1. Tugas aha do na dilehon Jahowa tu si Petrus sebelum mate ibana?

 SETIA do Apostel Petrus manomba Jahowa saleleng martaon-taon. Rap do ibana mandongani Jesus tikki marbarita. Mulai do ibana marbarita tu akka halak na so Jahudi jala dukkon i gabe anggota punguan na mangaradoti do ibana. Tikki diboto si Petrus na lao mate nama ibana, dilehon Jahowa do muse tugas tu ibana. Hira-hira taon 62-64 M, dipakke Jahowa do ibana lao mambahen dua surat na gabe bagian ni Bibel, i ma bukku 1 dohot 2 Petrus. Harap do roha ni si Petrus dung mate ibana annon, dua suratna i boi mangurupi akka donganna sahaporseaon.—2 Ptr. 1:​12-15.

2. Boasa surat na dibahen si Petrus massai pas tu halak Kristen di tikki i?

² Tikki disuratton si Petrus dua suratna i, marragam do sitaonon na diadopi akka donganna. (1 Ptr. 1:6) Misalna, adong do halak na berupaya mangajarhon ajaran na so sittong jala marpangalaho na so denggan di huria. (2 Ptr. 2:​1, 2, 14) Asing ni i muse, susa do halak Kristen na tinggal di Jerusalem ala naeng ro halak Rom manghancurhon kota ni nasida dohot bagas joro. Didok si Petrus do tikki i “ujung ni saluhutna”. (1 Ptr. 4:7) Jadi surat ni si Petrus i boi mangurupi halak Kristen asa toktong setia nang pe nasida mangadopi sitaonon jala paradehon nasida lao mangadopi hasusaan na naeng ro. b

3. Boasa ikkon taparsiajari akka surat ni si Petrus?

³ Nang pe surat ni si Petrus i ditujuhon tu halak Kristen di abad na parjolo, alai dibahen Jahowa do asa suratna i gabe bagian ni Bibel. Jadi hita pe boi do mandapot manfaat sian akka suratna i. (Rom 15:4) Godang do halak saonari on na marpangalaho na so denggan, alani i gabe maol ma hita manomba Jahowa. Asing ni i, satokkin nai lao masa ma hasusaan bolon,  na upparah sian kehancuran ni Jerusalem dohot bagas joro. Godang do sipasingot na boi tadapot di dua surat ni si Petrus i. On boi mangurupi hita asa torus mangingot ari ni Jahowa, asa unang mabiar tu jolma, jala asa toktong marsihaholongan. Asing ni i muse, suratna i boi do mangurupi akka sintua asa marhasil mandalatton tugas ni nasida lao patoguhon akka dongan.

4. Songon na dipaboa di 2 Petrus 3:​3, 4, aha do na boi mambahen ganggu rohatta?

⁴ Saonari on godang do halak na so porsea tu na didok Bibel taringot ari na naeng ro. Godang do halak na mangarehei hita ala sai tadokkon satokkin nai ro nama ari ni Jahowa i. Adong muse na mandok dang na lao masa i. (Jaha 2 Petrus 3:​3, 4.) Olo do tabege hata sisongon i sian akka halak na tajuppangi tikki marbarita, sian dongan sakarejotta, manang keluargatta. Jala boi do gabe ganggu rohatta alani i. Alai dipaboa si Petrus do sipaingot na boi mangurupi hita.

5. Aha do na porlu taingot asa sabar hita paimahon ari ni Jahowa? (2 Petrus 3:​8, 9)

⁵ Godang do halak na makkilala songon na lambat do ari ni Jahowa i. Alai sipasingot ni si Petrus boi mangurupi hita asa toktong mangingot asing do cara ni Jahowa mangida tikki sian cara ni jolma. (Jaha 2 Petrus 3:​8, 9.) Saribu taon di jolma dos songon sadari do i di Jahowa. Sabar do Jahowa, dang lomo rohana diripasson manang ise pe. Jadi tikki ro ari ni Jahowa i, hancurhononna do sude pamarettaon di portibi on. Sada hasangapon do di hita mangalehon tikkitta lao marbarita tu sude halak.

