alai ikkon mandok mauliate do hita tu Jahowa. b (1 Kor. 4:7) Ikkon tasadari ma jolma na so sempurna do hita jala porlu dipasingot. Sahalak donganta bawa na marumur 60 taon lobi mandok, “Hea do jut rohakku tikki dipasingot  alani kesalahanku. Alai marsiajar do au asa unang haccit rohakku manang metmet rohakku molo dipasingot. Berupaya do au padenggatton pangalahokku jala toktong mangalehon na terbaik tu Jahowa.” Takkas ma, molo taoloi Jahowa jala toktong marserep ni roha, pasti denggan do ngolutta.—Poda 22:4.

12. Songon dia si Josia mangalului Jahowa tikki poso dope ibana? (2 Kronika 34:​1-3)

¹² Tiru ma si Josia na mambahen keputusan na denggan. Tikki remaja ibana, nungnga mulai ibana mangalului Jahowa. Lomo do rohana marsiajar taringot Jahowa, jala mangulahon lomo ni roha ni Jahowa. Nang pe songon i, godang do tantangan na diadopi ibana tikki gabe raja. Tikki ibana mamaretta, godang do akka halak na manomba debata na so sittong. Jadi ikkon barani do si Josia mangorai bangsona asa unang manomba debata na so sittong. Jala memang i do na diulahon ibana. Sebelum dapot umurna 20 taon, nungnga mulai ibana mangaropukkon akka inganan panombaon ni debata na so sittong di wilayah pamarettaonna.—Jaha 2 Kronika 34:​1-3.

13. Molo dilehon hamu ngolumuna tu Jahowa, aha do pengaruhna tu ngolumuna?

¹³ Nang pe poso dope hamu, boi do hamu maniru si Josia. Marsiajar ma taringot Jahowa dohot akka sifatna. Molo dibahen hamu songon i, gabe taronjar ma rohamuna lao mangalehon ngolumuna tu Jahowa. Molo dibahen hamu keputusan sisongon i, aha do pengaruhna tu ngolumuna? Olo do ra sarupa tekadmuna songon si Luke na tardidi tikki marumur 14 taon. Tikki dilehon ibana ngoluna tu Jahowa marjanji do ibana mulai di tikki i, Jahowa ma na uppetting di ngoluna, jala berupaya mambahen las rohana. (Mrk. 12:30) Molo songon i tekadmuna, pasti dapotmuna do annon pasu-pasu sian Jahowa!

14. Paboa ma contoh ni akka na poso na maniru Raja Josia.

¹⁴ Hamu akka na poso, tantangan aha do na diadopi hamu? Parrohahon ma akka pengalaman on. Contohna si Johan na tardidi tikki marumur 12 taon. Didok ibana sai dijujui akka dongan sakalasna do ibana asa mamakke sigaret elektrik manang vape. Aha do na diulahon ibana asa unang menyerah? Dirimangi si Johan ma, gabe marsahit do annon ibana jala  boi gabe sega hubunganna tu Jahowa molo dipakke ibana vape i. Contoh na asing i ma donganta si Rachel. Marumur 14 taon do ibana tardidi. Dipaboa ibana do aha na mangurupi ibana asa boi mangadopi akka tantangan di sikkola. Didok ibana, “Sai hukaitton do akka aha na masa di ngolukku tu Bibel dohot tu Jahowa. Contohna, tikki pelajaran sejarah pittor huingot do akka ayat manang akka surirang na adong di Bibel. Manang tikki makkata-hatai dohot donganku huingot do sada ayat na boi hubagihon tu nasida.” Olo do ra dang sarupa tantangan na diadopi hamu dohot Raja Josia. Alai boi do hamu marbisuk jala setia songon ibana. Jadi molo mangadopi tantangan hamu di tikki poso, on boi mangurupi hamu mangadopi tantangan di ari na naeng ro.

