1. Dung diida si Petrus mukjizat na dibahen Jesus, boha do perasaanna?

 NUNGNGA saborngin manipat si Petrus manjala dekke. Alai dang adong na dapotna. Alani i didok Jesus ma tu ibana, “Boan ma parau on tu inganan na ubbagas jala paturun ma jalamuna disi.” (Luk. 5:4) Sasittongna ragu do si Petrus, boi do dapotna dekke manang na dang. Alai nang pe songon i, diulahon ibana do na diparettahon Jesus. Dukkon i dapot ni si Petrus dohot akka donganna i ma massai godang dekke, sappe naeng maribak ma jala ni nasida. Tikki diboto nasida nungnga dibahen Jesus mukjizat, gabe longang situtu ma roha ni nasida. Alani i didok si Petrus ma, “Lao ma ho sian labbungkon Tuan, ai jolma pardosa do au.” (Luk. 5:​6-9) Didok roha ni si Petrus dang tama ibana rap dohot Jesus.

2. Aha do manfaatna molo taparsiajari teladan ni si Petrus?

² Toho do na didok si Petrus i, “jolma pardosa” do ibana. Dipaboa do di Bibel, sipata disolsoli si Petrus do aha na dihatahon dohot na diulahon ibana. Songon i do tong hamu? Berjuang dope hamu mangatasi hagaleonmuna? Molo songon i do, boi do hamu dipatogu molo diparsiajari hamu teladan ni si Petrus. Boasa tadok songon i? Pikkirhon ma on, sasittongna boi hian do dibahen Jahowa asa unang disurat kesalahan na dibahen si Petrus. Alai dipaboa do i di Bibel asa gabe parsiajaran tu hita. (2 Tim. 3:​16, 17) Molo taparsiajari songon dia si Petrus mangatasi hagaleonna, gabe taboto ma dang diharappon Jahowa hita asa sempurna. Alai lomo do rohana asa berjuang hita mangatasi hagaleonta.

3. Boasa ikkon toktong hita berjuang?

 ³ Boasa ikkon toktong hita berjuang? Molo toktong hita berjuang, boi ma lam tu dengganna hita. Pikkirhon ma contoh on: Sahalak parmusik boi do sappe martaon-taon marlatik asa malo ibana. Saleleng na marlatik i ibana, pasti godang do kesalahan na dibahen ibana. Alai torus do ibana marlatik. Jala nang pe nga malo ibana marmusik, tong do ibana mambahen kesalahan. Nang pe songon i, dang menyerah ibana. Torus do ibana marlatik asa lam tu dengganna. Dos songon i ma, nang pe tahilala nga marhasil hita mangatasi hagaleonta, alai boi do tabahen muse kesalahan. Alai torus do hita berupaya asa lam tu dengganna. Olo do di pudian ni ari tasolsoli aha na tadokkon manang na taulahon. Alai molo dang menyerah hita, pasti diurupi Jahowa do hita asa lam tu dengganna. (1 Ptr. 5:10) Saonari, tabahas ma songon dia si Petrus torus berjuang mangatasi hagaleonna jala songon dia Jesus patuduhon asi ni roha tu ibana. Boi do on mangonjar rohatta asa toktong melayani Jahowa.

4. Songon na disurat di Lukas 5:​5-10, aha do na didok si Petrus taringot dirina? Jala songon dia do Jesus paposson rohana?

⁴ Tikki didok si Petrus “jolma pardosa” ibana, dang dipaboa di Bibel boasa didok ibana songon i, manang kesalahanna na dia na diingot ibana tikki i. (Jaha Lukas 5:​5-10.) Adong do kesalahan serius na dibahen si Petrus. Alani i do ra didok rohana dang tama ibana rap dohot Jesus. Diboto Jesus do boasa si Petrus mabiar. Nang pe songon i, diboto Jesus do tong na boi si Petrus toktong setia. Lambok do Jesus mandok tu si Petrus, “Unang pola mabiar ho.” Balga do pengaruh ni hata ni Jesus i tu si Petrus. Alani i, gabe ditinggalhon si Petrus dohot si Andreas ma ulaon ni nasida, i ma manjala dekke. Jala gabe mangihutton Jesus ma nasida. Dipasu-pasu Jahowa do nasida ala dibahen nasida keputusan sisongon i.—Mrk. 1:​16-18.