6. Songon dia do asa toktong ‘taingot ari ni Jahowa’ i? (2 Petrus 3:​11, 12)

⁶ Dijujui si Petrus do hita asa “sai mangingot” haroro ni ari ni Jahowa. (Jaha 2 Petrus 3:​11, 12.) Carana, tarimangi ma ganup ari akka pasu-pasu na lao jalootta di tano na imbaru. Bayakkon ma dirimuna boi manghirup udara na ias, mangallang sipanganon na sehat, jala pajuppang muse dohot akka halak na dihaholongi hamu naung dipahehe. Asing ni i, bayakkon ma lao dipahehe do annon akka halak na mate marratus taon naung salpu, jala diajari hamu nasida taringot akka surirang di Bibel naung saut. Molo dibayakkon hamu on, boi do i mangurupi hamu asa sabar paimahon ari ni Jahowa, jala paposson rohamuna nungnga jonok be tikkina. Molo ‘nungnga taboto’ songon dia masa depanta, gabe dang dililuhon ajaran na so sittong be hita.—2 Ptr. 3:17.

7. Aha do akibatna molo mabiar hita tu jolma?

⁷ Ala taboto satokkin nai nama ro ari ni Jahowa i, tottu lomo do rohatta paboahon barita na uli tu halak na asing. Alai olo do sipata gabe dang saut tapaboa barita na uli i ala mabiar tu jolma. On ma na masa tu si Petrus. Di borngin andorang so mate Jesus, mabiar do si Petrus mangakkui na sisean ni Jesus do ibana. Jala mulak-ulak do ibana mandok dang ditanda ibana Jesus. (Mat. 26:​69-75) Nang pe songon i, marhasil do si Petrus mangatasi biar ni rohana i jala di pudian ni ari didok ibana do di suratna, “Unang ma habiari hamu manang aha na mambahen halak mabiar. Jala unang ma ganggu rohamuna.” (1 Ptr. 3:14) Hata ni si Petrus on paposson rohatta na boi do hita mangatasi biar ni rohatta tu jolma.

8. Aha do na boi mangurupi hita mangatasi biar ni rohatta tu jolma? (1 Petrus 3:15)

⁸ Aha do na boi mangurupi hita mangatasi biar ni rohatta tu jolma? Didok si Petrus, “Pos ma rohamuna Kristus i do Tuan jala badia do ibana.” (Jaha 1 Petrus 3:15.) Molo mabiar hamu marbarita na uli, rimangi ma huaso ni  Jesus Kristus Rajatta dohot akka na diulahon ibana saonari. Bayakkon ma ibana mamaretta di surgo, jala marjuta suru-suruan di sakalilingna. Ingot ma muse hata ni Jesus na mandok, “Nungnga dipasahat tu au saluhut huaso na di banua ginjang dohot na di tano on.” Dung i didok ibana muse, “Sai na donganakku do hamu sahat tu panutup ni jaman on.” (Mat. 28:​18-20) Jala dijujui si Petrus do hita asa sai “rade” paboahon haporseaotta. Alani i, olo do hamu marbarita di tempat karejomuna, di sikkola, manang di inganan na asing? Pikkirhon hian ma andigan tikki na pas di hamu mangulahon i, jala persiappon ma na lao sidokkononmuna. Martangiang ma hamu tu Jahowa mangido habaranion, jala pos ma rohamuna pasti urupan ni Jahowa do hamu mangatasi biar ni rohamuna tu jolma.—Ul. 4:29.

9. Nandigan do si Petrus dang patuduhon holong? (Ida gambar.)

⁹ Ikkon torus do si Petrus marsiajar songon dia carana asa boi patuduhon holong. Hea do dibege ibana Jesus mandok, “Hulehon ma tu hamu paretta na imbaru, marsihaholongan ma hamu. Ikkon dihaholongi hamu do akka donganmuna na asing dos songon carakku makkaholongi hamu.” (Joh. 13:34) Alai di pudian ni ari dang olo si Petrus rap mangan dohot akka dongan na so halak Jahudi, ala mabiar  ibana tu akka dongan na halak Jahudi. Gabe didok si Paulus ma ibana halak na “munafik”. (Gal. 2:​11-14) Dijalo si Petrus do sipasingot sian si Paulus i jala marsiajar do ibana sian kesalahanna i. Di dua suratna i, didok ibana do asa unang holan di bagas rohatta tahaholongi akka donganta. Alai ikkon tapatudu do holong ni rohatta i.

