Solhot do si Bebe tu bapana. Godang do keluarga sian ias ni rohana mandok, ”Diboto Debata do na dumenggan”, alai di roha ni si Bebe, i ndang mangapuli gariada mambahen hansit ni roha. Sai marulakulak do didok ibana di rohana, ”Ndang i na dumenggan.” Tangkas ma na marhabot ni roha dope ibana. Tarida ma on sian sada buku na disurat ibana pigapiga taon dungkon i.

Songon si Bebe, dihaporluhon do godang tingki di sasahalak asa ndang marhabot ni roha be. Tarlumobi tingki mangadopi hamatean ni sasahalak na tahaholongi. Di Bibel, digombarhon do hamatean songon ”musu na parpudi”. (1 Korint 15:26) Hamamate ni halak na tahaholongi olo do ro di tingki na so panagaman jala ndang margogo hita mangambati. Ndang adong na boi malua sian hamatean. Alani i, ndang songgot roha molo maol sasahalak mangadopi hamatean ni halak na dihaholongina dohot pangkorhonna.

Sungkunsungkun do ra rohamuna, ’Sadia leleng do tingki na dihaporluhon laho marhabot ni roha? Songon dia do mangadopi on? Songon dia do ahu mangapul roha ni na marhabot ni roha? Adong do pangkirimon tu halak na mate?’