1-2. Aha do manfaatna molo taparsiajari kisah ni si Simson?

 MOLO dibege hamu taringot si Simson, aha ma na dibayakkon hamu? Dibayakkon hamu do ra sahalak bawa na massai gogo. Tutu do i. Alai hea do dibahen si Simson keputusan na sala na mambahen susa ibana. Nang pe songon i, sai diingot Jahowa do akka na denggan na diulahon si Simson. Jala disurat do di Bibel taringot kesetiaanna asa gabe sitiruon tu hita.

² Dipakke Jahowa do si Simson mangulahon lomo ni rohana lao mangurupi bangso Israel. Marratus taon dung mate ibana disuru Jahowa do Apostel Paulus manuratton goar ni si Simson gabe sada sian akka halak na porsea. (Heb. 11:​32-34) Sai diandalhon si Simson do Jahowa tarlumobi tikki mangadopi situasi na maol. Saonari tabahas ma songon dia teladan ni si Simson boi patoguhon hita.

3. Tugas aha do na dilehon Jahowa tu si Simson?

³ Tikki tubu si Simson, halak Palistim do na mangarajai halak Israel. (Pangh. 13:1) Massai kejam do halak Palistim i jala susa do halak Israel dibahen nasida. Alani i, dipillit Jahowa do si Simson “lao paluahon halak Israel sian tangan ni halak Palistim”. (Pangh. 13:5) Tugas na massai borat do i! Ikkon  diandalhon si Simson do Jahowa do asa boi ibana mangulahon tugasna i.

4. Songon dia do cara ni Jahowa paluahon si Simson sian halak Palistim? (Panguhum 15:​14-16)

⁴ Saonari tabahas ma songon dia si Simson marpos ni roha tu Jahowa jala mangandalhon bantuanna. Sada tikki hea ma tentara ni halak Palistim lao manakkup si Simson tu huta Lehi na adong di Juda. Mabiar do halak Juda tu nasida. Alani i dipasahat halak Juda ma si Simson tu nasida. Dung i, diikkat halak Juda ma si Simson mamakke dua tali na baru jala diboan ma ibana tu tentara ni halak Palistim. (Pangh. 15:​9-13) Nang pe songon i, “dibahen tondi parbadia ni Jahowa ma ibana lam gogo. Gabe malua ma tali i sian tanganna”. Dung i dapot ni si Simson ma “osang-osang ni halode jantan na baru mate”, jala dipakke ibana ma i pamatehon 1.000 halak Palistim.—Jaha Panguhum 15:​14-16.

5. Aha do na patuduhon Jahowa na diandalhon si Simson?

⁵ Dang somal osang-osang ni halode dipakke gabe sinjata. Alai boasa dipakke si Simson i gabe sinjatana? Alana takkas do diboto ibana, boi pe ibana marhasil holan alani Jahowa do, dang alani sinjata na dipakke ibana. Dipakke si Simson do aha pe na adong di ibana lao mangulahon tugas na sian Jahowa. Takkas ma, marhasil do si Simson ala Jahowa na diandalhon ibana!

6. Aha do na boi taparsiajari sian kisah ni si Simson?

⁶ Dilehon Jahowa do tong gogo tu hita lao mangulahon tugas na sian Ibana, nang pe tahilala hira na so mungkin boi taulahon tugas i. Olo do diurupi Jahowa hita marhite cara na so hea dope tapikkirhon. Pos ma rohatta diurupi Jahowa do hita songon na dibahen ibana tu si Simson. Pasti boi do hita marhasil mangulahon tugas sian Jahowa molo taandalhon Ibana.—Poda 16:3.

7. Paboa ma contoh na patuduhon na massai penting do mangalului petunjuk ni Jahowa.

⁷ Saonari godang do akka donganta na mangurupi di ulaon pembangunan. Dipatudu nasida do na porsea nasida tu Jahowa. Najolo,  godangan Bale Harajaon dohot bangunan na asing dirancang jala dibangun akka donganta. Alai ala torus martamba na tardidi, ikkon dibahen organisasi do penyesuaian. Martangiang do akka dongan na martanggung jawab mangido petunjuk ni Jahowa jala dicoba nasida do cara na baru, misalna manuhor jala merenovasi bangunan. Si Robert donganta naung martaon-taon karejo di ulaon pembangunan di liat portibi on mandok, “Mulana maol do huhilala mangulahon cara na baru i. Alana beda hian do cara on dohot aha naung diulahon hami saleleng on. Alai rade do akka dongan mangihutton penyesuaian i. Takkas ma dipasu-pasu Jahowa do penyesuaian i.” Godang nai dope pengalaman na patuduhon na sai ditogu-togu Jahowa do naposona asa marhasil mangulahon tugas na sian Ibana. Jadi sian tikki tu tikki porlu do tasukkun diritta, ‘Hulului do petunjuk ni Jahowa jala olo do au menyesuaihon diri tu petunjuk i asa lam denggan melayani Ibana?’