10. Molo ‘tahaholongi akka dongan sian ias ni rohatta’, hasittongan ni Bibel na dia do na taoloi? Patorang ma. (1 Petrus 1:22)

¹⁰ Di suratna i, didok si Petrus ikkon sian “ias ni roha” do hita makkaholongi akka dongan. (Jaha 1 Petrus 1:22.) Molo tapatudu holong na songon i, on patuduhon na ‘taoloi do hasittongan’ i. Hasittongan na dipaboa si Petrus disi, termasuk ma i ajaran ni Bibel na mandok dang “marimbar jolma di jolo ni Debata”. (Ul. 10:​34, 35) Molo holan tu piga-piga dongan di huria do holong rohatta, dang boi tadok na taoloi paretta ni Jesus asa makkaholongi akka dongan. Olo do ra adong dongan kompakta di huria. Jesus pe songon i do, adong dongan kompakna. (Joh. 13:23; 20:2) Alai dipaingot si Petrus do hita asa berupaya “makkaholongi sude dongan sahaporseaon”, alana keluargatta do tong nasida.—1 Ptr. 2:17.

11. Aha do lapatanna makkaholongi “sian nasa roha”?

¹¹ Didok si Petrus do muse tu hita, “Marsihaholongan ma hamu sian nasa roha.” Hata “sian nasa roha” di ayat on maksudna, toktong makkaholongi sasahalak nang pe maol mangulahon i. Misalna aha do na diulahon hamu molo adong na mambahen haccit rohamuna? Biasana dang olo hita patuduhon holong tu ibana. Gariada pittor naeng tabalos do songon na dibahenna i tu hita. Alai marsiajar do si Petrus sian Jesus, dang lomo roha ni Debata molo songon i akka naposona. (Joh. 18:​10, 11) Disurat si Petrus do muse, “Unang ma balos hamu na jahat dohot na jahat manang issak-issak dohot issak-issak. Alai balos hamu ma na jahat dohot na denggan.” (1 Ptr. 3:9) Jadi molo sian nasa roha do tahaholongi akka dongan, pasti burju jala asi do rohatta tu halak na mambahen haccit rohatta.

12. (a) Molo tahaholongi akka dongan sian nasa roha, aha do muse na ikkon taulahon? (b) Songon na dipaboa di video Tajaga ma Asa Toktong Hita Marsada, aha do na porlu taupayahon?

¹² Di surat ni si Petrus na parjolo didok ibana do, “Marsitutu ma hamu marsihaholongan.” Holong sisongon i boi do manutup godang hasalaan. (1 Ptr. 4:8) Mungkin hea do diingot si Petrus na diajarhon Jesus tu ibana piga-piga taon sebelumna taringot manalpuhon hasalaan. Di tikki i, olo do ra didok roha ni si Petrus nungnga gabe halak na burju ibana ala olo ibana manalpuhon hasalaan ni donganna “sappe pitu hali”. Alai diajarhon Jesus do tu ibana asa manalpuhon hasalaan sappe “77 hali”, lapatanna dang adong batasna. Dang holan tu si Petrus sipasingot on, alai dohot do tu hita. (Mat. 18:​21, 22) Molo maol hamu mangulahon i, unang ma metmet rohamuna. Sude do hita dang sempurna, alani i sipata maol do hita manalpuhon hasalaan ni donganta. Alai saonari na paling penting, berupaya ma hamu manalpuhon hasalaan ni donganmuna jala mardame dohot ibana. c

13. Aha do na mambahen maol di akka sintua mangalehon tikki lao patoguhon akka dongan?

¹³ Dung hehe Jesus didok ibana do tu si Petrus, “Parmahani ma anak ni biru-birukki.” Tottu dang lupa si Petrus tu hata ni Jesus i. (Joh. 21:16) Molo sintua hamu, pasti diboto hamu na marlakku do tong hata ni Jesus i tu hamu. Olo do ra maol di sahalak sintua mangalului tikki asa boi mandalatton  tanggung jawab na penting on. Molo nungnga berkeluarga sahalak sintua, ikkon diurus ibana do parjolo kebutuhan ni keluargana, ikkon boi do dihilala keluargana na dihaholongi nasida, jala ikkon diurupi ibana do keluargana i asa toktong jonok tu Jahowa. Ikkon gabe sitiruon do muse ibana di ulaon marbarita jala ikkon denggan do diparade ibana akka na lao dipasahat ibana di parpunguan, parpunguan wilayah, dohot parpunguan regional. Adong muse sintua na gabe Panitia Penghubung Rumah Sakit manang mangurupi Departemen Rancang/Bangun Setempat. Massai godang do tanggung jawab ni akka sintua!