5. Aha do pasu-pasu na dapot ni si Petrus ala berjuang ibana mangatasi perasaan negatif?

⁵ Godang do pasu-pasu na dapot ni si Petrus, ala gabe sisean ni Jesus ibana. Boi ma diida ibana Jesus pamaluppon na marsahit, mangusir suru-suruan na jahat, jala pahehehon halak na mate. b (Mat. 8:​14-17; Mrk. 5:​37, 41, 42) Dapot ni si Petrus do muse parnidaan taringot Jesus na lao gabe raja di Harajaon ni Debata. Jala balga do pengaruh ni parnidaan i tu ibana. (Mrk. 9:​1-8; 2 Ptr. 1:​16-18) Autsugari dang gabe sisean ni Jesus ibana, pasti dang boi  dapotna akka pasu-pasu i. Massai las do roha ni si Petrus ala torus ibana berjuang mangatasi perasaan negatifna, boi ma dapotna akka pasu-pasu i!

6. Pittor marhasil do si Petrus mangatasi hagaleonna i? Patorang ma.

⁶ Nang pe nungnga dapot ni si Petrus sude pasu-pasu i, alai ikkon berjuang dope si Petrus mangatasi hagaleonna. Contohna tikki didok Jesus na lao marsitaonon ibana jala mate songon naung disurirangkon, didok si Petrus dang na lao masa i. (Mrk. 8:​31-33) Marulak-ulak do muse si Petrus dohot akka apostel na asing marsoal taringot ise na ussangap sian nasida. (Mrk. 9:​33, 34) Asing ni i muse di borngin andorang so mate Jesus, disittakkon si Petrus do pinggol ni sahalak bawa. (Joh. 18:10) Laos di borngin i muse tolu hali ma disoadahon si Petrus Jesus, ala mabiar ibana tu akka halak. (Mrk. 14:​66-72) Pasti hancur hian do perasaan ni si Petrus di tikki i.—Mat. 26:75.

7. Kesempatan aha do na dilehon tu si Petrus dung hehe Jesus?

⁷ Dang ditinggalhon Jesus si Petrus na marmetmet ni roha i. Dung hehe Jesus, dilehon Jesus do muse kesempatan tu si Petrus lao mambuktihon na holong do roha ni si Petrus tu ibana. Jala dipangido Jesus do si Petrus asa gabe parmahan tu akka biru-biruna. (Joh. 21:​15-17) Pittor dioloi si Petrus do i. Buktina, di Jerusalem do ibana tikki ari Pentakosta jala ibana ma sada sian akka halak na dimiahi tondi parbadia.

8. Aha do kesalahan na dibahen si Petrus tikki di Antiokia?

⁸ Nang pe si Petrus nungnga gabe halak na miniahan, alai ikkon berjuang dope ibana mangatasi hagaleonna i. Di taon 36 M, disuru Debata ma ibana lao manjuppangi si Kornelius na so halak Jahudi. Di tikki i ma dimiahi Debata si Kornelius. Sian on takkas ma tarida, ‘na so marimbar jolma di jolo ni Debata’ jala na boi do halak na so Jahudi gabe bagian ni huria Kristen. (Ul. 10:​34, 44, 45) Dukkon i, rap mangan ma si Petrus dohot halak na so Jahudi. Hape dang hea diulahon ibana on sebelumna. (Gal. 2:12) Didok roha ni piga-piga halak Jahudi, dang boi nasida rap mangan dohot halak na so Jahudi. Tikki di Antiokia si Petrus, adong dope akka dongan na di huria i na songon i pandanganna. Alani i gabe dang olo be mangan si Petrus dohot akka dongan na so halak Jahudi, ala mabiar ibana tu akka halak Jahudi na di huria i. Diida si Paulus do na munafik si Petrus disi jala dipasingot do ibana di jolo ni godang halak. (Gal. 2:​13, 14) Nang pe mambahen kesalahan si Petrus, alai dang menyerah ibana mangatasi hagaleonna i. Aha do na mangurupi ibana?