8. Tikki mauas hian si Simson, aha do na diulahon ibana?

⁸ Diingot hamu do ra akka ulaon na luar biasa na dibahen si Simson. Hea do sahalakna pamatehon singa dohot pamatehon 30 halak Palistim di huta Askelon. (Pangh. 14:​5, 6, 19) Diboto si Simson do dang boi ibana mangulahon i sude molo dang diurupi Jahowa ibana. Buktina, hea ma mauas hian ibana dung manaluhon 1.000 halak Palistim. Aha do na diulahon ibana? Martangiang do ibana mangido bantuan ni Jahowa asa boi dapotna aek.—Pangh. 15:18.

9. Aha do na dibahen Jahowa lao mangalusi tangiang ni si Simson? (Panguhum 15:19 dohot surat na di toru)

⁹ Ditangihon Jahowa do tangiang ni si Simson. Dibahen Jahowa do mukjizat asa adong siinumon ni si Simson. Tikki diinum si Simson i, “mulak ma gogona jala las ma rohana”. (Jaha Panguhum 15:19 dohot surat na di toru.) Piga-piga taon dukkon i, tikki disurat Panurirang Samuel bukku Panguhum adong dope mata mual i. Aha do na diingot halak Israel tikki diida nasida mata mual i? Sai diurupi Jahowa do naposona na toktong mangandalhon Ibana di tikki na dihaporluhon.

10. Aha do na porlu taulahon asa diurupi Jahowa hita? (Ida gambar.)

¹⁰ Nang pe adong bakatta jala godang pengalamanta, porlu do tapangido bantuan ni Jahowa asa marhasil hita mangulahon tugasta. Dung i ikkon serep do rohatta jala mangakkui holan alani mangandalhon Jahowa do boi hita marhasil. Songon si Simson na margogo dung manginum aek na disediahon Jahowa, tapakke ma sude na disediahon Jahowa lao mangurupi hita asa toktong setia tu Ibana.—Mat. 11:28.

11. Boha do caratta mangandalhon Jahowa? Paboa ma sada pengalaman.

¹¹ Taparrohahon ma pengalaman ni donganta si Aleksey na di Rusia. Toktong do ibana martahan nang pe mangadopi penganiayaan na parah. Aha do na mangurupi ibana asa boi toktong togu? Didok ibana, “Saleleng on, taratur do au dohot istrikku manjaha Bibel tiap ari jala belajar pribadi. Tiap pagi dibahas hami ma ayat harian jala rap martangiang do hami tu Jahowa.” Aha do na boi tatiru sian nasida? Jahowa ma na sai taandalhon, unang diritta sandiri. Songon dia carana? Taratur ma hita marsiajar Bibel, martangiang, marpungu, jala marbarita asa toktong togu haporseaotta. Molo taulahon i, pasti dilehon Jahowa do bantuan tu hita asa boi toktong melayani Ibana. Songon si Simson na dipargogoi Jahowa, pos ma rohatta pasti dipargogoi Jahowa do hita.

12. Aha do keputusan na sala na dibahen si Simson? Jala aha do beda ni keputusan i tu dua keputusan na sebelumna?

¹² Jolma na so sempurna do si Simson songon hita. Hea do dibahen ibana keputusan na sala. Gabe marjea ma ibana alani i. Dung dipillit ibana gabe panguhum, ‘holong ma roha ni si Simson tu sahalak borua na margoar si Delila na tinggal di Rura Sorek’. (Pangh. 16:4) Sebelumna nungnga martunangan si Simson tu borua Palistim. ‘Na ditogu-togu Jahowa do si Simson mambahen keputusan sisongon i’ asa adong dalan ni Debata “lao mangalo halak Palistim”. Dukkon i, manginap ma ibana tu jabu ni sahalak boru-boru na so hasea di Gasa. Dibahen Jahowa do margogo si Simson lao mamboan pintu gerbang ni kota ni halak Palistim lao manaluhon nasida. (Pangh. 14:​1-4; 16:​1-3) Alai asing do si Delila sian dua boru-boru di dua peristiwa on. Alana olo do ra si Delila halak Israel, jadi dang ibana na dipakke Jahowa gabe dalan lao manaluhon halak Palistim.

13. Aha do na dibahen si Delila tu si Simson?

¹³ Godang do hepeng na dijalo si Delila sian halak Palistim asa gabe dalan lao manakkup si Simson. Mulak-ulak do mangelek-elek si Delila tu si Simson asa dipaboa si Simson aha na mambahen ibana margogo. Ala massai holong roha ni si Simson tu si Delila, gabe dioloi ibana ma pangidoanna i. Ujungna gabe mago ma gogo ni si Simson i, jala gabe ditadikkon Jahowa ma ibana.—Pangh. 16:​16-20.