14. Aha do na ikkon diingot akka sintua asa rade nasida patoguhon akka dongan? (1 Petrus 5:​1-4)

¹⁴ Didok si Petrus do tu akka sintua, “Parmahani hamu ma biru-biru ni Debata.” (Jaha 1 Petrus 5:​1-4.) Hamu akka sintua, diboto hami do na holong rohamuna tu akka dongan jala lomo do rohamuna patoguhon nasida. Alai sipata olo do dang sanggup dihilala hamu mangulahon i, ala nga palojahu manang ala massai godang ulaonmuna. Aha ma na boi diulahon hamu? Paboa ma sude perasaanmuna i tu Jahowa jala paboa ma na lomo do rohamuna mangurupi akka dongan. Disurat si Petrus do muse, “Molo diurupi ibana donganna na asing, diulahon ma i mangasahon gogo ni Debata.” (1 Ptr. 4:11) Bisa jadi godang do sitaonon ni akka donganmuna na so boi dipasae di tikkitta saonari. Alai ingot ma, boi do Jesus mangurupi nasida saonari dohot di tano na imbaru. Jala undenggan do cara ni Jesus Kristus “parmahan na sumurung” i mangurupi nasida sian caramuna sandiri. Jadi na dipangido Debata sian hamu akka sintua, i ma asa makkaholongi akka dongan, mamparmahani nasida, jala gabe “sitiruon” tu nasida.

15. Songon dia do sahalak sintua patoguhon akka donganna? (Ida gambar.)

¹⁵ Taida ma pengalaman ni si William naung leleng gabe sintua. Diattusi ibana do massai penting patoguhon akka dongan. Tikki mulai pandemi COVID-19, diupayahon ibana dohot akka sintua na asing do lao manghubungi ganup penyiar di kelompok dinas ni nasida ganup minggu. Didok ibana, “Godang do akka donganta na sahalakna di jabu, jala alani pandemi gabe mura nasida marpikkiran negatif. Tikki adong masalah ni akka donganta i, manat do donganta si William manangihon  nasida asa diboto ibana aha na dipikkirhon akka donganta i jala songon dia lao mangurupi nasida. Dung i dilului ibana ma publikasi manang video sian situs webta lao mangurupi akka donganta i. Didok si William, “Dibandingkon najolo, penting hian do saonari patoguhon akka donganta. Haru tu akka halak na so mananda Jahowa, berupaya do hita mangurupi nasida. Tarlumobi ma akka donganta. Ikkon taurupi do nasida asa toktong di hasittongan.”

16. Boha do caratta mangulahon nasehat sian dua surat ni si Petrus?

¹⁶ Di artikel on nungnga tabahas piga-piga parsiajaran sian dua surat ni si Petrus. Bisa jadi dung mambahas on gabe diboto hamu ma aha na porlu dipadenggan sian dirimuna. Misalna, lomo do rohamuna asa lam jotjot mangarimangi pasu-pasu na lao jaloonmuna di tano na imbaru? Olo do hamu berupaya marbarita di tempat karejo, di sikkola, manang di inganan na asing? Dilului hamu do cara lao patoguhon holong tu akka donganmuna? Jala molo sintua hamu, bertekad do hamu asa lam rade jala semangat patoguhon biru-biru ni Jahowa? Tikki dirimangi hamu sukkun-sukkun i, olo do disadari hamu adong na porlu dipadenggan hamu. Alai unang ma metmet rohamuna. ‘Burju do Tuan i’, jala pasti urupanna do hamu asa gabe lam denggan. (1 Ptr. 2:3) Dipapos si Petrus do hita, ‘Togu-toguon ni Debata do hamu . . . sahat tu ujungna. Patoguonna, pargogoanna, jala pahotonna ma hamu.’—1 Ptr. 5:10.

17. Pasu-pasu aha do na lao jalootta molo dang menyerah hita jala olo hita ditogu-togu Jahowa?

¹⁷ Mulana didok roha ni si Petrus do dang tama ibana rap dohot Jesus. (Luk. 5:8) Alai ala diurupi Jahowa dohot Jesus, gabe marsitutu ma ibana mangihutton Jesus. Dilehon Jahowa ma tu si Petrus “hamuliaon masuk tu Harajaon na saleleng ni lelengna, i ma Harajaon ni Jesus Kristus Tuan jala Sipalua hita”. (2 Ptr. 1:11) Pasu-pasu na luar biasa do on! Hamu pe molo dang menyerah songon si Petrus jala olo hamu ditogu-togu Jahowa, boi do dapotmuna hangoluan saleleng ni lelengna. Pos ma rohamuna ‘dapotmuna do haluaon i alani haporseaon’.—1 Ptr. 1:9.