9. Sian dia taboto na setia si Petrus? (Johannes 6:​68, 69)

⁹ Setia do si Petrus. Dang diloas ibana manang aha pe mambahen ibana gabe maninggalhon Jesus. Contohna, hea ma sada tikki adong hata ni Jesus na so diattusi akka siseanna. (Jaha Johannes 6:​68, 69.) Godang do akka sisean na maninggalhon Jesus ala dang olo nasida mangalului lapatan ni hata ni Jesus i. Alai dang songon i si Petrus. Setia do ibana. Gariada didok ibana do, holan hata ni Jesus do “na parohon hangoluan na saleleng ni lelengna”.

10. Songon dia do Jesus patuduhon na pos rohana tu si Petrus? (Ida gambar.)

¹⁰ Dang ditinggalhon Jesus si Petrus. Di borngin andorang so mate ibana, diboto Jesus do na lao ditinggalhon si Petrus dohot akka apostelna do ibana. Alai dipapos Jesus do roha ni si Petrus na lao mulak do muse si Petrus tu ibana jala toktong setia. (Luk. 22:​31, 32) Asing ni i, diboto Jesus do “anggo roha i naeng do nian mangulahon na sittong, alai gale do daging i”. (Mrk. 14:38) Jadi nang pe nungnga  disoadahon si Petrus ibana, alai dang olo Jesus maninggalhon si Petrus. Dung hehe Jesus, dipatuduhon ibana do dirina tu si Petrus tikki sahalakna. (Mrk. 16:7; Luk. 24:34; 1 Kor. 15:5) Pasti dipatogu do roha ni si Petrus ala dibahen Jesus songon i!

11. Songon dia do Jesus paposson roha ni si Petrus?

¹¹ Dipapos Jesus do roha ni si Petrus na lao urupan ni Jahowa do ibana. Dung hehe Jesus, diparade ibana do akka na porlu tu si Petrus dohot akka apostelna na asing. Dibahen ibana do mukjizat, gabe godang ma dekke dapot ni nasida. (Joh. 21:​4-6) Pasti gabe dipatogu do si Petrus alani mukjizat on. Gabe pos ma roha ni si Petrus pasti paradeon ni Jahowa do sude kebutuhanna. Olo do ra diingot ibana hata ni Jesus na mandok, lehonon ni Jahowa do sude na porlu tu akka halak na mangalului Harajaon ni Debata. (Mat. 6:33) Alani i, dibahen si Petrus ma ulaon marbarita gabe na uppetting di ngoluna dang ulaon manjala dekke. Barani do ibana marbarita di ari Pentakosta 33 M. Jala adong ma marribu halak na manjalo barita na uli. (Ul. 2:​14, 37-41) Dung i, diurupi ibana muse halak Samaria dohot halak na so Jahudi gabe halak Kristen. (Ul. 8:​14-17; 10:​44-48) Takkas ma dipakke Jahowa do si Petrus lao mangurupi akka halak sian nasa bangso gabe bagian ni huria Kristen.

12. Aha dope na porlu taingot molo berjuang dope hita mangatasi hagaleonta?

¹² Diurupi Jahowa do hita asa unang menyerah. Memang dang sai mura mangatasi hagaleonta i. Tarlumobi molo nungnga martaon-taon hita mangatasi i. Sipata, olo do upparah hagaleonta i sian hagaleon na diadopi si Petrus. Alai diurupi Jahowa do hita asa unang menyerah. (Ps. 94:​17-19) Taida ma jolo pengalaman ni sahalak donganta bawa. Homoseksual hian do ibana saleleng martaon-taon andorang so marsiajar Bibel. Alai dung marsiajar Bibel ibana, muba do ibana. Nang pe songon i, olo do sipata muncul keinginanna na sala i. Alai dang menyerah ibana. Aha ma na mangurupi ibana asa unang menyerah? Didok ibana, “Dilehon Jahowa do gogo tu au. Sian on au marsiajar, boi do hita toktong mangihutton standar ni Jahowa. Dipakke Jahowa do au lao mangulahon lomo ni rohana. Jala nang pe dang sempurna au, sai dipargogoi Ibana do au.”