15. Aha do na mangurupi si Josia toktong setia tu Jahowa? (2 Kronika 34:​14, 18-21)

¹⁵ Tikki marumur 26 taon Raja Josia, mulai ma dipadenggan ibana bagas joro. Tikki na dipadenggan i bagas joro, dapot ma “bukku na marisi Patik ni Jahowa na dipasahat tu si Musa”. Tikki dijahahon tu ibana isi ni bukku i, gabe taronjar ma rohana mangulahon na tarsurat di bukku i. (Jaha 2 Kronika 34:​14, 18-21.) Boha molo hamu? Lomo do rohamuna manjaha Bibel ganup ari? Bisa jadi nungnga berupaya hamu mangulahon i. Las do rohamuna manjaha Bibel? Adong do diingot hamu ayat ni Bibel na bermanfaat tu hamu? Molo si Luke na dipaboa nakkin, disurat ibana do akka parsiajaran na menarik na dapotna tikki manjaha Bibel. Molo dibahen hamu songon i, gabe boi ma diingot hamu akka ayat manang parsiajaran na dapotmuna sian Bibel. Lam bagas diparsiajari hamu Bibel jala lam lomo rohamuna manjaha i, gabe lam taronjar ma rohamuna lao melayani Jahowa. Jala taronjar ma rohamuna mangulahon na tarsurat di Bibel, songon Raja Josia.

16. Boasa dibahen si Josia kesalahan na balga, jala aha ma parsiajaranna tu hita?

¹⁶ Marsiajar sian si Josia na mambahen keputusan na sala. Tikki marumur 39 taon si Josia dibahen ibana do kesalahan na mambahen marjea ngoluna. Umpos do rohana tu dirina  sandiri. Dang dipangido ibana petunjuk sian Jahowa. (2 Kron. 35:​20-25) Adong do na boi taparsiajari sian on. Dang soal sadia umurta jala sadia leleng hita marsiajar Bibel, ikkon toktong do talului petunjuk ni Jahowa. Taratur ma hita martangiang mangido petunjuk ni Jahowa, marsiajar Bibel jala mangido saran sian akka donganta na togu haporseaonna. Molo tabahen songon i, gabe boi ma tapasiding kesalahan na balga jala marlas ni roha ma hita.—Jak. 1:25.

17. Aha do na boi taparsiajari sian si Jehoas, si Usia, dohot si Josia?

¹⁷ Godang do na boi diulahon hamu tikki poso dope hamu. Sian si Jehoas, si Usia, dohot si Josia, marsiajar do hamu boi do dibahen hamu keputusan na denggan jala palasson roha ni Jahowa di ngolumuna. Memang dibahen nasida do kesalahan na parohon jea tu diri ni nasida sandiri. Alai molo ditiru hamu do akka na denggan sian nasida jala dang dibahen hamu kesalahan songon na dibahen nasida, boi ma hamu marlas ni roha.

18. Paboa ma akka ise na poso na disurat di Bibel na marlas ni roha di ngoluna. (Ida gambar.)

¹⁸ Godang do disurat di Bibel taringot akka na poso na marlas ni roha. Alana jonok do nasida tu Jahowa jala las do roha ni Jahowa tu nasida. Sada sian i, i ma si Daud. Tikki poso dope ibana, dipillit ibana do lao manomba Jahowa jala ujungna gabe raja na setia. Hea do dibahen ibana kesalahan. Alai halak na setia do si Daud di jolo ni Jahowa. (1 Raj. 3:6; 9:​4, 5; 14:8) Molo diparsiajari hamu taringot si Daud, gabe dipatogu ma rohamuna asa toktong setia manomba Jahowa. Boi do muse diparsiajari hamu taringot si Markus manang si Timoteus. Poso dope nasida manomba Jahowa jala toktong setia manomba Ibana. Las do roha ni Jahowa dibahen nasida, jala nasida pe marlas ni roha do ala manomba Ibana.

19. Aha do keputusan na terbaik na boi dibahen hamu?

¹⁹ Keputusan na dibahen hamu saonari balga do pengaruhna i tu masa depanmuna. Molo pos rohamuna tu Jahowa jala dang mangandalhon diri sandiri, pasti diurupi Jahowa do hamu lao mambahen keputusan na denggan. (Poda 20:24) Boi ma hamu marlas ni roha jala dipasu-pasu Jahowa ma hamu. Ingot ma diargai Jahowa do sude akka na dibahen hamu tu Ibana. Sian sude keputusan na dibahen hamu di ngolumuna, melayani Jahowa ma keputusan na terbaik.