14. Aha do akibatna ala porsea si Simson tu si Delila?

¹⁴ Susa do dihilala si Simson ala upporsea ibana tu si Delila sian tu Jahowa. Ujungna ditakkup halak Palistim ma ibana  jala dipulsikkon ma matana. Dipenjarahon ma ibana di Gasa jala dibahen ma ibana gabe panggiling ni gandum, ala hea dipaila ibana akka halak na di kota i. Dung i, dipaila do muse ibana tikki marpesta halak Palistim. Dilehon nasida do godang pelean tu Dagon, i ma debata ni nasida, ala nungnga dipasahat si Simson tu nasida. Diboan nasida ma si Simson sian penjara asa “diparekkeli” ibana.—Pangh. 16:​21-25.

15. Aha do na diulahon si Simson na patuduhon diandalhon ibana do muse Jahowa? (Panguhum 16:​28-30) (Ida gambar sampul.)

¹⁵ Nang pe balga kesalahan naung dibahen si Simson, alai toktong do ibana manomba Jahowa. Dilului ibana do kesempatan asa boi mangulahon tugas sian Jahowa lao manaluhon halak Palistim. (Jaha Panguhum 16:​28-30.) Martangiang do ibana tu Jahowa. Didok ibana, “Loas ma au mambalos halak Palistim on.” Dialusi Jahowa do tangiangna i, jala dibahen ma si Simson mulak margogo muse. Ujungna boi ma ibana marhasil mangulahon tugasna i. Jala unggodang do na dipamate ibana di tikki i sian na dipamate ibana sebelumna.

16. Nang pe hea taulahon kesalahan songon si Simson, alai aha do na porlu taulahon?

¹⁶ Nang pe gabe susa si Simson alani kesalahanna, alai dang na gabe so olo be ibana mangulahon tugas sian Jahowa. Songon si Simson, olo do ra hea taulahon na sala. Gabe dipissang hita manang dang dilehon be tanggung jawab tu hita. Molo songon i, unang ma gabe dang olo be hita mangulahon lomo ni roha ni Jahowa. Taingot ma rade do Jahowa manalpuhon kesalahanta. (Ps. 103:​8-10) Nang pe hea taulahon kesalahan, alai olo do Jahowa mangalehon gogo tu hita songon na dibahen tu si Simson.

17-18. Aha do na boi diparsiajari hamu sian pengalaman ni si Michael? (Ida gambar.)

¹⁷ Taparrohahon ma pengalaman ni donganta na poso na margoar si Michael. Godang do na diulahon ibana di huria, gabe parhobas dohot perintis biasa. Alai hea do dibahen ibana kesalahan, alani i gabe dang dilehon be tu ibana tanggung jawab di huria. Didok si Michael, “Mulana massai godang do na boi huulahon tu Jahowa. Alai toppu do mago i sude. Lungun hian do rohakku, alana dang adong be na boi huulahon tu Jahowa. Huhilala hira na  ditadikkon Jahowa do au. Jala gabe sukkun-sukkun do rohakku, boi do denggan muse hubungakku tu Jahowa songon na uju i, manang boi do dapottu muse tanggung jawab songon najolo i.”

¹⁸ Alai toktong do si Michael manomba Jahowa. Didok ibana, “Berupaya do au padenggatton hubungakku tu Jahowa. Taratur do au martangiang, marsiajar Bibel, jala mangarimangi i.” Ujungna dapot ni si Michael ma muse tanggung jawabna di huria. Saonari gabe sintua do ibana dohot perintis biasa. Didok ibana, “Godang do dapottu bantuan, tarlumobi sian akka sintua. Gabe husadari ma na holong dope roha ni Jahowa tu au. Boi do dapottu muse tanggung jawabhi jala nga ias be panggora ni rohakku. Sian on marsiajar do au rade do Jahowa manalpuhon kesalahan ni halak na olo bertobat sian nasa rohana.” Pos ma rohatta nang pe hea tabahen kesalahan, alai molo tapadenggan pangalahotta jala taandalhon Jahowa, pasti pasu-pasuonna do hita.—Ps. 86:5; Poda 28:13.

19. Boasa gabe dipatogu rohamuna alani teladan ni si Simson?

¹⁹ Di artikel on, nungnga tabahas akka na masa di ngolu ni si Simson. Jolma na so sempurna do ibana. Hea do ibana mambahen keputusan na sala ala holong rohana tu si Delila. Nang pe songon i, toktong do ibana manomba Jahowa. Jala toktong do si Simson dipakke Jahowa lao mangulahon lomo ni rohana. Dang holan i, dipakke Jahowa do si Simson marhite cara na luar biasa. Disuru Jahowa do asa disurat goarna di Bibel. Ibana ma sada sian akka halak na togu haporseaonna na disurat di Heber bindu 11. Dipatogu do rohatta ala taboto Debata na tasomba olo mangalehon gogo tu hita, tarlumobi tikki gale hita. Songon si Simson tapangido ma tu Jahowa, “Ingot ma au. Bahen ma au gogo.”—Pangh. 16:28.