13. Songon na disurat di Ulaon ni Apostel 4:​13, 29, 31, boha do caratta maniru si Petrus? (Ida gambar.)

¹³ Adong piga-piga hali si Petrus mambahen  kesalahan na balga, ala mabiar ibana tu jolma. Alai dung martangiang si Petrus, gabe boi ma ibana barani. (Jaha Ulaon ni Apostel 4:​13, 29, 31.) Hita pe boi do gabe barani. Taida ma pengalaman ni si Horst donganta na poso na mangolu tikki mamaretta Nazi di Jerman. Di tikki i, disuru do akka halak mandokkon, “Heil Hitler!” na lapatanna, “Paluaon ni si Hitler do hita!” Nang pe diboto si Horst sala i, alai ala mabiar ibana tu guruna dohot tu dongan sasikkolana, gabe dohot ma ibana mandokkon i. Nang pe dibahen si Horst songon i, dang gabe dimuruki natua-tuana ibana. Gariada martangiang do natua-tuana rap dohot ibana asa dibahen Jahowa si Horst gabe barani. Alani bantuan ni natua-tuana jala diandalhon si Horst Jahowa, ujungna boi ma si Horst tetap setia. Didok ibana, “Dang hea ditinggalhon Jahowa au.” c

14. Songon dia do akka sintua mangurupi akka dongan na marmetmet ni roha?

¹⁴ Sai diurupi Jahowa dohot Jesus do hita. Taida ma buktina. Taingot ma muse contoh ni si Petrus. Dung disoadahon si Petrus Jesus, ikkon dipillit ibana do naeng toktong gabe sisean ni Jesus manang menyerah. Alai ditangiakkon Jesus do tu Jahowa asa unang mago haporseaon ni si Petrus. Dipaboa Jesus do tangiangna i tu si Petrus. Jala dipapos do rohana, na lao dipakke do ibana lao patoguhon akka apostel na asing. (Luk. 22:​31, 32) Pasti dipatogu do roha ni si Petrus alani hata ni Jesus i. Sarupa songon i ma, tikki naeng mambahen keputusan na penting hita, dipakke Jahowa do akka sintua lao paposson rohatta na boi do hita toktong setia. (Eps. 4:​8, 11) On ma na diulahon sahalak donganta sintua na margoar si Paul. Disukkun ibana do akka dongan na marmetmet ni roha, aha do na mambahen nasida najolo olo mananda hasittongan. Dipapos ibana  do muse roha ni nasida, na dihaholongi Jahowa do nasida jala dang na lao tinggalhononna nasida. Didok ibana do muse, “Godang do huida akka dongan na toktong setia ala diurupi Jahowa nang pe hea nasida marmetmet ni roha.”

15. Songon dia do pengalaman ni si Petrus dohot si Horst patuduhon na tutu do hata na disurat di Mateus 6:33 i?

¹⁵ Dilehon Jahowa do sude kebutuhan ni si Petrus dohot akka apostel na asing. Dos songon i ma, pasti lehonon ni Jahowa do akka na tahaporluhon molo tabahen Ibana gabe na uppetting di ngolutta. (Mat. 6:33) On ma na dihilala donganta si Horst na dipaboa nakkin. Tikki masa Perang Dunia II, lomo do rohana naeng merintis. Alai ala massai pogos ibana, ragu do ibana boi dapotna hepeng asa boi toktong merintis. Attong aha do na diulahon ibana? Diuji ibana ma Jahowa. Marbarita ma ibana saleleng saminggu tikki kunjungan pengawas wilayah. Di ujung ni minggu i tarsonggot do ibana ala dijalakkon pengawas wilayah do tu ibana amplop na marisi hepeng. Cukkup do hape hepeng i asa boi ibana merintis saleleng piga-piga bulan. Alani hadiah i, gabe pos ma roha ni si Horst, sai urupan ni Jahowa do ibana. Mulai sian i, dibahen ibana ma Harajaon ni Debata gabe na paling penting di ngoluna.—Mal. 3:10.

16. Boasa porlu taparsiajari pengalaman ni si Petrus dohot akka na disurat ibana?

¹⁶ Pasti las hian do roha ni si Petrus ala dang dioloi Jesus pangidoanna asa ditinggalhon ibana. Toktong do dilatik Jesus si Petrus asa gabe apostel na setia jala asa gabe sitiruon tu halak Kristen. Massai godang do parsiajaran na boi tadapot sian pengalaman ni si Petrus on. Dibahen ibana do dua surat tu akka huria di abad na parjolo. Jala akka surat i gabe bagian ni Bibel ma saonari. Di artikel na mangihut, tabahas ma piga-piga akka nasehat i jala songon dia hita mangulahon i di tikkitta saonari.